ساعدوني في تحضير العدس

[ام طيوبه]

اختي انا ننصحك باه تطيبيه ب ماء السعيده......انا شخصيا نشمخو الصباح برك كي نعول نديرو ف الغدا ساعه او ساعتين ونوجد التتبيله تاعي كيما تفضلو الاخوات ثوم .بصل.توابل.ملح.زيت وطبعا طماطم مصبرة وخضر اذا حبيتي الكل مع بعض واضيفي العدس تاعك طبعا ماتغسليه جيدا لما يغلي الخليط مرقي بمااااااااااااااء سعيده وسكري الكوكوط تاعك ربع ساعه فقط او 20 دقيقه ورايحه تتحصلي على مرق عدس بالنتيجه اللي ترضيك وترضي زوجك ان شاء الله.

[jia-smile]

المشاركة الأصلية كتبت بواسطة cherinou

انا ندير في كوكوطة البصل مرابي ولا مقطع صغير والثوم بزيادة شوية والزرودية مقطعة والبطاطا مقطعة وايلا بغيتي حبة لفت والكرافس وشوية قصبر وحبة ماجي وفلفل اكحل وكمون وطوماطيس تاع القوطي وفلفلة حمرة والزيت واللونتي والرند ومرقي بالما وا
بلعي عليها تطيب ومين تصفر الكوكوطة نقسي عليه كلشي بارد في بارد يجي بنين

تمااااما هكااا نطيبوه ويجييييييي امممم بااارد في بارد

وزيييد ماتنسايش ختي نوعية لعدس تاني تلعب دور
كاين عدس صح مايطيبش
والماء تاني حنا الماء تاع الحنفية تاعنا مايطيبش حتا نشرو سعيدة

[خربشة ناعمة]

المشاركة الأصلية كتبت بواسطة noha_ali31

شكرا لكن البارح جربت العدس تبعت الخطوات والله نفس الشئ بلاك من الماء راني تشهيت ناكل العدس

شوفي اختي راح نقولك على طريقة جربيها و ادعيلي
حطي العدس بعد ما تنقيه مليح
حطيه في شوية ماء يغلي وارمي معاه 6 او 5 سنات ثوم مع وريقة رند لمدة 5 دقايق او حتى تشوفيه بدا يغلي
بعديه على النار وزيديلوا شوية ماء بارد و ديري يديك فالزوج في القدرة و بداي تحكي
في العدس بين يديك راح تشوفي باللي القشرة بدات تتنحى
هكداك زيديلوا الماء و بداي تصفي و ترمي في القشرة


و العدس راح تلقايه بدى اصفر و فيه حبات بقشورهم عادي


راح تقوليلي بلي القشرة فيها الفايدة راح نقولك الفايدة في الحبة الصفراء اكثر
كيما قشور البطاطا فيه الفايدة نرميوه و ماناكلهوش قشور التفاح كدلك قشور الجلبانة والفول فيهم فايدة مع ذلك نرميوهم
العدس كدلك

و دركا نجيوا للطياب والله صدقيني تبعي هاد الطريقة و رديلي الخبر
انا العدس راجلي يقولي في حياتي ما كليتش عدس بنين كيما هدا
و تعلموها جاراتي من الشرق و من الغرب و من الصحراء
و حبوه بزاف و مرة راجلي بعث لصحابوا الغداء و كنت مطيبة العدس للان يشكروا فيه
دركا كل واحد تميتا يعني تبدلوا المدينة اخرى .كي يهدروا معاه في التليفون

يقولوا كاش ماكاين شوية عدس ههه

السر راهوا كامل كي تنحي القشور


المهم رابي هاديك الثوم اللي غلات في الاول مع حبة طماطيش
و ننصحك ماديريش البصل.العدس ما يحبش البصل كيما اللوبيا وهادي المعلومة متبعينها من زمان
و ماني ربي يطول في عمرها تعلمتها من عند الروميات في وقت فرنسا

بعد ما حطيتي الثوم والطماطيش ورقةرند دديري الزيت الملح فلفل اكحل كمون فلفل عكري و الحرور
قليهم مليح و زيدي ديري العدس معاهم يتقلى مع شوية كرافس او معدنوس
و مرقي ضربةوحدة بلاك تزيديلوا الماء من بعد راهوا يجيك صامط و غلقي الكوكوت
و كي تعاودي تفتحي في نص الطياب زيدي ديريلوا مغرف طماطم مع شوية هريسة ادا تحبوا الحار
و غلقي الكوكوت وحد العشر دقايق او ربع ساعة وطفي عليه.يعني وقت الطياب كامل هو 25 او 30 دقيقة لان العدس منحي ا و القشور و مرة على مرة طلي على العدس لانك لوكان تغفلي عليه تلقايه دايب
وطفي عليه
راح تلقايه
المرقة خاثرة وتقيلة متوازنة و اللون يشهي و يفتح النفس و البنة ما نقولكش كيفاش روعة
و الريحة تشميها من بعيد

ملاحظة
ادا حبيتي ديري معاه حبة بطاطا قطعيها في الاول مربعات صغار تتقلى مع الثوم والطماطيش
البطاطا راهي تخرج بنينة مع العدس
و قدميه مع البيض المغلي و الشلادة

جربيه و رديلي الخبر

[noha_ali31]

شكرا لكن على النصائح وراح نجرب نحي القشور ونديرلوا ماء سعيدة وربي يهنيكم ان شاء الله

[AGHA.WISSAL]

تسلم الأيادي

[amina-31]

lentille tchemkhih kbel mataybih ok
ana nkhallat kolchi m3a ba3d w mayjich khal

[kikimnarim2]

انا انصحك بتغيير نوعية العدس الذي تستعملينه...

[OM AYA]

حنونة انقعيه في الما ء السخون ثم قشريه وما ترميش عليه ماء بارد باه ما يقرزنش

وارحي ككامل الخضر مع الزيت والتوابل وحطيهم يتقلاو ثم ارمي عليهم العدس و امرقي بالسخون وما تكتريش الماء وغطي عليه وكي يطيب ديريلو طماطم كونساغف و كملي كمية الماء السخون و خلي تطيب الطماطم و يعقد شوية و بصحتكم جربيها ما تندميش واذا حبيتي كي نطيب العدس نصورلك المراحل و النتيجة وكذلك كاين العدس الاحمر روعة ذوق بنة سرعة في الطهي بدون تعب و قيمة غذائية عالية

[TOFNINE]

ممكن نوعية العدس
ديما نطيب وجامي بلعت الكوكوط على العدس ممكن تبلوكي
شمخيه ربع الى عشرن دقيقة
صفيه ورميه في قدر الكوكوط مع الخضر والطماطم والزيت واللحم كلش بارد فى بارد والماء وعندما يغلي القدر نقصي النار شوية ومرة على مرة حركى
وفي الاخير القصبر او معدنوس مع كمون والرند وتاكليه بالصحة

[anfal10]

ساهل ماهل شوفي يا لالة تبعي طريقتي وتشوفي ايجيك طري الله الله حيري النوعية الطيابة كاين عدس عيان شويا ما يطيبش ليه ليه
المهم انا انقيه من الحجر نغسلوا و نديروا ايطيب في ايناء لما يبدى يغلي نديرلوا نصف ملغقة صغيرة خمارة و انخليه ايطيب في نفس الوقت نجيب الكوكوط نحط فيها البصل مقطع رقيق الملح الزيت ما نكثرش الثوم و التوابل فلفل اسود راس الحانوت العكري قليه مع شويا جاج ولا لحم و لا وحدو ايجي بنين بوالوا ديري زرودية مقطعة صغيرة القرعة و اللفت و البطاطا حبة و لا زوج
قليهم شويا ثم حطي طوماتيش تاع الباطا ملعقة كبيرة صفي العدس ديالك او ديريه معاهم مرقي اغلقي لاكوكوط طلي عليها من ذاك ما تنسايهاش :d و ان شاء الله تنجحي فيه

[ام سوهيل]

أختي إيلا ماعندكش لاكوكوط ديريلو وحدى خميرة الحلوة و راح تشوفي كيفاش يطيب زبدة و الله يوفقك سلام

[هند11]

ياختي روحي اطباق ام رامي تلقاي عدس تاعها راهو طيب زبدة انا منبدلوش ابدا جيني روعة

[نسيم الإيمان]

ديريلو بكربونات شوي برك قدر نص مغرف صغيرة كي تجي تقفلي على الكوكوطة
و الماء جربي ديري تاع سعيدة

[عبد الغني زين]

سلام عليكم خوتاتي انا راني ندرس طبخ جماعي في مركز التكوين وباغي وصفات تحضير لجماعات يعني 100 واحد مثلا كيفاش ندير العدس والاطباق الاخرى العادية مثل اللوبيا .. زيتون الخ

[sandie belle]

كي تجي طيبي العدس, غلي كمية من الماء و في هاد الوقت نقي العدس نتاعك و مبعد صبي عليه الماء المغلي و خليه يتنفخ.
و في هاد الوقت انصبي على المرقة نتاعك عادي : بصل ثوم طماطم حب وملح و توابل و لحم او دجاج و ادا تحبي الحار ديري شوية هريسة و قلي بشوية زيت و مرقي بالماء
نرجعو للعدس كان حبيتي حكيه شوية بين يديك باش يطيرو شوية القشور نتاعو او خليه كيما راه صفيه من الماء و لوحيه في المرقة و اقفلي الكيكوطة حتان يطيب.
كي يطيب ديريلو طماطم علب و قرن فلفل و شوية دبشة او معدنوس و بالصحة و الراحة