من هجر صاحبه

[مشكلتي]

السلام عليكم

انا مشكلتي بسيطة فقط محتاجة توجيه

كانت عندي صديقة اسوء ما فيها الغضب وحتى لو غالطة بليار بالميه متقولش سمحيلي او عذرا او اي حاجة تبرر بيها بحكم عندها النيف ودايما انا الي نروح ونحاول منخليش الصداقة هاذي تنتهي

ولكن دائما كرامتها عزيزة وحالات الغضب والجنون يخبطوها تهز روحها وتنتظر العباد يراضيوها على خطئها عليهم
فقررت اني نبعد عليها افضل لي نفسيا

اخر موقف كان بسبب كلمة الي هي ( جلست وراها فقلت للي معايا اساليها عن ترجمة الكلمة هاذي الطفلة قالتلي علاش متسقسيهاش انتي فقلتلها خفت لتحمق عليها سمعتني صاحبتي ودارتلي من الحبه قبه وبقات شاده نيفها بالرغم من محاولتي للصلح) للغدوة جات جايه وكانت غضبانة والجنون يخبطوا فيها لحقتها وقاعده نلطف في الجو لقيتها شاده نيفها على ماكان والوا والهدرة بالمزية تراجعت وخليتها ولحد الساعه منهدر معاها ولا تهدر معايا

وقبل يومين قالتلي امي انه ميجوزش منهدرش معاها ع الاقل السلام
وبالفعل البارح لقيتها جنب وحده سلمت عليهم في زوج
اليوم لقيتها ووحده قلت السلام عليكم يا البنات وصباح الخير

والمشكله هاز نيفها وبيني وبينكم السلام استخسرته فيها وعفيتها بزااااااف ونفسي طابت منها
سؤالي :
فهل نبقى دائما كل ما نلقاها نسلم عليها ولا يكفي لاني درت الي عليا
ويكفي ان الامور من جهتي صافيه فقط الاختلاف مبقيناش صحابات وفرات
كيفاش يا الاخوة باش مندخلش في اثم من هجر اخاه بسببها وفي نفس الوقت نحفظ نفسي وكرامتي من الاهانه

[تصفية وتربية]

قال -صلى الله عليه وسلم-: (لا يحل لرجل أن يهجر أخاه فوق ثلاث ليال يلتقيان فيعرض هذا ويعرض هذا وخيرهما الذي يبدأ بالسلام)
كبري عقلك أختي وادفعي بالتي هي أحسن، كوني أنتِ من الذين قال عنهما -صلى الله عليه وسلم-: (وخيرهُما الذي يبدأ بالسّلام)، إن كانت تأتِيكِ مشاكل بسببها فابتعدي عنها لكن لا تُقاطعيها
ونصيحة: اِبحثِي دومًا عن صُحبة صالِحة تُعينكِ على أمور دِينك، وابعتدي عن صُحبة السّوء.
وبارك الله في والدتكِ على تنبيهها إيّاكِ

[*نآدرة~]

كان عندي صاحبة من هاذ النوع مسكينة،خسرتنا كاملين وبقات وحدها
للأسف الشديد عيينا نحاولو فيها وعيينا نراضوها بالصح هي ما فهمتش روحها وزادت في عنادها،ربي يصلح الاحوال ياختي انت درتي لي عليك خليلها الوقت تفكر وأكيد ترجع ليك
عجبوني هاذ الأبيات من الشعر قرايهم
إصبـــر علـــى حلـــو الزمـــان و مـــرّه
و اعلـــم بـــأن اللـــه بالـــغ أمـــره ..

لا تســـــتغـــب فتستغـــاب ، و ربّمـــا
مـن قـــال شيئـــاً ، قيــل فيـــه بمثلـــه

و تجنـــب الفحشـــــــاء لا تنطـــق بهـــا
مـــا دمـــت فـــي جـــدّ الكـــلام و هزلـــه

و إذا الصديـــق أســـى عليـــك بجهلـــه
فاصفـــح لأجـــل الـــود ليس لأجـــلـــه

ربي يهدي ما خلق

[knives66]

هني راسك منها وسلام والله وجع راس

[حبيبة زوجها]

هاد النوع من الناس صعيب يتعايش معاهم وتقعدي ديما تخافي منهم ......انت درت لي عليك ميهمكش
ربي يهديها