هل علي ان اطلق الفتاة لي راني عاقد عليها

[مشكلتي]

وقع لي مشكل مع فتاة لي راني عاقد عليها. هاذ المشكل هوا انها دائما ما تخرجلي شغل عدوة في اي مشكل ندخل فيه طول لسانها غير معايا، مؤخرا فقط وقع لي مشكل كبير نوعا ما مع موظف معايا في العمل و بحكم اني مسؤول في العمل عاقبت هاذ الموظف ، فإذ بعد ايامات قليلة تقولي لي بحال مرتي عندو الحق فيك بين قوسين خاطر دارلي مشاكل في العمل كبيرة بالرغم اني نفهمها في مشكل مليح مليح . غاطتني كي جات معاه و عطاتو الحق و عايرتني بهدرتو برغم من اربع سنوات خطبة منها سنتين عقد و عندي مادرتلها غير زينة في حياتها لي متحلمش بيها اي طفلة ولكن شحال من مرة انا لي غالط في مشاكلي مع الناس. خمس ايام مكلمتهاش كوبيت عليها تيليفون والله ماحوست عليا ولا قالت نراضيه ولا نشوف واش بيه . على كل حال خاوتي عزمت على طلاق و استخرت الله عزا و جل حبيت نستشيركم واش رايكم .

[حورية تو]

يا أخي مثل هذه الأمور تحدث إن قمت بتطليقها وتزوجت بأخرى ستجد نفس الأمر ..بدل ما تطلق كن صريح معها عالج مشاكلك بدل الهروب منها وإلا لن تستطيع الإستقرار
أم تظن أن الزواج ليس فيه إلا الألوان الوردية ...كن أكثر صلابة و أكثر مسؤولية

[nadir_telecom]

يا أخي إذا بدات المرأة أو الصديق يخرجلك شغل عدو أو عدوة دير في بالك بدات تكره طريقة التفكير ديالك ماعناتها ماراهيش تحملك والله العظيم ماني نحرد فيك بصح هذي هيا الحقيقة + 4 سنين خطبة بزاف هذه هي أسباب المشاكل و لوكان تزوجتها تشوف منها ما أكثر مادام راك إستخرت دير لي تريحك أخي و خيرها في غيرها إنشالله بالتوفيق السلام

[ع.عيسى]

لا يمكننا الجزم بذلك
فلربما هي تنهرك لأنها تراك ظالم....
ثم 4 سنوات خطبة وعاقد عليها... هادوين اكتشفت انها عدوة؟... هادي من المفروض في الأشهر الأولى تعرفها ماشي بعد مرور 4 سنوات + عقد شرعي ومدني.. لو كانت جات خطبة مدتها أشهر نقلك الغيها وشوف أخرى.
ومع ذلك باش ما نظلموكش.... تريث وزيد صلى استخارة... ولكن اهم حاجة هو انك مقتنع بها... لانه ان تطلقها قبل الدخول اهون من ان تطلقها بعد الدخول*

[Anabela]

هذا قرار كبير ، ومنظنش بالمشكل الكبير يمكن كين سوء فهم فيما بينكم برك ،عاود استخر ولا تستعجل وسقسي والديك ونتس اصحاب تجربة وجرب تفهم عقلية ابمراة هذي وبلاك حتا نتا فيك امور خاطئة حاول تصلحها ومدام عاقدين اثعد معاها وتفاهمو بالتراضي وشوف وش لي يخليها دير هكدك وفهمها بلي تصرفاتها تضرك وان شاء الله تتوصلو لحل يرضي الطرفين

[قدور بن عاشور]

عامين و انت عاقد يا حبيبي وين رايح بها؟
أظن هذا هو المشكل الحقيقي لي من تحته تخرج كل المشاكل الأخرى
واش راك تستنى؟ راك خدام لاباس بيك، تزوج و تهنى و هنيها معاك

[ابو سليمان10]

استغرب من الناس الذين يخطبون لمدة سنوات و يعقدون ايضا...لو لم يكن هناك عقد على الاقل الانفصال سهل...الان تصبحان مطلقان و فيها اجراءات

[natssomi]

السلام عليككم ، هذا هروب من الواقع با أخي ...........راه زوجتك ان كرهت منها خلقا رضيت منها آخر ، علاه تزرب تتهور بالطلاق وبينتكم مودة وصداق وعقد ،أهدر معاها فهمها فالمشكل بالعقل وتناقشوا ، الهروب ليس دائما هو الحل