معجنات وأطباق لذيذة بالمرقاز المخادع

[إلهام07]

الوصفة 20 : المرقاز المخادع

طاب نهاركم حبيباتي .

تعرفو كل مانجرب حاجة وتعجبني نحطهالكم باش تستفادو معايا وهذي المرة جاتني في راسي فكرة المرقاز المخادع، تعرفو الحاجة أم الاختراع وأنا نموت على المرقاز كون نصيب ناكلو كل يوم بصح السعر نتاعو غالي و نصو شحمة وحتى النظافة راهي معدومة ماتتصوروش أن الجزار رايح كل مايجي يمس اللحم يروح يغسل يديه بالماء والصابون لخاطر عيونكم .
المرقاز اللي يتباع إما العادي ( نتاع 650دج/كغ ) كي تقليه يذوب ويصفي بزاف الشحم أو spécial ( نتاع 950دج/كغ ) غالي ماتقدرش كل الأسر تشريه وفي كل الأحوال شروط النظافة والتخزين غير متوفرة فيه .
كامل نحبو المرقاز ونحبو ناكلوه ديما بصح السعر نتاعو غالي ماكانش أسرة تقدر تشري المرقاز كل أسبوع وحتى إذا تقدر تشريه يخافو من التسمم خاصة في فصل الصيف .
جاتني في راسي هذي الفكرة وعلاش مانحضرش المرقاز في الدار وجربتو و حبيت نشارككم في هذه الحيلة مع أنها بسيطة وممكن تعرفوها بصح حبيتكم تستفادو معايا بيها .

المقادير :
* انا استعملت حوالي 300-350غ لحم مفروم .
* راس ثوم مرابي
* توابل خاصة بالمرقاز كل واحد وكيفاش يحب يداوي المرقاز :
- 1/2م ص فلفل أسود
- 1م ص فلفل أحمر بودر
- 2م ص معمرة مليح كمون
- 1 م ص كروية
- ملح
- 1 م ص هريسة ، أنا نستعمل هريسة بريق الأمل لذيذة جدا
- 1 م ص طماطم مركزة ( اختياري )
- ممكن ثاني دبشة مقطعة رقيقة أنا مانديرش


إذا حبيتو تستعملو المرقاز للمعجنات كيما أنا ديروه بهذه الطريقة :
* نحطو في مقلاة شوية زيت ونقليو اللحم المفروم مع الثوم والتوابل كامل كي يطيب نطفيو والمرقاز المخادع أصبح جاهزا للاستعمال .


حبيتكم تشوفو كم مرة استعملته روعة مايفيقوش خلاص باللي هذا لحم مفروم :

هنا درت بيه بيتزا كالزوني كان عندي غير شوية لحم مفروم زدت رابيت معاه كاشير :



https://www.djelfa.info/vb/showthread.php?t=1293215

درت بيه قراتان البطاطا نتاع اميرة مع الشيدار والبيشاميل جا تحفة :


هنا كنت تعبانة ورايحة ندير قاطو الطبقات نتاع الأمنيات شرينا بيتزا عادية وزدتو هو من فوق مع جبن شيدار :


هنا درت بيتزا بالعجينة السحرية نتاع أم كوثر جات تحفة خاصة مع camembert والشيدار :


هذي البارح برك درتها في دولمة الجريوات نتاع أم ماجد :


مازال غير مادرتهاش هنا :


أما إذا تحبو جربوه شطيطحة مرقاز كيما وصفة بريق الأمل أو في مقلوبة المرقاز نتاع أم رامي تخلطو المكونات مع اللحم نيء وتعجنوه مليح وتشكلوه أصابع وتخليوه يريح حوالي ساعة في الثلاجة وتستعملوه .



هنا درت بيها مقلوبة المرقاز نتاع ام رامي طبق لذيذ جدا :


طريقة اقتصادية ديري بيه معجنات بأنواعها وراهو يجي اقتصادي وبنين وزيد متأكدة من النظافة ومن التخزين .

ممكن البعض منكم يعرفو الحيلة هذي لكن دائما هناك مبتدئين

إلى اللقاء في أفكار أخرى
.

[SAMAH SAMAH]

جزاك الله خيرا

[meriama13]

يعطيك الصحة الهام على الوصفة
راني جربت بيتزا كالزوني جاتني رووعة

[sidali 2007]

يعطك الصحة روعة كما انت ربي يعطك ماتتمني

[ام بسومة]

لي عودة للموضوع

[مرام اروى]

يعطيك الصحة يالعمرية الحرة فكرة هايلة في انتظار جديدك

[ام بسومة]

يعطيك الصحة لهوومة راكي فووووووور
تستاهلي تقييم

[oum ibrahim]

الله الله عليك يا ام الافكار حتى المرقاز ولى مخادع ههههههه يعطيك الصحة على الفكرة الجديدة ربي يرزقك ماتتمناي

[أم ريمة*]

سلام شكرا الهام على المعلومة الله يمتعك بصحة البدن ويرزقك الزوج الصالح ماهى الترت الاخيرة وممكن تشرحى طريقة البيتزا بالكمبار وشكرا

[ام احمد وصال]

يعطيك الصحة يا ام الافكاران شاء الله نجربو هدا اللحم المرحي المجمد يتباع عند الجزارة كانل ولا كاين واحد سبيسيال باه نوصي الراجل يشريهلي

[إلهام07]

المشاركة الأصلية كتبت بواسطة SAMAH SAMAH

جزاك الله خيرا

آمين ، شكرا

المشاركة الأصلية كتبت بواسطة meriama13

يعطيك الصحة الهام على الوصفة
راني جربت بيتزا كالزوني جاتني رووعة

أو فرحتيني ، تاكلوها بالصحة والهناء

المشاركة الأصلية كتبت بواسطة sidali 2007

يعطك الصحة روعة كما انت ربي يعطك ماتتمني

الله يسلنك ، شكرا على الدعوة حبيبتي

المشاركة الأصلية كتبت بواسطة مرام اروى

يعطيك الصحة يالعمرية الحرة فكرة هايلة في انتظار جديدك

الله يسلمك مرام

المشاركة الأصلية كتبت بواسطة ام بسومة

يعطيك الصحة لهوومة راكي فووووووور
تستاهلي تقييم

شكرا حبيبتي هذا من ذوقك

المشاركة الأصلية كتبت بواسطة oum ibrahim

الله الله عليك يا ام الافكار حتى المرقاز ولى مخادع ههههههه يعطيك الصحة على الفكرة الجديدة ربي يرزقك ماتتمناي

ههههههه ضرك كل شيء مع إلهام يولي مخادع وعلى قولة بسملة فرح ، مازال مازال هههههههه

المشاركة الأصلية كتبت بواسطة أم ريمة*

سلام شكرا الهام على المعلومة الله يمتعك بصحة البدن ويرزقك الزوج الصالح ماهى الترت الاخيرة وممكن تشرحى طريقة البيتزا بالكمبار وشكرا

ام ريمة يا ام ريمة مواح نحبك ، شوفي :
1- التارت راهي في تطبيقاتي الموضوع نتاع 30 تطبيق ، درت وصفة جينواز أم رامي نتاع جينواز النيستلي بصح طيبتها في بلاطو 25سم * 33سم ومن بعد سقيتها وقسمتها على 2 ودرت فوق قطعة منهم المعجون نتاع الفراز وحطيت النصف الآخر فوقها ومن فوق شوية معجون وزينت بالشانتيي .
2- البيتزا : العجين وصفة العجين السحرية نتاع أم كوثر ، كل قرصة ندير 2 كيسان ماشي معمرين مليح فرينة نحي أقل من نصف العجين نحلو طويل كيما حبل ونحط فيه قطع الجبن مستطيلة ونغلق ونقص ونغلق الجوانب على شكل تمرات ونحل النصف الآخر نتاع العجين وندهن الصينية نتاع البيتزا ونحط القرصة ( نهزها بالرولو باش تبقى مدورة ) ونحط فوقها الصلصة حتى الحاشية باش كي نحط تمرات نتاع العجين يلصقو ونصفف هذوك القطع بشكل مائل ونخلي فراغات لاخاطر يطلعو يلصقو ونحط في الوسط زيتون أخضر شرائح ومعدنوس مقطع ومرقاز مخادع وجبن كامومبير وشوية كرام فراش نتاع العلب ( نتاع بلادنا ) وكي طيب من تحت نجبجها نرابي فوقها شيدار ونشعل من فوق تحمار وخلاص

[إلهام07]

المشاركة الأصلية كتبت بواسطة اماني السلام

يعطيك الصحة يا ام الافكاران شاء الله نجربو هدا اللحم المرحي المجمد يتباع عند الجزارة كانل ولا كاين واحد سبيسيال باه نوصي الراجل يشريهلي

لالا ماشي كل الجزارة كاين جزارة اللي يبيعو اللحوم والأسماك المجمدة هذوك تلقايهم حاطين les congélateurs فيهم هاذو لحوايج ، في المارشي نتاع 1014 الجزارة اللي على في الواجهة كامل عندهم
بصح عن خبرة جربت كل شيء مجمد تقريبا فيهم غير اللحم المفروم بصح لازم داويه مليح باش يجي بنين و2 أنواع نتاع سمك فقط ، الباقي والله غير خاطي خسارة دراهم فيهم ، مافيهم حتى طعم حاشى النعمة يعيفو

[الأمنيات]

[linat]

يعطيك الصحة حبيبتي وربي يحفظك من كل سوء

[soriaalg]

ربي يجازيك يا عبقورة المنتدى
شوفي نقولك حاجة ديري فينا مزية والفي كتاب سميه اختراعات الشاف الهام 07 من مختبرها الخاص
والله نحكي بالصح جبتيلنا الكثير من الافكار الرائعة والاقتصادية والاهم من كل هذا اللذيذة
ربي يرزقك ما تتمنين يااااااااااااااااااااااااااااااااااااااااااااااااا ااااااااارب جعلها في ميزان حسناتك استفدت كثيرا كثيرا