الزلابية وبالصور

fatalim · 2013-07-18, 23:20

يجب تحضير العجينة 5 ايام من قبل هذه المقادير لكمية كبيرة
المقادير
1كغ فرينة
1لتر ماء
20غ خميرة الخبز
ملون غذائي اصفر او برتقالي

العسل
3كغ سكر
1/5لتر ماء
عصير ليمونتين
ملعقة عسيلة
3ملاعق ماء الزهر
الطريقة

ذوبي الخميرة الطازجة في قليل من الماء

زيدي الملح والفرينة وخلطي مليح

زيدي الماء الفاتر وخلطي بالروبو او بالفوي نورمال

ومبعد حطيها في ماعون كبير وغطيها وخليها تخمر لمدة 5 ايام هذا هو سر الزلابية تخمر بزاف يعني غطيها وانسيها كي تولي ريحتها كيما الياوورت كاين يقولك 3 ساعات كافية بصح الصح 5 ايام
اليوم الخامس
وجدي العسل قبل
فرغي الماء والسكر في كسرونة انا لم استعمل 3كغ سكر انا درت مقادير لكمية صغيرة

خليه يغلي بلاما تحركيه لعدة دقائق ومبعد زيدي عصير الليمون باش يمد شوية قروصة للزلابية

كي يولي اللون كيما العسل ويخثار نحيه من النار وزيديلو العسيلة وماء الزهر

خلطي العجينة نتاع الزلابية لازم تكون كيما نتاع الكريب ولا البغرير وزيدي الملون انا درت لون اصفر

خلطي مليح حتى يولي اصفر كامل
وجدي كلش للزلابية المحقن والغراف وكلش كيما في التصويرة

سخني الزيت في مول كبير ولا مقلاة انا درت مول القراتان ماتسخنيش بزاف وماشي بارد باش مايتلونش

كي يسخن الزيت احكمي المحقن وعمريه بالعجينة وبوشيه بصبعك باش مايسيلش وابداي المغامرة ديري اشكال حلزونية نصيحة لازم تدريب كبير حتى تتقني هذه المرحلة لكن في الاخير رايحة تصلحلك

وكي تطيب خرجيها وديريها في العسل ومبعد قطريها

مانكذبش عليكم بزاف تخسرولي الحبات بصح انا خيرت الملاح برك ههههههه