موضوع مميز ثلاث انواع من البقلاوة

fatimazahra09 · 2014-06-11, 20:07

ثلاث انواع من البقلاوة

السلام عليكم انشاء الله تكونو بخير وعلى خير .....
البقلاوة و لي باللغة الفارسية تسمى بـ baklava
اصل البقلاوة تم تجاهلها تماما من قبل المصادر يقولو ان موضعها كان في اسيا الوسطى واما في المجر و امافي سوريا و يبدو انو خلال الحقبة البيزنطية تم اختراع وصفتها ومشات تجارتها و انتشرت .... وعدد الطبقات لي يمثلوها بالطريقة التقليدية نتاعهم كانت بعدد 33 يقلو ما يساوى عدد السنين لي عاشهم سيدنا عيسى عليه السلام و شكلها الحالي وتقطيعها الاول كان في احدى مطابخ قصر طوبكابي في اسطنبول بتركيا و يقولو مهد البقلاوة كان في مدينة انديب على حساب الاعتقاد الشائع في تركيا ......
بغيت نمدلكم نبدة على هاد الحلوة الرائعة لي نسميها انا شباح الطبسي نهار العيد
وانشاء الله تسمحولي على المحاضرة في التاريخ لاني صح طولت عليكم
هادو مقادير عجينة البقلاوة الخاصة بي : في بلا نتاع 30 / 35 سم
1 كلغ فرينة حطيلو 250 غ زبدة طرية + ½ كاس نتاع شاي زبت + 3 م ك سمن (تحطي هادو كامل فوق النار يدوبو ) + 1 م ص فاني + 1 بيض+ 1 خميرة الحلوى
( وما تتخلعوش ..... هادا سر بيناتنا )
ديري نصف كمية ليدام و النصف الاخر خليه باش ديريه بين الطبقات
حكي مليح بيديك و لمي بالماء وماء الزهر وديديلها فوق حقها شوية ماء الزهر وماء باش تساعدك في الحلان نتاعها .... اقسمي العجينة على 2 وكل عجينة اقسميها على ثلاثة ...رايحا تتحصلي على 6 عجينات ...ديريهم في كيس بلاستيكي و خليهم يريحو الوقت لي تركبي الماشينة : جلي بالفرينة و لا المايزينة لا كانت كيما تبغي بالحلال ....العجينة الاولى ثم بالماشينة رقم 2 -4 – 6 ثم 8 الاخيرة وكل مرة ديري المايزينة ولا الفرينة ماتنسايش ..هادي اقسميها مباشرة على 4 قطع ...اثنين للطول واثنين للعرض ..و هادي قياسات السينية لي تقدري ديري فيها 30/35 سم ولا كان الطول نتاعو بزاف على العرض رايحا تتحتاجي لثلاث قطع للعرض و اثنين للطول .. ودرك نمدلك قياسات السينيات لي ديري فيهم ثلاثة طبقات على ثنين 38 سم /28 سم ... كيما هادا لي درت فيها انا ....
ماتنسايش تعكسي الشرائط ... وديري بيناتهم نصف ليدام لي بقى بقطرات فقط بالبانسو ... هنا حطيتي اربع قطع من العجينة و بالتالي درتي زوج طبقات ... زيدي حلي عجينة اخرى يبقاولك 4خليهم مغطيين مليح في الكيس و ديري نفس العملية وانتي وشطارتك ... لاكانت السينية نتاعك طول بلا عرض معناها رايحا ديري 2 شرائط طوال و 3 ناقصين عليهم شوية ... كيما السينية لي في الصورة و كملي العجينة الثالثة ... ييبقاولك 3 اخرين ... بنفس الطريقة ....وديريخليط الزبدة والسمن والزيت من فوق
كي تكملي تلقاي روحك درتي 6 طبقات متخالفين بالطبع ... وننصحك دايما تبداي بالعرض ونسيت باش نقولك اول شيئ ادهني السينية نتاعك مليح مليح بالزيت و الطبقة الاولى لي تحطيها على السينية ما تتكسلش خليها هاكداك و حتى الطبقة الاخيرة لي من فوق ... المهم ..
ديري عقدة اللوز او الكوكاو نتاعك 3 كيلات لوز بكيلة وحدة قل اصبع ... انشاء الله فهمتوني
ديري 1 م ص فاني و لاكان درتيها بالكوكاو ماتقليهش حتى يحمار خليه اصفر حق لي تتنحالو القشرة لاكان بالقشور و ديريلو معطر وملون اللوز ...رايحا جيك بقلاوة هايلة ....... لي ما تتعرفش تفرق بين اللوز والكوكاو و ماعندهاش خبرة في الحلويات رايحا تظنو لوز ....... بلا ما تفوريه وتستنايه سبع ايام وسبع ليالي ....... هههههههه
المهم بليه بشوية ماء الزهر وخليه مفتول برك باش مايخرجلكش ما بين الطبقات في الطياب .... كيما صورة حطيتها في وصفة قلب اللوز https://www.djelfa.info/vb/showthread.php?t=1596940 ..رايحين تفهمو كلشي ...
المهم هنا سوو بيديكم مليح و حلو العجينة الرابعة راهم يبقاوك 2 و حطو الطبقة الاولى دايما بالعرض باش جيكم الطبقة الفوقانية والاخيرة بالطول مليحة ومافيهاش التبياس ... وحاجة اخرى ماشي شرط حتى تقلبو العجين على حاشية السينية
انا نلحق لنصف الحاشية تكفيني ....شوفو الصورة ... وما تخافوش في تطبيقها ... علاه نشوف بزاف تبقالهم العجينة خسارة وعلاه ....
المهم را نا في الطبقة الاولى لي فوق اللوز احكمي كاس يكون بهاد الشكل لي في الصورة و دحرجيه وفوتيه على البلاتو نتاع الحشو بلا ما تظغطي بزاف و فوديه حتى في الحواشي .... le niveau بحيث تسوي .
كيما دير الالات الخاصة بتسوية الطريق المعبد ... ههههههههه
عاد باش ديري ليدام بالبانسو وكملي بالعجينة الخامسة ... رايحا ديري بها زوج نتاع الطبقات و العجينة الاخيرة رايحى تختمي بها ...... وادا ادا ماكفاتكش ... للطبقة السادسة الفوقانية والاخيرة ... اضغطي مليح مليح بصباعك على الحواشي و من بعد قطعي بالسكين الزوائد وهاديك العجينة اعجنيها مليح بلا ما ديري الفرينة حتى للرقم الاخير باه اديري و حاولي تسويهم مليح كي تحطيهم ...
عاودي ساوي باصابعك مليح الحواشي نتاع السينية و هنا يجي التقطاع اقسمي دايما بالطول وبداي بمنتصف السينية و من بعد النصف حاولي تقسميه على ثلاثة وكملي النصف الاخر ... كي تكملي لا بغيتي ديريهم مقروطات ... الشكل الشائع للبقلاوة
وانا من لي عرفتها و كانت على فكرة اول حلوة تقليدية نتعلمها و الفضل يعود لوالدتي الله يحفظها ويطول في عمرها لي كانت دايما تشجعني و تساندني في كامل الشيئ لي نديرو ... وراني نهدرلكم على اساس سن مبكر 13 سنة على الاقل ... وليت لوكان مانحطش يدي في الفرينة نمرض .....ههههه...
المهم نكمللكم الحكاية :ماعرفتش تقطاع اخر للبقلاوة سوى على شكل مثلث .... وما تخافوش ماكانش لي شوت ... الصور
راها كينا ..... ومفعول الخميرة مارايح يديرلها والو ...برك يمدلها خفية و توريق يحير فيه لي ياكلها و ماكان حتى طعم اخر تخافي منو ... ونقوللكم انا نخدمها في الحشية و نغطيها بالبلاستيك بعد لي نديرلها بالطبع شوية من خليط الزبدة بالبانسو ونخليها كامل الليل ... حتى الغد من داك نطيبها على درجة حرارة 200 درجة في الفرن الكهربائي من تحت كي يطيبوالحواشي اشعليلها من فوق ....و ادا موالفا تحطيها في سينية قبل ما دخليها طيب تولي بالمفهوم سينية في سينية ...اشعليلها في الفرن الكهربائي دايما من تحت طيب مدة 15 الى 20د من بعد زيدي اشعليلها من فوق ...تولي طيب من فوق و تحت في وقت واحد حتى تحمار...خرجيها وعسليه 1 كلغ عسل و1 كاس شاي نتاع ماء زهر وحولي ماتكثريش ماء زهر باش ما تتشمخش البقلاوة وتبقى تتقرمش ويبقى لونها يلمع مهما طولت ...خليها تبات ليلة كاملة او تبقى من الصبح تتشرب حتى الحشية خلاص باش تتقطع ....ديريها في ليكيسات و بصحتكم .
وننصح اي وحدة تخدم بعجينة فيها الزبدة او ليدام وتكون غلطت في المقادير نتاعها و تحسها تتفتت وما تقدرش تحلها تزيدلها مقدار من الفرينة و مقدار ماء وماء الزهر بالتعاقب ... رايحا تصلحلها انشاء الله ......
و لا180في فرن الغاز من فوق تحطيها باش طيب من تحت والفوق بلا ماتشعليلها من فوق

عجينة الفيلو نتاع الرابط هدا
https://www.youtube.com/watch?v=e_AOEJ8qEtU
و بقلاوة تركية بالقطايف درتها بعجينة البقلاوة نتاعي من تحت ونفس طريقة العقدة والقطايف حليتهم بشوية زبدة دايبة وزيت مخلطين و كي طابت شربتها بكيلة عسل مخلطة مع 2 كيلات شاربات وزينتها بالملمع الغدائي ... وكاين لي يديروها بعجينة الفيلو و حتى الاخت المتميزة فلة ابدعت في صنعها ودارتها بالعجينة المورقة ...
المهم كل وحدة كيفاه تخير عجينتها
انشاء الله تكون عجبتكم و نهديها ليكم كامل ....من القلب من القلب من القلب .... والله

القطايف

البقلاوة

[

عجينة الفيلو لي في الرابط

انشاء الله الصور تكون كامل لحقت .................................................. ............................سلام

MINA-NINA16 · 2014-06-11, 21:28

ما شاء الله هدي بقلاوة وعليها الكلام وحتى تقطاعها مثلثات بزااااااااااااااااااااااااااااااف هايلة
بارك الله فيك و يحفظلك صحتك و يديك اللي يتلفو بالحرير

ليلات · 2014-06-11, 21:34

مشكووووورة

nounoudjs · 2014-06-11, 21:55

بارك الله فيك

tamimkougi · 2014-06-11, 21:57

الملتزمة بإذن الله..بارك الله فيك اختي وشكر الله جهودك,,,,شـــــكــــــــــــرا"

2014-06-11, 22:16

تسلمييييييييييي يا احلى فاطمة والله موضوعك هااايل من المقدمة التاريخية للطريقة للاسرار لطريقة التقطيع للصور كلشي فوووووووووور يعطاك الصحة هدا العيد باذن الله نعتمد فكرة الخميرة وشكل المثلثات هاااايل يا فنانة
ربي يجازيك الفردوس الاعلى يااااااااااارب
ياريت تحطي الصور في الموضوع مباشرة باش تدعميه والله مواضيعك دايما تعجبني بزااااااااااااف يسلمووووووووووو

أم مبين · 2014-06-12, 00:19

يعطيك الصحة بارك الله فيك

أم إناس · 2014-06-12, 09:14

ماشاء الله بقلاوة روووووعه بارك الله فيك

mon poupon · 2014-06-12, 09:55

تبارك الرحمان
ما شاء الله
ربي يحفضك من العين أختي

الأمنيات · 2014-06-12, 10:20

بارك الله فيك يعطيك الصحة

tsotso70 · 2014-06-12, 13:58

ألسلام عليكم
ألله يبارك ما شاء ألله
ألناس تقول كل صبع بصنعة وأنت كل صبع بصنعات
صراحةً ولله عمل جبار منكِ أختي فاطمة
وتستاهلي ألتقييم أن
شاء ألله يستفادو منك ِ ألاخوات وأن نشوفوا تطبيقاتهم باأسمك
نعطيك نصيحة فقط ألرولو أو ألحلال لي راكي تستعملي فيه ثقيل وخشين شوية
حاولي تستعملي مونش بالي جديد من نوعية رقيقة صدقيني روعة ويساعدك باش تتحصلي على عجينة أرق
ربي يوفقك يامحترمة

اغادير · 2014-06-12, 14:08

يعطيك الصحة

راجية عفو الله · 2014-06-12, 15:44

مشكووووورة

ام احمدي · 2014-06-12, 16:01

روووووعة اختي موضوع شامل ومفصل يعطاك الصحة والله يستاهل التثبيت
ممكن تفهميني في هادي
250 غ زبدة طرية + ½ كاس نتاع شاي زبت + 3 م ك سمن (تحطي هادو كامل فوق النار يدوبو )
هادي الكمية نقسمها على زوج نص للعجينة ونص للدهن ولا كيفاه
تاني ياريت مقادير الكاوكاو لكيلو فرينة
بليز جاوبيني والله عجبتني ميرسييييييييييييييي على الشرح الكافي والوافي

fatimazahra09 · 2014-06-12, 20:56

اقتباس:

المشاركة الأصلية كتبت بواسطة ام احمدي

روووووعة اختي موضوع شامل ومفصل يعطاك الصحة والله يستاهل التثبيت
ممكن تفهميني في هادي
250 غ زبدة طرية + ½ كاس نتاع شاي زبت + 3 م ك سمن (تحطي هادو كامل فوق النار يدوبو )
هادي الكمية نقسمها على زوج نص للعجينة ونص للدهن ولا كيفاه
تاني ياريت مقادير الكاوكاو لكيلو فرينة
بليز جاوبيني والله عجبتني ميرسييييييييييييييي على الشرح الكافي والوافي

السلام عليكم ...اسمحيلي على التاخير في الرد نفهمك درك في هادوك المقادير :
ديريهم كامل يدوبو ...فرغي نصف الكمية على الفرينة والنصف الاخر خليه على جهة باش ديري بيه بين الطبقات
ومفادير الحشو ديري 1 كلغ كوكاو ....بالمعنى 3 عبار في 1 عبر سكر ناقص اصبع ولاكنتي حابة تنقصي اكثر ديري ناقص 2 صباع و لافاني ومعطر اللوز ورشية بماء الزهر بدون ما تشمخيه بزاف ...........افتليه برك ...
انشاء الله نكون جاوبتك على الشيئ لي كنتي تحوسي عليه