تحوسي تخيطي كوات ادخلي ....سطايفيه

[stayfiya]

السلام عليكم و رحمة الله و بركاته
ورشة اليوم مختلفه و باينه من العنوان
باش تخيطي الكوات اول حاجه لازم تحددي
لكان تاع بلاصه ولا زوج بلايص
المهم تاع زوج بلايص تحتاجي لاوات
زوج ميطرات ونص . خيري من لمليحه
خاطر لي راهم يتباعو خفاف غسله زوج ترق و تتفتت
هاذي شريتها 25نلف للمتر

و قماش خيري كيما بغيتي تحبي ديري كل وجه من زي
انا عندي لقماش من قبل و ما بغيتش نعرضها بزاف
(تقدري تقولي درت بلاصه و نص)

هاذي تاعي لقديمه

فرشت لقماس و حطيت لاوات تاعي و قلبت علي الطرف الثاني

راح تعدلي الزوائد بالمقص و تخلي زوج سم من لقماش بعيد على لاوات
حق لخياطه

من بعد تبداي تفيكسي بالنقاقب على الحواف و في النصف
من حسن حظي ان لقماش لي خيرتو فيه الموتيف مربعات يعني
مطراسي من عندهم ههه
نتي ارسمي الموتيف لي بغيتي مقروطات او ماطلاسي. باش نخيطو و نثبتو لاوات مع لكتان
هيا نخرجو نخيطوه علابالكم ختكم منفيه في الحوش
انا بدلت رجل المشينه تساعدني الرقيقه تمشي مليح
لعريضه تثقلني هي منطقيا خميلها تلقايها صح

لي مشينتها خفيفه غير ما جربش خاطر راح تهلكها
و تعشي تدعي عليا
لازم نبداو بالحواف نبعدو قيمه خس صباع على الحافه و نبداو نخيطو ساير داير

لازم تتحكمي فيها كي جي تخيطي في الوسط
المكان ضيق تاع المشينه اذن راح تبرميها و تثبتيها بيدك و اليد لوخرى تجبد للخلف

خلصنا لداخل نروحو نقفلوها على الحواف بهاذ الطريقه

كاينه طريقه اخرى تخليه ميش مكفف و تفوتي عليه بيي سبيسيال كوات
و كاين طريقه اخرى مختلفه من الاول تخيطي الكوات كيما لمخده و تقلبيها
و تحشي فيها لاوات انا ماساعدتنيش الطريقه تكركبتلي. و ماقدرتش نتحكم فيها
خلاص انهينا
ضك تنقيها من الخيوط و النقاقب

هاي الكوات متغطيه بيها ههههه لالا وريتهالكم برك في الليل نتغطى بيها

هيا ديرو نتوما ليكم و لولادكم كاين لقماش تاع بنات هيلو كيتي و تاع الذراري
سبيدرمان و بين تان الله الله
و تقدري تخدمي بساط صغير تقعدي عليه
. اتقلشي خليك من المشري كون يسمعوني لي يبيعو فيها
يقولولي الاقتصاد حابس و نتي زدتي علينا
يااااريت وحده طبقها و تدعيلي