نحكيلكم حكاية ..

[crono]

صباحكم بالخير والهناء
يحكو بكري على راجل تزوج مرا على نياتها وقلبها طيب والي في قلبها على راس لسانها والي على لسان الغير تصدقو وذنها ،اما راجلها خدام ذراعو نهار تصيب وعشرة تغيب وماشية وحالتو ترجع لتالي صبح لي يخدم بيه ياربي يحصل بيه غرفية زيت والا مغرف دهان يجيبهالها تتعشاها معاه، والنفس تمل وتتشهى نشهيكم في الجنة ويعطي ربي لكل قلب واش تمنى.فلانة ملت من الخبزة والزيت والدهان الراجل عارف عقلها على قدو قالتو ياراجل قلبي طاب من الزيت والدهان طالبة نحوس على دسم صحيح ،قالها هذا ماطلبتي غدوة نجيبلك هبرة لحم ونصغرلك لعظم ونزيد معاهم طرف فاكية ونشبع مولات بيتي ،وهي صبحت الضحكة معبية الفم ومشمرة الكم تتحف في الدار وكيما قالو في دار باباها نعاسة وفي دار راجلها رقاصة هو فرحها بكلمة وهي شيعتها عند الجيران راجلي اليوم يجيبلي اللحم ووجدت البرمة وشعلت لفحم وقعدت تستنى فيه يدخل ....
لحڨ الليل دخل و في ايدو صحفة زيت قالتلو وينو اللحم قاللها انا خممت ودورتها في راسي قلت مولات بيتي تسحق ماخير من اللحم ودوم من الشبعة راني نويت دراهم اللحم نشريلك بيهم مناڨش زينين يستاهلو هاك الوذنين، رڨدت المخلوقة وهي الفرحة مش سايعتها طلع النهار لمت الدار ودارت عليهم جار جار اليوم شويخي جايبلي الذهب وقالت لجارتها ثقبتلها وذنيها وڨعدت عند العتبة تستنى فيه حتى جا وفي ايديه وقية دهان قالتلو وينو الذهب قاللها نويتها وخرجت من فمي بصح قلت عوينتي وعشرتي نشريلها حوش تتكسل وتمد رجليها فيه تتهنى من التراب والضيق ،غير بان الفجر بدات تلم في القش ربطت وحزمت والجيران ودعت
وحجابها لبست وقدام الباب قعدت لحق المغرب جا من بعيد غير شافها هاكذاك رجع على طريقو ماعرف يلقاها من الدنيا والا من هاد المخلوقة النية راح ڨعد قدام جماعة وهبط راسو ويخمم جاه واحد سقساه حكالو الي فيها وانو مرتو كل يوم تطلب حاجة وماشي فاهمة انو هو على قد الحال تكلملو صاحبو قالو صار كي كرهت منها ولي مافيه منفع حطو في المدفع وادفع ،انا نعطيك الحل كاين واحد يبيع في دار بصح المشكل ساكنتها جنية لي يدخل تخرجو وسومتها معقولة تسوى كان دينار امنها توفي بكلمتك وامنها تتهنى منها .وصلنا لصاحبو دبر عليه الدبارة ولي ينصحك بالخراب والطلاق مايبكي معاك نهار لفراق.
صبح الرويجل شاري الدار رجع لمرتو كرا حمال وهز القش غير وصلها لفم الباب قاللها ادخلي نضمي القش انا راني رايح نجيبلك وحدة تعاونك على الدار هو دارها سبة باه مايدخلش خاف على روحو راح قعد ورا حيط ويستنى كانش ما يصرا اما مولات النية دخلت وبدات تنظف في الحوش هكاك حتى سمعت صوت يخوف تلفتت تلقاها الجنية تحسابها لمرا لي بعثها راجلها باه تعاونها قالتها يعطيك الربح هذا وقت لعب ماتعرفيش تسلمي مدي ايدك عاونيني هاكي المصلحة وبركاك من الجياح الجنية بقات مصدومة من تصرف لمرا وعاودت عيطت بصوت اقوى ودور ليها مولات النية بكف ڨربعتها قالتلها بعثك راجلي تعاونيني شمري على ذرعيك لا نربيك ماشي خلصك باطل الجنية مسكينة خافت وولت عبدة للمرا لانو هوما لي مايخافش منهم يصبحو تحت امرو وبدات الجنية تخدم وتعاون في مولات النية حتى طاحو كتافها مسكينة من التعب ولت تقوللها اعتقيني ونعطيك جرة ذهب ضحكت مولات النية وقالت ليها معليش كي تجيبيه روحي في رمشة عين حطتلها جرة ذهب وطارت لمرا من الفرحة وقالت للجنية مسموح ليك روحي وخرجت مولات النية شرت اللحم والفاكية ومناڨش ذهب وروحت ڨعدت تسنى في راجلها كيف موالفة مع لحق المغرب قال نروح نشوفها واش صرا فيها وغير يلحق للدار تضربو ريحة اللحم ويلقاها هي زاهية حكاتلو على واش صرا وقالتلو لمرا لي بعثها تعاونها على الدار عطتها جرة ذهب تبسم وقاللها صح مول النية اذا ماربح يسلك على خير وولد الاصل لوكان توكلو زيت حافي يصونك وقليل الاصل لوكان تعطيه لحم كتافك يخونك وتوتة توتة خلصت الحدوتة
العبرة زيني قلبك وامشي بالنية تتقضالك امور مخفية واذا ماربحتي مع المخلوق تربحي مع الخالق والفم لو مغلوق والقلب صندوق راه سبحانو يخلص لحقوق
لحديث قياس يفهمو السلطان والعساس ويبعد علينا شر الوسواس الخناس ويديم لمتنا في الخير ياخيار الناس.

[لؤلؤة تلمسان]

صح مول النية يربح ....... بصح بعد ما يتعب

[حسناء بنت الجبل]

روعة ، سلمت أناملك

[gecko]

بارك الله فيك