الى الأخت أم نعيمة و كل من طلب وصفة قاطو حريم السلطان

أم عبد الله السلفية · 2015-11-07, 20:42

السلام عليكم

أختي هاني جيتك

قبل ما تبدي خلاص بالقاطو لازمك تحضري هاذ الوريقات بعجينة اللوز الاصطناعية تلونيها بالأخظر و تزيديلها شوي نشاء باه تحكم روحها و تشكلي الورقات بيدك .

قالولي بلي كاين طابع صغير على شكل دمعة صغيرة بصح أنا ما لقيتوش ياخي خدمتهم بيدي و حاولي ديريهم كامل قد بعضهم ما تجيش وحدة أكبر من وحدة . و تخليهم ينشفو و يبسو شوي . كي تريهم يشيحو فرشيلهم شوي نشاء باه ما يلصقولكش في الطبق الي راكي حطيتيهم فيه.

أنا بقولي هاذم من العيد الأضحى راني صورتهملك مع الطابع

شوفي طيبي صابلي ديري أي وصفة تساعدك . بالنسبة ليا عندي وصفات ياااااسر لكني نفضل صابلي الزيت بطريقتي راااااااااائع جدا و طعمتو أبن من صابلي الزبدة. نمدلك الطريقة و انت تحبي ديريها أو ديري أي عجينة صابلي تنجحلك.

المقادير: 4 بيضات

3 كيسان شاي سكر عادي ( يعني كيلي بكاس التاي)

3 كيسان شاي زيت

فاني تاع الميزان

مبشور قشور الليمون

ملعقتين كبيرتين نشاء ( المايزينة)

فرينة

1 خميرة

الكيفية: في إناء تكسري البيضات و تصبي عليهم السكر و تضربي بالخلاط الكهربائي ملييييييييح ملييييييح حتى تشوفي السكر كامل ذاب و أصبح الخليط مثل الكريمة. هنا تضيفي الزيت و تواصلي الخلط ثم تضيفي الفاني و قشور الليمون و النشاء و و في الأخير الفرينة المغربلة و الخميرة الكيميائية حتى تتحصلي على عجينة طرية

غطيها.

فوق طاولة العمل افرشي كيس أي كيس عندك يكون نظيف و سميك باه تحلي فوقو العجينة بعد ما ترشيه بشوي فرينة. حلي العجينة على سمك 3 ملم أو 4 هنا في وصفة حريم السلطان نحبو الصابلي نتاعنا يكون عالي .

أطبعي بطابع الورقة ضرك نحطلك صورتو من باعد و اطهيها على نار متوسطة راهو فيسع يطيب ما تخليشو يحمار ياسر ربع ساعة يطيب و انت و الكوشة نتاعك المهم كي يطيب خرجيه و لصقي كل زوز حبات بالمعجون

كي تملي تلصقيهم كامل نروحو نحضرو القلاصاج و الي هو كالتالي:

بياض بيضة + ملعقة ماء زهر+ عصير ليمونة + فاني أو عطر الفانيلا+ ملون أبيض + سكر قلاص مغربل

تزيدي بشوي حتى تتحصلي عل القوام المناسب للقلاصاج و كي يجيك ثقيل زيديلو عصير الليمون و كي يجي خفيف زيديلو السكر المغربل

كي تكملي قلاصاجك أغطسي الحبات نتاعك أخدمي غير بالثلاثة و حطيهم فوق المشبك و غطي القلاصاج

خليهم حتى يقطرو و قبل ما ينشف القلاصاج حطي ورقة خضراء في الوسط و حطي العقاش المتوسط الحجم ديريه ساير داير بالورقة الخضراء كما هو موضح في الصورة. تحبي تقربيهم لبعضاهم العقاشات أو تبعديهم شوي . شوي برك مش ياسر.

و تكملي الحبات الكل المهم كي تحطي الورقة يكون القلاصاج الزائد كلو هبط باه ما تزلقش الورقة الخضراء عن مكانها و ما يجيكش الشكل متقون.

الملاحظة الثانية: كي تعودي تحطي ف لي بارل تكون يدك نضيفة و مش مبلولة باه ما يكحالوش العقاشات و من الأفضل تكون معاك وحدة تحط العقاش على القاطو باه هكا تكون الخدمة نقية و متقونة.

و في الأخير كي ينشف لقلاصاج تنقي الحبة من زوائد القالاصاج و تمسحيها بالملمع الغذائي الفضي .

بهذا تكوني أكملتي قاطو حريم السلطان الذي أعجب كل من تذوقه أو رآه

هو صح قاطو للأعراس و حاجة جديدة

omo marwane · 2015-11-07, 20:56

انا اول وحدة ترد يعني الصحن كامل لي بارك الله فيك عمل متقن و جميل شكرا

غربة أهل السنّة · 2015-11-07, 21:00

وعليكم السّلام ورحمة الله وبركاته
أرجو أن تكوني بخير أختي ،،، ما شاء الله رآئع جدّا
كُنتُ في انتظار الوصفة و كأنّي أنا من طلبتها -ابتسامة-
زادك الله من فضله
اللهمّ صلّ وسلّم وبارك على محمّد وعلى آله وصحبه أجمعين