المدرسة العليا للعتاد الحراش

[canada_13]

السلام عليكم و رحمة الله
لقد كنت في ثكنة الحراش سابقا و سأزودكم ببعض المعلومات عن هذه المدرسة -تجارب حدثت معي - و سأبدأ من يوم الدخول حتى الخروج
-عند الوصول الى الحراش من محطة القطار تستقل تاكسي و تقولوا يحطم في المدرسة العليا للعتاد الثمن 35 دج للبلاصة -اذا بغيت تروح وحدك اتفاهم معاه على السومة-
-وصلت الى الثكنة على الساعة 15:00 قبل الدخول اتصلت بالأم و طمأنتها بوصولي كما اتصلت ببعض الأصدقاء...........و خبأت الهاتف
-دخلت الثكنة أخذ مني لوردابال و بطاقة التعريف و تم تفتيشي تفتيش عادي شاف في الحقيبة بوخفيف و قالي اسنا درك ندخلك - هذا اللي يقعد عند الباب -
-بعد فترة جاء جندي و أخذني الى داخل الثكنة - الله يبارك الثكنة نقية و كبيرة - المفييد هدرنا انا و هذاك الجندي قالي الحالة لاباس
- وصلنا للشاليات وين نرقدو سبتهم مراسومبلين و كانوا حاكمينا 2 ابلي دركا يكونو كملو هايا امالا مدلهم الجندي الوثائق نتاوعي مدولي كأس و مغرف و اداني واحد من هاذوك اللي حاكمينا للشالي اللي نرقد فيه حطيت كابتي في لارموار و بلعتها و رحت نتعشا ....
- كيما رجعت راسومبلينا حسبونا و جبو لا ليست اللي يروحو للعيادة في يوم غد و اللي يروحو الى البليدة .....أنا كنت في قائمة العيادة لانوا متقلبتش
-كيما كان الحال جمعت شوي مع الجماعة و رقدت ....الصباح 4 تسوني الاولى و يجي واحد ينودك يشعل الدو تنوض تغتسل تصلي .......و تدي كاسك و تهبط باش تروح تستقهوا
- كيما رجعت عاودو عيطونا اللي نروحو للعيادة قالك اللي عندو دوسي يجيبو و يجيب التلفون باش يدفعو
- كان عندي دوسي تع عينين اديتو و رحنا للعيادة فتنا على الطبيب على 8 8.30 ميحلبكش كامل الطبيب يا يديرك apte يا instant انا دارني instant
- كيما جزت للعيادة و رجعت للشالي بدا روتين واحد يدور : تنوض صباح على 4 تستقهوا ترجع راك قاعد برا في البرد جماعة اللي مفاتوش للعيادة يروحو جماعة يروحو للبليدة جماعة يتلعوا يسيقوا شنابر و لوخرين راهم قاعدين حتى لل 8 تراسمبلوا يحسبوكم و تدخلوا للشاليات اللي يرقد اللي يقرا اللي يشارجي التلفون بالتخبية ............:11:00 تسوني تخرجو يحسبوكم يكونوا رجعو نتاع العيادة تروحو تفطرو ترجعو يحسبوكم و تدخلو ا تدخلوا للشاليات اللي يرقد اللي يقرا اللي يشارجي التلفون بالتخبية ......... 16:00 تسوني تخرجوا م يكونو رجعوا نتاع البليدة . تراسومبليو ممبعد يجبد لا ليست يعيط الي راحو للبليدة نتاع البارح و اللي راحو في هذاك النهار حتى غدوة باش تحرج ريسيلتا ....للي عيطلو محسوب يرفد كابتو و يدفع كاس و مغرف محسوب قبلو الملف نتاعو يروح لدارهم لوخرين اللي بغا يروح كاش ميشري من foyer ممبعد 17:30 تتجمعوا تروحوا تتعشاو و ترجعو تراسومبليو يحسبوكم و تخرج لا ليست اللي يروحو غدوة من داك للبليدة و اللي يروحو للعيادة ..........وو راهي تتعاود
ملاااااااحضات هامة :
-البورطابل ممنوع ادي معاك 2 واحد ادفعوا وواحد خبيه
- كاين وحد المقال في المنتدي يقلك واش تدي صوالح معاك و دراهم و كامل ....
- الحراش ثكنة نقية التوالات نقية الماكلة شابة
- اللي يحكموكم راخم كل دفعة يتبدلوا يسما نتا و زهرك
- اللي عندو اي دوسي يديه ... الطبيب ميقدرش يقلك اذا يقبلولك دوسي هو يبعث للبليدة و اللي معندوش دوسي يديرو مقبول
- اللي يدخل مع الصباح يدفع البورطابل و يروح للعيادة في نفس النهار ماشي كيما صراتلي انا دخلت في المساء
- الروطار انصحكم ماديروش بزاف
-بخصوص الفائض يبداو للي راهم instant و مزال مافاتوش للبليدة ثم يتلقوا من الكبار في السن 82 83 84 تلحق حتى 90 على حساب الغاشي
- المتزوجين يقولولخم ادفعوا فيش فاميليال و يكون عندهم حضوض قي الفائض
- نتاع الوزن كامل طلقوهم
- نتاع العينين تلقوهم
و هاذي هيا بالاك كاش ما نسيت و لا اللي عندوا استفسار يقولي نفهموا بواش نعرف .........

[الحو الشلفاوي]

شكرا لك الأخ canada 13....

انا الحو من الشلف وذاهب للحراش واقيلا ندير شوية روطار مل 20 جانفي نورح ان شاء الله

[zine02]

انا من شلف رايح التحق يوم 17 ان شاء الله

[moh ag]

السلام عليكم خاوتي عذرا على تأخري في الرد لأنني كنت في الثكنة و لم نخرج الا بالأمس أظن أن الأخ canada_13 أعطاكم معلومات مفصلة عن المدرسة و سأحاول أن أقدم لكم معلومات اضافيةأولا الالتحاق يبدأ من 15 جانفي الى غاية الأيام الأخيرة من شهر جانفي اذا ما كانش عندك ملف طبي ما ننصحكش تلتحق في الايام الاولى لأنك راح تتميزر برك بلا فايدة و ماكانش منها لي يروح في الايام الأولى عندو فرصة أكبر في الفائض بل يختارو على أساس السن يحكموا الاصغر سنا و يطلقوا الكبار في دفعتنا حكموا المولودين من 93 الى 88 أما أصحاب 87/86/85 و جزء من المولودين في 88 كلهم خرجوا فائض طبعا كاين لي صغار و خرجوا فائض و السبب معروف الثكنة كانت تستقبل عدد كبير من الملتحقين (أكثر من الف) لكن في الدفعتين الأخيرتين ماكانش العدد كبير حوالي 900 فقط مع العلم أن الثكنة تحكم 300 ممكن تبانلك 900 عدد كبير لكن دير في بالك ان معظم الغاشي يجي مسلح بملف طبي أو معريفة أو كبار في السن و لذلك اذا كنت من مواليد 88 أو أصغر و ماعندكش ملف طبي أو معريفة بنسبة كبيرة راك لابس بالنسبة للمدرسة هي جيدة على العموم من ناحية النظافة و النظام و المعاملة الماكلة عيانة خاصة في وجبة العشاء الدوش كاين الهاتف ممنوع حتى بعد ما تلبس يعطوهولك غير في نهاية الأسبوع بالنسبة للمسؤولين عن الطلبة الاحتياطيين كانوا معنا ثلاثة ملازمين احتياطيين من دفعة جانفي 2014 خرجو البارح و ربما يستبدلوهم بثلاثة من دفعة سبتمبر اضافة الى رقيب أول (سرجان شاف) و مساعد ( آجودان) القائمة تاع الناس لي راح تلبس تبان في بداية شهر فيفري الايام لاولى تاع السطاج فيها شوية تعب و ميزيرية رغم أن التدريب ماشي صعيب بزاف خصوصا للناس المتعودة على الرياضة أما لي ماشي موالف راح يتعب شوية خاصة مع ضباط التطبيق لي يدربوكم في الليل هي على العموم الشهر الأول هو الأصعب بعدها تولي عندك غير القراية و يولي المشكل الوحيد في الاستيقاظ على 4 تاع الصباح و قلة النوم هذه بعض المعلومات حول المدرسة ان شاء الله تستفيدو منها و لي عندو أي استفسار آخر راني هنا طوال هذا الأسبوع

[jocker-dz-23]

هل من اخبار عن عدد الملتحقين في المدرسة العليا للحراش

و شكراااااااااااااااااااااااااا

[brahim staifi19]

سلام عليكم أنا خويا رايح يدخل في 15 جانفي عندو دوسي طبي نتاع لازم و الحساسية هل من أصحاب الاختصاص يجاوبونا

[Rahim pazzo]

اكبر حشوة لهد الحشوة الوطنية انك تروح 15
الخرو من المدرسة نتا وعرفك لي دخل نهالا اللول و التالي غير كيف كيف

[brahim staifi19]

هل من اخبار عن عدد الملتحقين في المدرسة العليا للحراش

و شكراااااااااااااااااااااااااا

[khaled2121]

أنا بعتوني لمدرسة الدفاع الجوي عن الإقليم البرواقية دفعة جانفي 2016 لي عندو معلومات يتفضل بارك الله فيكم

[ZorOoo]

أفيدونا بعدد الملتحقين إخوتي الكرام

[brahim staifi19]

Lharach kayan 70 wahad fi 1er jour

[ZorOoo]

المشاركة الأصلية كتبت بواسطة brahim staifi19

Lharach kayan 70 wahad fi 1er jour

مشكور أخي السطايفي ، يعني يوم الجمعة دخلو 70 .
ماعليش تزودونا بعدد اليوم
بارك الله فيكم

[sifallah walid]

بارك الله فيك خوي agا Moh
يعني حسب هدرتك جماعة 89 معندهمش امل في الفائض؟؟؟ و ماهي لايام لمليحة للدخول بالنسة لي معندوش ملف طبي او كفالة يعني ماشي على ربي و خلاص

تقدر تحكيلنا على سطاج كيفاش و واش لازم نجيبو معانا و ميتاسيون نتاعه وين ؟؟ و تاني كيفاش نجي لهدي المدرسة من لقار خروبة
ربي يعيشك خويا
ا

[الحو الشلفاوي]

انا سمانة الجاية نروح

[youcefsetif]

خويا عيطلي و قالي روفزولي الدوسي و قالي راك أبت و اليوم راهم في 100 واحد فهمونا واش معناها