راني هبلت 2

[مشكلتي]

السلام عليكم
أنا صاحبة الموضوع
https://www.djelfa.info/vb/showthread.php?t=1676944
أشكركم على ردودكم والله حتى بكيت
ما يمكنيش نحكي لدارنا لأني يتيمة الأب وأمي تعبت علينا بزاااااف والآن هي مريضة بالضغط الدموي لدرجة أنها أصيبت بجلطة ومن نتائجها شلل نصفي ولولا فضل الله ما كانت لتشفى ::::بري بأمي يمنعني أني نزيد نعذبها على جالي ونهبلها بمشاكلي وتربيتي الدينية هي الأخرى تمنعني أني نحكي كل كبيرة وصغيرة عن حياتي الزوجية لعائلتي
وفضلت الصمت والتضحية لكن الأمور راهي تزيد للأسوأ حتى أنو عمرو ما نفق علي غير في الماكلة والشراب وما عدا ذلك كلشي نجيبه من دارنا

لما ناقشه في أمر السكن يقولي الصحابة رضوان الله عليهم وسكنو في خيمة كي نقولو على هاك هما رضوان الله عليهم ما ركبوش سيارة يضربني هذا مثال
أنا نسكن بعيدة بزاف على دارنا ونروحلهم مرة في العام وكي نروح دايمن نمثل أمامهم أني في أحسن حال وبحكم أنو المسكن ضيق عمري ولا إستقبلتهم عندي
كل هاذ الحالة محسودة من دار راجلي وزوجات أصدقائه بحكم أني مدبرة بيت ممتازة ودايمن محمرتله وجهه قدامهم ولا مرة شكيتلهم من حالي وهما مستكثرين علي هاذ الشي وين وصلو يقولولي هاذ الأمر في وجهي
ما نكذبش عليكم هو في البداية كان يبكي لبكائي ويفرح لفرحي وهاذ الشي كان مصبرني بزاف وعمري ولا شفت للماديات كان يكفيني حنانه
لكن الآن لأتفه سبب يغضب ويضربني وما بقى حتى شيئ يصبرني خاصة أنو ماعنديش أولاد معاه

ممكن الشي لي خلاني نكتب مشكلتي هو أن قلبي تعمر بزاف وأهله ورغم ظروفي عمرهم ما عطاولي الحق حتى وليت نشك بلي راني غالطة لكن لما كلمتكم ارتحت على الأقل نحس ما نيش نخمم وحدي بلي راني مظلومة ربي يجازيكم ويفرحكم

[ana-howa]

عجزت نلقى كلام نقولو
و الله كاين اللي بين يديه نعمة و هو ما يحس بيها مثل راجل
ربي يهديه و يعوضك خير على صبرك
اذا علاقتك باهلك اعمامك و خوالك مليحة خليهم يتخلو خاصة الضرب اياك تقبليها على روحك و لوكان درتيلو حد في هادي النثطة من الاول ماكان يعاودها

ربي يهديه صح و ربي يفرج عليك عاجلا يا رب

[loufa]

السلام عليكم
قلبي تقطع عليك وتالمت كثيرا خصوصا انهم حقروك واستغلو بعدك وعقالتك وبعد اهلك لكن لازم تلقاي حل لانه تعود على اهانتك وضربك وحتى اهلو عادو مايقيموكش لانه هو ماقيمكش
مثل ماقال الاخ قبلي شوفي اخوالك او اعمامك وامك فهميها غير بلعقل رغم انه صعب هاذ الشيئ لانه اذا اخبرتي اهلك رايحة تسمع

اما اذا مكانش حل نقولك ماتزيديش تهدريلو على السيارة واسكتي اصبري حتى يشريها فجميع الجالات هو مداير رايو او اهدري معاه فالوقت المناسب قوليلو معليش نبداو بالسيارة ومبعد اعملي الدار
حاولي ماتعانديهش لانك الخاسرة رغم انك مضغوطة بزاف
اما الناس الليراهي تحسد فيك اجبدي روحك عليهم حتى وتبقاي وحدك مايهمكش ونصيحة اخيرة ماتزيديش تكثري الهدرة
ربي يفرج عليك ويهنيك

[أم شروفة]

أولا. اسالي نفسك هل تقدري تتطلقي منو؟إذا كان جوابك لا. جيبي طفل وهذاك الوقت قلو ابنك او بنتك مرضت من الدار و البرد.اصبري غير شويا وإن شاء الله ربي يفرج.اختي رجال هذا الوقت ما تتكلميش معاهم نهائيا اللي في راسو يديرو.خليه اشترى السيارة اركبي وازهاي.اشترى كبش العيد كولي اللحم بصحتك . ما تحاوليش تحكمي فيه. غير عقبي الوقت.لعله مازال حاس روحو صغير ومش مسؤول وأقول الأطفال راح يحسوه بالمسؤولية

[مؤمنة بالله]

اصبري واحتسبي اجرك عند الله
كل الم يواجهم في هذه الحياة هو تكفير لذنوبك
فالله لا يبتلي من هب ودب
انت مبتلاة فاصبري لعل الله
يريد لك درجة أعلى
اجرك على الله
عليك بالطاعة وكوني حنونة عليه
هذا مايحبه الرجل
لعله يلين معك
لا تنسي ان تكثري من قول
رب لا تذرني فردا وانت خير الوارثين
كرريها كلما احسست بضيق
وربي معاك

[hamza18]

ادا كنت قادرة علي ان تصبري فاصبري ربما يفرج الله همك ولكني لو كنت في مكانك لما صبرت لاني ضد الضرب لا اعرف ادا كانت الرجولة تعني ضرب المراة في المجتمع الجزائري

[anise2011]

ربي يهديه صح و ربي يفرج عليك عاجلا يا رب

[om mohamed 1960]

حببتى قبل ماتحوسى على الحل حوسى السبب لي خلاه يتغير اكيد فيه سبب ادا مهوش فى الداخل هو من الخارج الراجل قبل ما (ينفجر)هنالك سبب.

[ابتسام smile &hope]

المشاركة الأصلية كتبت بواسطة أم شروفة

أولا. اسالي نفسك هل تقدري تتطلقي منو؟إذا كان جوابك لا. جيبي طفل وهذاك الوقت قلو ابنك او بنتك مرضت من الدار و البرد.اصبري غير شويا وإن شاء الله ربي يفرج.اختي رجال هذا الوقت ما تتكلميش معاهم نهائيا اللي في راسو يديرو.خليه اشترى السيارة اركبي وازهاي.اشترى كبش العيد كولي اللحم بصحتك . ما تحاوليش تحكمي فيه. غير عقبي الوقت.لعله مازال حاس روحو صغير ومش مسؤول وأقول الأطفال راح يحسوه بالمسؤولية

سبحان الله والطفل واش ذنبو تجيبو باش يتمرمد و لوكان يقولها مرض واش فيها الانبياء ومرضو
واش دير باش تعيشو تقريه تلبسو ولوكان يجي النهاراللي يفيض الكاس قادر راجلها ينساه ويعاود حياتو
ماتولديش حتىى تتاكدي بلي تحسنت احوالك
و مادابيك توقفي مع روحك و مكلاه تحمريلو وجهو
خممي مليح تعرفي علاه راهو مقلق على طونوبيل
يماك فهميها بلعقل لوكان تهبلي و لا تجيك جلطة شكون يرفدك
يهدر على الصحابة الله يهديه

[مريم الصابرة]

السلام عليكم اختي
شوفس قريت مشكلتك الاولى وهذي صراحة والله ما يستاهلك إنت بنت اصل وفحلة ويرحم من ربّاك انا على حساب ما قريت راجلك متدين لكن التدين هذا خترعو من راسو لانو لو يخاف ربي كان يراعيك وما يحقركش لهذي الدرجة هو عارف بللي ما يلقاش كيفك وعارف باللي ما عندك وين تروحي وخبيتي كل شي في قلبك عليها تمادى اختي عندك حل واحد إنفضي الغبرة على عمرك عاقلة نعم تعرفي ربي ماذابيا فقير وما عندوش معليش المهم راجل ويهتم بيك لكن كامل هذي الظروف ويزيد يمرمدلك بالضرب وبالكلام ويحقرك قولو ربي ماقالش هكذا لو كان يعرف ربي لما يمد المثال بالصحابة يقرا عليهم مليح كيفاه عاملو زوجاتهم راجلك من النوع اللي مطبق الفرض وثاقب الارض
اختي لازملك ديري حل ما تخربيش دارك لا ما نحبوهالكش ولكن لازملو قرصة وذن إنت روحي لداركم وما تقوليلهمش جيت غضبانة اقعدي لما يجي يديك قوليلو ما نرجعش إنت من حقك في حياة على الأقل بسيطة قبل ما يشري طونبيل لازم يبني دارو وقبل من كل شي يبني روحو لازم يبدل معاملتو معاك صدقيني لو يحس روحو راح يخسرك تشوفي كيفاه يرجع إمالا خمي اعطيه قرصة وذن روحي من عندو لداركم وخليه ياكلو البق شعال يصبر ماراحش يلقى كيفك
والله كي نشوف هكذا رجال تقولي نحرقهم يحرقو بنات الأصل
ربي معاك حنونة ورانا هنا كيما اهلك ما تخميش ربي معاك

[طُمآح الذُؤابة]

للأمانة ..
هناك حلقات مفقودة في سردكِ لما حدث لكِ !
الحلقات ، أعنيّ بها شيء من التناقضات ، أقول هذا و أحتفظ بها لنفسي
ربما أكون مخطئًا و قد أفصح بها و يقرأها فرد آخر .. كان ينويّ في كتابة حلّ ما علّهُ يُفيدكْ .

فما أنا بمانع خيّر .


و الله الموفِقْ .

[lachiche]

لا حول ولا قوة إلا بالله
اسمحيلي راجلك مهوش راجل و مهوش نتاع مسؤولية و ميستاهلش يتزوج مازال صغير في عملوا على6 ما أظن
واش راح نقولك اختي ربي يصبرك و يفرج عليك

[صالح مبروك]

يا اختي الطلاق افضل في هذه الحالة كرامة الانسان هي كل شيئ

حاولي اصلاحه اذا لم يرد الطلاق ابغض الحلال

والقسم على الله

[warm heart]

الصبر ثم الصبر اختي
الحمد لله الدنيا فانية
عليكي بقيام الليل والاستغفار

[sarah basyouni]

ما يعطوكش الحق لان المرأة في مجتمعنا مكنة للتفريخ والطبخ وحياتها رجل ﻓﻘﻂ