مطبخي سر سعادتي

chez biba · 2015-01-26, 09:40

المطبخ هو اكثر الأماكن الذي تمضي فيه السيدات معظم وقتهم ... واكيد ان هناك الكثيرات تتعقد من شيء اسمها مطبخ ويعتبر كابوس حياتها ... لما لا تجعليه مكانك التمييز و سر سعادتك!!

حبيت نشارككم بطريقتي في تنظيم مطبخي ... هي افكار بسيطة و يسهل التقيد بها و تطبيقها ...واكيييييد منكم من تعتمدها لكن قلت نحطها للفائدة وصدقوني نتايجها فعالة ...
اولا وقبل كل شيء التنظيم و الترتيب و حسن التدبير ... واهم حاجة لاستمرار النظام هو اعادة الاغراض لمكانها في الحال ... وايضا لازم يكون في مكان معين و معروف لدى الكل في المنزل لكل غرض..لانو سبب الفوضى الرئيسي هو انو يكونو حوايج ما عندهمش محل من الاعراب ههههههه

نبدأ على بركة الله

بالنسبة لخزانة المطبخ
أتخلصي من الاواني الزايدة ....موش تكسريها او ترميها غلفيها او حطيها في كرتون وخبيها في اعلى الخزانة
يعني خلي الضروري فقط .....واللي تستعمليهم بصفة دائمة وهكذا راح تنقسي عليك أواني الغسيل بالاضافة الى مظهر طاولة العمل اللي يكون مشحون و معبي ... والخزانة مظهرها صدقيني راح تلقايه رائع و منظم و موش متزاحم ويسهل عليك اعادة ترتيبو و تنظيف الرفوف كيما تحبي

احرصي على تبطين الرفوف بورق خاص (3 أمتار وبألوان مختلفة) متواجد في الاسواق وبأسعار جد معقولة

ورف اخر خصصيه للعلب ...شتى انواع العلب واملايها البقوليات، السكر، العجائن، كسكس، ارز ... واي حاجة تتعبا في علب بلاستيك او زجاج.
الدقيق حطيه في دلو كبير بالغطاء و حطي فيه صحن صغير مخصص لاخذ الكيل ومعاه غربال صغير ونفس الشيء بالنسبة للفرينة.

خلي دايما رغوة في إناء الغسيل واحدة باش تغسلي فورا الأواني اللي خدمتي بيهم وما يتراكموش عليك في النهاية

واحرصي على غسل الحنفيات مع كل غسيل باش تحافظي على بريقها وتفادي تكدس الكلس

بالنسبة للزيوت (زيت الطهو وزيت الزيتون) استعملي قارورة زجاج خاصة انظف وأسهل بكثير من رفع الدلو الكبير كل مرة...

الخبز حتى يبقى طري حطيه في صندوق خاص بيه وإذا كانت كمية كبيرة خلي واش تستحقي وكونجلي الباقي.

ديري سلة حطي فيها المواد اللي مخبياتها احتياطي او انها ماتحطش في علب

و ممكن تستغلي حتى باب الخزانة ...تعلقي فيه الاكياس من الجهة الداخلية ... او وراء باب المطبخ نلقاها طريقة عملية احسن من وضعها في الدرج

و بالنسبة للاكياس اللي تجي فيها القضية حطيها في كيس كبير من القماش ومفتوح من تحت علقيه وراء باب المطبخ

علب التوابل حطيها بجانب الفرن تاعك سواء اللي تتعلق في الحيط او الفردية عملية اكثر وذات أشكال وأنواع كثيرة

وبجانب الفرن دايما حطي صحن صغير لوضع الملاعق ... للحفاظ على نظافة طاولة العمل

ودايما عند تقشير الخضرة او تحضير حلويات حطي بجانبك كيس تحطي فيه لقشور او البقايا انا نفضل استعمال جرنان باللغة الفرنسية كي تكملي لميه وحطيه في سلة المهملات اللي لازم تكون مغطية بكيس كبير خاص بالمهملات أعزكم الله

بالنسبة للطابونة احرصي دايما على تغطية طاولتها بورق ألمنيوم خشين باش تحافظي عليها وتسهل تنظيفها

بالنسبة للثلاجة كل واحدة عندها طريقتها في الترتيب بما يتماشى مع عايلتها وحاجياتها فقط حبيت نركز على ضرورة استعمال العلب الشفافة للحفاظ على المواد وكذلك على نظافة الثلاجة وتسهل تنظيفها ...

علقي على بابها دفتر صغير مع قلم لكتابة اي غرض خاصك على الفور

والآن ابدعي واسعدي عائلتك بما لذ وطاب بدون تعب
في أمان الله لا تبخلو عليا بدعوة خير

chez biba · 2015-01-26, 09:42

** أرجو من كل اخت مرت على موضوعي وعندها طريقتها الخاصة او اي فكرة يمكنها ان ثثري بها الموضوع لتعميم الفائدة، وَبَارك الله فيكن**

ام سراج وملاك
طريقتي كلما تجيني اي فاتورة نتاع كهرباء ولا الماء نعلقها في الثلاجة باش نتفكرها ونسلكها شوفي ثلاجتي مليح وثاني الخبز نحطو في العلبة هاذيك نتاع لحطب
وين محطوطة العلبة نتاع الخبز في كل درج حاطة حاجة درج حاطة فيه كتاتن نتاع الكسرة مغسولين ومطبقين ودرج حاطة فيه مشتريات كيما لي حطيتيهم في السلة
ودرج حاطة فيه علب بلاستيكية وكل درج حاطة فيه حاجة باش كي نسحق اي حاجة نلقاها في مكانها

kaouka · 2015-01-26, 10:17

صباح الخير biba موضوع جديد ورائع هكذا نستفادو بزاف من بعض ربي يخليك 44444444444444444444444 بصح عجبتني فكرة سﻻ مكنتش خﻻص في بلي شكراً

سعيدة8888 · 2015-01-26, 10:17

برافو عليك
كي نسكن نطبقها

اسماء47 · 2015-01-26, 10:17

موضوع و لا اروع يعطيك الصحة
و كلش منطم و نظيف بارك الله فيك

ام سوهيل · 2015-01-26, 10:20

ربي يخليك 44444444444444444444444

oum imane83 · 2015-01-26, 10:31

lما شاء الله .. روعة ..بارك الله فيك على الافكار النيرة

أم ياسين الزهراء · 2015-01-26, 10:32

الله يعطيك الصحة عجبوني افكارك

قوليلي باش تغطي الثلاجة من فوق

ام سراج وملاك · 2015-01-26, 10:36

شي بيبا فكرة موضوعك رائعة بارك الله فيك

chez biba · 2015-01-26, 10:40

شكرا ليكم على المرور والردود الرائعة كروعتكن ، بارك الله فيكم

chez biba · 2015-01-26, 10:42

اقتباس:

المشاركة الأصلية كتبت بواسطة أم ياسين الزهراء

الله يعطيك الصحة عجبوني افكارك

قوليلي باش تغطي الثلاجة من فوق

الله يسلمك ام ياسو راهو كاين غلاف خاص يغطي الفوق وعلى الجوانب فيه جيوب ومعاه غطاء تاع الرفوف كيما هذا

ام سراج وملاك · 2015-01-26, 10:48

اقتباس:

المشاركة الأصلية كتبت بواسطة chez biba

أرجو من كل اخت مرت على موضوعي وعندها طريقتها الخاصة او اي فكرة يمكنها ان ثثري بها الموضوع لتعميم الفائدة، وَبَارك الله فيكن

شي بيبا حبيت نوريلك طريقتي كلما تجيني اي فاتورة نتاع كهرباء ولا الماء نعلقها في الثلاجة باش نتفكرها ونسلكها شوفي ثلاجتي مليح وثاني الخبز نحطو في العلبة هاذيك نتاع لحطب
وين محطوطة العلبة نتاع الخبز في كل درج حاطة حاجة درج حاطة فيه كتاتن نتاع الكسرة مغسولين ومطبقين ودرج حاطة فيه مشتريات كيما لي حطيتيهم في السلة
ودرج حاطة فيه علب بلاستيكية وكل درج حاطة فيه حاجة باش كي نسحق اي حاجة نلقاها في مكانها

amirateljazayer · 2015-01-26, 10:58

حتى وان كانت بعض الامور معروفة فانك قد تعبت في الموضوع وتستحقين اكثر من الشكر عزيزتي
النظام هو اساس البيت بصفة عامة والمطبخ بصفة خاصة ..فهو المكان الذي نمضي فيه اغلب وقتنا
بارك الله فيك على الافكار اختي ..اشكر مجهودك

chez biba · 2015-01-26, 11:00

بارك الله فيك اختي ام سراج وملاك راني أضفت مشاركتك

ام سراج وملاك · 2015-01-26, 11:10

هنا مدايرا سلة كلما نغسل لماعن نحطهم يقطرو ثم ومداير كتانة نظيفة نزيد نمسحهم بيها ونحطهم في بلايصهم اما الرف الفوقاني حاطة فيهم التوابل لي نطيب بيهم

في الجهة هاذي وفي هاذ الرف حاطة لقدورة لنستعملهم في الطياب وداخل الرف حاطة سارفيس نتاع القهوة ونتاع العصير لضياف نتاع الغفلة