السلام عليكم.هذه قصيده للشاعر العيد دبوسي من مدينة عين الحجل اتمنى ان تنال اعجابكم.
هاذ المضرب كان محبوبي يعنيه/////كنت نطل عليه من راس الكديه
كنا نجحد حبنا بكري نخفيه \\\\\\ من الحشمه و الخوف نتلقا خفيه
حين تجيني تريح القلب تزهيه///// نحس الدنيا كامله هذي ليا
زهو الصغر اهيج بنادم يعميه\\\\\ و يخلي كل الجوارح معنيه
كان غزالي كنت متولع غي بيه/////من غيرو موحال حاجه مقضيه
باقي حبو في قلبي خافيه\\\\\ مثل الوشمه فالحم تبقى حيه
مكتوب الله لاحني ما بين يديه////يا زيان تقدرت ربانيه
مفارق حبو لازم العبد اعزيه\\\\\ويصبرلو خاطرو على لوخيه
نار الحب اتهدم القلب و تكويه////و اذا شعلت ما تخليشي حيه
ترضالي جنحين نغدى طاير ليه\\\\ونفرفر و نحط عند لي بيا
قلبك حجره ما قدرت نفتت فيه///// واش نفتت فالحجره الصميه
غرستك ورده في جناني شوهتيه\\\\خرجت شجره يابسه حرطانيه
هان عليك العيد لسمر و سحرتيه////خلى الطبه عاجزه و اهل الرقيه
زدتي جرح على جراحو و جرحتيه\\\كشفك ربي بين صبحه و اعشيه
تبعتي لفلوس و الحب انكرتيه /////قليل الاصل محبتو هذي هيا
خليتيني وحيد قلبي يتمتيه \\\\\\ والله ماني مسامحك يا موذيه
كنت هاني رحت للذيب نربيه//////كي امنتو كشر الناب عليا
نبش لحمي و العظم يكدد فيه\\\\\\نستاهل كي درت فالذيب النيه
حليل العاشق ما يكون اللوم عليه////ياسر مثلي من خلايق مبليه
راني داخل بير نارو حاطت بيه\\\\\صهدو يضرب كي الريح الغربيه
ريح شهيلي جاي غبارو كاسيه/////فيه الرمله و فيه قداه ن حيه
الي ظربو يروح من برو ينفيه\\\\\يقعد هيكل في صحاري منفيه
هاذ الحب لي صابني ما ليه شبيه///حطم قصري كان قلعه مبنيه
حرم اكلي عدت للنوم معاديه \\\\\ عدت نعد ضلوع بصباع يديا
ولفي واعر باه من ذاتي نمحيه/////يا لحباب خيالها في عينيا
العبد الغافل راه في رمشه يديه\\\\\ما يرحمش الطايره و البريه
راح الحب و راحت معاه اماليه/////ماهو باقي شي يعجب فالدنيا
ناسو تحشم و النيف تموت عليه\\\\\اللبسه عربي و اللحاف طيه طيه
تتحيك نسوان و الوجه تغطيه //////تزيد زماله فوق هذيك وذيا
اما حب اليوم العاقل يحشم بيه\\\\\\حب الدراهم ما يصلح قضيه
ناسو تعشق فالمال تصلي ليه//////راس المال الكذب و الخدعانيه
بعض الجيل تخلطت لعيوب عليه\\\\و انسى اصلو قلد النصرانيه
العاقل م كلامهم يغلق وذنيه/////كلام مفرنس فيه غير الدونيه
الطف بينا يا الله ذا الجيل اهديه\\\\\و استرنا يا خالقي من ذ الحيه
شاتي نختم بالصلاة على نبيه /////صلو يا حضار على سيد الوليه
( تقرير عن مشاركة سيئة )، و الموجودة أسفل كل مشاركة .
2012-09-07, 01:23
اطلال
العرض العادي
