عقود ماقبل التشغيل في مديريات التربية

خالد الجوهري · 2013-12-28, 11:33

البسملة1

اليوم راح نطرح عليكم السؤال :
ماهي مهام ملحق تربوي و مساعد ادراي و مساعد اداري رئيسي
لان بعض المدراء التربية ومدراء مدارس الابتدائية و المتوسطة والثانوي
يستغلون فئة العمال عقود ماقبل التشغيل في امور اخرى لذلك يجب ان تكون مهامنا موحدة
لكي لا يكون لاحد الفرصة ليستغل الاخر ولا سيما توقيت

mokeddemmostafa · 2013-12-28, 14:59

انا راني خدام في ابتدائية في اطار عقود الادماج المهني في الادارة مع العلم انني عندي شهادة ليسانس في العلوم الاقتصادية ونخدم في الاستشارة مثلا نسجل الغيابات ....

كلمات معبرة · 2013-12-28, 17:27

يا ختي او اخي كلنا نعمل بدون شهاداتنا
عن نفسي اعمل بثانوية امرر ورقة الحضور كل ساعة لاساتذة هو بنفس الشهادة معي
والله ايا اجيني الدمعة لكن قدر الله ماشاء فعل
وربي يفرج علينا

rihabamal · 2013-12-29, 17:27

السلام عليكم

أنا ثاني راني في إبتدائية نخدم الأمور المتعلقة بالإدارة كالشهادات المدرسية

وزيد نعمر الأوراق الخاصة بالمطعم درست الحقوق و اليوم راني نضلي نحسب شحا ل دارو بطاطا و شحال بصلة للفطور

حسبنا الله و نعم الوكيل

bourahla mohamed · 2013-12-29, 18:36

ma3lich ana tani kont kifak basah rabi farag 3liya basah hata digadit niveau
inchaa allah rabi yfaraj 3likoum

حنين الماضي 193 · 2013-12-30, 12:36

انا تاني دخلت جديدة في لاداس في الابتدائية نخدم في خدمة خاطيني كيما قالت الاخت نحسب البطاطا والبصلة ونكتب الامتحانات والله ربي يكون في عونا

imad1483 · 2013-12-30, 15:11

السلام عليكم
يا اخي مادامك تخدم في إطار الإدماج المهني .... تخدم كلش على جميع الجبهات
ماكان حتى واحد يخدم بالشهادة تاعو
المهم المنصب الفارغ راك تعمرو كون يعود حتى جنايني ولا في مطبخ
حسبنا الله و نعم الوكيل

HAKIM HA · 2013-12-31, 00:20

واش دير يا خويا هذا هو الحال

انا راني نخدم الثلاثاء الصباح لا غير و نمرر ورقة الغياب على اساتذة كيفي انا لي مفروض انا استاذ تاني

ما يحس بالجمرة غير لي كواته لاني راني الحمد لله عندي استخلاف مين تجي عندي لي تمرر ورقة الغياب نروح ليها نجري و اعتذر منها لاني نحس بيها

خالد الجوهري · 2014-01-04, 17:16

شاركوا اكثرا ليعرف الجميع ماهو جهاز عقود ماقبل التشغيل
هل جهاز للتكوين او حساب الخبرة لهؤلاء الفئة

2013 rose · 2014-01-04, 18:16

انا كنت نخدم في مركز التكوين المهني كنت حكمة مصلحة التمهنين دخلت في 2012 كنت انا نسير مصلحة وحدي
لخطرش مساعد تقني البيداغوجي لي ربح بوست راح يدير ستاج و في سبتمبر 2013 دخل تقول قاع مدخلش هو يخلص 4 ملايين و نا ندير كولشي
درت تحويل العقد و الحمد الله سنياولي و غدوى ان شاء الله عندي اول يوم في ثانوية معلبليش وين راح يديروني بصح انا كون نصيب نخدم مع مقتصد
على حساب ليسونس لي عندي

~~زينو الاغواطي~~ · 2014-01-04, 19:54

يا خاوتي انا فرضت على المدير بلي جاي نربح في الخبرة المهنية قبل مانكاشي اول مرة نروح نسقسي المدير إدا كنت تهداني نربح في الخبرة في التخصص التدريس وسقستو وش تكتبلي في شهادة العمل ايا قالي قري 4ساعات في الاسبوع وروح كمل قريتك والحمد الله أطلب منكم ان تسئلو المدير قبل ان تكشو في المؤسسة اللي تعطيكم الفايدة

~~jobs-algeria~~ · 2014-01-05, 15:00

لكل من يريد أن لا يستغل من طرف أي مسؤول في أي مؤسسة أو شركة عمومية أو خاصة

ما عليه سوى

قراءة القانون الأساسي لتلك المؤسسة أو الشركة وقانون الوظيف العمومي وكذالك القانون بشكل عام

أعرف بعض الناس لديهم...... ثقافة قانونية رائعة..... استثمروها في عملهم ... حيث يعرفون عملهم بالتحديد

يعني واجباتهم وحقوقهم

وعندما يتكلم المسؤول .... خارج إطار القانون فهم لا يعيرونه أي اهتمام

يا ترى.... هل هذا مريح ؟

وما الذي سوف يفعله أي مسؤول عندما.... يواجه أناس يعرفون أحيانا --- حتى صلاحيات ذالك المسؤول أحسن منه---

نتمنى التوفيق للجميع

وأقول باختصـــــــــــااااار----- عدم معرفتك للقانون = أخذ حقوقك بل والتعدي عليك.

amalelrouh · 2014-01-05, 18:37

انا في عامي الاول خدمت في ابتدائي كنت انا والفام دوميناج كيف كيف اتخيلو كنت انسسيق القاعات مع التلاميذ كي يكون عندنا ملتقى وانوجد القاطو ونمسح الغبرة
دارو فينا الراي
بعد عامين اتبدلت لليسي كنت نخدم من الثمنية حتان للخمسة ونص
ايا من بعد جاو بنات عقود جدد منها بديت انا نكره وليت نخدم بنفحتي نهار نجي وعشرة مانجيش
ودركا راني نروح غير باش انحلل دراهمي دايرتها نهار بنهار من التسعة لل 11/30 والعشية ثاني ودرنا اجتماع مع المدير قلنالو حددنا مهامنا
دركا كل واحد عندو مهامو انا نخدم في الرقابة العامة ونتبع في مراسلات الغيابات وبس

mimi-dz · 2014-01-06, 15:52

انا نخدم في الامانة والله يا المديرة غير نعم الناس وما تحاسبنيش على التاخر ولا الغياب وجامي قاستني بهدرة ومدللتني وانا ثاني عارفة قدري نخدم خدمتي وشادة فمي ووثاني شادة لوجسيال تاع كشوف النقاط مرات تجي خدمة زايدة ومرات ما تكونش خلاص كاينة الخدمة التوقيت من 8 حتى 15 وبيني وبينكم ديما صباح روطار 8.30 انا مشكلتي في البعد وحق النقل والغداء والراتب لي 3 اشهر ما شفتوش ربي يفرج علينا جميعا

N.alger · 2014-01-06, 19:50

السلام عليكم ورحمة الله وبركاته....كذب من قال أن عقود ما قبل التشغيل تكسبنا الخبرة...في الحقيقة تعلمنا التخلف خاصة اللي يخدمو في قطاع التربية ابتدائيات او متوسطات او ثانويات أنا عن نفسي نخدم في مفتشية ابتدائية لكن واش تعلمنا؟ سجل الوارد وسجل الصادر وكاشيهم وبالاك تنسى الرقم وخدملي جدول ارسال...وزع البريد...اكتبي الندوة في الوورد وفي Power Point ....ابحثي لي عبر النت عن هذه الكتب...الفوتوكوبي...والفوتوكوبي بالزوم للكتب القديمة والمكتوبة بخط صغير (حتى يتمكن من قراءتها بخط واضح ميعييش روحو)...والمشكل الكبير واللي قاللهم ارقدو يجي ساعة في اليومين ويخليني مباصيا مع أولياء التلاميذ وخصوصا عند الدخول المدرسي نجوز نهاري كامل ندارب معاهم كاين اللي يحب يحول وليدو وكان اللي يحوس رخصة تخفيض السن وخلي وخلي وكل شي يحصل في راسي...ولست الوحيدة فكل أصحاب عقود ما قبل التشغيل يعانيو الأمرين...والله كاين بنات نعرفهم يخدمو في الإدارة ويغسلو في المطعم...وكاين رجال يخدمو عقود ما قبل التشغيل ورغم الشهرية القليلة يطمعو فيهم المدراء والمفتشيين -اللي عندهم السيارات الفخمة- يديو ويجيبو البريد من الأكاديمية ومصاريف التنقل من جيوبهم لا حول ولا قوة إلا بالله....وين راكم يا مسؤولين؟؟؟؟ -علابالي متسمعوش قاع بيا- والله تتحاسبو من جهة ربي حساب عسير معلابالكمش واش راهو صاري قاع....أنت يا مسؤول تخبط صدرك وتقول انا مسؤول ههههه بالاك شهادة كي الناس متسعاهاش...على واش مسؤول؟ على عايلتك وأهلك وأقاربك ومعارفك....بارك الله فيك كفيت ووفيت...وفي الختام صدق من قال عقود ما قبل التشغيل علمتنا التخلف حتى واش قرينا قضاونا عليه صح خاوتي؟ وحسبيا الله ونعم الوكيل