ملف لبعض الحلويات الرائعة

ام سراج وملاك · 2014-10-22, 10:38

حبيت نجمعلكم بعض وصفات الحلويات الرائعة نتمنى انها تنال اعجابكم

تارتولات بكريمة الليمون

المقادير
250غ فرينة + 125غ زبدة باردة+ ذرة ملح +2 ملاعق كبيرة سكر عادي + ملعقة صغيرة لافاني +1صفار بيض+2ملاعق كبار زيت عادي +نصف ملعقة صغيرة خميرة الحلوى+2 ملاعق ماء بارد او حليب بارد

نحلط الفرينة مع قطع الزبدة وذرة الملح و السكر ,نمزج باطراف الاصابع كاننا نقص الزبدة مع الفرينة ,نتحصل على حبيبات رملية نضيف صفار البيض والفاني والخميرة والزيت ونلم بالحليب او الماء, نتحصل على عجينة طرية وملساء
ندهن ليمول الصغار ,نشكل كورات من العجينة ونحل كل كورة في المول, نثقب القاعدة بالفرشيطة , ندخلهم الفرن ساخن على 180درجة ,بعد 10دقائق نخرجها ونضغط بالاصبع قليلا على القاعدة المنتفخة لانه فيها الخميرة ,و نرجعها الفرن حتى تاخد اللون الذهبي نخليها تبرد تماما ثم نحيها من ليمول

كريمة الليمون
كاس و ربع سكر عادي ( 250غ )
كاس ونصف ماء ( 300ملل)
نضعهم فوق النار حتى يذوب السكر تماما ثم نضيف 3 ملاعق كبيرة و نصف مايزينة (75 غ ) و نحرك على نار هادئة حتى يتخثر الخليط و يصبح ثقيل, نبعد الاناء عن النار و نضيف 3 صفار البيض ونخلط جيدا ثم نعيده على النار متوسطة مدة دقيقة كاملة ,نبعده عن النار و نضيف ملعقتين كبيرتين زبدة (70 غ )و نخلط ثم نضيف عصير ليمونة صفراء كبيرة +مبشور القشرة ( zeste) و نحرك جيدا ,نتحصل على كريمة الليمون لذيذة جدا
نحشي بها التارتولات و نزينهم بالشوكولا الذايبا على شكل خطوط رفيعة

لخوخات

العجينة
علبة ياغورت طبيعى (ممكن نعوضها بالرايب) +نصف كاس حليب دافى +3ملاعق كبيرة سكر +1 ملعقة كبيرة خميرة الخبز +1خميرة الحلوى +ربع كاس زيت ,ملح ,و2 كاس ونصف فرينة

نخلط الكل حتى نحصل على عجينة لينة ندهنها بالزيت ونغطيها ونتركها تخمر مرة ثم نزلها ونتركها تخمر مرة ثانية ثم نشكلها كورات صغيرة مثل حبات الجوز ونتركها تخمر مرة اخرى ثم نطيبها

نحضر كرام موسلين وهي كرام باتسيير + زبدة
كرام باتيسيار(نصف لتر حليب +100غ سكر عادي +75غ مايزينة +حبة بيض )
و الزبدة (125غ زبدة فلوريال +2ملاعق فانيليا)

نخلط الحليب مع السكر والمايزينة والبيضة ونديرهم فوق النار ونبقى نحرك حتى تعقد . نطفي النار و نضيف 25غ زبدة ونخلط حتى تذوب الزبدة نغطيها بالبلاستيك و نخليها تبرد مليح
نضرب 100غ زبدة المتبقية مع ملعقة كبيرة من كرام باتيسيار الباردة
و نضربهم جيدا ثم نضيف بقية الكرام باتيسيار و2 ملاعق كبار فانيليا و نضرب حتى نتحصل على كرام موسلين تلمع .

ناخذ الكورات بعدما طابو وبردو ونفرغها قليلا من الاسفل ونحشيها بكرام موسلين ونلسق كل حبتين مع بعض وندهنها بمعجون المشمش ونرمدها فى السكر العادي ونزينها باوراق من عجينة السكر

بقلاوة ملونة

مقادير العجينة
4 كيلات فرينة + كيلة دهان (3/4 سمن مدينة +1/4 زبدة لابال او ستار)+ ماء الزهر نذوب فيه رشة ملح +الماء + بودرة كاكاو

نخلط الفرينة مع الدهان ذايب وبارد ونحلهم براحة اليد ثم نبلل بخليط من الماء وماء الزهر حتى تتلم العجينة نقسمها الى كريات ناخذ كورة ونلونها بالكاكاو نغطوهم ونخلو العجينة ترتاح
الحشوة
3كيلات لوز + كيلة سكر عادي ناقصة شوية +زاست نتاع القارص +لافاني ونبلل بماء الزهر واذا استعملنا الكاوكاو نضيفلو معطر لوز مر +معطر لوز حلو
الطريقة
نرش الطاولة بالميزينة (النشاء)ونحل العجينة بالحلال ثم في المشينة ,نذوب مارغرين التوريق (صالحة) وندهن الصنية ونحط 4 طبقات وندهن بين كل طبقة وطبقة ونثقبها بالشوكة ونفرغ فوقها الحشو ونسوي السطح مليح ثم نزيد ثلاث طبقات وندهن بينهم
اما الطبقة الاخيرة نحل العجينة البنية ثم نمررها في الجهة الاخرى لمشينة البقلاوة للحصول على شرائط ونفس الشي بالنسبة للعجينة البيضاء يصبح عندنا شرائط من اللونين نبدا من وسط الصنية ندهن ببياض البيض ثم نحط شريط بني وبعدو ابيض وهكا واحد في جنب واحد ومايكونوش متباعدين حتى نكمل ثم نقطع البقلاوة مربعات ونحط فوق كل مربع وردة وحبة لوز او كاوكاو وندهنها للمرة الاخيرة وندخلها للفرن وفور خروجها وهي ساخنة نسقيها بالعسل نضيفلو قليل من ماء زهر ونخليها في الصنية ليلة كاملة ثم نقطعها ونحطها في ليكيسات

قاطو الفرشيطة

المقادير
250 غ زبدة طرية
3 صفار البيض
150 غ سكر قلاصي
1 ملعقة صغيرة من خميرة الحلوى
70 غ مايزينة (نشاء)
400 غ فرينة تقريبا
1 ملعقة صغيرة من لافاني
مربى المشمش
شوكولا
الطريقة
نخلط الزبدة والسكر حتى تصبح مثل الكريمة ,نضيف صفار البيض و لافاني ونخلط ,ثم المايزينة ,ثم الفرينة مع الخميرة تدريجيا حتى نتحصل على عجينة لينة ,نشكل كورات صغيرة ، ونضغط عليهم بالفرشيطة (الشوكة) نحطهم في الصنية وندخلها الفرن الساخن على ‍180 درجة حوالي 20دقيقة (مايحمارش يبقى بيض)
نلصق كل اثنين مع بعض بالمربى ثم نغطس نص الحبة في الشوكولا الذايبة (نذوبوها في حمام مائي ثم نضيفلها شوية ماء)

حلوى رخامية بالفلان

*المقادير
120غ زبدة لينة
100غ سكر
100غ لوز محمر ومطحون جيدا
كيس فلان ذوق الكراميل
كيس سكر الفانيلا
ملعقة صغيرة خميرة الحلوة
1 بيضة
الفرينة حسب الحاجة

*الكريمة
50غ زبدة
100غ سكر قلاصي
ملعقة كبيرة شوكولا غبرة

للتزين
شوكولا سوداء وبيضاء
لوز أو كاوكاو مطحون متوسط

طريقة التحضير :
نخلط الزبدة و السكر جيدا , نضيف البيضة ثم اللوز و الفلان و سكر الفانيلا ثم الخميرة الكيميائية مع الفرينة حتى نتحصل على عجينة طرية .
فوق طاولة العمل نبسط العجينة و نقطع دوائر , نضعها في صينية و ندخلها الفرن الساخن على 180 درجة تقريبا 15دقيقة ,ثم نتركها تبرد .
نحضر الكريمة بخفق الزبدة بالخلاط الكهربائي حتى تصبح كريمة ثم نضيف سكر قلاصي و الشوكولا غبرة ونستمر في الخفق .
نلصق كل حبتين حلوى مع بعض بالكريمة ثم نمرر الحواف في اللوز أو كاوكاو
نطلي وجه الحلوى بالشوكولا البيضاء (مذوبة في حمام مائي او ميكرو أوند ) ثم نعمل خطوط دائرية بالشوكولا الأسود وبواسطة عود الاسنان او السكين نزين من الوسط نحوى الاطراف ,نتركها تجف.

حلوى رااائعة بالبوبينة نتاع الخيط
حلوى ساهلة وتذوووووب في الفم

المقادير:
3بيضات،كاس سكر عادي،كاس زيت،كاس فرينة،لافاني،1خميرة الحلوى،مايزينة،معجون،القليل من النواد كوكو
الطريقة:
نخلط البيض مع السكر والفاني جيدا نضيف الزيت ونخلط ثم الفرينة والخميرة ثم نبدا نضيف فالمايزينة حتى نتحصل على عجينة متجانسة وطريا نصنع كويرات صغيرة ونحطها في الصنية.ثم نشكلها بالبوبينة تاع الخيط فارغة (la BOBINE ).نحطها في المايزينة في كل مرة ونضغط على الكويرات ,ندخلها تطيب على 180 درجة حوالي 10 الى 15 دقيقة ولما تبرد نلصق كل زوج حبات بالمعجون ونزين الحواف بنواد كوكو

حلوى ترافل

المقادير:
125غ مارغرين
125غ سكر ناعم glace
100غ مايزينة
نص كاس زيت
ملعقة قهوة خميرة كيميائية
ملعقة قهوة فانيليا
بيضة كاملة وصفار بيضة
500غ فرينة بالتقريب
العقدة:
لوز او كاوكاو
حلوة الترك
معجون
للتزيين:
سكر ناعم
شوكولا ذايبة

التحضير:
بواسطة الخلاط الكهربائي نخلط المارغرين والسكر الناعم ,نضيف البيضة وصفار بيضة ثم الزيت,الفانيليا والمايزينة,نخلط الخميرة مع الفرينة ونضيف بالتدريج ونلم باليد حتى نتحصل على عجينة متماسكة
نغلفها بكيس بلاستيكي وندخلها الثلاجة مدة 10د
العقدة:
نخلط اللوز وحلوة الترك ونلمهم بالمعجون
نشكل كويرات صغيرة وندخلها الثلاجة حتى تتماسك,نشكل كويرات من العجينة تزن 24غ ونحشيها بكويرة من العقدة ونضعها في مول السيليكون ,ندخلها لفرن 180 درجة مدة 20د
بعدما نخرجها نرش عليها السكر الناعم ونزينها بالشوكولا
نقدرو نديروهم يلا عقدة ونديرو شوكولا ذايبة في المول ونحطو حبات الحلوى فوقها ونخليها تيبس

تارتولات بكريمة اللوز
المقادير:
العجينة :
*250غ زبدة فلوريال
*125غ سكر عادي
*2حبات بيض
*م ص لافاتي
*1/2 م ص خميرة الحلوى
*500غ فرينة

كريمة اللوز
250غ سكر/*250غ زبدة/*250غ لوز مرحي بقشورو و ماشي محمص /*لافاني /*5حبات بيض/*80غ فرينة

طريقة التحضير:
للعجين
نضرب السكر مع الزبدة مليح , نضيف 2 بيضات, لافاني ونخلط ,ثم الفرينة والخميرة ,نغطي العجينة و نخليها تريح شوية
كريمة اللوز
نضرب السكر مع الزبدة مليح ,نضيف البيض حبة بحبة و نخلط ثم ندخل الفرينة و اللوز بالسباتولا ,
نحل العجينة بالحلال تكون شويا رقيقة ,نقطع دوائر ونضعهم في مول الدزيريات ثم نعمرهم بكريمة اللوز 3/4 وندخلهم الفرن على 180درجة حتى يطيبو ويحمارو ,ثم ننزع بواسطة ملعقة الوسط ونزين بكرام شانتيي ثم نعيد الغطاء فوق كل حبة ونرشهم بسكر قلاصي ونزينهم بخطوط من الشوكولا الذايبة

تارتلات بكرام باتسيار

التحضير:
العجينة : نخلط 100غ زبدة طرية + 50غ سكر + لافاني و رشة ملح ثم نضيف 1 بيض + 2م ك مايزينة ونخلط + نصف ملعقة صغيرة خميرة الحلوى+ الفرينة حتى تتلم تكون عجينة طرية نغلفها وندخلها الثلاجة ترتاح من 10الى 15د.
من جهة اخرى نحضر كرام بتسيار.
نخلط 3 صفار بيض + 3م ك سكر عادي + 3م ك مايزينة + نصف لتر حليب + قشور الليمون نضرب الكل في الخلاط الكهربائي ثم نضعها في كسرونة ونحطها على نار متوسطة مع التحريك حتى تعقد نضيف قطعة زبدة ونخلط ثم نعمرها في مول السيليكون نتركها تبرد و ندخلها الثلاجة .
من جهة اخرى نحل العجينة بسمك 5مم ونقطع دوائر على قياس المول نضعهم في صينية عليها ورق الطهي وندخلهم لفرن 180درجة لمدة 10د
بعدما يبرد ندهنهم بلاجولي او المربى و ننزع الكرام بتسيار من المول و نحطهم فوقهم و ندهن الحواف و نزينهم باللوز او كاوكاو او بيستاش.......الخ وفي الوسط نزين بالكرام شانتيي

كيكة الياغورت الرّخامية

بيض 3، علبة ياغورت ،نقيس بنفس العلبة , 2 سكر، 1 زيت،3 فرينة ،كيس خميرة الحلوى، قشور الليمون ،ملعقة كبيرة كاكاو،ملعقة كبيرةحليب.
نضرب البيض و السكر،حتى يتضاعف حجمه ،نضيف الياغورت ,الزيت ، ثمّ الفرينة و الخميرة المغربلين تدريجيا ونخلط بالملعقة ،نزيد قشور الليمون, نقسم العجينة إلى نصفين ،نضيف للقسم الثاني ملعقة كاكاو و ملعقة حليب.
نضع ورق الطهي على الصينية ثم نضع في وسطها ملعقة من الخليط الابيض ثم ملعقة من الخليط البنيّ،نكرّر العملية حتى ننهي الخليطين، نقلب السكين ونعمل خطوط متعاكسة للحصول على شنل وردة. ندخلها الفرن الساخن على °180 مدّة 20 الى 25د.

متنساوش اخواتي دعوة خير تكفيني وشكرااااااااا