شرح اول خطوة لتعلم البرمجة ؟

[UltrasDzCoder]

==========================
هل لازم تتعلم الخوارزميات او لغة البرمجةX ، هل لازم يكون عندي كذا وكذا وكذا ، شحال نحتاج باش نتعلمها و لازم ديبلوم .
==========================
مغالطات كبرى نشوفها في حق مجال البرمجة او اي مجال كان ، ولي هي الخطوة رقم (0) ، الخطوة الصفر هي الخطوة الاهم على الاطلاق وهي الانطلاقة الحقيقية لاي فرع من علوم (IT) (الاعلام الالي بعععع) واهم الامور لي لازم تحضرها في هذي المرحلة :
1.اتعلم البحث في جووجل :
يا اخي او اختي واحد ماراح يلحقلك اللقمة لفمك ، لو كان ماتشقاش وترفد المغرف او الخبز ماراحش تاكل ، والمخ (العقل) كيفاه مالا نوكلوه ؟ طبعا من البحث والفضول ، انت واش يضمنلك بلي معلومات لي قولتهوملك في الخاص او شوفتهوم في الفايس او اي مكان فالاب ( موثوقة ) ، لازم تحوس وتبحث هذي مهارة تسحقها 100000000000000 ب %
==========================
2.اتعلم ابسط اساسيات الحاسوب :
ولهنا واش نقصد بابسط اساسيات ، اتعرف شوية على مكونات الحاسوب واش فيه خناتش وكيفاش ديلرو بريزا (لابريس الوصلة ) يشعل ، هذا امر حوسو عليه في جووجل يعني حاجة تجيبلك حاجة
==========================
3.اتعلم اساسيات نظام التشغيل :
نظام التشغيل امر واجب عليك تتعلمو ، ماتتعلموش معناه راك غلقت اللعب ، وبامرحبا لكل تعقيد ، سقوط الشعر واصابة بنوبة قلبية محتمل جدا في حالتما دخلت دخلة تع كاميكاز ، والله لي ماجربش يتعلمو منو ابسط الامور مايلوم غير نفسو ، الكورسات على راسها جرب تبحث عنه
==========================
4.هيئة نفسك على الانجليزية
نتا حاجة من الزوج يا اما تعرف لو نجلي نقولك مازال ماتعرفش ، ولا نتا ماتعرفش نقولك لازم تعرف ، الانجليزية هي لغة الاساسية في التكنولوجيا ، مايختلفوش اثنان على ارتباطها الوثيق بالتكنو ، وعليها فان الذي لم يتعلمها راهو لقا الحل ، حوس على كيفاه تتعلمها عند الحاجة نتا مفهمتش كلمة متعلقة بالحاسوب حوس على ترجمتها وكلمة تجيب كلمة تجيب جملة تجيب فقرة تجيب مقالة ، و هذي حلقة مفرعة ماتخلاصش ابدا ، بصح المراكمة تخيك خير من اليوم لي سبقو ، وانت لي تعرف حان الوقت باش تبحث ماشي تقول نعرف بلا ماتبحث بالاك راك تمارس خداع الذات
==========================
5.عندك خطة ؟
علاباك واش راح تتعلم في البرمجة ولا خلطها تصفا ، خلي نتعلم هذي وهذي ومباعد نسقي شكون لي خير ههههه انا ذكي جدا هههههه ، بالله عليك يا اخي او اختي راك صعبتوها على رواحكم ، لازم توجد ورقة تحط فيها قائمة للامور لي راح تتعلمهم ، قائمة صغيرة تمشي عليها ، تتضمن اقتراح للامور لي تتعلمهم ، ابحث عن الحاجة لي حاب تتعلمها زيدلها كلمة "مسار" "خطة" "خريطة" ، وجرب تقارن بينها ، خلي نفسك تعرف واش يلزم بعيدة عن فخ التشتت وفخ الافضل ، الخطة تجي فيها مدة زمنية باش تقيس الاداء فقط ، فغالب نسمع ناس تقولك تعلمت البرمجة في 6 اشهر بصح غالبا هذي عبارة عن bullshit اعزكم الله ، ماكاش فترة محددة كل واحد وقدراتو وظروفو وجهدو حرام نحكمو على واحد ونطولو مدة معينة
==========================
6.هيئ روحك نفسيا :
تعلم البرمجة ماشي مستحيل بصح ماشي بالامر الهين ، مايهمش واشنو هو مستواك الدراسي ولا حتى نوع شعبة ديالك ولا وين قريت ، جع عندنا فرص عادلة ، يفرق فقط في عقلية الشخص ، انت فكر بلي فيها اجتهاد واستمرارية وتستهل بزاف تدخل لهذا المجال ، خلي عندك هدف واضح في غرضك من تعلمها واتقانها ، خليك مامن بلي دير بيها حاجة كيما داروها ناس قبلك وموراك ، برك كل واحد نصيبو ورزقو من عند الله ، اخلصو النية
==========================
المهم ايلا عجباتك المقالة ، كي تنشرها راح تفيدني وتفيدك وتفيد ناس اخرى ، وهذا من سمات التغير نحو الاحسن
اخوكم في الله #ultrasdzcoder

[tadjou40]

السلام عليكم

[UltrasDzCoder]

المشاركة الأصلية كتبت بواسطة tadjou40

السلام عليكم

وعليكم السلام ورحمة الله 🥰🧡