بخصوص المجلس التاديبي للتلميد

[biberse1192]

السلام عليكم
هدا الموضوع كجواب لموضوع السابق الدي طرحته بخصوص احالة التلميد للمجلس التاديبي و الدي كان يمس ابني
اولا و قبل كل شيء اوجه كافة شكري و احترامي لكل الاعضاء الدين تكرمو بمشاركتهم في موضوعي
و اردت ان المح لهم بانني ام و ليس اب
وانا طلبت إفادتي بالقوانين الدستورية عند احالة تلميد لمجلس تأديبي مش رأيكم
و للإخوة اللي جاوبو وقالو ابني مشي مربي و قالو كأن ابني ملاك و الاستاد شيطان و الكلام تاع نعطوه logement و نزوجوه و احنا مشي حضانة ايا هادي هدرة ؟ بحق الخالق اهدا كلام واحد مثقف ولا عضو تربوي ينتمي إلى ميدان التعليم والتربية ولا قال منتدى نكتبو فيه كيما نحبو ولا لينار تاع بن بوزيد في بالي لكن نجاوبهم
الحاجة الاولى انا ما قللتش من خطأ إبني وما قلتش ابني ملاااااك عظمتله الخطأ و ماعطيته اي حق و عاقبته و رحت للاستادة في بيتها و اعتدرتلها و طلبت من ابني يعتدرلها و اعتدرلها قدام الكل و ما قبلتش اعتداره هي حرة وطلبت منها تعاقبه بأي طريقة و تكون رحيمة معاه فالمجلس وكي قلت كلام شارعي ماطيحلهاش و شهادة من كافة الاساتدة و نقسملكم بالله العلي العظيم و اليوم الجمعة فضيلة ابني محتارمهم malgré مايقراش
و الحاجة تانية قلت معدل ضعيف لاكاش حابين تقريو غي المستوى تاع 16 و18 و المستوى الضعيف لا روح لل Privé و قري كيما تبغي تما واه مانهدرش بصح راك في مؤسسة عمومية عاااااااااااامة لقاع الشعب فيها المليح و القبيح وولاد التعليم و القانون يطبق على الجمــــــــــــــــــــــــــيع مشي غي على لي معندهش ظهر يستندله علاخطرش بلادنا هاكة تتمشى بوتفليقة الله ينصره عيا ما يعاود فيها بصح لاغالب عندك intervention تعيش ما عندكش كلاك بوبي بالمصطلح تاعنا
وحظرت المجلس و حطوفيه 7 تاع التقارير من الرغم حضوري دائم و عمرهم ماجبدولي على تقرير(هدا هو الثضامن) بصح كيعولو على واحد يخيطوهله بالخيط الاسود المهم الحمد لله على كل شيء وغيرت لابني الثانوية بصح نبغي القانون يطبقوه على الكل انا تاني في الميدان و شفت اللي مانقدش meme pas نحكيه

و نصيحة لكافة الاولياء لازم كل واحد يكون واعي للقوانين و مايسكتش على حق ولده ولا بنته علاخاطرش بزاااااف تلاميد راحو ضحايا كيما هاك وولو افة في المجتمع و مرانيش نقولكم يا الاساتدة نتوما حضااااااانة لكن انتوما لي تعرفو تحبولهم الدراسة و انتوما لي تكرهوهالهم راكم معابهم اكتر مارانا معاهم علاخاطرش هادي مسؤولية و راهم امانة في رقابكم وانا راني مستشارة تاني نحس بالتلميد علاخاطرش اولادي تلاميد ماراناش في كوري تاع غنم نسرحو فيهم باه نقبضو الشهرية علاحطرش هوما المستقبل
ونقوووووولها مليار مكانش حد يدافع على التلميد من غير والديه و الله غالب انا مع ولدي ظالم ولا مظلوم لانني أم
مازال ديرو اولاد و تحسو معنى المسؤولية وimposible ما تواجهوش معاهم مشاكل علاخطرش مشكل الشباب انهم واعييين و مايطبقوووووش ومقلقين الله يهدينا كامل العيب مشي غي فالتلميد تاني فالاستاد و فينا نعيو مانوجهو و نراقبو و نقولو مارانا نديرو والو La responsabilité n'est pas facile

[أبــ إبراهيم ــو]

لاحول و لا قوة إلا بالله

[فتيح العربي]

كل خنفوس عند امه غزال