بسم الله
لأول مرة سيكون موضوعي أكمل وأبلغ إن أنا تحدثت باللهجة الدارجة ... عساها تكون رسالة قوية الشكل والمضمون
لأول مرة سأكون مع الحكومة ...وأكون المعارض للمعارضة ... لأول مرة سأقول نعم للتقشف
حتى نكون واقعيين ...ساخرج من ثوب الناقد الذي يجلس في غرفته خلف شاشة الحاسوب ويضغط ببطء على مفاتيحح لوحة المفاتيح بينما يختسي فنحان قهوة " أروما " ساخن وفي مخيلته يقول : " أروما ولا هوما " ويضع جوربين صوفيين في قدميه ونيران المدفأة تبعث بحرارة هادئة أنيقة كأنها تحارب أولى نسمات الثلوج : ولله الحمد ألف مرة "
نعم سأخرج من تلك العباءة وأنزل إلى الشارع ...أنا هو ...أنا هو ذلك المواطن " غير البسيط " ... نعم أنا " مني للشعب "
يا خاوتي باش نكون صريحين ...الشعب كان عايش في بحبوحة كبيرة ...المشاريع ولينا نمدو فيها ..والصوارد سلفناها وسامحنا لي نسالوهوم ...ولي سرق سرق ... ولي هرب هرب ...لا علينا
بصح الشي لي "روماركيتو " هو الشعب يا خاوتي ولينا :" نوكلو الغلة ونسبو الملة " ...عايشين بألف فرنك ونقولو " تفو " على الحكومة ... علاه خاوتي " البقرة جيفة ومصارينها حلال؟؟"
هيه نستعرف باللي الدولة مادارت والو ..نستعرف باللي الرئيس الجزائري هو الوحيد في العالم لي ماعنجوش سبيطار يداوي فيه ويروح للدولة لي ستعمراتو باه داويه .... هيه نستعرف باللي 20 سنة خرج غير مشروع الطريق سيار لي كل يوم " نبيسوه من جيهة " هيه نستعرف ونستعرف ونستعرف
بصح نستعرف ثاني باللي الدولة كانت تسكت فالشعب ..كانت تصرف على الرياضة ... كانت تخرج الدراهم من الخزينة العمومية وتشري بيه " طويوطا هيليكس " تمدها للشبيبة باسم " لونساج " وتقولهم هاكو يا شعب هربو المازوت مدوه لتونس والمروك وديرو الدراهم .... هيه أنا نستعرف باللي الدولة تمدلك أومبيلونس باه انت تعاود تكريها للدولة تحطها في غقامة جامعية يسةقها " هواري " ويخرج لبنات في نص الليل " حاشا لي ممايتاهلوش بنات الفاميلية على العين والراس " ....هيه أنا نستعرف باللي بابا عمرو ما خلص فاتورة الماء و"القمامة " أكرمكم الله ... أصلا واش يخلص؟؟ يخلص الما والدولة مادارتلوش كونتور؟؟
هيه أنا نستعرف باللي قريت ببلاش فالجامعة وباللي ركبت ببلاش فالكوس ... وباللي كليت ببلاش فالريسطو ... هيه نستعرف باللي لينيتي تاع البورتابل كانت ب 3.98 وكنت نفليكسي كرتين ولا 3 فالنهار
هيه نستعرف باللي الحوانت كامل يخدمو بلا ريجيستر وماتجيهمش الضرائب ...مالا "القش" كان رخيس .... ما يجيش واحد يقلي السروال ب 500 الف ...هيه السروال ب 500 الف بصح أنا جارنا عايش في دبي كان يجي يشري " التبييشة " من الدزاير...علاه ؟؟؟ لخاطر لهيه السروال ب 6 ملاين ... هيه نستعرف باللي طول عمري نشري في الملح تاع دزاير بألفين فرنك ... ونشري " حلوة الترك " تاع تونس ب 5 ألاف كانت تدخل مهربة من الحدود ....
أنا نستعرف ...
مالا كي تجيني اليوم الدولة تقولي يا مواكن صواردنا حتى انت فسدتها ...ماشي غير شكيب خليل لي سرق .... حتى انت سرقت ....والدولة سرقت ... وال " المخ __ لص " سرق ...المخ +لص = مخلص ببساطة ... هيه حتى الإمام هز شوية من صندوق الزكاة ... حتى المعلم هز شوية من صوارد الإشتراك ...وحتى رئيس جمعية أولياء التلاميذ هز شوية من " البيدجي " ... ..
أنا كي تقلي الدولة ليوم " لينيتي " ب ألف فرنك نقولها وي برافو ...باش الشعب يبطل اللعب ببنات الناس ... لي عندو " أبال " محتم يفليكسي ولي ماعندوش يخبي دراهمو .... علاه كنا ميتين قبل ما يخرج البورتابل ... ياخي مالي عرفنا البورتابل والنت نسينا رواحنا ونسينا بعضانا ونسينا حاجة اسمها " صلة الرحم " .... والله معاك يا دولة ...أنا مادابيا " لينيتي " تولي ب 5 الاف ...وباش تعرف باللي حنا شعب تاع هدرة ؟؟ الشعب زادولو في السكر في الزيت في الدقيق فليصونص فالتريسيتي ....ما هدررررررررررش ...هوما زادولو في تسعيرة الهاتف النقال وهو دار يوم مقاطعة ..... هههههه
ونزيد نقلكم ؟؟ " نعم للزيادة في أسعار الوقود " هيه يزيدو واش عليه ...منا وروح لي عندو طريق محتم يخرج الطوموبيل لي ماعندوش يمشي على رجليه .... يا جدك راكم درتو الكرش من القولف 6 و 7 ...امشو شوية باه ماتمرضوش ب " ليفاريس" ...هيه يزيدلك فليسونس باه ماتعمرش " بلان " ب 60 ألف وتجيبها سمانة كاملة " تسركل " قدام الليسي و " تكحل " على بنات الناس وتسمع في " أديل " وفاهم منها غير كلمة " هاللاو "
iنعم يا مسؤولين ...زيدو فالتريسيتي ... الناس تبيت البورطابلااااااااااات تتشرجا والأيفون والأيباد والأيبود والأيماك والأي أي أي ... علاه خاوتي التريسيتي هاذي ماشي طاقة آيلة للانقطاع؟؟ ...هيه ماتبيتش الضو يمشي وماتسهرش حتى 4 تاع الصباح ...هاذي في مصلحتك ...اربح صحتك
هااااااااااااي الحكومة تخمم عليكم أسيدي ...ها شيخو رواحكم ...
عمبالي درك تخرجولي تقولولي هادي هدرة غير منطقية وهدرة تاع شارع ومانعرف واش ..... أو أجدكم والله كرهنا من الزخرفة والتلوين والتطبيع والتضييع وحكمان الصف والضرب بالكف .....
يا خاوتي صدقوني ..أناهذا وين فقت علاه " سيدتي حكيمة " كانت تضربني كي كنت " فالبريمار " كي ما حفضتش سورة المطففون .... يا خاوتي راهي كاينة دروس وعبر فالحياة هاذي لوكان مانتقرصوش ما نشفوش عليها ... أنا لوكان ما ضربتنيش سيدتي حكيمة لوكان اليوم سورة الإخلاص مانعرفهاش ... لازم الإنسان يقول الحمد لله على المليحة والخايبة ...ولا ربي نعرفوه غير فالمليحة؟؟
نعم نستعرف باللي المسؤولين سرقو ونهبو وهربو ...وهاذي كاينة فيأي بلد فالعالم ...علابالي باللي في دزاير زايدة شوية ... بالصح نحنا ثاني عندنا دور ...مانبقوش ننتقدو ونسبو ... أنا شخصيا نوقف مع الحكومة ... وقت البحبوحة فات صايي مانرجعلوش ولي فات مات ... لي سرق وهرب وكيلو ربي ... إن الله يمهل ولا يهمل ...
خاوتي أسمحولي طولت عليكم أنا نروح نشري " سنتورة " سمعت باللي راهي تسوا 50 ألف حاجة مليحة تاع " جلد " ...جلد خاوتي يعني كيما الصوف والوبر... ماشي جلد مصدر فعل جلد يجلد ....هههههه ....قبل ما يزيدولها فالسومة ...باه كي تقولي لحكومة زير السنتورة معانا تضرب دورة ... نزير أأأ سي محمد ...ماشي الناس كامل تزير وانا " يطيحلي السروال حاشاكم "
كيما يقولو صحاب :"الستيلو " هاذا فيض من غيض ....في أمان الله
تفريغة قلب كتبها " صاحب الشهادة الورقة
( تقرير عن مشاركة سيئة )، و الموجودة أسفل كل مشاركة .
2016-01-16, 11:42
نعم... مع التقشف ...اتقشفوا يرحم والديكم
العرض العادي
