ابني لا يتكلم

[meryomay]

السلام عليكم اخواتي
ابني عندو عامين و 8 اشهر يقول غير بابا و ماما و كلمة كلمة اللي مايطلعش فيهم اللسانه
في الاول كنت حاسبة المشكل في لسانه كان لاصق و ديتو عند الطبيب و حلو بصح مايهدرش راه غير كما كان و لسانو قاع مايطلعوش الفوق كي نبقى نطق فيه ما يعودش الكلام حتى الحروف مايقولهمش راه متعبتني هاد المشكلة
الله يخليكم اللي عندها حل تمدهولي و اجرها على الله

[anissa90]

ان شاء الله خير الحل الوحيد اديه عند اخصائي باذن الله يتحسن

[oum radja]

اذا ماكانش عنده مشكل في السمع ولا في التركيز ماتخافيش عليه راح يهدر
بالاك برك ماشي متعود يحرك لسانه
ديريله تمارين لي يحرك فيهم لسانه مثلا خرجي لسانك وقوليله يعاند
ومرة خرجي لسانك وطلعيه لفوق او هبطيه لتحت ومرا يمين ومرة يسار هاكذا و بالمداومة راح يوالف
وتاني ديري معاه le soufle يعني ينفخ بالونة او يدير فقاعات

[نورالهدى بيولوجيست]

خالي عندو بنت في نفس سن ابنكمواليد اوت 2012 و لحد الان تقول ماما و بابا و الماء فقط

ان شاءالله خير

[meryomay]

شكرا لكم اخواتي على الرد
ام رجاء ابني ما شاء الله عليه يسمع و يفهم و يعرف كل شي عندو المشكل في النطق فقط و بالنسبة لتمارين لسانه ديما نديرهم ليه بصح لسانه مايخرجوش خلاص ما نعيا معاه و والو و مايطلعوش الفوق راح نجرب معاه نفخ الفقاعات
المنطقة اللي راني فيها ما كانش اخصائي
ان شاء الله خير

[أم أيوب 11]

اختي من الافضل تدي ولدك عند طبيب أطفال هو لي يعرف ادا كان فيه مشكل يساعدك ويوجهك وان شاء الله ما يكون غير الخير

[حور العين 83]

نظن انو ولدك عندو التصاق في لسانو تحت اللسان اديه لطبيب يشوف لسانو اذا لقا هذا هو المشكل يديرلو عملية بسيطة بقص الجزء الملتصق تحت اللسان وباذن الله يتحسن

[meryomay]

اديتو عند الطبيب وحل ليه لسانو بصح مزال باقي غير كيما كان مايطلعش لسانو

[بريق الدجى]

ماتقلقيش روحك بالاك مزال ماوالفش يحرك لسانو برك
احكيو معاه بزاف و سميلو لحوايج
و كي يحتاج امر ما ديري روحك مافهمتيهش و خليه يبذل مجهود باه يهدر معاك
و اهم حاجة نحيلو التلفزيون و الميكرو لانهم يعلمو الصغير يستقبل فقط و مايتفاعلش مع المحيطين
نقولك هذا الكلام عن تجربة لان ابني فات 3 سنوات و يهدر كلمات محدودة و مايقدرش يكون جملة مفيدة و رانا نحاولو معاه
بالتوفيق اختي