خطيبي

[مشكلتي]

السلام عليكم

فتاة جامعية بعمر 27 سنة مازالت ادرس ( تحضير دكتوراه ) (وعندي بعثه العام المقبل باذن الله ) تفكروها مليح

مخطوبه

ايه انا من الفتيات الي قالوا عليهم قاتلهم الطموح ... وضيعت فرص تاع زواج بزاااف ومانيش نادمه والله

مشكلتي الزواج كله كله خط احمر وبعد الحاح الكل وافقت

شاب بعمر 32 مانعرفوا عليه غير وش قالوا الناس ( الكل آمن شره ... واجتماعي نوعا ما ... يعمل و له بيت تعليمه عالي........... المهم شبه كامل )

خطيبي وباختصار محسسني عنده وخلاص وراه من كرم نفسه وجود اصله وطيبه جا خطبني .... بعد شهر من الهدرة قالي

27 سنة تضياع ع القرايه بحجة طموحي وانا من الجهل والخدمه دمار للبيت والمرا وظيفتها الدار .....

خليته قال الي عنده وبعدها قتله

مانيش نادمه حتى ع حاجة و الحمد لله

قالي كي تجي عندي المعادلات الي قريتهم انسايهم وانتهلاي فدارك وولادك
قلته ان شاء الله

بعدها قتله راني راح نقفل وانتهى الكلام

بعد يومين نفس الموال

وانت والقرايا ووووووو

ونهيناه بكيما حب هو


وكل مرة يجبد ويعاود وقالي وش حكايه البعثه الي راح تجيك

قتله جاتني والعام المقبل باذن الله نمشي

قالي تسمى في قولك تتزوجي ع 30 سنة انتي وانا نسناك ؟
قتله ياك علابالك ...
وبدا يصعق ويعاود وانتوما البنات ...
انا كوبيت عليه وعلابالي غلطت وموش راح نبرر

بعث sms تندمي ي فلانه

خليته وشهر كامل وكل واحد جابد على خوه
حتى بعث sms وقالي استغنيتي ومهمكش

انا عيطتله وكان ساااكت واعتذرت كي كوبيت في وجه وهو قالي محبيتش نخليك قبل ما تطلبي السماح مني ...

ضحكت وقتله تستاهل واسمحلي كي ضيعت وقتك معايا وبدات نوبه الهبال وانتي وكي عندك كذا حاسبه نفسك
قتله اذا مهبول روح اتعالج .... متكسرليش راسي ولا بيك شفقت عليا راك مخلوف وربي يسهل ويوفق الكل
وبدا يسب ويسب حوالي دقيقتين حتى برد قلبه وكوبا عليا


عمري ي خاوتي لبينت اني موش حابه نتزوج وانا معاه ولا عمري هزيت روحي عليه كنت نتغافل ع حوايج بزااف مثلا يحمق بلا سبب
يزعف على حاجه تافهه يهيني كي يكون قلقان من الناس

وقلت ممكن على جال وقت الزواج والبعثه .....ولا الراجل يتاستي نصبر عليه ولا لا بصح

حاول يبعث ويعيط وانا قافلتها في وجه

هدر مع والدي وقالوا غلط عليها بزااف واشفعلي يا عمي عندها



هل انا غلطت ؟

هل هذا راجل يستاهل نكمل عمري معاه ؟

ممكن يتغير ؟

ولا اي واحد عصبي هكا ؟

هل اذا فسخت خطبتي راح نضر اهلي ؟

[دموع الفـرح]

انتي يا اختي وصلتي لمرحلة الدكتوراه وهي مرحلة ماشي الناس كامل يوصلو ليها عدرا على رايي مي هدا الراجل نحسو ماشي مساعدك ومش متفهم وضعيتك وحاب يكون دايمن هو خير ......كان قدار يقنعك برايو باللتي هي احسن ويبدلك رايك بلا ماتحسي ......ماشي يفرض رايو فرضا .......هدا رايي نشالله تتقبليه ونشالله ربي يسهلك معاه ولا مع غيرو

[براءة سامية]

سأختصر عليك الموضوع ،، هذا الرجل لا يناسبك بمآآ أنك طموحة مثلي يجب أن تجدي الرجل الذي يشجعك أكثر و لا يكون قاتلا لأمانيك تخلي عنه ،،و لن تندمي ،،لأنه و ببطء سيقتل كل ما فيك من طموحات و دون أن تشعري ،، هو لم يحاول أن يتفهمك أبدا و رما هو غار من نجاحك،، لا تستعجلي ثم إنك في 27 لازلت صغيرة ،، أحسسته متسلط و يحب فرض رأيه،، المهم حاولي أن تقنعي أهلك و أبدا لا تفعلي شيئا لا تريدينه واصلي الركض لطموحاتك أنت الآن في تحضير الدكتوراه و ربما ستأتيك فرص أفضل ...
و ليس كل واحد عصبي هكذا هناك رجال متفهمون و مقدرون للظروف يسعون فقط لتشجيع و إسعاد الشريك الآخر لا إزعاجه
وفقك الله،، أتمنى أن أكون قد أفدتك بكلماتي البسيطة.....سلآم

[mahopa18]

السلام عليكم... والله هذه المواضيع تحيرني... ويظهرلي انو ماراحش تتفاهمي مع خطيبك لانو الامور من الاول راها تبان صعيبة.. خصوصا انو راكي متمسكة بالدراسة نتاعك وهو مراهش متفهم هاد الامر... اصلا من الاول عارفك بلي تحضري للدكتوراه ولازم يشجعك مش العكس... اختي صلي صلاة الاستخارة ولي فيها الخير ربي يكتبهالك...

[TINZA2]

هل فكرتي في السفر وحدك
شرعا حرام
و نصيحة تلهاي بقرايتك لأنك مراكيش نتاع زواج
مصيرك العنوسة و غاديا تندمي

[lhossin]

من الصعب التوفيق بين الدراسة والزواج فسيختل احدهما لي بغاها كل خلاها كل ولكن عليك بالاولويات لي عمرها 27 سنة واش بقالها تستنا اذا انت تدرسي الدكتورة هل درستي ان شباب المراة من 13الى 20 فاذا بلغت الثلاثين فقد كهلت ةاذا بلغت الاربعين فقد شهلت والشهلة هي العجوز نصيحتي لك ان كان الشخص متخلق ومتدين فاستخيري الله واكملي نصف دينك فالفرص قد تاتي مرة في العمر ......

[التلمساني المغناوي]

أخطيك منه يا أختي والله تندمي ندمة العمر
كيفاه أنت طول عمرك تجتهدي وتدرسي حتى وصلتي للدكتوراه ما شاء الله عليك ويجي هذا يقولك أنساي معادلات اللي قريتيهم أنت مكانك في البيت هههههه
نعرف شحال كيما حالتك مين ضيعوا دراستهم على جال هذه النوعية من الرجال وصلوا لحالة الهبال والطلاق والتفكير في االإنتحار بعيد لشر وأنتوما من البداية لم تتفاهموا وعراك ونقاش حاد كيفاه راح يصرا لما تعيشوا تحت سقف واحد ههههه ؟؟
نصيحتي إليك :
أنت واصلي دراستك وطموحك لأنو قليل وين تلقى إمرأة جزائرية مثقفة وطموحة هذا الوقت كلهن جهل على جهل للأسف الشديد ولما تحققي طموحك إن شاء الله رب يفتح عليك بالذي يناسبك ...خلي إيمانك ققوي بالله وما يهفك حتى واحد بالخرطي راكي قارية وواعية ...لي يقولك حبسي الطموح هذا راه حاسدك والغيرة تقتله ههههه

[sandibal]

يااختي الرجال كاينين بزاف مي الدكتراء ماشي كامل الناس توصل ليها اخطيك مادام راكي في البر والله العضيم باذنو راح يعوضك بالي يفهمك ويشدلك يدك باش نزيدي للقدام وهاذا يبقى راي وعن تجربة
ربي ييوفقك للي فيه الخير متنسايش تصلي صلاة استخارة

[السي محمد]

نصيحة مني

افسخي الخطوبة


و ارتاحي

اصلا انت متزوجة بالدراسةو العمل

لستِ بحاجة لزوج ...وش تديري بالزواج؟؟؟

[*سيرين نور عيني *]

Chofi hanouna yji nhar w tenedmi tweli dar w chrol w drari au moin kamli 9raytek bch matendmich b courage

[عائشة 88]

السلام عليكم انصحك بالاستخارة

[mrmilano1984]

هاو سوق النساء تاع دك تكبر تعجرف تشناف يحبو يعيشو كما يحبو يحبو يتقعدو بزاف اسني نقرا استني نكمل القراية استني نخدم من بعد نخمم وهي موسوسة في راسها ومش مرتاحة بلاك تمد نفسها للشخص هداك
ياودي روحو تلعبو علي رواحكم حسبتو بلي مانقدروش نعيشو بلا بيكم لو كان جت انا وحدة تتقعد بيا لثم نرملها الماء علابيها نسبة العانسلت يزيد بزاف وكي توصل 35 سنة تولي ندمانة وراح تتزوج اي شخص وضيعت سنواتها السابقة في التشراط والتخيار

[mrmilano1984]

الندامة تجي من بعد مش دك نهار تكبري في العمر تحسيلها مليح دجا 27 سنة راهو سن الزواج مش التشراط والتكسال

[mrmilano1984]

خلاص علابالنا بلي نتي قارية دكتورا وووو الله يسهل عليك هادي حياتك واحد مايرايي عليك

[eBusiness]

بالمختصر المفيد : "أنت لا تصلحين كي تكوني زوجة وهو تافه أكثر منك" ولا داعي كي أبرر كلامي لأن سفرك خارج الوطن وحدك حرام عند أغلب العلماء ولا داعي يجي واحد يقولي راني غالط وخطيبك هذا طريقة تعامله معك خاطئة ويبدو أنه غير متوازن وشخصيته ضعيفة والسلام عليكم.