ياجماعة ، باركولي، أخيرا ، صلحلي الكرواسون

[إلهام07]

الوصفة الثالثة : كرواسون

صباح الفل و الورد و الياسمين ، صباح اليوم المورال راهو طالع ، هاذو 5 سنين و أنا نجرب في وصفات نتاع الكرواسون و كل مرة فشل ذريع حتى يأست و أخيرا البارح ، صلح واااو .
أنا عندي وصفات عديدة نتاع مقبلات عبارة عن كرواسون مالح محشي أجبان أو كاشير ...الخ ، جربتهم بالكرواسون اللي يتباع بصح ما جاش مليح لا خاطر حلو و أنا نحتاجو مالح.
المهم ، قلت نفيدكم بهاذي الوصفة اللي لقيتها في منتدى آخر و طبقتها و صلحتلي :

المقادير :
* 500 غ فرينة
* 200 غ حليب دافئ ( حوالي كاس و ربع إذا كان الكاس كبير و كاس و نصف إذا كان متوسط )
* 100 مل زيت ( أقل من نصف كاس )
* 10غ خميرة الخبز ( أنا حطيت 2 ملاعق صغار )
* 1 ملعقة صغيرة خميرة الحلويات
* 1 بياض بيضة ( نحتفظ بالصفار لدهن الكرواسون )
* 2 ملاعق صغيرة ملح
* 2 ملاعق صغيرة سكر
* للتوريق : 100 غ زبدة توريق



الطريقة :
1- نخلط المكونات الجافة : فرينة+سكر+ملح+خميرة الخبز+خميرة الحلويات، ثم نضيف بياض البيض و الزيت و نخلط وأخيرا نضيف الحليب الدافئ. نحصل على عجينة طرية ( لازم تكون طرية ، إصبعك يدخل فيها بسهولة و لكن ماشي جارية )، إذا لم تكن طرية ممكن تضيفي القليل من الحليب ثم نعجن جيدا ( حوالي 10-15 دقيقة ) و نضع العجين في إناء و نغطيها بكيس بلاستيكي و نتركها تتخمر حتى يتضاعف حجمها( حوالي ساعة )






2- نشكل كويرات متساوية الحجم و نتركها ترتاح حوالي 15 دقيقة مغطاة بكيس بلاستيكي حنى لا ينشف العجين (أنا شكلت منها 8 كورات ، ممكن تشكلي عدد أقل إذا حبيتي ).


3- نطرح الكويرات رقيقة بواسطة حلال ، إذا لصقتلك العجين ممكن تستعملي الفرينة لطرح كويرات العجين ( أنا طرحتهم فوق الرخام ما لصقوليش )


4- كل ما تطرحي قرصة تدهنيها بزبدة التوريق باش كي تحطي فوقها القرصة الثانية تتورق ( القرص تطرحيهم قد بعضاهم ).


5- نطرح القرصة المتحصل عليها رقيقة ( حوالي نصف سنتيمتر سمك )


6- نقسم العجين إلى مثلثات متساوية ( أنا قسمتها إلى 16 مثلث حبيتهم صغار ،إذا حبيتيهم كبار أقسميهم على 8 فقط )


7- نلوي الحبات من الجزء العريض إلى الضيق حتى نشكل شكل كرواسون ولازم نرخف ما نزيرش بزاف و حنا نلويو باش العجين يبقالها مكان وين تنتفخ

8- نحط الحبات في صينية الفرن مدهونة بالزيت أو الزبدة و لازم الطرف الأخير للمثلث يكون من تحت باش ما تتحلش المثلثات. أيضا ، لازم نباعد بين الحبات حتى لا تلتصق ، أنا باعدت بيناتهم كما في الصورة و مع ذلك لصقولي الحبات في بعصاهم و فسدلي الشكل نتاعهم


9- ندهن بصفار البيض مخلوط مع ملعقة صغيرةحليب دافئ و ملعقة كبيرة عسل و نرش الجلجلانية ( اختياري ) و نخليها تخمر 2 ساعتين أكرر ساعتين كاملين .

10- ندخلها للفرن المسخن مسبقا لتطهى على درجة حرارة متوسطة ( حوالي 200 درجة مئوية ) لمدة حوالي 15-20دقيقة ( حسب الفرن ).

وهاهي بعد ما خرجت من الفرن


شوفو واش خفيف و هشوش




* ملاحظة : أنا الكرواسون درتو مالح ، إذا حبيتوه حلو زيدولو السكر في العجين ( 4-5 ملاعق كبيرة سكر ) و فاني و ممكن تحطو شكلاطة فيه من الداخل او حتى تشكلوه على شكل PAIN AU CHOCOLAT و قبل ما يحمار من فوق أجبدوه و أدهنوه بالسيرو ثقيييل.

في المرات القادمة إن شاء الله ، نحطلكم وصفات سهلة للمقبلات اللي رايحة نعملها بهذا الكرواسون

أسمحولي طولت عليكم ، بصح حبيت نوضح مليح كل الخطوات . أرجو أنكم جربوها و تعجبكم .