اول محاولة

[فايزة1207]

السلام عليكم ورحمة الله وبركاته
اخيرا عندي باه نصور وحابة نخيط قندورة حاولت نحط الخطوط العريضة وحابة تصححولي
دوران الصدر 100سم
باه نكمل ال\راعين
ولكم مني جزيل الشكر

[mariana1]

مبروك عليك أخت فايزة أتمنى يفيدوك الأخوات ،أنا مبتدئة في الخياطة

[فايزة1207]

شكرا اختي على المرور

[stayfiya]

يعطيك الصحه فايزه
ما فهمتش واش بغيتي نصححولك. اذا على فتحة الرقبه مليحه و الكتف مليح بصح البونده هاذيك 3سم قليله انا تبانلي عرضها 7سم
راني هنا كشما تستفسري

[فايزة1207]

فرحت جدا بردك اختي سطايفية ربي يجازيك كل خير
يعني نعدل البوندة ونفصل
دوران الصدر100/4+4سم ولالا ؟

[stayfiya]

شوفي فايزه تبانلي زايد 4 بزاف خاطر في اربعه معنا ه كل ربع تزيديلو اربعه سم راح تزيدي 16سم كامل دوران الصدر يعني راح جيك بابور

[الخروبية]

السلام عليكم
ربي يوفقك ختى فائزة والحرة عندها الحق دوران الصدر زايد 4 بزاااااااااف يعنى تلبسي نتى وجارتك
المعقول 8سم بين الصدر وضهر متخافيش مدام معاك الحرةبنت لحرار راكى رايحة تعدى بسفينة لبر الامان
ربي يوفقك تحية من الخروبية للجميع وتحية من الخروب الغالى لسطيف العالى للحرة بنت لحرار
سلام ياكرام

[فايزة1207]

بارك الله فيكم اخواتي سطايفية والخروبية
راح نكمل البترون ونرسم الكم ونرجع للتصحيح

[فايزة1207]

صباح الخير اخواتي
كي قست المسافة من الاعلى لخط الصدر لقيتها30سم
كيفاه نوصل الخط من الابط لخط الصدر ؟

[stayfiya]

تبانلي بزاااف ثلاثين. اكثر شي 27
فتحة الذراع مليحه هو المسافه بين خط الكتف للخصر 38/44 مابين هاذ الرقمين بالتقريب معناه عادي هبطي من الابط للاطاي. حسب القيس لي لقيتيه
ما تنسايش راكي تخيطي في روبه تاع دار يعني ما تتقيديش بالقيس قدقد

[باسم وبيسان]

بزاف 30 وانا ليا نقسى شوية فى الطابق 25 سم بزاف ودرك تدخل السطايفية

[stayfiya]

ام باسم 25 راهي تزيد تنقص منها. حق الهبطه تاع لكتف 2سم انا بانتلي قياساتها. زايده واقيل فايت xxl

[الخروبية]

السلام عليكم
جمعة مباركة لى الجميع انا راى من راى سطايفية كى تهبطى ب25 تلقاى التقويسة 30 بلاك راهى بصهتها الله يبارك نورمال لي تعود ضعيفة شوية تقدر تهبط حتى 22 و الغلطة راهى فى الخط تاع لطاي عاودى احسبي من
لكتف حتى لطاى وقيسى لطاى تاعك وجمعي نقاط لبعداهم
تحية من الخروبية للجميع سلام ياكرام

[فايزة1207]

هههههههههه لالا مانيش سمينة
يسما نهبط من الابط لخط لاطاي مانقلقش روحي بخط الصدر

[باسم وبيسان]

المشاركة الأصلية كتبت بواسطة stayfiya

ام باسم 25 راهي تزيد تنقص منها. حق الهبطه تاع لكتف 2سم انا بانتلي قياساتها. زايده واقيل فايت xxl

والله ياسطايفية انا فى الكتان عدت مانهبطش فى خط الكتف نقيس طول 23 كى تعود مش سمينة تجينى مليحة وكى كنت نهبط فى الكتف فى الكتان كى نخيطها تجى فيها مشكل معرف علاه
والله ليوم عولت نفصل سع والله مافصلت وجعنى راصى مرقدتش لبارح مع بيسان مريضة بقرجمها دارتلها الخانة وانا والفت نشتى نفصل صباح بكرى