عادات غريبة في الأعراس الجزائرية

[*سندوسة*]

تمتاز الأعراس الجزائرية بطبوع خاصة توارثتها العائلات جيل بعد جيل وصارت بمثابة الأعراف التي لا تخرج عنها أغلب العائلات في كامل ربوع الوطن ورأت أن الخروج عنها يجلب النحس للعروسين معا لذلك ألزمت نفسها بها. ومن يقف عليها في الأعراس يلاحظ أنها تتراوح بين الأعراف العادية وأخرى تخرج عن المألوف حتى أن بعضها تدخل من باب الخرافة إلا أننا نجد العائلات تحرص على إتيانها في الأعراس خوفا من تعرض العروسين إلى النحس.
تقول نسيمة خباجة
تتنوع العادات والأعراف من ولاية إلى أخرى إلا أننا نقف على بعض العادات التي تأخذ طابع الغرابة في بعض الأحيان ونجدها أعرافا ملزمة لدى العائلات لا تخرج عنها مهما كلفها الأمر، فالخروج عنها هو خروج عن عادات الأجداد ويمس وقار العائلة ونجدها أنها عادات في أغلبها تمس العروس أكثر من العريس وتتنوع من ولاية إلى أخرى تبعا للعادات المتداولة على مستواها.
وإذا وقفنا على بعضها بولايات الغرب نجدها عادات تخرج عن المألوف نوعا ما، فمثلا العروس الوهرانية تلزم عند نهاية (التصديرة) على رمي ملاعق تكون على حسب عدد إخوة زوجها من ورائها وهي تمشي في القاعة لكي يذهب طفل صغير إلى جمعها وتكون عادة ملزمة لا تخرج عنها العروس الوهرانية في غالبية الأحيان تيمنا بإنجاب عدد من الأطفال حسب عدد الملاعق.
أما إذا نظرنا إلى العروس الجيجلية فنجدها أنها تصفع من طرف أخ زوجها الصغير أثناء زيارتها إلى أقرب شلال في المنطقة وهي عادة تخرج نوعا ما عن المألوف إلا أنها تتكرر في أي بيت جيجلي في الأعراس خاصة، ومن يخرج عنها فقد خرج عن عرف القبيلة. أما في العاصمة وفي ولايات الوسط كالبليدة فتحزم العروس صبيحة اليوم الموالي لزفافها وتكون التحزيمة بالفوطة القبائلية التي تمتلئ بالحلويات لتوزعها العروس على المدعوين في تلك الفوطة، وهناك من يذهب بالعروس إلى الحديقة وهي تحمل إنائين لتغرس نبتة هناك تعد نبتتها في بيت العائلة كفأل خير عليها وعلى زوجها.
ولو ذهبنا إلى أعراف سيدي أمعمر الولي الصالح بولاية الشلف فإننا نجد أن أعرافه متعددة ومتنوعة، فمثلا العروس تزف حافية إلى جانب عدم تذوق أكل بيت زوجها في تلك الليلة كعادات متوارثة لدى العائلات الشلفية.
تلك الأعراف التي طبعت الأعراس الجزائرية منذ القديم وهي على الرغم من خروجها عن المألوف في بعض الأحيان إلا أنها تبقى عادات راسخة في أغلب الأسر تستمد منها الأعراس الجزائرية رونقها وخصوصيتها.
وعلى الرغم من العادات الدخيلة التي تبعد عنا على غرار استعمال العمارية من طرف بعض العائلات تلك العادة المغربية المحضة التي توحي بإبعاد العروس عن عين الحاسدين إلا أن العادات القديمة أو الأصيلة لازالت تنافس تلك العادات الجديدة وأبت بعض العائلات إلا التقيد بها في الأعراس وجعلها الحاضرة الأولى كونها تضرب في أعراق مجتمعنا ومبادئه المترسخة التي لا يمكن الخروج عنها في أي حال من الأحوال.

[staifia]

سلامو ياسمين
فعلا هي عادات غريبة و لكنها تبقى متوارثة عبر الاجيال
احنا في سطيف في اليوم الموالي لزفافها ياتي اخو العريس الاصغر ويحزمها بحزام ويضربها ضربة خفيفة على ظهرها ههه
وكاين بمجرد ما تدخل العروس لبيت زوجها تأتي ام الزوج وتعطيها دهان او زبدة وتضعها على الحائط هههههههه
عادات مضحكة صراحة
شكرا

[eBuziness]

هناك عادات لا نفهمها وأحتسبها من التخريف لكن صراحة عادات زمان فيها الرحمة مقارنة بعادات اليوم من صالات وسيارات وتطلب طويل عريض... يعني يا ريث لو لازلنا نقوم بالخرافات أحسن من الجهل الذي نحن فيه هههههه

[*سندوسة*]

المشاركة الأصلية كتبت بواسطة staifia

سلامو ياسمين
فعلا هي عادات غريبة و لكنها تبقى متوارثة عبر الاجيال
احنا في سطيف في اليوم الموالي لزفافها ياتي اخو العريس الاصغر ويحزمها بحزام ويضربها ضربة خفيفة على ظهرها ههه
وكاين بمجرد ما تدخل العروس لبيت زوجها تأتي ام الزوج وتعطيها دهان او زبدة وتضعها على الحائط هههههههه
عادات مضحكة صراحة
شكرا

وعليكم السلام اختي سطايفية
حنا عندنا الحزام يديره في اخر السهرة يعني يدوري كلش في نهار واحد ويتهناو يعني يتقاسمو المصاريف نتاع الصالة
كيما ختي دارت الحنة نتاعهامع عرس زوجها والمصروف لي فالعادة يجيبوهلنا لحاج قالهم دوه للصالة هاكذا باش خيفف عليه المصاريف
والحمد لله كلش تم بخير

[*سندوسة*]

المشاركة الأصلية كتبت بواسطة eBuziness

هناك عادات لا نفهمها وأحتسبها من التخريف لكن صراحة عادات زمان فيها الرحمة مقارنة بعادات اليوم من صالات وسيارات وتطلب طويل عريض... يعني يا ريث لو لازلنا نقوم بالخرافات أحسن من الجهل الذي نحن فيه هههههه

زمان تاني كانو يديرو الاعراس سبعة ايام وليالي وكانت مصاريف بزاف بصح الحاجة لمليحة لي كانت فيهم هي المعاونة والنية والقلب صافي

وكاين واحد العادة شفتها هي لعروسة كي يجيبوها لبيت زوجها تعفس على حبة بيض

[ouissamak]

هههه عادات غريبة عجيبة حقيقة
حنا عندنا في منطقة القبائل يديرو العرس يومين اليوم للحنة ويوم وين تدخل ولا تروح فيه العروسة واليوم الثالث يديرو قهوة صباح للجيران والمقربين ويجيو دار العروسة يفطروهم ومور الفطور يحزموها ويديوها لشجرة كبيرة وتغسل تما يديها وتجوز على قاع الغاشي وتديرلهم شوية ريحة هههه
وكي تلخق العروسة يعطوها تشرب ماء من يد عجوزتها وغربال معمر بالسكر والحلوى ترفد وترمي موراها وعند باب الدار يديرولها سنسلة تاع ذهب تجوز عليها وكسرولها بيضة تحت رجليها ههههههه
وكاين اللي يدير شوية عجينة ترميها العروسة في السقف اداااا لصقت يعني راح تعمر تما وادا طاحت يعني راح تتطلق العروسة
وكاين وين لعروسة في صباح عرسها تطيب البغرير ادا خرج مثقب يعني العروسة مليحة ويربحو عليها وادا خرج بيطون هههه يا ويلها مسكينة

المهم قاع خرافات ويبقاو عادات اجدادنا انا نهار عرسي مادرت حتى عادة من هاد العوايد ولا واحدة ودرت عرسي في الدار يعني تقشف حتى لتم هههههههه وجاز من اروع ما يكون الحمد لله

[*سندوسة*]

المشاركة الأصلية كتبت بواسطة ouissamak

هههه عادات غريبة عجيبة حقيقة
حنا عندنا في منطقة القبائل يديرو العرس يومين اليوم للحنة ويوم وين تدخل ولا تروح فيه العروسة واليوم الثالث يديرو قهوة صباح للجيران والمقربين ويجيو دار العروسة يفطروهم ومور الفطور يحزموها ويديوها لشجرة كبيرة وتغسل تما يديها وتجوز على قاع الغاشي وتديرلهم شوية ريحة هههه
وكي تلخق العروسة يعطوها تشرب ماء من يد عجوزتها وغربال معمر بالسكر والحلوى ترفد وترمي موراها وعند باب الدار يديرولها سنسلة تاع ذهب تجوز عليها وكسرولها بيضة تحت رجليها ههههههه
وكاين اللي يدير شوية عجينة ترميها العروسة في السقف اداااا لصقت يعني راح تعمر تما وادا طاحت يعني راح تتطلق العروسة
وكاين وين لعروسة في صباح عرسها تطيب البغرير ادا خرج مثقب يعني العروسة مليحة ويربحو عليها وادا خرج بيطون هههه يا ويلها مسكينة

المهم قاع خرافات ويبقاو عادات اجدادنا انا نهار عرسي مادرت حتى عادة من هاد العوايد ولا واحدة ودرت عرسي في الدار يعني تقشف حتى لتم هههههههه وجاز من اروع ما يكون الحمد لله

رانا نكتاشفو فالمزيد من العادات والتقاليد الله يبارك

والله نتوما قاسيين على لعروسة بزااااف كيفاش هادي لعروسة فنهار الزاوج تنوض دير البغرير هههه والله عقاب للمسكينة مع سبق الاصرار والترصد
ونتاع لعجينة لي تلصق ويلا مالصقتش تتأزم المسكينة وتقعد مهددة بأي لحظة انها راح تطلق تعيش في كابوس

نتي تهنيتي ههه لا بغرير ولا راها لاصقة ولا ماراهاش لاصقة


ربي يهنيك ختي ويدوم لهنا والستر عليكم

[eBuziness]

هل أنا في الزازاير أو راني حاير؟؟؟ ههههههه كاين هناك صدقا خرافات كبيرة في هذا البلد... أعجبتني فكرة العجينة التي تلصق في السقف ههههههه ربما كان على الزوجة أن تخلط الغراء اللاصق مع العجينة حتى تتأكد من أنها ستلتصق بالسقف هههههه والله كوارث...

[ام فروحة]

نقوللكم عادة في ولاية شلف تاع سيدي معمر لي ذكرتها الاخت ولكن ماكملتش حاجة ان المهر رخيص لدرجة لا تتوقع اي في سيدي معمر لازم مايديرهاش شرط غالي 8 ملاين او 9 وخاتم العرس فقط مكان لا جهاز ولا حنة لي يرافقها الطبق ولا فطورها يعني الكبش ونسيت الشرط تاع الذهب لي حنا نقولوا لازم 4 صوالح يعني بالمختصر المفيد لي حاب يتزوج وماعندوش نصيحة من عندي غير يجيبها من شلف واش رايكم في هاذه العادة وكاين حاجة لازم مايديرهاش لاخطرش اذا فوق هاذا تصرا كريثة لا يحمد عقباها

[Simassim]

هههه اغرب عادة سمعتها صحبتي تزوجت فتيات او البيض مارانيش متاكدة نهار لي راحت فيه لدار راجلها داوها وحدها لواحد الوالي تطوف ومرمدوها (عام هي بلي ماسك وقوماج والحالة باش توجد روحها للعرس فالأخير مرمدوها بالتراب وااااعععع ). فالطين البنت من الخلعة ماقدرتش تتكلم. ولا تهدر ماكانش علاباها بهاد العادة الغريبة حتى بقات تبكي وتقولهم رجعوني لدارنا بطلت مانتزوجش. مسكينة مرضت

[*سندوسة*]

المشاركة الأصلية كتبت بواسطة ebuziness

هل أنا في الزازاير أو راني حاير؟؟؟ ههههههه كاين هناك صدقا خرافات كبيرة في هذا البلد... أعجبتني فكرة العجينة التي تلصق في السقف ههههههه ربما كان على الزوجة أن تخلط الغراء اللاصق مع العجينة حتى تتأكد من أنها ستلتصق بالسقف هههههه والله كوارث...

ماشي غير خرافات بل كوارث
ولكن لا تنسى ان هناك غراء بمجرد ملامسته بالهواء يصبح صلبا يعني تجي تكحلها تعميها

[*سندوسة*]

المشاركة الأصلية كتبت بواسطة ام فروحة

نقوللكم عادة في ولاية شلف تاع سيدي معمر لي ذكرتها الاخت ولكن ماكملتش حاجة ان المهر رخيص لدرجة لا تتوقع اي في سيدي معمر لازم مايديرهاش شرط غالي 8 ملاين او 9 وخاتم العرس فقط مكان لا جهاز ولا حنة لي يرافقها الطبق ولا فطورها يعني الكبش ونسيت الشرط تاع الذهب لي حنا نقولوا لازم 4 صوالح يعني بالمختصر المفيد لي حاب يتزوج وماعندوش نصيحة من عندي غير يجيبها من شلف واش رايكم في هاذه العادة وكاين حاجة لازم مايديرهاش لاخطرش اذا فوق هاذا تصرا كريثة لا يحمد عقباها

شكووووووووووووووووووووووون لي تشكر لعروسة اكيد امها وخالتها

هههه امزح معك اختي فقط لاتغضبي
يا بنتي الله يهديك بغيتي تبوريلنا السلعة هههه

كاين تاني نواحي تلمسان والغرب والقبائل مايشرطوش بزاف


وسررت بمرورك

[*سندوسة*]

المشاركة الأصلية كتبت بواسطة simassim

هههه اغرب عادة سمعتها صحبتي تزوجت فتيات او البيض مارانيش متاكدة نهار لي راحت فيه لدار راجلها داوها وحدها لواحد الوالي تطوف ومرمدوها (عام هي بلي ماسك وقوماج والحالة باش توجد روحها للعرس فالأخير مرمدوها بالتراب وااااعععع ). فالطين البنت من الخلعة ماقدرتش تتكلم. ولا تهدر ماكانش علاباها بهاد العادة الغريبة حتى بقات تبكي وتقولهم رجعوني لدارنا بطلت مانتزوجش. مسكينة مرضت

ماعلاباليش الحكمة في هاد العادات الغريبة
خلاو الاهم وقعدو يتبعو فالامور الخرافية
الله يهديهم ويصلح الاحوال

[eBuziness]

المشاركة الأصلية كتبت بواسطة سندوسة يسمين";3992932798][b][font="arial

كاين تاني نواحي تلمسان والغرب والقبائل مايشرطوش بزاف [/font][/b]

وين هذه في تلمسان يرحم والديك؟؟؟

[Simassim]

المشاركة الأصلية كتبت بواسطة ebuziness

وين هذه في تلمسان يرحم والديك؟؟؟

انا واحدة منهم وكل قريباتي تبارك الله عليكم الواحد لي ناوي الخير من البداية ربي يكتبلوا الخير ولي من الاول نيتو ماشي صافية ربي يبعدوا على بنات الخير