اريد نصائحكم ..انا العام الجاي اجوز الباك

[manel dima]

حبيت نقولك بلي تعبت بزاف وأنا نكتبلك في هاذو النصائح ، إذن مالازمش تمر عليها مرور الكرام
هي أحوال واجهتني حقيقة هذا العام ونتمنى أنك تستفيد منها ، وإذا قريتها وفهمت واش راني نقولك والله تنجح

أولا تعجبني الناس اللي تهتم بالباك من أول وهلة ونقولك ديما حط ربي في قلبك واعلم بلي أنت لازم تجتهد واللي يبقى راهو على ربي ، ولازم ديما تتوكل عليه وتكثر من الدعاء ، صدقني أنا جامي لكان طلبتو في حاجة وخيبني فيها ، والحمد لله جوزت الباك على خير وراني نستنى في النتيجة


نقولك حاجة وهي غلطة كبيرة صرات معايا : إذا كنت تعتمد على النت بزاف ، مانقولكش هي ماشي مليحة ، لا ........ هي رائعة إذا أحسنت استغلالها ، لازمك تخصص على الأكثر ساعتان في اليوم تستخرج فيها أهم المواضيع النموذجية ، من بعد تبدأ في حل هذه المواضيع من ساعتها لأنك كل ما تحل موضوع تلقى فكرة جديدة وماتخليهاش تتراكم عليك في الميكرو وكل مرة تقول خلي نزيد نخرج مواضيع أخرى ، لأنو هاذي الغلطة والله صراتلي وندمت عليها ندمة العمر ، اتخيل مليت الميكرو بالمواضيع بصح في الأخير حليت 20 بالمئة منها فقط رغم أني جوزت وقت بزاف وأنا قاعدة معاها

ثاني حاجة ، كاينين مواق بزاف تلقى فيهم المناقشة مع الأساتذة ، أنت تسأل وهوما يجاوبوك ، رائعة جدا ونشكر بزاف الأساتذة اللي عاونوني

ثالثا حاجة ماتترددش خلاص باش تسأل الأساتذة على أي حاجة مافهمتهاش ، لأنو العود اللي تحقرو يعميك ، وفي الباك ماتهمل حتى حاجة صغيرة ولى كبيرة

إذا كنت علمي ، الفرنسية والإنجليزية أنا تبانلي اللي قراهم قراهم بكري لأنو كي تكون تحضر للباك يكون الوقت تاعك كامل للمواد العلمية وماتلقاش حتى الوقت باش تهز في يدك كراس فرنسية أو انجليزية ، إذن إذا حاب تراجعهم ابدا من ضرك يعني في الصيف وياربي وتقدر تلقى روحك فيهم

بالنسبة للحفظ : لازم أي درس تكتبو تحفظو وماتخليش الدروس تتراكم عليك ، وكاينة طريقة أخرى هي أنك ماشي تحفظ كل يوم بل تجمع الدروس كامل اللي قريتهم خلال أسبوع وتحفظهم خلال الويكاند ، هكذا تاني تلقى روحك فيهم ، ولازم تركز تاني على الفهم الجيد ........ هاذي فكرة نأكدلك عليها بزاف : أنا واش درت في الصيف : جمعت الدروس كامل تاع أختي اللي جوزت قبلي وكتب خارجية أخرى وبديت نحضر في الدروس وكتبت ملخصات خاصة بيا وأيضا لخصت المصطلحات والشخصيات ، تبانلك روحك في الأول بلي ماتقدرش تعمل هاذو لحوايج بصح في الحقيقة راهم ساهلين لأنهم وقائع ماعليك إلا تحاول كيفاش تفهمهم
وفي المواد العلمية كيما الفيزياء والرياضيات أعمل لكل مادة كراس خارجي ، كل ماتديرو درس جديد لخصو بطريقتك الخاصة واكتبو في الكراس الخارجي اللي عملت ، يعني تكتب الأشياء الأساسية فقط ونهار تجي تراجع ومثلا يكون في هاذيك اللحظة الوقت ضيق تقدر تراجع غير الأمور الأساسية اللي كتبتها ، وكذلك كل ماتحل تمرين وتلقى فكرة جديدة أكتبها في كراسك باش ماتنساهاش
نأكدلك على حاجة : اعتمد على أسلوبك الخاص لأنك لما تعتمد على أسلوب الأستاذ وأنت ماراك فاهم فيه حتى حاجة ماراحش تخرج بنتيجة

الفلسفة : لازمك تبدا من أول لحظة مع الأستاذ ، ضرك تشوف الناس كيفاش تعود تخلع فيك بلي الفلسفة ماتقدرش تقراها ، بصح لوكان تتبع الأستاذ من الأول وفي كل كلمة يقولها رايحة تكون النتيجة رائعة ، والفلسفة تتطلب التطبيق يعني لازمك تتعود على طريقة كتابة المقال ومن بعد اديه للأستاذ يصححلك

في العلوم : لازمك تحضر الدرس وحدك في الدار قبل ماتعملو في القسم ، يعني تجيب كراس تاع واحد جوز قبلك وترجع للكتاب وتفهم وحدك ، تبقى الأمور اللي مافهمتهاش رايح تفهمها لغدوة في القسم

هاذي أغلب النصائح وإذا كان تفكرت حاجة أخرى نزيد نقولك عليها
بالتوفيق وأدعيلي ننجح في الباك بالمعدل اللي راني نتمناه في قلبي