جزاء سينمار....النية والغباء

[مشكلتي]

السلام عليكم
سعت كثيرا عن مشاكل الكنة واخت زوجها واليوم عشتها بمرراتها
ليس بالغريب لم اتزوج حتى الان
وهذا السسب راح يرجح اغلبية من سيقرا المشكلة
منذ زواج خويا في شهره الاول وهو معانا بالدار عنده شمبرة فقط
لم يهنا لي بال
اقوم ب 90 من عمل البيت ولم اشتكي يوما قدام راجلها بتماطلها
نغسل ماعين الغذاء و الصباح والعشاء
نطيب يوميا العشاء نغسل ملابس اخوتي لاخرين نعمر الماء نخرج البوبال حاشاكم
وماذا تفعل الكنة طيب الغذاء برك وتدخل لغرفتها
وانا ابتسم في وجهها عادي ونحدثها ولانهار قلتها انا حاكمة كل شي
اليوم خرجت مع امي باه نشروا حوايج وبقينا بزاف لبرا وهي مريضة اديتها توانس فيا
كنت وصيت مرت خويا باه دير بالها لشمبرتي لان عندنا احفاد العايلة بنات يفسدوا صوالح وذراري صغار تعرفوهم ونشاطهم
ايا رجعت لقيت الشمبرة مقلبة شعلت ايا العشية قدام راجلها قلتها يعطيك الصحة انا نعس دارك كي تروحي لدار اهلك
ووصيتك نلقى حوايجي الخاصة تم انتهاكها
وووبختها بزاف قدام راجلها ايا هو بقى ساكت وهي واش قالت
شمبرتي مش كما شمبرتك لما قلتها ترضاي يدخلوا يفسدولك هكا
ومن لعشية دخلت دارها ماخرجت زعما زعفانة
وراجلها بقى اليوم كي المجنون يروح ويجي يريح مع امي

وبقى يلمح اني مخطئة فقلت له كاين 4 حيطان لي معجبوش ينطحهم
لاني بلغ السيل الزبى
ايا يلعبها فرنك ونص وسيضربني لكن امي اوقفته
للعلم انا في الدار برك من البنات كامل تزوجوا واخرهن لي تزوجت صفعها مرة بكف

ياربي الحقرة

فضفة لي حاب يعلق ولا يفتي براي يكتبه راه مرضت نفسيا منها
ونذكر قبل هذه الحادثة ديما نتبسم في وجها تامرني ونلبي لها رغباتها
انا اكبر منها بخمس سنوات
والجميع سيرى تصرفي غيرة اني لم اتزوج
لااخفي ماحدث اليوم جعلني افكر بالقبول باي شخص

[tassnim5]

الحل بين يديك و سهل جدا لا تطلبي من زوجة أخيك شيئا أنت تقومين باعمال التنظيف في بيت أبيك و ليس في بيتها اشتغلي كما لو كانت غير موجودة و سوف تجدينها تطلب من أخيك أن تشاركك العمل لانها ستشعر كأنها ضيفة عندكم بعد أن كانت تشعر أنها سيدة البيت و لا تقوم بأي شيئ عدا اعداد الغذاء. أقفلي غرفتك بالمفتاح حتى لا يعبث بها الاطفال و لا تدخلي في صراعات مع أخيك لان أول ما ستفكر به العائلة هو أنك تغارين منها كما قلتي و هذا أصعب مشكل ستواجهينه ان اتهموك بذلك اذ انه لا يمكنك جعلهم يغيرون تفكيرهم و ستعيشين معهم بتلك النظرة الموجهة اليك و سيحاولون تأكيد غيرتك بعد كل تصرف تتصرفينه او تفسير كل كلمة الى أنها نابعة من الغيرة و ما الى ذلك .....
لا تفكري في الزواج من أي كان بل اشغلي نفسك بنفسك الى ان يأتي الزوج المناسب ان شاء الله كلها أيام و تنقضي.

[بـــيِسَة]

السلام عليكم


هذا بيت اهلك قومي بعملك و أتركيها كانها غير موجودة [ تخيلي يجو ضياف انتم لي تتبهدلو ] يعني انت قومي بالعمل الي تقدري اعليه
و خليها هي يجي اليوم الي تفهم وحدها صدقيني ... و هادوك المشاكل يمرضوا أمك فقط خليك منها كيما يقولوا كل واحد في حدو
و الا جاك خطاب لباس اعليه أقبلي لما لا يا أختي هادي سنة الحياة
و العلم لله

[amoulette]

قولي حسبي الله و نعم الوكيل و خلاص و خطيك منها و من المشاكل لانك مهما فعلت لهم من خير ما يتفكروهش و مزال كي يجيبوا دراري و تبقي نتي تربي فيهم و تعسي فيهم و الاخير يردوك انت الغالطة اهتمي بوارديك و فقط اما بخصوص شغل الدار انت راكي في داركم و مجبورة تخدميه و ما تستني مساعدة من اي احد لكن لا تكوني طيبة لحد السذاجة هناك حدود لكل شيء

[toulay]

وعليكم السلام ورحمة الله وبركاته
الغلطة من الرجل لهو خوك هاذي الزوجة تاعو راهي مستحرمة بيه لقاتوا بين كتافها علابالها دير واش دير ميهدرش معاها لانها ببساطة زوجته المصون
انت اصبر وقول ربي ينصر الحق ان شاء الله ومديرش الغش لامك مريضة مسكينة ربي يجعلها الشفاء ان شاء الله
انت تاني مين خرجتي علاش معندكش مفتاح تقفل بيه الغرفة تاعك وتاني علاش تعسلها في غرفتها من وقتاش اول مرة نسمع كنة تقول لاخت زوجها عسلي الغرفة تاعي تقفلها وتروح علاه خدامة عندها انت
المهم مين تخدم خدمة الدار دير في بالك بلي هاذي داركم ونهار تتزوج ان شاء الله راح تدي معاك خدمة يديك باش ميقولوش عليك فنيانة وجايحة يقولوا الله يبارك الطفلة هاذي فحلة ونشيطة
وفيما يخص انو ليجي تقبل بيه لا لا رد بالك طيش روحك لمن هب ودب
بالتوفيق وربي ينوب عليك ان شاء الله

[aiche]

قبل ما تجيئ الكنة ، كنت تقومين بكلّ أشغال البيت وحدك ... أليس كذلك؟! واصلي نشاطك في بيت أبيك وكأنّها غير موجودة
والغرفة تحتاج إلى مفتاح وليس إلى عساس
لا بدّ ولازم أن تتفادي أي صدام مع الكنّة، إذا كنت تودّين راحة والديك
لأنّ كثرة الخلافات في البيت يؤذي الأبوين كثيرا... وأخوك أيضا يصبح مشرذم بينكم وبين زوجته.. فرفقا به
دوام الحال من المحال

[فاصلة]

أحسن حل ديرولها دارها وحدها ينقص عليك التعب وهي تشمر على ذراعها في دارها.

[zahra1999]

السلام عليكم

عزيزتي مراكيش تعرفي تميزي ؛
حقك باه تتقاسمي معاها شغل البيت سكتي عليه وتنازلتي لمستوى غريب !
ورايحة تحاسبي بنت الناس على غرفتك لي معستهالكش .سي نورمال يزعف خوك ويوقف معاها لأنك ظلمتيها .مرت خوك ماهيش مسؤولة باه تعسلكم بيوتكم من الاحسن تخلوها وشأنها.

غلطتكم انتوم كفاه مخليين الأمور تسير بعشوائية ومراكمش ظابطين الاشغال .واحد يتعب والآخر مرتاح هذا ظلم بعينه!

وفعلا راح يقولو عليك غيورة مثلما اتهمت بها المطلقة والارملة والمريض والفقير ....هذا حال مجتمعنا

الحل :

-ديري قيمة لروحك ومن اليوم اظبطو المهام حتى ف البوبال.

وخليك من الضحك معاها وكأنك تترجاي فيها باه ترضى عليك

هذا ان تعذر فصلها عنكم.

-أحيانا نحير في بعض العائلات يرفضو باه يديرو مطبخ للكنة ورؤوسهم تصدع ألما من المشاكل المشتبكة معها!

أخيرا دوام الحال من المحال ولي غلط في الدنيا يخلصها اليوم ولا غدوة

ربي يفرج عليك ان شاءالله

[وسيمツ]

"ليس بالغريب لم اتزوج حتى الان
وهذا السسب راح يرجح اغلبية من سيقرا المشكلة"
---
من هاته العبارات التي قلتها افترض أنك دائما متوترة. دائما في حالة دفاع
و مستعدة كل الوقت لرد أي تصرف ترينه لا يليق أو ترين فيه انتقاصا منك
و اطلاق هاته الاحكام السبقية التي ربما أنت فقط من قالها على وجه الكرة الأرضية
يجعلك تتصرفين وفقها و يجعل كل تصرفاتك تدور في فلك هاته الأفكار
اي أن المشكلة تبدا من محادثاتك مع نفسك أصلا بالأساس.
ما لقت انتباهي أيضا هو هاته العبارة:

"كامل تزوجوا واخرهن لي تزوجت صفعها مرة بكف "
ذكرت أمرا خارجا عن السياق تماما و هو صفعك لاختك التي تزوجت حديثا
هاته المعلومة لا تخدم أي فكرة في الموضوع.
و هذاذ ما يجعلني أرجح ما قلته لك في الفقرة الأولى.
أنت دوما في حالة شجار و استعداد لرد أي عدوان خارجي
حتى أن هاته الحالة جلبت فكرة او معلومة من نفس نوعها و هي دخيلة
أصلا في القصة و لا تخدم معطيات المشكلة التي تبحقين عن حل لها.
لاحظي أيضا الجزء الأول من العبارة التالية:

"ايا يلعبها فرنك ونص وسيضربني لكن امي اوقفته"

هاته عبارة تشاجرية بامتياز لما تحمله من وصف للخصم و تصغير له.

حالتك النفسية العامة واضحة من طريقة وصفك للمشكلة.

يجب ان تغيري من الحالة الدفاعية التي أنت فيها إلى حالة
بناء جسر و التواصل مع الآخر.

هذي تاع التهاويش تنفع في الصغر و في بعض الحالات النادرة راكي كبيرة ذرك صاي ما بقالكش حاجة كيما هذي
ما تبالكش القباحة هذي قفازة و واحد ما يديلك حقك و فحلة لالا، في الواقع هاذي راهي جْيــــَـــــــَــــــــَـــــــَـَـَاحة
أمَّا الآن و أنت كبيرة يجب أن تغيري حالتك الفكرية هاذي إلى مهارات التواصل
لازم تتعلمي تبني تواصل مع الآخر و تخلي و تحاقظي ديما على حد أدنى من العلاقة
باه كي يكون خلاف تقدري تتواصلي و ديري تسوية ... لا سيما أفراد عائلتك
راهم الأرحام تاعك ما فيهاش لعب هذي في الشرع تاعنا .. ذرك راهي هكذا بصح لا حقا كي تتزوجي و تكون عندك عائلة مشكلة صغييرة تتضخم إلى ان
نطيحو في القطيعة لي قال ربي من وصلها و صلته و من قطعها قطعته ... عن الرحم
وش معناها وش راني نقول ؟

مثلا خوك لا تتشاجري معه، بل تروحي تهدري معه بطريقة تتحكمي أنت في الهدرة .. كيفاه تتحكمي في الهدرة
ما تدخليش مباشرة في الموضوع .. أبداي قولي مثلا أفلان عندي حاجة حالة نقولهالك لا عندك شوي وقت ... سيقول نعم
قولي نحن اخوة أنا و انت و مرتك ثاني راهي ختي ذرك و كيما علابالك اني معاكم في الحلوة و المرة وووو ...
وشي هو مادام كاين الشيطان ز النفس ديما راح يكونو خلافات و هاذ الشيئ كاين عند الناس اكل ..
و هنا قولي مشكلتك بنفس النبرة التي تستند إلى منطق تتفقان إليه معا ...
و قوليلو اذا راني غالطة قولي ما فيهاش اشكال ..
هنا راكي انت من يقود الحديث و بهاته الطريقة مشاكل زاف راح تتجنبوهم

دربي روحك على أسلوب الكلام
كالمي روحك
و بركاي ما تتهاوشي و تتفلقي كي المستورة
عند الحبة و القبة ...
اي مشكلة ما تبدايش تلمي تلمي و تقولي حملت حملت صاي ارواحي نعتلك
لالا من الأول شيئ ما عجبكش وجدي صيغة كلام متين كيما نعتلك و اطرحي رأيك قال مثلا في حكاية طريقة العمل لي ما كيش راضية بيه، " نديرو برنامج يخرجني و يخرجك و رانا عند بعضانا لا خصاتك حاجة راني هنا نعاون اختي و انتي ثاني ..."

و هاكذا.
و اقراي كيفاش تغيري من طبيعتك أنا اعطيتك المشكلة لي نرجحها
و انت اقراي كاين بزاف مواضيع على الانترنيت و كتب تتحدث عن حالتك
و peace.

[اميرة الامواج]

بارك الله فيك
اولا : انتي غلطتي بزاف كي قولتيلها علاه معسيتيش البيت ....علاه البيت مكتوبة باسمها باه تعسها هي ....زيد بالزيادة جيتي خارجة اغلقي الباب بالمفتاح وروحي بصح باه تخليها مفتوحة وهي شايطة مع الذراري وتخرج فيهم من الغرفة هذا يقولولوا هبال اسمحيلي انتي الغالطة ونورمالموا تطلبي السماح ....
وكي عارفين روحك تخرجي هذوا الاحفاد علاه مديتوهمش لأمهاتهم وابائهم ولا روحتوا معاهم .
مليح أنتما اخرجوا وخلوا بنت الناس تعس ...

ثانيا : الغلطة الثانية اللي راكي دايرتها لعمرك يالحنونة هي انك زايدة عليها ...علاه انتي تقضي كامل هذا الشغل علاه مديرلهاش دالة ...لازم ماماك توقف وتسير البيت كما ينبغي و كل واحد يخدم خدمتوا
احنا في عائلتنا تصيب أكثر من 6كناين و 4لوسات ودايرين الدالة ...لكي لا يحدث الخلل ....

هذي الكنة مجاتش غير تاكل وترقد ...
وديريلها دالة حتى في لبوبال تفرغها وتغسلها دبر رأسها ....
نوضي نفضي الغبار على روحك ...وماشي كي متزوجتيش تقعدي خديمة وقرصيونة على مرت خوك .....والله قنطتيني ودرتيلي القلقة علابالك ....

المهم الغلطة الكبيرة اللي درتيها انك متزوجتيش قبل ماجي مرت خوك ....يعني علاه قعدتي حتى جات مرت خوك ...

المهم كيما فهمتك ديري عشاء واقعدوا على طاولة الحوار ديروا الدالة وكل واحد يلزم حدودوا وسكتونا وخلاص ...


ايه ربي يرزقك بالزوج الصالح ....ليا وليك ....
انا ثاني قاعدة مع 4نساء خاوة وكامل في بيت بصح دايرين دالة.....ههههه
خوك درك غير تقولوا ماماك ندير الدالة يقلها بنتك حرشاتك .....هههه وجدي روحك .....

راهي غير وحدة دارت فيك هكذا ......هههه

والله ياختي البيت واشغال البيت يلزمها مسير صحيح واقف وماهوش ظالم ...
سينوا ديرولها كوزينتها وحدها وتباصي هي وراجلها ....

بالتوفيق


سلام من قلب يحب السلام

[محمد محمد.]

عجيب وغريب أمر هؤلاء النسوة !! وفي كل يوم ازداد حيرة !!

يعني ماذا تريدون من الرجل ؟؟؟؟ كيما داروا معاكم ما سلكوا

إذا وقف الرجل مع أخته أو أمه تجي الزوجة تاعه تقول حقرني

وإذا وقف مع الزوجة تاعه تجي أخته تقول حقرني

يعني ماذا عليه أن يفعل ؟ هل يمزق نفسه قطعا قطعا !!

بصراحة يلزمكم السوط ، لو كان جاو الرجال يحكموا السوط في يديهم ، واحدة ما تهدر ، كل وحدة تلزم حدها ولكن لما رُفِعَ السوط دارو النساء رايهم وكلاو رسان الرجال .

[الأيمان]

معليش حبيبتي ..
زوجة أخيك ليس فرضا عليها خدمتكم ...بل واجب خدمة زوجها ...و انا أرى أنها أحسنت بطبخ الغذاء ..و هي ملزمة بغرفتها و نظافتها و ليس بيتكم يالالة ...هاهي طيب لغدا يعني راهي قاسمة و الشغل كول عليك عادي هي ضيفة عندكم و نتوما مالين الدار ...لنرحمها تخيلي نفسكتسكنين في دار عايلة و اصلا كنت في بيتك معززة تعرفي واجباتك كل ..ايا كي تروحي لدار راجلكمع امه و اخوته ...بزف عليك تطبخي و تنظفي ..و تهتمي بابنك لي في بطنك ......ليس واجبا عليك خدمة أهل زوجك و لكن الواجب خدمة زوجك هذا مانص عليه الشرع ....زوجة اخيك لم تخطىء بل أنت من أخطأ في تفسير ان زوجة اخيك ستكون معاونة و ان من مسؤوليتها خدمة كل البيت ...

[غصن البآن]

هذه من الاسباب لي خلات بزاف من الشباب يعزفون عن الزواج... الخوف من مشاكل النسا وجياحتهم .
ربي يهدي سركم. راكي بعيدة بزاف على الصح. ونصيحة.. كي تحبي تعرفي الصح سقسي لي يعرفو مشي تديري نفسك خصم وحكم.
ربي يعين اخوك. من بدايتها راح تدخلوه فحرب النسا هذي

[سجل أنا جزائري]

مثل ما قالولوك

نظن دخلتي روحك في صراع مع زوجته بدون ما تدري

اولا هل زوجتك من فرضت عليك شغل بيت ام وحدت تقومين بهذا الواجب هل طلبتو منها قيام بمسادعتكم و رفضت ؟اعتقد انو لا

ثاني شيء و اغلب النساء يطيحو في غلطة هذي و يتهموهم انهم يبع زوجته هلى حساب عائته او العكس الرجل يبني أحكماه بما رأته عينه و سمع
يعني في حالتك سمعك انه توبخي فيها لأنها ما عستلكش شمبرتك أكيد يفهمها راكي تتبلي فيها علاه هي تعسلك شمبرتك مش خدمتها

[*عبدالرحمن*]

صاحبه المشكلة نشرت موضوع جديد

https://www.djelfa.info/vb/showthread.php?t=2258191