ملف مفتوح عن الحلويات المعسلة من مطبخ Toma

[ilbeldelmondo]

السلام عليكم و رحمة الله و بركاته
نقدم لكم ملف مفتوح عن الحلويات المعسلة من مطبخي لكن راني مبتدئة شوي اوكييييي؟؟؟
تفضلن و انتظروا جديدي كل مرة ان شاء الله


بقلاوة اللوز و الجوز

المقادير لي صينية دائرة بقطر ٣٠ سم تمد ٤٨ حبة

العجين:
٥٠٠غ فرينة
٥ ملاعق ك نشاء
١ و ١/٢ م ص ملح
١ م ك سكر
١٠٠ مل زبدة او مارغرين ذائبة
نص كاس ماء زهر
نص كاس او ثلاث ارباع ماء
نخلط الجميع و نعجن قلييييييلا فقط و نشكل حربوش كبير نغلفه بلاستيك و نخليها ترتاح نص ساعة
الحشو:



كيلو لوز مقشر محمص و مرحي
نص كيلو جوز مرحي
نص م ص قرفة
رشة ملح
٢٥٠ غ سكر
١٠٠ مل بين الماء و ماء زهر
نص كاس جلجلان محمصة و مرحية
نخلط السكر القرفة و الملح مع الماء و نخليهم يرتاحو و اذا تقدري وجديهم ليلة قبل باه يذوب السكر
من بعد نخلط هذا الخليط مع اللوز الجوز و الجلجلان و نخلط مليييييييح
نروحو للعجين بعد مارتاح و طريقة التوريق

نقسم الحربوش تاع العجين الى قطع صغيرة حوالي ٨ نأخذ بالوحدة و ونفردها شوي الى مستطيل و نفوتها في ماشينة الباستا في الرولو الأملس في الرقم المفتوح او الأوسع انا عندي ١ و كاين ٧ او ٦
ندير النشاء و نطبقها و نعاود نفتح و ندير النشاء و نطبق نكرر العملية مرتين او ٣ انا درت ٢ برك

ثم نرش النشاء مليح على القطعة و نفتحها في الرقم الاوسط لب هو ٣ مرة او اثنين ثم مرتين في الرقم الضيق انا عندي ٦
نتحصل على شريط عريض قد الماشينة و طويييييل و شفاف لانه رقيق

ندهن الصينية بالزبدة الذائبة
نضع شرائط العجينة الواحد قدام الاخر و ماننساش نطلع على جوانب الصينية لحماية الحشو في الفرن

ندهن الزبدة على الطبقة الاولى ثم شرائط الطبقة الثانية تضعها عكس الاولى اي علامة + و نكمل ندهن بين الطبقات حتي ندير ٦ طبقات
نضع الحشو و نرصه بالشوي باه يجي مستوي

نغطي الحشو بنفس الطريقة تاع القاعدة بطبقات اكثر انا درت ٧

ندهن الزبدة و نقطع الى معينات و نرشق حبات لوز او ربع حبة جوز يمكن التزيين بالنقاش

للحصول على شكل النجمة تابع الصور و يجب التحديد بالسكين قبل القطع

نسخن الفرن و نطيبها على درجة ١٥٠ حتى تحمار من الجوانب و نحمرها من فوق
المدة واحد الساعة او اكثر
نخلط حوالي كيلو عسيلة مع نص فنجان ماء زهر
نسقي البقلاوة مع مخرجها من الفرن و نخليها تبات ليلة قبل التقديم




بقلاوة بالفول السوداني

العجينة:

انا درتها رقيقة ثلاث طبقات من تحت و اربعة من فوق لي يحبها مورقة بزاف يضاعف كمية العجين
المول المستعمل ٣٨*٣٠ سم
٣٧٥ غ فرينة
٤ ملاعق كبار نشاء
ملعقة صغيرة و نص ملح
ملعقة كبيرة سكر
نص كاس ماء زهر
٣/٤ كاس ماء
١٠٠ مل زبدة ذائبة

نخلط المكونات حتى الحصول على عجينة متماسكة نعجنها شوي و نقسمها الى ٢١ كرة لان كل ٣ كرات يمثلو ورقة
نغطيهم ببلاستيك و نخليهم يرتاحو نص ساعة او اكثر
الحشو

١.٥ كغ فول سوداني محمص مقشر و مرحي
نص كاس او اكثر جلجلان محمص و مرحي
رشة ملح
٢٥٠ غ سكر
نص م ص قرفة
ربع كاس كراميل سائلة
م ك عطر الجوز
١٠٠ مل بين ماء و ماء زهر

نخلط السكر القرفة الملح العطر و الكراميل مع الماء و ماء زهر و نخليهم نص ساعة يذوبو من بعد نخلطهم مع الفول السوداني و الجلجلان جيدا
على طاولة مرشوشة بالنشاء نجيب ثلاث كرات نفردهم غير شوي و نرش النشاء فوقهم و نحطهم فوق بعض حيت راح يمد ولي ورقة عجين و نفردهم الى ورقة جد رقيييييقة

ندهن المول بالزبدة الذائبة و نحط الورقة الاولى و ندهن بالزبدة
نزيد ثلاث كرات بنفس الطريقة و نحطها فوق الاولى و ندهن و نزيد الثالثة و اذا تحبي تزيدي الطبقات زيدي حتى ستة
الاخيرة ماندهنهاش و نحط الحشو و نرصه باعتدال
نغطي الحشو بنفس طريقة القاعدة يعني كل ثلاث كرات ندير النشاء بيناتهم و نفتحهم الى ورقة رقيقة و ندهن الزبدة بين الطبقات حتى اربع او اكثر

يمكن تقطيعها ثم دهن الزبدة او العكس حسب حرارة المطبخ انا قطعتها مربعات
نضع حبة فول سوداني في وسط كل حبة و نسخن الفرن على ١٥٠ درجة
نضع الصينية في الوسط و نخليها حتى تتورق و تحمار من الجوانب و نشعل من فوق

درجة الحمورة أذواق كل واحد كيفاه يحب
نخلط كيلو عسيلة مع ربع كاس ماء زهر و نشرب البقلاوة و هي سخونة و نخليها تبات و تقدموها




شهية طيبة
العجينة ماشي فيلو باه وحدة ما تقولي ماشي هك لان عجينة الفيلو تاريخها إغريقي و عندها مئة وصفة مالا هذه نسميها عجينة طومة هههههههه باه نكون انا صاحبة حقوق النشر ههههههه


الخشخاش او المقرقشات
المقادير
500 غ فرينة
100غ مارغرين ذائبة و تقدري تنقصي شوي و تعوضيه زيت باه يجيو مقرمشين
ملعقتين صغيرتين ملح
بيضة
ماء زهر باه تلمي العجينة
نص ملعقة خميرة كيميائية

تعجني العجينة شوي و تخليها ترتاح نص ساعة او ساعة في حرارة عادية

تقطعي العجينة الى ستة و تحلي في رقم واحد انا مشينتي اول رقم هو الواحد
ديري النشاء و طبقي على ثلاث و تحلي مرة ثانية في واحد
و تزيدي ديري النشاء و طبقي علي اثنين و تحلي مرة ثالثة في رقم واحد

ثم تحليها في رقم ثلاثة مرتين و رقم خمسة مرة واحدة
انا مشينتي تخلص في ستة و العجينة ما لازمش تكون رقيقة لانها راح ماتتنفخش
اذا ام تتنتفخ في المقلاة نقصي الحلان

راح يجيك شريط طويل و عريض اذا تحبي الحبات الضخمة قسمي الشريط في العرض الى اثنين يعطيك حبتان
و اذا تحبي ديري ميني حبات تقدميهم في كيسات ديري عرض 5 و طول 30

تسخني الزيت مليح و النار تكون متوسطة ماشي ناقصة باه يتحمرو شوي و نخليك مع الصور






نقطروهم من الزيت و كي يبردو نعسلوهم
التقديم كيما تحبي فكرة الشونتي تاع أمي و يجيو هايلين
الميني مقرقشات لي رهم في الكيسات يصلحو مع التي في نفاس ريمة ان شاء الله ههههه ندبر عليك
يكمن اضافة المكسرات









سفنج السميد
مشهور في المغرب العربي و كل واحد و طريقته
هذه وصفة أمي و جا هايل و خفيف و ساهل جداً*

المقادير:
*نص رطل سميد
اربع ملاعق فرينة
ملعقة صغيرة الا ربع ملح
ملعقة كبيرة سكر
بيضة
ملعقة صغيرة خميرة الخباز
نص فنجان زبدة ذائبة
نخلط المكونات و نبلهم بالماء الدافئ و نحاول تكون العجينة طرية ماشي يابسة نعجن شوي و نخليها ترتاح في مكان دافئ

من بعد نعجنها باليد او العجانة و نسقيها لازم تكون تلتصق باليدين و نزيد الزبدة
نشكل كرات كيما تاع الشخشوخة و المسمن و نخليوهم يرتاحو نص ساعة


نسخن الزيت و نفرد كريات العجين بسمك 8 مم نحاول يكون الوسط خشين و المحيط رقيق
نقلي حبات السفنج و نلوح الزيت فوق كل حبة عندما نضعها في الزيت باه تنتفخ

كي نكمله نعسلوه او نديرولو السكر

ان شاء الله يعجبكم و صحة و عافية






صينية الكنافة*
من الحلويات الشرقية اللذييييذة و الدسمة يعني كثيرة السعرات لكن ماعليش الواحد يذوقها في الاعياد و المناسبات*
انا كنت نأكلها تاع سوريا و تجي الكل مقرمشة و لذييييذة ماشي مندية كيما تاعنا في الجزائر و الشكل أيضاً يجي مرصوص و ليس مبعثر


السر كان في طريقة طيابها و حتى تقطيعها يجي أسهل ما يكون*
ملاحظة انا هذه عملتها في العيد الفطر و غيرت الوصفة لان صينية الكنافة تجي طبقتين من القطايف و الحشو مكسرات
انا عملت طبقة pâté brisé و طبقة قطايف و لكم الاختيار
طبقة العجينة المكسرة
ثلاث كيلات فرينة
بيضة
كيلة زبدة طرية
ملح
ملعقة صغيرة سكر
قرصة خميرة
و القليل من الماء الزهر تلمي بة العجينة
انا استعملت كمية صغيرة نفردها بعلو نص سم و نخليها في الصينية ترتاح نص ساعة ثم نطيبها في الفرن حتى تحمار بحرارة 180 درجة

طبقة المكسرات نجيبو المكسرات لي تحبوهم و نرحيوهم غير شوي لازم نحسو يقرمشتهم اثناء الأكل و نلموهم بشوي عسل ماشي بزاف
طبقة القطايف*
تحلو القطايف لكن مانبعثروعمش نخليوهم كيما الخصلات و نحضرو كيلة زبدة و كيلة زيت ذايبين و وندهن الصينية بنفس حجم صينية العجينة المكسرة
نرص القطايف و نسيح عليهم الزبدة و الزيت*


الكمية تكون لرطل كنافة كاس و نص زبدة و زيت
ثم نجيب صينية ثقييييلة انا استعملت مول الزجاج يكون يقدر يدخل في صينية القطايف أختي تستعمل فايونس لصينية مربعة
و ندخلها الفرن درجة 180 حتى تحمار من الأسفل ثم نقلبها و نخليها حتى تحمار من الجهة الاخرى
رايحين نلاحظو خروج الدهن الزائد صفيه او يمكن قلب القطايف فوق شباك
كي يبردو الطبقتين
نحط المكسرات فوق الطبقة الاولى برفق ثم القطايف
و نعسلوعم بعسل دافئ مع القليل من ماء زهر و ما نكثروش العسل*

يباتو ثم نقطعوهم و التقطيع سهل جداً بالسكين المسنن

شهية طيبة و يا رب يعجبوكم

يتبع