من فضلكن احسن وصفة للتشاراك و احسن قلاساج

[لميس اميرة]

السلام عليكم

اخواتي من فضلكن ما هي احسن وصفة للتشاراك و تكون فعلا مبسسة و تذوب فالفم
و الحشو يبقى طري و ما ييبسش

و القلاساج يجي من فوق رطب و طري و لونو مليح و ما تحسيش السكر يقرمش في سنيك


من فضلكن اخواتي عاونوني


راهو دايرلي الخلعة و الفوبيا و زوجي يموت عليه ديما يقولي ديريه و انا نتهرب لاني خايفة فعلا ما يجيش طري كيما تاع اختو


حمرولي وجهي ربي يخليكم

[mazaridj]

كاس سمن دايب اوبارد +كاس زيت+كاس ماء الزهر +2ملاعق حليب غبرة تخلط المكونات ويترك يرتاح ليلة كاملة تشكل كرات بوزن20غ .الحشو 3كيسان لوز او فول سوداني مرحي القليل من السكر قرفة اوفاني ويجمع بماء الزهر.القلاصاج فنجان حليب بارد +ملعقة زيت+ملعقة ماء الزهر +ملعقة ليمون +ملعقة صصغيرة فاني +سكر ركب

[حياتي نبع امل]

احسن عجينة للتشاراك هى العجينة السحرية ،كاس زيت ،كاس زبدة ذايبة او سمن ذايب ،كاس حليب وتجمعى بالفرينة
من الافضل تخدمى العجينة وتخليها تريح على الاقل ساعتين ،بعد تشكيل حبات التشاراك ايضا خليها تريح متلا من الليل للصباح او من الصباح للمساء باه تطيبيهم ،باه يشدو الفورم تاعهم ،
يطيب على درجة حرارة متوسطة والفرن يكون شاعل من قبل 180 درجة حتى يحمارو شوية من تحت ادا شفتيهم مازالهم ماطابوش ،اشعلي مالفوق يصفارو برك ماتخليهمش يحمارو
كى يطيب خليه حتان يبرد كاااامل ،ًبعدها اطليه
القلاصاج هو بياض بيضة ،مغرف زيت وعصير الليمون وماء زهر،شوية شويه ما تكثريش وابقاي تضيفي ف السكر رطب يكون مغربل على الاقل زوج مرات. ،ضيفي السكر حتان تتحصلي على عجينة ،ابقاي تدلكى ف هاديك العجينة ملييييح ملييييح ادلكيها وعاودى بعدها ابداي تضيفي مرة عصير ليمون وبعدها سكر رطب ومرة ماء الزهر او سيرو اللي هو عبر سكر عادى مع زوج عبار ماء ،ترونش قارص بعد الغلي بعشر دقايق طفي عليهم ،المهم تبقاي مرة مرة عصير ليمون وسكر ومرة سيرو وماء الزهر وسكر حتان توصلي للكمية اللي تستحقيها والقوم المطلوب ،خلي الطليه تريح شوية باه يخرجو منها فقاعات الهواء ،واقلاصي بيها عادي
بعدما ينشفو الحبات امسحيهم بالناكخى باستعمال بانسو صغير كيما تاع الماكياج ولا اسفنجة صغيرة كيما تاع الفوندوتان امسحى الحبة مليح حتان ترجع تبرق وزينيه كيما تحبي بورود بعجينة السكر ولا بواش حبيتى
تفكرت حاجة العقدة ديري فيها سكر رطب خير من السكر كريستاليزى ،والقلاصاج هدا يطول ويقعد طري ،وادا الكميه صغيرة تقدري تستعملي قلاصاج الحليب لكن ما يفوتش اسبوع ولا عشرة ايام
ومالازمش تخافي ابداي بكاس صغير ومرة على مرة ديري وعاودى حتان ترجعى محترفة فيه وبالتوفيق ،ماهوش حاجة صعيبة اسهل منو مكاش

[لميس اميرة]

بارك الله فيكم اخواتي

حبيت نسال هل لما نجي نشكلو نطبع و نحط الحشو و نلف او نعمل كويرات احسن

حبيتو يجي شغل فويتي من داخل ممكن تورولي الطريقة اذا فهمتو عليا اخواتي