اخذ المقاسات على طريقة mode pour lol

[rim-25]

السلام عليكم حبيباتي
كامل لي هنا مهتمات بالخياطة و انا وحدة منكن و كنت في موضوع ذو صلة حطيت بعض الاسايات لي لازم نعرفوها قبل ما نبداو الخياطة
https://www.djelfa.info/vb/showthread.php?t=1613068

اليوم رايحة نحطلكم درس اخذ القياسات بطريقة اكاديمية
الطريقة هادي كانت الاستاذة تاعنا تاع الخياطة معتمدتها معانا
و كانت دروسها تلخيص لفيديوهات mode pour lol
و هو موقع فرنسي لتعليم الخياطة
https://www.modepourlol.com/

الدرس الاول هو اخذ القياسات
https://www.youtube.com/watch?v=jCLZqDcG9_o

رايحة نحاول ننقلو مبسط لتعم الفايدة للاخوات
اذا اخطات ارجو من الخبيرات التصحيح
و اهلا بالنقد البناء

البداية مع ورقة القياسات لي نهزو فيها القياات تاعنا كامل


نحتاجو شريط كما هدا للمبتدئات فقط باه تعرف اين هو خط الوسط la taille و اين هو خط الحوض bassain


نحتاجو شريط قياس خاص بالخياطة لانو رايح يكون لين و يمشي مع انحناءات الجسم


هذا قلم اسود تاع الماكياج العادي خاص بالمبتدئات فقط باه نعين نقاط خاصة في الجسم مع الوقت ما نحتاجوهش


المسطرة للمبتدئات ايضا باه نحكمو النيفو تحت الطابق مثلا و ما نميلوش يدنا كي نجيو نهزو القيس مع الوقت نستغناو عليها


الان نرجعو للخيط الاول نقسموه على زوج الحيط الاول نحطوه في لاطاي ما نشبحوهش ماناش حابين نقصو من لاطاي تاعنا حابن نهزوها كما راهي و الخيط التاني نحطوه في الباصا و تحديدا في اكبر منطقة يعني تشوفي لبلاصة العريضة لتم و تهزي عليها القيس


الان توقفي مقابلة الضحية لي رايحة تهزيلها القيس هههههههههه و تخيلي النقاط المتقطعة هاديك لانها هي لي رايحة تخليك تعرفي مكان النقاط لي رايحن نرسموها بالقلم الاسود من بعد تعرفو واش نديرو بيها


صورة اخرى لنفس النقاط لي هزيناهم من قبل

[rim-25]

الان وجدو روحكم مليح ديرو في حسابكم بلي كي تهزو القس ما لازمش تشبحو شريط القياس تاعكم على الجسم لازم يكون يتحرك بسهولة و ما تخليوهش كبير بزاف تاني و نهزو طاي اكبر من لاطاي تاعنا و لازم نتاكدو مليح من القياسات تاعنا

الان رايحين نهزو محيط الصدر لازم نكونو ورا الموديل تاعنا ( الضحية) باه نتاكدو بلي القيس هزيناه قدقد و ما يجيش شريط المتر تاعنا هابط


هكذا يعتبر القياس تاعنا غالط




نرجعو للطريقة الصحيحة لازم يكون في الخلف في نفس مستوى الامام و يكون يعدي من الامام على راس الصدر


الان نروحو نهزو قيس محيط الوسط لي هي لاطاي منين حطينا في الاول الخيط تاعنا، ماش تروحيلي منين السرة مثلا شوفي رانا فوقها في المنطقة الضيقة و هنا ما لازمش نشدو الخيط بزاف علابالي كامل عندكم لاطاي شابة 36-38 بصح ماش شرط تبينوهالي هنا هزولي لاطاي تاعكم كما راهي


الان ننتاقلو لمنطقة الباصا كما حطينا قبيل الخيط التاني كما قلتلكم نروحو لاعلى منطقة و نهزو القيس منها


هذا ارتفاع الحوض نقيسوه بقياس الفرق بين الزوج خيوط لي حطيناهم في الاول يعني ماش تجيبولي قالون فيه 2 سم عرض و تقولولي راني هزينا الفرق اذا كان الخيط لي هزيتوه عريض بزاف هزو من نصف العرض تاعو القيس ماش من الحواف باه ما ياثرلناش على القيس


هنا وصلنا للكورساج شفتو النقطة الاولى لي حطيناها ما بين محيط الرقبة و منتصف الكتف بالعرض نحطو لتم المتر تاعنا و نبداو نهبطو لخط الوسط و لازم نعديو على راس الصدر هذا هو كورساج الامام


كورساج الظهر بنفس الطريقة من النقطة هادي لي تقريبا في محيط الرقبة و منتصف الكتف و نهبطو بخط مستقيم لخط الوسط ما نميلوش يدنا


للتاكد فقط من حساباتنا شفتي خط الوسط من الخلف تطلعي للكتف و تعاودي تهبطي للامام مرورا براس الصدر رايحة تلقاي نتجة نقصي منها كورساج الظهر لازم يخرجلك تاع الامام



عرض الكتف الان نربطو بين النقطتين لي رسمناهم في الكتف


هنا رايحين نحسبو الفرق بين الاكتاف قداه نحتاجوها خاصة في لي مونش باه نرسموهم



نفس الشئ بالنسبة للامام تقريبا رانا من مستوى الطابق نبداو نحسبو
من منبت الصدر ماش تروحيي فوق الصدر و جك الطابق ماش مرسوم مليح


ارتفاع الصدر نحسبوه من خط الوسط الى راس الصدر و نستعملوه باه نرسمو لي بانس


هنا نحسبو الفرق بين الراسين هوما يقولو من الاحسن في هاته الحالة تكوني عريانة بصح محال في بلادنا ههههههههههههه


هنا رايحين نحسبو عمق الرقبة لهذا نستعملو المسطرة لانو عادة القياسات تاعنا لازم تكون عمودية و اعمق مكان في الرقبة ماهوش مع النقطة هاديك لي في محيط الرقبة لهادي نديرو المسطرة باه نحكمو نفس المستوى فقط مع الوقت ما نحتاجوهاش


هنا رايحين نهزو القيس هذا لي نقدرو نقولو عليه ارتفاع تحت الطابق رايحين نحتاجوه باه نرسمو الطابق احيانا ما نعرفش كفاه نشرحهم بالعربية ، مي هذا ما يعنيش اني قاوية في الفرنسية ههههههههههههههههه

[rim-25]

الان ارونا ابدعاتكم حبيباتي
بحيث مطلوب من كل وحدة منكن تحميل الاستمارة
و متعمرها بالمعلومات اللازمة
اي تختار ضحية و تهزلها قياسات و تحطلنا هنا
باه في المرة القادمة نحطو الجزء الاول من رسم باترون الاساس

[djamilach23]

الله اينورك كيما نورتينا ويجعلها في ميزان حسناتك وان شاء الله انطبقوها مشكورة .

[sarra5]

شكرااا ليييك رييييييم

[نورةسعاد]

شكرا اختى ان شاء الله نستفادو من هاذالشرح الدقيق

[rim-25]

الحمد لله ان الدرس عجبكم
نتمنى فقط بعض النشاط و طبقوه لاني بديت بتحضير صور باترون الاساس و لان الدرس طويل بزاف رايحين نقسموه على مرتين

[sarsoura45]

تسلم الايادي على الشرح والرسم

[rim-25]

لبنات شوية تفاعل باه نبداو في الصح

[islam girl]

و الله شرحح اكثثثثثثثثثثثثثر من راااااااااااااائع شكرااااااااااااا بحجم السماء اختي

[ام عصومي و معتز]

شرح رائع واضح و بسيط الف شكر اخيتي

[بعيدة المنال]

أنا تاني اقبلوني معاكم وضحيتي الأولى ستكون بنتي ربي يحفظها لكنني أعترف من البداية بأنني ثقيلة في الفهم باش تديريني في حسابك أختي ريم
جعل الله جهودك في ميزان حسناتك وجزاك عنا كل خير

[sara lora]

بارك الله فيك حنونة