سلسلة حلويات مميزة .. موضوع يخص المبتدئات و حتّى المحترفات

[عماني نور]

أتمنى أن تكونوا جميعا بصحة و عافية ،،

معاكم " نور عماني " أختكم من تيبازة ،، ممبدئة في الحلويات بصح شاطرة و تحب تتعلم (( وليت حوحو )) ،، المهم ....
أنا صح كنت مبتدئة بصح ظوكا كي ولاّ ينجحلي القاطو و الناس كاامل تشكرو خلوني نعلق زوج نجوم و نولي زعما زعما نفيدكم بخبراتي ههههههه

كاين في المنتدى بزاااف مبتدئات " كيما كنت انا احم احم ،، و اكدولي على كنت " و مازلت حابة نتعلم منكم و مستعدة نمشي حسب نصائحكم و توجيهاتكم ....

alr أختي المبتدئة ... حبيبتي الي ع العام و انتِ تتفرجي واش رايك تنضمي لينا و تبداي اتطبقي وصفات مميزة و لذيذة ،، و الأهم أنها مضمونة النجاح

و أكيد أنتِ تعرفي وصفات مميزة ،، مام تكون معروفة و كااامل حاطينها فالمنتدى ،، لكن لكل واحدة فينا سرها الخاص و لمستها المميزة ،، و ذوقها الي تختلف بيه عن الأخريات

هذااا الي ماذابينا نعرفوه ...

يعني ادخلي هنا ،، و حطيلنا وصفاتك المميزة ،، و قوليلنا أسرار نجاح الحلوى تاعك ... و حتى أسرار فشلك الذرييييع في بعض الوصفات ،، باش كلنا نتعلمو و مانعاودوش نفس الأخطاء

عن نفسي عندي حلويات نحبها بزاااف و نتميز فيها ،، يعني ماشي كيما المحترفات الي عندنا فالمنتدى الله يبارك عليهم ،، بصح نقدر نفيد شويا خصوصا أني بديت نتعلم الحلويات في معهد تكوين و راني ندي نصائح صدقوني لا تقدر بمثمن رايحة نقولهالكم بالوحدة ان شاء الله

و ظوكا باش مانطولش عليكم ،، نظن الموضوع واضح ،، يتطلب وصفات سهلة ،، لذيذة ،، مضمونة النجاح ،، مرفوقة بأسرار النجاح ، و أسرار الفشل ،، و الي عندها اي معلومة مفيدة تشاركنا بيها " مرحبا بالجميع "

تابعونا ~

مازال بجعبتنا الكثييييييير

[عماني نور]

قاطو " الأورسان " ،، قاطو بالشوكولا ،، سهل جدا ،، و راااااااااااااااائع الذوق ..... و أكيييييد مضمون النجاح ...

المقادير :

125 غ مارغرين " الأفضل أيليو أو فلوريال "

80 غ سكر ناعم ،، و الي تحبو حلو أكثر تدير 100 غ

2 بيض

150 غ مايزينة

1 ملعقة كبيرة كاكاو

1 خميرة كيميائية

فرينة

شوكولا للتزيين ،، انا نفضل شوكولاطة سوداء " أومباسادوغ " لأنها تعطي ذوق و لا أرووووع

و للتزين ،، أنتِ و ذوقك ،، ممكن أي نوع مكسرات ،، فارميسال الشوكولا أو حتى الملونة ،، و ممكن أيضا بالشوكولاطة البيضاء أو الخليط الأبيض تع أم رامي (( مكوناته : 4 ملاعق كبيرة سكر ناعم ،، ملعقة كبيرة زيت ،، ملعقة صغيرة نشاء ،، ملون ابيض ،، ملعقة كبيرة إلى ملعقتين حليب سائل ))


خلطي المارغرين بيدك ملييييييييح أومبعد زيدي السكر الناعم خلطي ملييييح حتى يولي كيما الكريمة ،، زيدي البيض و خلطي ،، أومبعد امزجي الكاكاو و المايزينة مع بعض و بداي تضيفي فيهم بالشوية و تخلطي ،، أومبعد زيدي الفرينة و الخميرة الكيميائية و خلطي بلا ما تعجني

مالازمش العجين يكون يابس ،، يعني زيدي الفرينة حتى تحسي بالعجينة طرات ،، شكلي كرية ،، إذا تشكلت عادي ،، و مالصقتش في يديك " العجينة تكون ناجحة "

ديري كريات صغار أو شكلي حربوش و قطعي على شكل مقروطات ،، أنتِ و ذوقك ،، و حطيهم في صينية مرشوشة بالفرينة

و دخليهم للفرن الي يكون مسخن ديجا بدرجة حرارة 180 ،، لمدة 15 د تقريبا

أنتِ شوفيه بعد 15 دقيقة ،، و مسيه بيدك " بلعقل برك لاخاطرش بزاااف طري و بلخف يتفتت " إذا لقيتيه شد روحو نحيه ،، إذا مازال طري يعني يتضغط كي تمسيه خليه يزيد يطيب

و كي تشوفيه تشقق عااادي ،، هو يطيب هكذاك


خرجيه ،، خليه يرتاح شوية ،، مدة 3 دقائق تقريبا باش تقدري تنحيه ،،

حطيه في علبة أو صينية و خليه حتى يبرد تماما ،،

حضري القاناش تاعك ،، ذوبي الشوكولا مع شوية زبدة " قطعة صغيييرة " و ملعقة كبيرة حليب سائل "

غطسي الحبات من الفوق ،، و حطيها ،، بعد ما تكملي الحبة الثانية ،، ذري على الحبة الأولى المكسرات الي راكي مجهزتها للتزيني،، أنا استعملت بيستاش مرحي ،، و كملي .....




كي تنشف الشوكولا تماااامااا ،، حطيها فلي كيسات " و بصحتك " ^^



جربي و ادعيلي

ظوكا نقولك أسرار فشل هاذ الوصفة :

1 - تديري بزاااف فرينة حتى تيبس العجينة .
2 - تستعملي مارغرين لابال ،، تخرجلك غريبية ماشي أورسان لأنها مزيتة بزااااف و تخسرلك الوصفة .
3 - تخليها تطيب أكثر من اللازم ،، تجيك يااابسة و محروقة من تحت " ذوقها و شكلها يفسدو "

4 - تضغطي عليها بيديك بقوة ،، أكيييد رايحة تتفتت لأنها هشة جدا ...

5 - الشوكولا الي تزيني بيها تحبيها تفسد زيدي بزاااف الحليب ،، رايحة تخرج مايهة ،، و ماتنشفلكش
و يبان القاطو تاعك مغمس فالحليب بالشيكولا

6 - تذري المكسرات المرحية فوق الحلوى مباشرة بعد ما تغطسيها فالشوكولا ،، رايح يكون شكلها ماشي شباب ،، و تغطس فالشوكولا ،، يعني مايبانش شكلها مليح .

هذا ماكان نوغمالمو

~

[عماني نور]

عندي مشكلة مع الصور .... سااعة باش تطلعلي صورة واحدة

غدوة ان شاء الله نزيدلكم وصفة اخرى ،، و نستنى رأيكم فالأورسان ،، و مشاركاتكم المميزة

ماتحشمونيش تعيييشو والله غير راني نعسااانة و قاعدة نطلع فالصور و نكتب و نصور و نجيبلكم وصفات

ع الأقل ماتشوفوش و تروحو ، شجعوني و لول بكلمة ....

ياالله ظوكا تصبحوا بخير ~ نلتقي غدا ان شاء الله

[منى العلم نور]

يعطيك الصحة والله شهيتيني وحابة ضرك نوضنخدموا ربي يحفضك

[منى العلم نور]

وستار تجي نورمال

[hosna1]

Yatik elsah ya shatra

[omayoub2]

merciiiiiiiiiiiiiiiiiiiiiiiii

[نيفرتيتي.]

الله يبارك

[ام خيرو]

ماشاء الله روووووووعه

[الحب و الوفاء]

بارك الله فيك و اتمنى ان تكملي الموضوع

[درة بيتي]

روعة الله يبارك يعطيك الصحة في انتظار جديدك وشككككرا على الموضوع المميز

[أم إناس]

شكرًا وَبَارِكْ الله فيك

[ayatte]

شكرا على المجهود و على نصائح النجاح و الفشل

[& هبة الرحمن &]

[khnafnaf]

bravoo ya chatra, jawak haylin w rabbi yjazik amin.