كب كيك الشوكولا بأكواب الشوكولا

ladymillion · 2013-05-02, 21:15

بسم الله الرحمن الرحيم

كب كيك الشوكولا بأكواب الشوكولا

هذه الوصفة للأخوات لي طلبو كب كيك لي شافوه في موضوعي صور حلوياتي وأنا درت كمية قليلة باش نوري للاخوات الطريقة مع الصور

أولا نبدا بمقادير الكعكة الاسفنجية اي الجينواز شعلي الفرن 180° وابداي

المقادير:

2 بيضات + 4 ملاعق كبيرة سكر+ 4 ملاعق كبيرة زيت + 4 ملاعق كبيرة فرينة +قرصة ملح + نصف باكي خميرة القاطو+ قشور ليمون+ شوكولا فينيتي أي نوتيلا

اخفقيهم في الخلاط عادي كيما المادلان

وحضري قوالب السيليكون حطيها في مول المادلان وحطي ملعقة كبيرة من الخليط في قوالب السيليكون وزيدي حطي شوي شوكولا وبعدها ملعقة كبيرة ودخليهم الفرن حتان تشوفيهم حمارو ومتحليش عليهم حتان يطيبو وخرجيهم حطيهم على جنب

وهاذو بعد ما طابو

ذوبي الشوكولا في حمام مائي
وانزعي لكيسات برفق من اكيكات الصغيرة
وباستعمال ملعقة صغيرة حطي كمية من الشوكولا و وزعيها بالبانسو في الوسط وعلى الجوانب وحطي عليها الكيكات وحطيهم في الكولجيلاتوغ يحمدوا وكي تجمد خرجيها ونحي القالب يجيك ساهل كي تنحيه وتجي الشوكولا حاكمة شكل قالب السيليكون كما في الصورة

بالنسبة للكريمة ديري نصف كاس حليب مع 4 ملاعق كبيرة من كريمة الشانتيي و 2 ملاعق صغيرة كاكاو واخفقي مليح حتى تطلع الشونتيي وزيدي أضيفي م ك شوكولا ذايبة أو نوتيلا
وحطيها في كيس حلواني وزينيها كيما تحبي

هاهو شكلو الاخير

وهذه هي صورة كب كيك لي درتو من قبل وحطيتو في الموضوع

وهذا عملي لليوم

تحياتي وانشاء الله نكون أفدتكم بوصفاتي

ladymillion · 2013-05-02, 22:46

وينكم يا بناااااااااات اين الردود

oum anas 69 · 2013-05-02, 23:40

رااااااائع غاليتي أنتي نجمة جديدة سطعت في سماء منتدى الجلفة مزيدا من الإبداع و التألق

ladymillion · 2013-05-03, 11:09

بارك الله فيك نزيد تألقي باعجابكم

sbmwhadz · 2013-05-03, 11:32

شكرا لوفاءك و في انتظار باقي الوصفات فأنا على أحر من الجمر

youcefi sabrina · 2013-05-03, 11:39

merci beaucoup ma chère

oumjiji · 2013-05-03, 16:10

راكي فنانة راني طلبت وصفة الموس شيكولا والجنواز وماكانش حتى رد بليييييييييييييييييييييييييييييييييييز جاوبي عليا ويعطيك الصحة

اميرة في دنيا حقيرة · 2013-05-03, 16:19

بلا منعطوك راينا راكي قمرة ماشي غير نجمة مضوية متحتاجيش لراينا يضويك شكرا ليك حنونتي و اكيد رانا نستناو باقي الوصفات

JIMI17 · 2013-05-03, 17:35

رائععععععععععععععععععععععععععععععععععععععععععععععع عععععععععععععععععة

ladymillion · 2013-05-03, 19:51

اقتباس:

المشاركة الأصلية كتبت بواسطة oumjiji

راكي فنانة راني طلبت وصفة الموس شيكولا والجنواز وماكانش حتى رد بليييييييييييييييييييييييييييييييييييز جاوبي عليا ويعطيك الصحة

يا أختي الوصفات لي طلبنيهم راني كيبتهم في تعليقات موضوعي صور لبعض حلوياتي شوفي في الصفحة 2 ولا 3 نسيت المهم تلقايهم وراني عن قريب نديرهم ونصور بالخطوات شكرا بزااااااااااااااف