الجزء الاول من باترون الاساس على طريقة mode pour lol

rim-25 · 2014-06-21, 17:53

السلام عليكم حبيباتي
كنت في اليومين لي فاتو حطيتلكم اساسيات يجب معرفتها قبل الدخول لعالم الخياطة
https://www.djelfa.info/vb/showthread.php?t=1613068
و من بعد حطيتلكم طريقة اخد القياسات بطريقة اكادمية ماخوذة من موقع mode pour lol
https://www.djelfa.info/vb/showthread.php?t=1613039
و اليوم نكملو مشوارنا و نبداو برسم باترون الاساس
و لان الدرس طويل بزاف رايحن نقسموه على زوج
اولا و كالعادة فيدو يلخص كلامنا كامل
و مصدر معلوماتي لي نمدلكم فيها
https://www.youtube.com/watch?v=jCLZqDcG9_o

كبداية لازم نعرفو ما هو باترون الاساس لي صدعتلكم راسكم بيه

الباترون اوبلغتنا العربيه النموذج
إن الباترون يعد من اهم الخطوات الاوليه او ممكن نسميه اساس الخياطة حيث اننا به
نستطيع ان نحدد القياسات وان نحدد الخطوط المهمه
والباترون الاساسي هو نقل لمقاسات الجسم الطبيعيه على الورق حتى بالتالي
نستطيع ان نقوم بعمل وتطبيق اي موديل نريده عليه
لكل قطعه باترونها الاساسي البنطلون التنورة الجلابيه الملابس الداخليه ....الخ
هنا سنتعلم عمل الباترون الاساسي ومنه نعمل البلوزه او الجلابيه او اي شئ نحتاجه.

اول حاجة لازمنا لائحة بالاشياء لي نحتاجوها
و كفاه اختي تبداي تخدمي و انت ما سجيتش حوايجك ما تصلحش

اول حاجة ورقة كبيرة نرسمو فيها الباترون

مجموعة من الاقلام الملونة لان اختلاف الالوان رايح يبينلنا الخطوط الاساسية للرسم و الخطوط المساعدة

الة حاسبة تساعدنا على حساب القياسات التي سيطرا عليها بعض التغييرات

مسطرة طويلة تساعدنا على رسم الخطوط المستقيمة احيانا انا عن نفسي ما نستعملهاش و نستعمل شريط القياس في مكانها لان الحافة تاعو مستقيمة

كوس يا حوجي واشنو هذا مسطرة و كوس و الة حاسبة علاه راني في حصة تاع رياضيات ههههههههههههه عادي حبيباتي حنا قاعدين نتعلمة في الخياطة على الطريقة الاكادمية او كما يقولولها الخياطة الرفيعة

بيروكي تاع خياطة هذا نستعملوه في رسم الانحناءات

و نستعملو ايضا الورقة تاع القياسات لي كانت في الدرس لي فات

تنبيه مهم جدا الباترون ما يتخدمش على الجسم كامل و انما يتخدم على نصف الجسم فقط

يعني رايح يكون عندنا اربع اجزاء تاع الباترون

لهذا السبب القياسات تاعنا رايحة تتقسم على 4

الان رايحين نقومو ببعض التعديلات على ورقة القياسات الاولى لي عندنا

نضيف لمحيط الصدر 8 سم و لمحيط الوسط 3 سم و محيط الحوض 4 سم
ثم نقوم بعدها بقسمة المقاييس السابقة على 4

لغاية الان رانا ما درنا والو و ما بديناش في الرسم

rim-25 · 2014-06-21, 17:53

البداية

في الاول قلتلكم بلي نحتاجو لورقة كبيرة باه نرسمو عليها الباترون ارتفاعها رايح يكون ارتفاع كورساج الامام + 30 سم لانو رايحين نرسمو الجزء العلوي للجسم هو لي فيه التفاصيل بزاف اما الاقدام نكملو نهبط بخط مستقيم فقط

العرض رايح يكون نصف عرض الحوض لانو اعرض منطقة في الجسم و نزيديلو 20 سم

هنا تقدرو تتسالوا قلتلكم القياسات رايحن نقسموهم على 4 هنا علاه قسمنا على زوج ببساطة لانو رايحين نرسمو باترون الامام و الخلف في نفس الوقت

نرتفع على اسفل الورقة ب 5 سم و رايحة تمدلنا خط الحوض و كذلك على جانبي الورقة و نرسم خطوط مستقيمة

و رايحين نتحصلو على منتصف الامام و منتصف الخلف و باه ما ننساش الخطين هادو كي نحطوهم على القماش يكون مطوي على زوج و الجهة المغلقة هي لي يتحط فيها الخطين هادو

الان رايحين نرسمو خط الوسط

بالرجوع الى طريقة اخد القياسات رايحين نلقاو بلي ارتفاع الحوض قسناه بقياس المسافة بين خط الحوض و خط الوسط و يعني باه نعاودو نرسمو خط الوسط رايحين نرجعو للقيس هذا

يجب رسمو بطريقة موازية تماما لخط الحوض لي رسمناه في الاول باه تضمني انو موازي تمام ارسمي ارتفاع الحوض في نقطتين و اربطي بيناتهم

باه رسمنا خط الوسط استعملنا ارتفاع الحوض بصح حنا ما اخدناش قياس يربط خط الصدر بالقياسات السابقة صح بصح اخذنا الارتفاع لي قلنا عليه ارتفاع ما تحت الطابق و هو قريب لارتفاع الصدر رايحين نستعملوه مع بعض التغييرات

خط الصدر رايح يكون في راس الصدر مباشرة بصح الارتفاع لي تحت الطابق ماهوش مع ارتفاع الصدر مباشرة لهذا رايحين نقصو منو 2 سم

رايحين نعاودو نرسمو خط الصدر موازي لخط الوسط و خط الحوض

واش هو الفرق بين خط الصدر و ممحيط الصدر؟

في القياسات الاولى كنا نرسمو في الخطوط الاساسية فقط الان بعد ما رسمنا الخطوط الاساسية رايحين نبداو نرسمو تفاصيل الجسم العرض تاعو
قلت من قبل انو القياسات لي اخدتها و درت عليها تعديلات رايحة نقسمها على 4 لاننا نرسمو ربع الجسم فقط بصح كاينة مشكل صغير الانحناءات في الجسم كاينة في الجهة الامامية فقط من الصدر ماش من الخلف و مهما كان الصدر صغير محال يكون قد الامام قد الخلف لهذا السبب و لعلاج هذا الاشكال رايحين نزيدو 2 سم لجهة الامام و نقصوهم من الخلف

2 سم قياس نسبي يختلف باختلاف قياس محيط الصدر

درك نروحو للورقة الاساسية تاعنا تحديدا في خط الصدر الجهة الامامية منين حطينا منتصف الامام نرسمو نقطة تبعد عن خط منتصف الامام ب مقدار قدره 1/4 محيط الصدر + 2 سم بالشوية برك درك ترسموها

و في جهة الظهر في خط الصدر نرسم نقطة تبعد عن خط منتصف الظهر ب 1/4 محيط الصدر - 2 سم

رايحين نتحصلو على الشكل هذا راكم تشوفو بلي تقريبا راهم متناظرين اذا تجاهلنا 2 سم لي ازحناها

نعينو النقط a و نهبطو بخط مستقيم و نعينو النقط C و نزيدو نعينو النقطة B و نزيدو نهبطو بخط عمودي و نرسمو النقطة D

الان نحاولو نرسمو محيط الحوض ركزو مليح

باه نكونو متفاهمين النقاط C+D ما همش نقاط لي تمثل عرض الحوض و انما رايحين يكونو مرجع يعاونونا في الرسم

نحسبو الفرق بين 1/2 محيط الصدر و 1/2 محيط الحوض

هادي عملية حسابية يعني النتيجة ممكن تكون موجبة كما ممكن تكون سالبة

اذا كانت النتيجة سالبة مثلا (-3) رايحين نقسموها على 2 و نضيفو 1.5 في كل جهة
علاه نضيفو و ماش نقصو ببساطة لانو نقصنا محيط الوسط من الصدر لقيناها موجبة معناها انو الصدر داخل او بتعبير اخر اقل من محيط الحوض ب 3 سم لازم نرجعوهم لهادي اضفنا 3 سم و باه ما يكونش عندنا خلل قسمناها على زوج اي وزعناها على الامام و الخلف

و رايحة تعطينا الشكل هذا

الحالة هاذي نلقاوها لما يكون محيط الوسط اكبر من محيط الصدر و مثلا كان العكس رايحين نلقاو انو محيط الصدر اكبر من محيط الوسط بالنسبة للنساء لي عندهم الصدر كبير بزاف

في الحالة هادي الفارق رايح يكون موجب

اذا كان الفارق موجب واش لاايحين نديرو ؟؟؟؟؟
ببساطة نقصو الزائد مثلا خرجلنا الفارق (+2) نقسموها على زوج و نقصو 1 سم من كل جهة

حنا رايحين نكملو بالمثال هذا في الباترون تاعنا

rim-25 · 2014-06-21, 17:54

نستعملوه لرسم ارتفاع الكتف تقريبا
للامام نستعملو كورساج الامام

و نرسموه فوق خط منتصف الامام

كي نعينو النقطة نرسمو خط موزي لخط الصدر و يكون بخطوط متقطعة و يمتد لحوالي 20 سم علام ما نرسموهش بخط مستقيم كما الاول لانو رايحة تطرا عليه تعديلات

في الخلف نستعملو كورساج الخلف

و بنفس الطريقة نرسمو خطوط متقطعة

رايحين تلاحظو انهم ماهمش في استقامة واحدة عادي لانو في الامام كاين الصدر و الارتفاع تاعو رايح ياخد مسافة هي الفرق لي لقيناه في الرسم

واش هي اهمية الخط هذا ؟ قلنا من قبل ان الفارق في الكورساج الامام و الكورساج تاع الظهر راجه الى ارتفاع الصدر يعني كون نخليو الارتفاه هذا رايحة تهبط الحاجة مستقيمة جهة البطن و ماش رايحة تعطينا المظهر الانثوي الجميل لي نحوسو عليه لهذا السبب وجة البنسة او كما مقولولها حنا لابانس باه تخفي الفارق في القياس هذا بصح ما نحطوهاش اينما كان عندها حسابات دقيقة ليها

نبداو ببنسة الامام و نستعملو L'ecart des saillants او الاصح نستعملو نصفها لاننا رايحين نقسموه على زوج

نضح علامة على خط الصدر لان هذا القياساساسا خاص بالصدر ماش رايحين نحطوه في خط الوسط او الحوض مثلا

انطلاقا من النقطة السابقة نرسمو خط عمودي و دوما بنقاط متقطعة الى غاية خط الباسا

rim-25 · 2014-06-21, 17:55

في الظهر نفس الشئ 1/2 L'ecart des saillant بصح مع ملاحظة مهمة نزيدو نقصو منها 0.5 سم

و بنفس الطريقة للخلف

عندنا محيط الوسط كبير بزاف لهذا السبب لازم ندخلوه شوية

باه نعرفو القيمة لي لازم نقصوها لازمنا عملية حسابية بسيطة و لي هي 1/2 محيط الصدر ناقص 1/2 محيط الوسط

الفرق هذا لي حسبناه رايح يكون هو العرض تاع لي بانس و رايح يتقسم على منطقتين الاولى الخط تاع لي بانس و الثانية الخطوط الاولى لي رسمناهم A+B

نقسمو النتيجة لي لقيناها على 4 مثلا اذا كانت 20 رايحين نلقاوها 5 ما نخليوش النتيجة هكذا و انما نديرو عليها بعض التعديلات كما الصورة في الخط تاع لي بانس نديرو اكبر قيمة 5.5 و على الجوانب يعني في النقاط A+B نديرو اصغر قيمة

توضع النقاط باه نقصو لي بانس رايح يكون بالطريقة هادي

نعينو 2 نقاط هادو

نبداو نرسمو في لي بانس

كنا فيما سبق حسبنا القيمة تاع لي بانس و عينا النقاط في الخط الخارجي عينا نقطة على خط الوسط تبعد بحوالي 4.5 سم من الجهتين نرسمو خط صغير من النقطة هاديك للنقطة لي حددناها من قبل في خط الحوض C+D يكونو مؤقتين فقط

فوق الخط لي رسمناه نهبطو ب 8 سم و نعينو نقطة تكون خارجة عليه ب 1 سم و نرسمو خط مستقيم ثم نكملو ننزلو بخط مستقيم للنقطة تاع الباصا لي كنا رسمناها من قبل

و هنا درنالها زووووووووووووووووووووووووووووووووم و اكيد الرسم رايح يكون باستعمال البريوكي

و الان من نفس النقطة لي كنا رسمناها في خط الوسط و لي هبطنا منها نعاودو نرسمو خط مستقيم منها الى خط الصدر يتوقف في النقطة لي حددناها من قبل A+B

رايحين نتحصلو على الشكل هذا لي يمثللنا الشكل الخارجي اكيد مازال ما رسمناش القسم الخاص بلي مونش و الرقبة و لي بانس حددنا مكانهم و ما زال ما رسمناهمش

درك نرسمو لابنس تاع الظهر ساهلة بزاف كنا حددنا مكانها نهبطو من الخطوط لي رسمنا و نتوقفو ب 2.5 سم قبل خط الباصا و نطلعو حتى خط الصدر

كي نهزو الورقة تاعنا رايح يكون عندنا الشكل هذا

بقاتلنا بنسة الامام

كنا في اخذ القياسات اخدنا قياس ارتفاع الصدر و حسبناه بدينا من خط الوسط و طلعنا لراس الصدر هذا هو القياس لي يهمنا نرسموه على خط البنسة

رايحين نربطو النقطة هادي و لي سمنيناها Kبالنقطتين لي رسمناهم في الاول L-J و في الاسفل نهبطو حتى خط الباصا

لكان البطن ما كانش مصطح فعليا نقدرو نرسمو انحناءة صغيرة و اذا كان البطن مصطح نرسمو مستقيم

و هكذا نكونو خلصنا الجزء الاول من باترون الاساس
في الايام المقبلو نكمل نحط بقية باترون الاساس و فيه نطرقو لكيفية رسم الرقبة و كيفية رسم الطابق و كيفية رسم لاديكوب

انتظــــــــــــــــــــــــــــــرونا