تارت التفاح بالعجينة المورقة

[إلهام07]

البسملة1

تارت التفاح بالعجينة المورقة

تكملة للوصفات اللي طلبتوها وصفة تارت التفاح الرائعة اللي رجعتلي إدمان ليا ولأسرتي من يوم ذقناها .... وأروع مافيها انها خفيفة وسريعة ولذيذة جدا جدا جدا .
كنت شفت ام انس الغالية تحضرها ديما وكنت نتساءل عن طعم التفاح وهو طايب بصراحة مادخلتليش راسي وعجبتني بزاف كي شاركت بيها في مسابقة المعجنات وبقيت نتردد اني نجربها لانو مانحبش طعم التفاح طايب لكن ماتخيلتش أنو طعم التفاح المكرمل لذيذ جدا لهذه الدرجة .

درتها اول مرة ورحت ديت منها صحن لأختي وزوجها كي رجعت للمطبخ لقيت البلاطو فارغ .
من بنتها عاودتها في نفس اليوم قبل ماطيب جانا خالي وزوجتي يودعونا ماشيين للعمرة كلاوها وعجبتهم بزاف وما بقالي حتى قطعة .
كي راحو في نفس اليوم عاودتها العشية قبل ماتكمل طياب جاونا ضياف حطيتها مع عصير هبلو عليها كلاو وزادو اللي بقى أخذوه معاهم .

رجعت عملت حوالي 2 كغ عجينة مورقة وخبيتها في الثلاجة وكل مرة نجبد قطعة منها نطرحها ونحط فوقها قطع تفاح وإلى الفرن فعلا كلمة روعة قليلة عليها أدمناها لدرجة انني عملتها في شهر واحد حوالي 10 مرات ولليوم ماشبعتهاش ومنين نديرها تخلاص حتى آخر حبة.

صراحة تارت تحفة ومشكورة غاليتي ام أنس اللي ديما كنتي تنبهينا لهذي الوصفة وفعلا ندمت اللي ماجربتهاش من قبل .... وهذي تارت التفاح من مطبخي أخيرا :

المكونات : الكمية لبلاطو نتاع فور :

250غ عجينة مورقة

2 تفاحات متوسطين

قطعة صغيرة زبدة

3 ملاعق كبيرة سكر عادي مخلوطة مع ملعقة صغيرة فاني

قرفة ( اختياري أنا مانحطش )

الطريقة :

* نفرش البلاطو نتاع الفور بورق الزبدة

* نقطع التفاح شرائح رقيقة جدا باش يطيب في الفرن ويتعسل لازم يكون رقيق. مانقطعش التفاح قبل بوقت باش مايكحالش . ممكن نقشر التفاح او نحتفظ بالقشرة

*نشعل الفرن نتاعي يسخن على أقصى درجة حرارة.

* نطرح العجينة رقيقة لازم تكون رقيقة باش جي خفيفة ومقرمشة وماشي معجنة بصح مانرققهاش بزاف باش ماتتكسرش كي نجي ناكلها .

* نقطع العجينة بالشكل اللي نحب مربعات أو مستطيلات أنا يعجني شكل المستطيل فقط ننتبه أنو عرض المستطيل يكون أكبر من عرض شرائح التفاح لأنو العجين المورق ينكمش في الفرن شوية وهذا باش مايسيلش الكارامال على اطراف العجينة ويحترق ومن بعد يصعب نزع الحبات من الصينية بدون مانكسرها.

* نستف قطع العجينة المورقة في البلاطو بلا ما نخلي مسافة بين القطع لأنها في الفرن رايحة تنقص في الحجم .

* نستف شرائح التفاح فوق قطع العجين المورق بدون مانضغط عليها رايحة تلصق من بعد في العجين من السكر.

* نوزع قطع صغيرة جدا من الزبدة فوق قطع التفاح ( كل قطعة حطيتلها 3 قطع زبدة أقل من حجم حبة الحمص الزبدة تعطي بنة روعة للتارت)

* نرش التفاح مليح بالسكر باش يتعسل مليح ويجي مكرمل.

* نحط البلاطو في الثلاجة يرتاح حتى يسخن الفرن مليح مليح ( لازم العجينة تكون مرتاحة قبل وبعد التشكيل حتى لانتكمش في الفرن وماتعجنش)

* كي يسخن الفرن مليح ندخل البلاطو للفرن في الرف الوسطاني ونقص للحرارة إلى 200° حتى تنتفخ العجينة وتورق (حوالي 10د )

* نقص للحرارة إلى 160° - 140° ونخليها طيب في راحتها حتى تتحمر من تحت مانخليهاش تتحمر بزاف باش مايتحرقش الكاراميل.

* نهبط البلاطو للرف السفلي ونشعل الفرن من فوق باش تتحمر من فوق ويتعسل التفاح مليح هذي المرحلة ماطولش لأنو التفاح مايحمارش بزاف.

* نخرج البلاطو من الفرن وبسرعة وهو سخون ندهن التفاح بلاجولي بسخاء ونقدمها فورا وهي سخونة ومقرمشة .
* نصيحة هااااااامة جدا جدا جدا ، كي توجد مباشرة بسرررررررررررعة كولي حقك من البلاطو لأنه ماراحش يطيرلك من بعد ...... ديما تصرالي
.

وهنا جربت هذا الشكل شفتو في النت وعجبني بزاف بزاف
3 تفاحات نقشرهم ونقطعهم رقاق شوية ماشي بزاف
نوجد في مقلاة كاراميل ( انا حطيت 7 ملاعق معمرة مليح سكر ) ومالازمش نحرق الكاراميل نطيبو على نار هادية
كي يوجد الكاراميل نضيف 2 ملاعق كبيرة معمرة مليح زبدة ونحرك بالسباتولا
نضيف التفاح ونحرك ومرة على مرة نبقى نحرك باش يطيب التفاح كيف كيف
نضيف قرفة وفاني
في الاول يبدى التفاح يطلق الماء نتاعو ويذبل ثم تبدى الصوص تعقد حتى يتكرمل التفاح
نكفي النار ونخليه على جنب
تحلي العجينة المورقة ( انا عملت الوصفة نتاعي نتاع العجين المورق ) وتقطعيها مربعات وديريها في صينية المادلان بدون دهن ولازم تخلي العجينة خارجة مليح على الحواف لأنو من بعد نتنفخ وتنكمش العجينة
دخليها للفرن مسخن مليح مسبقا طيب كيما أي عجينة مورقة
وكي طيب نخرجها وندهن الحواف بلاجولي
ونعمر الحبات بالتقفاح المكرمل والصوص نتاعو
* ملاحظة : إذا شفتي الصوص جمدت شوية أرجعي سخنيها باش تجرى

فعلا من اورع ما يكون عجينة هشوشة وخفيفة ومع التفاح المكرمل والصوص نتاعو سايحة وريحة القرفة والفاني ممممممممم







أخييييييييرا نقوللكم اللي مازال ماجربتهاش راحت عليها فعلا

شهية طيبة

[<نَجْمَاتْ>]

وووواوووووو روعة يعطيك الصحة إلهام ربي يحفظك ويناولك اللي في بالك
نجربها ان شاء الله أنا ثاني منحبش ذوق التفاح طايب
وشكرا على النصيحة

[fleur de lili]

ilhem vraiment raki 4444444444
cet recette et parmi la premiere dans la couisine francaise
raki top merciiiiiiiiiiiiiii.

[أم ياسين الزهراء]

يعطيك الصحة بصح ماكانش كيما القرفة في التفاح يزيد فيه النص

[السلطانة هيام]

4444444444444444

[إلهام07]

المشاركة الأصلية كتبت بواسطة ام نور و جمانة

وووواوووووو روعة يعطيك الصحة إلهام ربي يحفظك ويناولك اللي في بالك

المشاركة الأصلية كتبت بواسطة ام نور و جمانة

نجربها ان شاء الله أنا ثاني منحبش ذوق التفاح طايب
وشكرا على النصيحة

ربي يحفظك ام جمانة مشكورة على المتابعة
طعم التفاح مكرمل وريحتو مممممممممممممم حاجحة اخرى تماما تماما

المشاركة الأصلية كتبت بواسطة fleur de lili

ilhem vraiment raki 4444444444

المشاركة الأصلية كتبت بواسطة fleur de lili

cet recette et parmi la premiere dans la couisine francaise
raki top merciiiiiiiiiiiiiii.

مشكورة ليلي على المتابعة ............... قبلاتي

المشاركة الأصلية كتبت بواسطة أم ياسين الزهراء

يعطيك الصحة بصح ماكانش كيما القرفة في التفاح يزيد فيه النص

أول مرة درتها جربت وحدة بالقرفة انا جاتني عادي بصح هوما ماعجبتهمش مايحبوش خلاص التوابل وخاصة القرفة والهيل والقرنفل واش نقولك مايحبو والو الموصايب

[ام ريان عبدالله]

نجربها ان شاء الله

[samia05]

الله يبارك دائما تجيبيلنا وصفات تهبل واللي يزيد في بنة وصفاتك روحك الطيبة وخفة دمك.ربي يجازيك كل خير

[*توبــــة*]

خويا راه يقول شفتي دارتها اكثر من عشر مرات ف الشهر

نتي ديريها غير مرة برك ههههههههههههه

حذاري تزيدي تحطي مواضيع يا لهووووووومة

راه عقابي قالي طبقي كل وصفاتها ف العطلة هذي

[أنواار الإيماان]

اممممممممممممممم يعطيك الصحة يالفحلة مشكوووورة وبارك الله فيك
العجينة المورقة خلاصتلي ان شاء الله راهي مبرمجة يوم الجمعة ههههههه واكيد اول حاجة نديرها بيها التارت شهيتيني وزاد عجبتني رقيقة وماشي محمرة بزاف اقصد التفاح ليس العجينة
حقا لهومة نرققها كيما الميلفاي ولا شوية رفد منه
مشكووووووووووووورة الف مليون مرة

[oum souhaib]

يعطيك الصحة هايلة

[حياتي نبع امل]

تم التقييم ،،، تقييم ممتاز ،بارك الله فيك

[idron0]

ربي يجازيك كل خير

[madie]

[*توبــــة*]

إلهامو راني قيمتك.......تقييم ممتااااااااااااز شاف