كون علي

[مولود حداد]

السلام عليكم ورحمة الله


هذه قصيدة "كون علي" وكانت بطلب من الأخ مقبل على الزواج نسأل المولى عزوجل أن يبارك له وعليه.


بسم الله مول المنة *** والصلاة على صاحب السنة *** محمد بذكرو نتهنى
جابلنا الرسالة والدين
كنت في بالي مهني *** والناس جات تهبلني *** حبوا بالسيف يزوجوني
قالولي راك فالتسعة والعشرين
ورَّّّّّّّّّّّّّّّّّّّّاك رايح بهاذ العقلية *** خلِّ عليك العزوبية *** اتوكل برك ودير النية
وخاطيك حوايج واحدوخرين
وانا تخمامي فالسكنى *** والشهرية نتاع المحنة *** والغلا فحياتنا
في روحي حاصل حصلتين
قلت ماني شايف طفلة *** قالو ماهي مشكلة *** نخيرولك وحدة فحلة
تكونلك قرة العين
هنا قلت وين المقصود *** قالو بنت عمك محمود *** 5 في عينين الحسود
كاملة وعايلتها معروفين

رحنا يا سيدي للدار *** لقينا باباها وواحد مصفار *** كان هذاك خالها المختار
يخلع وعينيه مبقصين
كنت سامع عليه *** يدخل روحوا فاللي خاطيه *** البلا بعيد وهو شاريه
والقوم ليه كارهين
بابات الطفلة متربي *** وهو يالطيف واش مخبي *** شر في قلبو وانا قلبي
يخبط فور تسعين


قاللي واش تخدم *** قتلو معلم *** قاللي وماكش حاشم
وجاي ومكركر عشرين
قاللي شحال تخلص *** جاوبت زوج ونص *** والشهرية ديما تنقص
مالفاسيليتي والدين
بصح الراتب راح يزيد *** مع بداية العام الجديد *** وحتى فقضية المسيد
قربوني للدار كيلومترين
نمشي عالبساطة *** فحياتي داير خطة *** وكي تكون الحالة مخلطة
نقلبها عقلية ثمانين
نصرف غير بلعقل *** نتقشف فالماكلة والنقل *** وفرزقي ما نستعجل
ضامنو رب العالمين
فالدار أنا اللي نحكم *** نحبها تسمعلي كي نتكلم *** تحط راسها وتحشم
والحيا يزيد فالزين
نحبها تتهلى فالدار *** وتحسنلي للجار *** وما تخرَّج اسرار
نسعد بيها فالدارين
نحبها ترَّضي الوالدين *** وفحلة كيما اللولين *** تعرف تنصب الطاجين
المطلوع تعجنو عجين


قاللي إيه نت يا حبيبنا *** لازملك وحدة مالجنة *** فالدنيا ماهي كاينة
هذيك الحور العين
راك تعرف بنات اليوم *** الإيليميتي والملينيوم *** عقلية بانين ماشي ثوم
الكوب كاري والجين
الطياب ما يعرفوش *** واليدين للزوج قوش *** ترباو عالفشوش
كيما قوم الألفين
يعرفوا صح الحفافات *** وقدام التيلي بالساعات *** حفظوا كل المسلسلات
أصفر وأخضر ولوخرين


هنا مزية باباها نطق *** قاللي مناك راح يتحقق *** نت باين متخلق
ماكش مالشبيبة المهبولين
بصح نقولك في كلمة *** ونوجزلك نقطة مهمة *** كون علي كي تطلب فاطمة
والبشر كلهم مخصوصين
انا راح نمدلك *** الطفلة اللي تسعدك *** وتربيلك بناتك وولادك
ينشأوا عالتربية صالحين
ونت كون فالمستوى *** مومن تقي وقدوة *** ماشي وساير عالتقوى
خبزك ودراهمك حلاليين
بيت لحلال *** عمرو يبنيه المال *** لا وماهوش الجمال
يبنيوه لزواج متكاتفين