مشاركتي في *يدا بيد للتخلص من الظاهرة* بعنوان -ظاهرة التبذير في جهاز العروس-

[ميمي ناصر 22]

السلام عليكم ورحمة الله تعالى وبركاته
اسعد الله صباحكم . مسائكم
ان شاء الله الكل بصحة وعافية
بعد ان قرأت موضوع الاخت * نور لا تراه * فيما يخص غلاء المهر حبيت نطرح موضوع في نفس السياق تقريبا الا وهو
~التبذير جهاز العروس ~
يمكن الموضوع بخص النساء اكثر لكن من الحد منه راح نتخلصو من الكثير من المصريف التي تبذر وتدخل العائلة في الديون
انا كنت من بين العرائس 2015 ولكن كنت متتبعة لقسم العرائس وتجهيزاتهم هنا في منتدى الجلفة و في منتديات اخرى وعلى مواقع التواصل الاجتماعية منذ اكثر من 5سنين و مع احتراماتي لكل العرايس اللي كانو يحطو الجهاز نتاعهم و كل تجهيزاتهم للعرس لكن انا من رايي مبالغ فيها وسببت الكثير من المشاكل بين العروس واهلها لانو اي عروس تحب تكون مثل قريناتها وتبدا في التقليد وكيما نقولو تفرض على اهلها لازم ندير كيما هدا الجهاز وندي كذا وكذا وكذا ومتراعيش الظروف المادية لاهلها وحتى وهي عاملة رايحة تدير الدين ليها او لاهلها ولهذا اخترت هد الموضوع للنقاش و الحد من ظاهرة التبذير في جهاز العروس
مثلا فيما يخص الفراش تلقا العروس تاخذ معاها مالا يقل على 10لحافات او مانسميها حنا بساطات مع مخادهم لكل 2بساطات 450الف هدا اقل سومة
مع صالون مغربي على الاقل مليون
مع زربية اقل شي 400الف
تروسوات مالا يقل على 4 الواحد ب800الف فما فوق
كوات زاورة كوفرولي مالا يقل على 2من كل نوع من 400الف حتى اكثر من زوج ملاين
دراوات مالا يقل على 4 الواحد ب 450الف
مطارح الصوف على الاقل 4*
وفي الاخير كوفرولي الابيض وهدا اقل واحد من مليون فما فوق
وهدا كله تجد ان العروس ستسكن مع اهل زوجها يعني لها غرفة واحدة و معظم هدا الفراش راح يتخبا في الخزانة
نجي للتصديرة وما ادراك ما التصديرة معظم العرائس اللي شفتهم وحتى من العائلة على الاقل تاخذ 7 تصديرات وراح نذكر اهمهم
القفطان المغربي وفي وقتنا هدا تجد العروس تاخذ 2 او اكثر اقل قفطان من 2ملاين فما فوق يصل حتى 6ملاين
الجبة او الكوكتال او الفرقاني كل واحد واش يسميها من 2ملاين فما فوق
الهندي من 3ملاين فما فوق
السواري تاخذ منها العروس 2او اكثر من 2ملاين فما فوق
الطقم الابيض 'اونصومبل' من 2ملاين فما فوق
البدرون من زوج ملاين فما فوق
الكاراكو من 3ملاين فما فوق
هدو اهم التصديرات واللي اكاد اجزم انو مكانش عروسة مداتهمش في تصديرتها ناهيك عن القبايلي الوهراني التلمساني القاط السطايفي وحتى التونسي
ثالث نقطة هي المكياج ومستحضرات التجميل واللي تتكلف اكثر من 3 ملايين من عطور الى مكياج الى مواد العناية بالشعر والجسم تجد العروس تاخذ معاها مالايقل على 6انواع من العطر و مزيل العرق و مالايقل على 3 علب مكياج بالوان مختلفة و ناهيك على مكملاتها من احمر الشفاه و اقلام و طلاء الاظافر و الماسكارا و غيرهم
حبيت نوضح فقط اكثر الامور تبذيرا في الجهاز وكاين بزاف امور متطرقتش ليها
انا في فترة تجهيزي لعرسي حاولت انو نتفادى التبذير على قدر المستطاع
وفي التعليقات القادمة راح نحط كيف اتفاديت هد النقاط وان شاء الله تستفادو منها
اسفة على الاطالة في الموضوع ولكن حاولت قدر المستطاع التلخيص
وان شاء الله نلقاو الحلول لهد الظاهرة

[ميمي ناصر 22]

السلام عليكم
عدت من جديد لاضع بعض الحلول اللي اتبعتها انا شخصيا في الترتيب لجهازي
اول حاجة انا الحمد لله من عائلة ميسورة الحال و لكن هدا ميمنعش اني منبذرش و ندي بزاف الجهاز ونصرف من عند اهلي بلا حساب والا نخليهم في الديون مع انو راني ساكنة وحدي و كنت قادرة نقول اللي في بيت الشي داو هد القدر من الجهاز مالا انا ندي الضعف ولكن الحمد لله قدر نسيطر على هد النقطة
ثاني شي انا من جهاز اختي تعلمت بزاف حوايج و حاولت نتفاداها قدر المستطاع
ثالثا نبداو مع الحلول
*لازم على كل عروس تدير حرفة يدوية في ايدها حتى وان كانت عاملة ولا تقرا في فترة الصيف تقدر اي وحدة تتعلم حرفة تفيدها انا هد المجال استفدت منو بزاف وخصوصا انو كنت ماكثة بالبيت لاكثر من 5 سنوات قبل الزواج* حاولت مع الدراسة ولكن مزال ربي مكتبليش النجاح حبست في الباك و دخلت تكونت في الخياطة التقليدية والحمد لله بعد عام اخذت الدبلوم وهدا حفزني اني نتعلم اشياء اخرى من الاعمال اليدوية والحمد لله هدا فادني في التجهيزات و خيطت حوايجي وحدي و خدمت تروسواتي وبساطاتي وحدي وبهدا وفرت نصف ثمنهم واكثر فمثلا في الخياطة انفقت غير حق القماش و التزيين والكل يعرف الخياطة وتكاليف الخياطات على الاقل حق ايدها مايقلش على 800الف فما فوق نفس الشي بالنسبة للتروسوات والبساطات
*بالنسبة للمكياج ومستحضرات التجميل انا من طبيعتي منديرش المكياج ولا اهتم بالمستحضرات التجميلية لانو مقتنعة انو الجمال جمال الروح ديت معايا غير حاجات بسيطة و تاني كان راجلي ساعات وين يجيبلي بعض المكياج كنت منستعملوش و نشوف تاريخ الصلاحية ونخبيه وتاني العطور كان خويا ربي يحفضو كي يروح كشما بلاصة يجيبلنا وفي الاخير لقيت روحي عندي المكياج ومخسرتش بزاف مصاريف وهدي فكرة التدبير وصدقوني تفيد بزاف وخصوصا البنات اللي يجيبولهم رجالهم المهيبة او الموسم كيما نقولو
*بالنسبة لللبسة انا 3سنين وانا مخطوبة لظروف عمل راجلي خارج البلاد كنت في كل مناسبة مثل الاعياد ندير مثلا قندورة نلبسها يوم العيد ومن بعد نخبيها في الجهاز وتاني الا جاتني كادو سواء لبسة او اكسسوارات او مكياج اي شي نخبيه حتى قبل ما نتخطب وبهدا وفرت مصاريف اللباس
انا منخرجش بزاف لهدا مدرتش ملابس الخرجة الا جلابة وحدة و بابا ربي يحفضو كان جايبلنا عبايات من الحج خبيتهم في الجهاز ملبستهمش ودرك رانا نلبس فيهم
*نجيو للفراش كيما سبق الذكر التروسوات والبساطات خيطتهم وحدي ومع اني ساكنة وحدي مي مديتش بزاف البساطات 4 بلا مخاد و التروسوات 4 بسعر 2او اقل
الكوات والزور و الكوفرولي اشتريت حاجة موايان محبيتش نشري تاع مليون فما فوق لانو كامل راح نتغطاو بيهم يعني نفس الغرض علاه ندي كوفرولي مليون وانا نقدر ندي بنفس المليون 3 كوفرولي ولا زور ولا كوات
*نجيو للتصديرة اول حاجة ديت غير الحوايج اللي مقتنعة صح اني نلبسهم بعد الزواج مش نلبسهم في الحنة ومن بعد نرميهم في الخزانة درت 5 منهم 2مخيطتهم انا يعني وفرت فيهم وجاتني وحدة كادو* و اللي شريتهم شريت سومة معقولة
*نقطة اخرى حبيت يستفادو منها وهي التروسو تاع الفاليزات !!!!! نستغرب من العرايس اللي يديرو تروسو الفاليزات واللي يتكون من 3فاليزات و مالات وكابة والثمن نتاعهم لا يقل عن مليون علاه هد التبذير والتباهي انا عن نفسي ديت فليزة وحدة وكابة علاه ندي تروسو وانا راح نفرغ كامل القش في الخزانة ؟؟؟ انا باقي القش ديتو في فاليزات دارنا وبعد العرس رجعتهم لدارنا ووفرت في سعر التروسو

[ميمي ناصر 22]

السلام عليكم
الان هد بعض النصائح اللي نشوف انها تفيدكم
اول شي كل وحدة تحاول انو تدي قدر الامكانيات نتاعها متبذرش
تقدر الوحدة كما سبق الذكر انو تتعلم حرفة تفيدها او حتى مجموعة من الحرف متعلقة ببعضها مثل الخياطة البساطات الساموكس التزيين بالورود التغليف والتزيين
كما سبق الذكر ايضا ممكن تخبي الوحدة حوايج يجيوها كادو او حوايجها الجدد كيما حوايج العيد راح توفر بزاف مصاريف
ادا كانت البنت راح تسكن مع اهل زوجها تراعي هد النقطة تدي حوايج قلال خصوصا في الفراش لانو راح تكونلها غرفة وحدة
التصديرة خيري الحاجة اللي تكوني صح راح تلبسيها بعد العرس فمثلا الطقم والسواري و الهندي انا من رايي انو العروس مش راح تلبسهم بعد الزواج وانا حسب ما شفت اغلب العرايس يلبسوهم في العام الاول ادا لبسوهم ومن بعد خلاص علاه على الاقل 9 ملاين تروح خسارة وثاني فيما يخص الجبات الثقال اقل وحدة 3ملاين وفي الاخير تلبسهم المرا مرة ولا زوج ويترماو في الخزانة
نقطة اخرى هي لاصال وعادت البنات تتنافس شكون دارت في افخم قاعة علاه الوحدة متديرش في دارهم وتربح اجر لاصال اللي ميقلش على 2ملاين لليلة ومن المعروف انو البنت عندها غير يوم الحنة اللي تحتفل بيه في بيتها اما الدخول والتحزام في بيت العريس علاه متخرجش العروسة مرفوعة الراس من بيت باباها البيت اللي كبرت وتربات فيه

وفي الاخير صدقوني على قد مادات الوحدة راح يقولو العبارة المشهورة ~~علاه ولش جابت~~

[نور لاتراه]

السلام عليكم
محجوز

[ذكـــــرى]

موضوع قيّم بارك الله فيك.
لي عودة بإذن الله.
لكن ما معنى محجوز؟

[ميمي ناصر 22]

المشاركة الأصلية كتبت بواسطة نور لاتراه

السلام عليكم
محجوز

وعليكم السلام و رحمة الله تعالى وبركاته
في انتظار تدخلاتك اختي نور

[ميمي ناصر 22]

المشاركة الأصلية كتبت بواسطة ذكـــــرى

موضوع قيّم بارك الله فيك.
لي عودة بإذن الله.
لكن ما معنى محجوز؟

وفيك بارك الله اختي
ننتظر مشاركتك في الموضوع
محجوز ... يعني خليت المساحة باه نرجع و نحط الحلول نتاوعي

[نور لاتراه]

السلام عليكم
اولا: بما ان لديكم إطلاع كافي على هذا الموضوع
فاكيد ان لديكم نظرة عن كثب لواقع الجزائريات وتعامل الاهل مع موضوع التبذير
فما هو تقييمكم؟
ثانيا :هل هناك امثلة اخرى بدأت تاخذ الموضوع محمل الجد؟هلا سردتم لنا كيف تصرفت,فاكيد لكل وسائله وطرقه
ثالثا: هل التباهي صار تقليدا وليس محصورا على طبقة بعينها ؟
رابعا: من تكتفي او تحاول التحضير قدرا الامكان بامكانياتها بعيدا عن استغلال التجار (اي تحاول ان لاتشتري كل تلك الاغراض)
تجد نفسها احيانا وقعت ايضا في الاسراف,مارايكم؟
لم اتوقع ان اسئل كل هاته الاسئلة,فقد كتبتها ارتجاليا كعادتي في الكتابة,نرجو اننا لم نثقل عليكم

[ميمي ناصر 22]

المشاركة الأصلية كتبت بواسطة نور لاتراه

السلام عليكم
اولا: بما ان لديكم إطلاع كافي على هذا الموضوع
فاكيد ان لديكم نظرة عن كثب لواقع الجزائريات وتعامل الاهل مع موضوع التبذير
فما هو تقييمكم؟
ثانيا :هل هناك امثلة اخرى بدأت تاخذ الموضوع محمل الجد؟هلا سردتم لنا كيف تصرفت,فاكيد لكل وسائله وطرقه
ثالثا: هل التباهي صار تقليدا وليس محصورا على طبقة بعينها ؟
رابعا: من تكتفي او تحاول التحضير قدرا الامكان بامكانياتها بعيدا عن استغلال التجار (اي تحاول ان لاتشتري كل تلك الاغراض)
تجد نفسها احيانا وقعت ايضا في الاسراف,مارايكم؟
لم اتوقع ان اسئل كل هاته الاسئلة,فقد كتبتها ارتجاليا كعادتي في الكتابة,نرجو اننا لم نثقل عليكم

عليكم السلام ورحمة الله تعالى وبركاته اختي

*اولا بالنسبة لواقع الجزائريات فللاسف والله شفت حالات تدمع لها العين تلقاي وحدة تدير فوق طاقة والديها و نذكرك مثال وحدة من لافامي صدقيني اقل مايقال عنها زاوالية الوالد نتاعها مجرد عون امن وخلاتو في الديون ووالديها باه ميكسروش فرحتها كيما يقولو تحملو الديون ولكن السؤال وين رايحين؟؟؟ وين دور الاهل و التوعية ؟؟؟وعلاه الفتاة متديش قدها قد روحها و تكتفي بالشي اللي كتبولها ربي ؟؟؟؟


ثانيا في التعليق الثاني راني حطيت مثال حي ليا شخصيا
كاين اللي داو بنصيحتي من بين العرايس اللي كنت نتواصل معاهم اما على المستوى الشخصي مزال مطبقوش افكاري لانو في رايهم انو افكاري خاطئة و اني بتعليقهم منيش قدقد


ثالثا ايه التباهي في وقتنا هذا ولا على الفقير قبل الغني


رابعا المشكل مهوش في استغلال التجار و غلاء الاسعار ( ماعدا فيما يخص الذهب ) المشكل في العروس نفسها كنت حطيت مثال فيما يخص الفراش البائع حاط السلعة والاسعار من اقل شي لاغلى شي و صدقيني كاين فراشات تصل حتى 3ملايين للكوفرولي هل من المعقول انو وحدة بعقلها تشري كوفرولي بهد السعر ؟؟؟انا نفضل نشري خاتم نلقاه للزمن والا نديرو كوفرولي ويتقطع
التاجر مش يفرض عليك انو تشري هد المودال صح يعطيك رايو ويقولك هدا يشدلك والنوعية والجودة احسن ...الخ لكن القرار يعود للعروس وكيما دايما نقول انو الغطا راح يدفينا سواء غطاء تاع 60 الف ولا تاع مليون

وفي الاخير ان شاء الله نكون وفيت بالاجابة واكيد مثقلتيش عليا بالعكس

[farawla01]

السلام عليكم واش راك اختي ميمي والله نستعرف بيك مرا ونص راك كيفي انا اديت غير الضروريات وخيطت بساطاتي والبلوزة الي تصدرت بيها وخدمت ليناب مدردش الدين والحمد لله

[ميمي ناصر 22]

المشاركة الأصلية كتبت بواسطة farawla01

السلام عليكم واش راك اختي ميمي والله نستعرف بيك مرا ونص راك كيفي انا اديت غير الضروريات وخيطت بساطاتي والبلوزة الي تصدرت بيها وخدمت ليناب مدردش الدين والحمد لله

وعليكم السلام والرحمة اختي فراولة
الحمد لله اختي السوال عليك
بارك الله فيك والله نفرح كي نشوف بلي مزال كاينين بنات يفكرو بهد الطريقة ويديو على قد حالهم وميخلوش والديهم غارقين مع الديون
انا تاني الحمد لله خيطت روباتي وحدي و خيطت 2من تصديراتي و خدمت التروسوات ولي ناب وتزيين السلال و الصابون وعلاقات المفاتيح وبزاف حوايج وفرت من خلالهم نصف الثمن اللي نشريهم بيه او اكثر

[أمل94]

شكرا لكي اختي ميمي ناصر علا الموضوع القيم انا مخطوبة وبعض النقاط اعتمدتها في تجهيزاتي قد اشرتي اليها كالخياطة بنفسي وشراء ما سألبسه فقط والاستغناء عن شرا ء التصديرة بكرائها يعني صح تلقاي لبنات من حواليك يقولولك اشري كذا وكذا قلتلهم انا الحاجة لي منتنفعش بها وتعمر غير الخزانة مانديهاش هذا شعاري لحد الان ران شارية غير الامور الاساسية وانشاله رب يباركلي فيها وشكرا عالموضوع الرائع

[ميمي ناصر 22]

المشاركة الأصلية كتبت بواسطة دمع الليل

شكرا لكي اختي ميمي ناصر علا الموضوع القيم انا مخطوبة وبعض النقاط اعتمدتها في تجهيزاتي قد اشرتي اليها كالخياطة بنفسي وشراء ما سألبسه فقط والاستغناء عن شرا ء التصديرة بكرائها يعني صح تلقاي لبنات من حواليك يقولولك اشري كذا وكذا قلتلهم انا الحاجة لي منتنفعش بها وتعمر غير الخزانة مانديهاش هذا شعاري لحد الان ران شارية غير الامور الاساسية وانشاله رب يباركلي فيها وشكرا عالموضوع الرائع

العفو اختي
بارك الله فيك هكدا تدي قدر مقدورك و متخليش اهلك في الديون و مافائدة الالبسة و الاشياء اللي نرميوها في الخزانة بلا استعمال ؟؟
ربي يتمملك على خير حنونة و يعينك على الجهاز و تدخلي بالصحة والهنا لعند راجلك

[أمل94]

شكرا الاخت ميمي ناصر