نصائح وجدتها اعجبتني فقلت لتستفيدوا منها انتم ايضا
.
.
1. كي تدخل لقاعة الامتحان متكثرش الهدرة بزاف مع الطلبة حاول تحكم بلاصتك وترزن روحك وتقرا الادعية وتصلي على رسول الله
2. كي يوزع عليكم السوجي بالعقل برك متخلعش روحك والله غير عادي كيما بكري كي تحكم الموضوع الاول كيما الرياضيات مثلا اقرا كامل الاسئلة والسؤال لي تعرف الحل نتاعو ديرلو اشارة √ ولي متعرفوش ديرلو x بعد ماتكمل الموضوعين احسب الاشارة √ لي لقيتو اكثر هو لي تخيرو
3. اسمعوني خاوتي حذاري كي تخير الموضوع تخيرو على حساب لي يمتحنو معاك انت عندك شخصية كن انت الاصل لا تكن التقليد
4. كي تبدا تجاوب متخدمش بالمسودة حذاري راك ضيع غير الوقت خاصة الاجابات لي تعرفهم راك لاباس عليك نورمال تقدر تجاوب ماتبقاش تشوف لناس اذا بداو باالاجابة تبدا معاهم استخدمهم المسودة غير في صوالح خفاف كيما توحيد المقامات ولا تأكد من حاجة
5. كي تبدا تجاوب مثلا تبدا بالهندسة الفضائية كي تلحق لسؤال لي متعرفوش متضيعش وقت بالتفكير فيك دوموندي ورقة اجابة اخرى وابدا بالأعداد المركبة كيف كيف كي تجاوب على تعرفو كامل دوموندي ورقة اجابة وابدا فيها المتتالية كي تلحق عند سؤال لي متعرفوش حبس وروح دموندي ورقة اجابة وابدا بالدالة متكسرش راسك مع الاسئلة لي متعرفهاش
6. بعد ماتجاوب على الاجابات كامل على الاسئلة لي تعرفهم كامل ارجع الى الاسئلة لي متعرفهمش بربي تجاوب عليهم على خاطر عقلك في هذه الحالة يكون مرتاح موش كيما الخطرة الاولى
7. النقطة المهمة في نص الوقت يجيك بليس ويقلك انت انسان غبي تخير في الموضوع الصعيب ويقلك الهندسة نتاع المووضوع الثاني عليها 5 نقاط وساهلة ووانت في هذيك الحالة تصدقو وتقول والله غير كاينة وتبدا بالموضوع الثاني بعد ماتكمل الهندسة يعاود يرجعلك ويقلك انت صح حابس الاعداد المركبة نتاع الموضوع الاول ساهلة يخلطلك الحسابات كامل وتحس روحك منهار نفسيا ويروح الوقت وتحس بخيبة امل كبييييييرة وتولي تسرع في الاجابات وتخلطو عليك اوراق الاجابة
8. خاوتي حذاري تسمع لبليس راهو يجيك في وسط الوقت ويقولهالك هذه الكلمة مالا قولو راهو وصوني غير مكلاه تشقي روحك وتعوذ من الشيطان ورد بالك تغير الموضوع رد بالك تغير الموضوع حذاري اذا غيرت الموضوع راح كل شيئ مووووت مع الموضوع لي خيرتو من البداية على خاطر الاختيار نتاعك كان سليم وصحيح بليس برك يلعبلك على المورال
9. بعد ماتكمل اجابتك بعقلك متخرجش بكري اقرأ اقرو مليح السوجي سؤال بسؤال والاجابة سؤال بسؤال ولعلى تكون نسيت سؤال جاي في اخر السطر
10. كي تقتنع بلي كملت الاجابة اخرج في اخر الوقت لان القاعة كي تولي ناقصة من التلاميذ كل مايكون التركيز مليح ويقل عليك الفوضى وتجاوب مليح. المهم انت لي تمد ورقت الاجابة للحارس موش هو لي يجبدهالك حبيت نقلك متخليهش هو
لي يقلك هيا ازرب انت لي تمدهالو اوك والفاهم يفهم
11. كي تخرج من القاعة هناك طريق واحد اسمو الدار مكانش طرق اخرى ولي يقلك واش خدمت قولو الحمد لله واذا قالك واش خيرت قولو الحمد لله ويقلك وجاك ساهل قولول الحمد لله اجابتك هي الحمد لله ولئن شكرتكم لأزيدنكم
12. حذاري والمناقشة حذاااااااااااري اذا ناقشة الحل يطيحلك المورال وتولي غدوة في اختبار العلوم كي تتفكر الرياضيات يطيحلك المورال وتبقى ساهي وعقلك متشرد اوك رد بالك تناقش حتى كون تحس روحك تدي 20 اياك اياك اياااااك
اياك اياك اياااااك والمناقشة
13. خاوتي هذه المرحلة نتاع الاختبارات ستنطلق حملة الاشاعات ويقولولكم تسرب السوجي نتاع الفيزياء ولا الشريعة اياك ان تصدق فاذا صدقت فأنت فعلا احمق مع احتراماتي هاذو ناس حابين يشلوشوكم ويشوشولكم الافكار رد بالك تصدق الشائعات كذب في كذب وهذو ناس حابة تخدم الفوطو كوبي نتاعها باه كي تروحلهم يديرولك الفوطوكوبي المهم منوصيكومش اكيد راكم فهمتوني وتسمعو كلامي
14. اخر وصية كل يوم كي تجي تصلي وتدعي بالنجاح ادعي لروحك وقاع المومنين وانا دعيلي دعوة سبيسيال ربي يخليكم خاوتي وربي ينجحكم وحاولو ديرو لي عليكم على خاطر كاين ناس تعبت على جالكم باه تفرح بالنجاح نتاعكم اللهم أمييييييييييييييييييييييييييييييييييييييين