مقدرتش ننسى

[مشكلتي]

السلام عليكم انا امراة متزوجة .في يوم ما تخاصمت مع زوجي وفجأة تدخل حماتي الغرفة وتنزل عليا وابلا من الشتائم ومن بين الكلام الذي قالته عبارتين كلما نتفكرهم نكحل عليها قلبي بزاف ويحز في قلبي اني لم ارد عليها شيئا ذالك الوقت .قدام زوجي قالتلي(لوكان عرفتك هكا والله ما نوقفها في داركم.)وقالت لي(لوكان راكي عند ناس اخرين راهم لاحولك درابلك برا)
تحبو صراحة اخوتي الكرام كلما نتفكرها كي قالتهملي وحشمتني قدام راجلي نصيب نقهرها ندمت على لي سكت كان غادي نقوللها وانا كان عرفتكم هكا كي توزنوني بالذهب منجيش .وبالفعل.وكان غادي نقوللها لوكان راني عند ناس وحد اخرين راني عايشة وحدي يتشهاو فيا النسا
المهم بعد لي صرا راني نخمم في حاجة ران نخمم نبطل منقوللها يمة نولي نقوللها خالتي .لاني علبالي هذ الشي يألمها بزاف مشي قضية تحبني ولا لانها تحشم بزاف قدام جاراتها وقريباتها كان نعيطلها خالتي قدامهم .علبالي تنجرح بزاف وتنحشم قدام طفالاتها وسلفاتها وجاراتها لوكان نقوللها يا خالتي قدامهم .واش رايكم والله حابة ننتقم منها بهذ الطريقة كيما حشمتني وجرحتني قدام راجلي

وش رايكم

[Elwawy]

أختي صفي ذهنك و صفي قلبك, نحن في زمن لا يمكن للمرء أن يتخيل فيه المستقبل يمكن أن يموت أي أحد فينا إضافة إلى فرص الموت الموجودة على هامش الفيروس , يمكن أن نموت جميعنا, و نتهناو من بعضنا أجمعين.

عندها سيظهر أنه كل شيء تافه و لا يستحق العناء.

[ع.عيسى]

الحمد لله انك ما رديتيش عليها... المشاكل تبدأ كيما هاك.. فعل رد فعل وتزيد تكبر وتكبر وماتخلاصش َواخرتها انت الضحية... لذلك من الأفضل والحكمة انك تنساي وتوكلي امرك لله.... لا تحاولي الانتقام ولا الرد... وادفعي بالتي هي أحسن.. فلربما حسن تصرفك هاذا يخلي عجوزتك تحس بالندم اتجاهك وتخجل من نفسها.. وثانيا تكبري في عيون زوجك....فليس كل إساءة تستحق الرد...

[بشرئ عاشقة العلم]

انا طفلة و كرهت النسا و قصصهم و الله
انا الحاجة اللي نعرفها مليح انو لوكان الراجل مزير مليح لا الاخت و لا الزوجة تتجا تحكي هاك قدامو
و انت اختي خطيك منها و مترديش عليها هدي غير سخافات برك و الغيرة تاع النساء هي اللي تدير هاك خلي بينك و بينها مسافة و خلاص
بالتوفيق

[محمد محمد.]

وعليكم السلام ورحمة الله وبركاته

في الحقيقة يا أختي الكريمة هناك شيء ما مختصر في قصتك وهو ما طبيعة هذه الخصومة التي كانت بينك وبين زوجك !!!

هل هي خصومة بسيطة عادية أم أن الأمر تجاوز غرفتكم !!!

بما أن أخت زوجك قدمت إلى غرفتك فهذا يعني أنها سمعت خصامكم وأنه لم يكن عاديا

في الحقيقة هذه الأمور تؤثر في سيرورة الواقعة وفي الحكم عليها حكما صحيحا

أما بالنسبة لسؤالك فالأفضل أن تتجاهل هذا الأمر خاصة إن كانت علاقتك مع زوجك جيدة ومستقرة لأن ردك عليها قد يفسد حياتك الزوجية وقد تتنه إلى ما لا يحمد عقباه

[Anabela]

من الواقع الانسان وقت الغضب قد يصل به الحال يقول اي حاجة دون تفكير ، مرات مهما ضراتك الكلمة لازم نتجاوزو بعض الامور كي تستمر الحياة سورتو مع انسان كبير كما عجوزتك ديرها فمقام الوالدة مترديلهاش الكلام احسن خليها على راحتها مدام موصلتش دارتلك حوايج كبار والوقت يصلح بيناتكم ، حطيها مكان امك قالتلك الكلام هذك وقع علابالنا مرات يصرا سوؤء تفاهم حتى بين افراد العائلة الواحدة ،

[بلا صوت]

معليش صفي قلبك برك

[نينو]

كبري قلبك . وفك عليك من المشاكل

هي صح غالطة . بالصح ماتفسديهاش انتي بالتهور . خليها كي بكري لا تنتقمي لا والو. حابة تدمري دارك بيديك.
انا متأكد انها قالتها في لحظة غش.
ربي يصبرك وربي يهنيك ان شاء الله

[حذيفة بن اليمان]

المشكل كامل في راجلك، بزاف حاسبين طاعة الوالدين أنها طاعة عمياء وهذا خاطئ، الطاعة لي رح يجي من ورائها ضرر لناس اخرين هي معصية وليست طاعة

لو كان جات فيه صفات الرجولة راه يدير موقف حتى لو كان متخاصم معاك

[عسجدة]

بارك الله فيك
شوفي انا منكذب عليك ....ما نعيشك في المثاليات ....ديري اللي يريحك ....

ديري كيما كنة عمي .قالت لمرت عمي باه نقلك يما ماكيش يما بصح ربي بلاني بيك نقلك يما .....بعد خلافات عائلية واحنا نسكنوا كامل مع بعض ومن سواد نهاري كنت ثم اثر الحادثة الأليمة.....ههههه

وعليه قوليلها خالتي نورمال بصح تبقى شدتهالك طول حياتك وكل مرة تقعد تهدر وجغنن عليك ....

بصح علابالي قلبك ميبردتش حتى ديريها

ديريها نورمال اقعدي سمانة وانتي تقليلها خالتي
الصباح قوليلها صباح الخير خالتي ....
كيفاه صبحتي خالتي .....
ومبعد كي تكملي سمانة طيبي القهوة وديري قريوش واديلها سنيوة وحطيهالها وقوليلها ارواحي تشربوا القهوة يايماااا.

ومنها انتي بردتي قلبك وخلاص ...

يا اختي العجوزة لازم تمشي معاها بالتوفيق .

أما أنا أن كانت لي عجوزا مستقبلا منقلهاش يما من اليوم الأول ....

ما نقول يما ما نقول خالتي نحاول قع منعيطلهاش.....ههههه

قالك العجوزة يما خلينا من التنوفيق صح .

يما وحدة اللي ولدتني ورباتني وكي نغيب تحوس عليا و كي مشوفنيش ما يجبها رقاد ....

سلام من قلب يحب السلام