تعلمي كيفية اخذ القياسات ....سطايفيه

stayfiya · 2014-12-25, 19:49

السلام عليكم و رحمة الله و بركاته اليوم قلت نستغل وقت
فراغي و نحطلكم درس نوضحلكم فيه
اول خطوه قبل التفصيل و الخياطه كيفيه اخذ القياسات
لأنو لوكان ما تاخذوش القياسات بطريقه صحيحه
ميش راح تتحصلو على نتائج مرضيه
نحتاج لورقه و قلم و شريط قياس و
اكيد اهم شيئ الطرف الثاني لي راحين ناخذو قياساتو
المرحله التاليه الشخص لي نقيسولو لازم يكون لابس حاجه
رقيقه و حافي باش يكونو قياساتنا مضبوطين
توجدي الورقه و القلم و تسجلي كل النتائج
تلاحظي منين يبدا رقم واحد في الشريط و منو تبداي تقيسي
حذاري تقلبيه على الانش

تاكدي يكون على السنتمتر

اول قياس ناخذوه هو
دوران الرقبه tour d'encolure

محيط الصدر tour de poitrine
لازم الشريط يكون داير على اكبر منطقه في الصدر
و هنا ما تزيريش المتر بعدما تاخذي القياس ثبتي الشريط
عند الظهر و طرفي الشريط يكونو على ابرز منطه في الصدر باش تتحصلي
على قياس صحيح

ثاني قياس قياس محيط الخصر tour de taille
نفس الطريقه لكن هنا تكون اصغر منطقه في دوران البطن

ثالث دوران معنا راح يكون محيط الحوض tour de bassin
و هو راح يكون في اكبر منطقه تحت الخصر دائما شريط
القياس مايكونش مشدودعلى الاقل فراغ صغير حق
ما يفوتو صباعك خلف الشريط

ومالازمش نزيدو
من عندنا من اجل الفضفضه لأنو كاين تعديلات
واجبه من بعد نشوفو واش نزيدولهم و كيفاش
نقسموهم و نتعرفو على مواضعهم في الباترون
نكملو مهمتهنا لي هي اخذ القياسات
و نروحو لعرض الكتف من الامام la carrure

و هنا من الخلف رايح تكون اكبر بقليل بما انو الظهر
محدب نوعاً ما

طول الكتف longueur d'epole
تحطي الشريط من اعلى نقطه في الكتف مكان التقاء
الرقبه بالكتف و نمدد الشريط الى زاوية الكتف مكان التقاء الكتف بالذراع

ارتفاع الخصر من امام longueur buste devant
نبدا من اعلى الكتف نمرر على ابرز منطقه في الصدر و نكملو لوسط الخصر

نفس الشيئ من خلف longueur buste dos
من اعلى الكتف مرورا بالظهر الى وسط الخصر

(اكيد هنا نحتاجو قياسات مضبوطه لذلك لازمنا نحددو قيس
الامام وحدو و الخلف وحدو لانو الامام يكون اكثر من الخلف مدام فيه الصدر)
من بعد ناخذ قيس المسافه بين الحلمتين écart des saillants
نحتاجو القيس هذا في تحديد مكان البانس فيما بعد

ارتفاع الصدر hauteur des saillants
يكون من الكتف الى ابرز نقطه في الصدر و هذا يحددلنا خط الصدر

ارتفاع الحوض hauteur de bassin
يكون من جنب يبدأ من الخصر الى اعلى ارتفاع في الحوض
هذا القياس هو لي يحددلنا خط الحوض في الباترون

عمق الرقبه profendeur d'encolure
هنا نحتاح لمسطره نضعها على حافة قاعدة الرقبه
و نقيس من اعلى الكتف الى حافة المسطره

يبقى الطول الكلي من الكتف الى الاسفل longueur total

هاذ القياسات نستعملها في رسم الباترون الاساسي و الكورساج
و كاين قياسات خاصه بالذراع و السروال ...الخ نتطرق لها لاحقاً
بعدما كملنا القياسات نعاود نتمعن في طريقه اخذها و نجرب مبدئيا
حتى نتحصلو على قياسات دقيقه و نهائيه
دمتم في رعاية الله و حفظه الى اللقاء
دعواتكم

om meriem · 2014-12-25, 19:52

الله يبارك ربي يحفظك راكي تعلمينا كل شيئ

stayfiya · 2014-12-25, 20:01

والله غير هبلني المنتدى ثلاث سوايع ما بغاش يطلعلي موضوع. تعبني

mimimouni · 2014-12-25, 20:39

الله يبارك عليك اختي سطايفية
موضوع رائع وطريقة شرحك بسيطة ومفهومة
هذا واش كنت نحوس نفهم
ربي يحفظك وينولك ما تتمناي
سلميلي على ضرة زوليخة ياخي ماتهاوشوش معا بعض هههههه

amira43100 · 2014-12-25, 20:43

ربي يعطيك ما تمناي و يبارك فيك والله راكي تفيدي فينا كثر الله خيرك

stayfiya · 2014-12-25, 21:02

الله يعيشك ام مريم ميمي و اختي اميره
ميمي راهي ما هانتش عليا زوليخه لوله نخبيها راني مقابلتهم لبعضاهم قالتهاش ما كي الضراير هههههه

foufa2014 · 2014-12-25, 21:12

شكرا جزيلا
على الشرح جعلها الله في ميزان حسناتك وجزاك الله خيراعلى هذاالموضوع

رغيوة · 2014-12-25, 21:28

بارك الله فيك اختي ربي يعطيك ما تتمناي ويكثر من امثالك

om safo · 2014-12-25, 21:52

شكرا ليك ختي على الشرح المفهوم بارك الله فيك

الخروبية · 2014-12-25, 22:36

الله يبارك الله يبارك الله يبارك الله يبارك الله يبارك الله يبارك الله يبارك الله يبارك الله يبارك الله يبارك الله يبارك الله يبارك الله الله يببارك من لخروب حتى سطيف يا الحرة بنت لحرار يعطيك صحتك وفى مزان حسناتك ماشى على جال زوليخة بلا سطايفية ياو طرمات حابسين وريدو هابط تحية من الخروبية للحرة سطايفية سلام ياكرام