بالتفصيل بات اشو باسرارها من مطبخي

ريمه · 2013-07-21, 23:38

السلام عليكم
حبيت نحط هنا طريقتي وبالتفصيل بصنع عجينة الشو ولي تكون دائما ناجحه معي
اول شي نجيب 250 مل من الماء نخلطها مع 125 غرام من الزبده وقرصة ملح نخليهم على النار

عند الغليان نوخرها من النار ونحط مره وحده 150 غرام فرينه ونخلطها مليح
اول حاجه وهو سر من اسرار نجاح العجينه انك تخلطي حتى تحسي انه نشف كاع هذاك الماء تاعها او ما يكونش كاين بخار ماء ولا ما تخرجش مليحه
من بعد نضيف عليها البيض وحده ورا وحده انا نستعمل من 4 الى 5 بيضات على حسب الحجم ولازم ما تكونش قاصحه بزاف تكون شويه جاريه
ما تخافيش كي يلصق البيض والعجينه من الاول لازم تخلطي مليح باش يتجانس الخليط

نحطهم في صينيه باستعمال لابوش من الاحسن ما تستعمليش الالمنيوم في الصينيه استعملي ورق الطبخ احسن او دهني مليح الصينيه تاعك و نخلي فورشات فوقهم و ندهنهم بصفار البيض ونخليهم بالفرن 180 درجه مده 10 الى ربع ساعه

اهم حاجه و هو سر ثاني ما تفتحيش ابدا الفرن حتى يفوت هذا الوقت وطلي عليهم بشوي كي تشوفي بلي طابو فتحي الفرن غير شويه و طفيه وخليهم حتى تتسرب الحراره من داخل الفرن عاد خرجيهم باش ما يهبطولكش ويفسدو
ومن بعد خليهم يبردو واستعمليهم كيما تحبي اما مالحين والا حلوين

انا جبتهم وفتحتهم ودرت كريم باتسيار و غليقتهم وزينت بكريم شونتيي وشوكولا

وشكل ثاني درته موضح بالصور

واكلير

ان شاء الله تجربوها وتعجبكم
مع تحياتي