تحبي تتعرفي على سوبر زيقزاق .. سطايفيه

[stayfiya]

السلام عليكم
جمعه مباركه
كيما وعدتكم لي عندها مشينه سوبر زيقزاق راح تتعلم تخدم بيها ان شاء الله
انا حبيت نعرفكم عليها و على لي بيي دبيش تاوعها كيفاش يخدمو و في الاخير كيفاش تطرزي بيها
اول شي
هاااذي هي (المشينه هاذي تاع مرت خويا )

اول حاجه ممكن راه عندك مشاكل فيها لازم تريقليهم باش تبداي الخدمه بيها
و تخيطي و نتي مستراحه
الحاجه لي مالازمش تنسايها هي الزييييت انا هاذا هو الزيت لي نزيت بيه ماشيناتي

لازم يكون خفيف لي تقولي الزيت واش فايداتو. نقولها الزيت للمشينه كي الما لينا هو مايخليش لبياس يتحك في بعضاه و يزرب يرشا. و يتكسر و ينقص من الحس و فوائد اخرين ممكن مانعرفهمش انا
الزيت يكون من فوق و من تحت اكييد ..!
تبداي تمشي الخيط نتاعك لي لازم يفوت بكل المراحل هاوليك توضيح

و مرات نلقاو مشكل الخيط يخرج من تحت لقماش و يتخبل و يولي يتقطع
كيما هكذا

تعرفي بلي راهي لا طونسيون نتاعك ميش مريقله مليح او ميش فايت عليها الخيط اصلاً

نتي ريقليها في 7و شوفي (ماتشوفيش على تاعي لانو راهي طارت و عاودت ركبتها بقات في رقم 3 ) المهم الخيط نتاعك كي تجبديه مايكون مرخوف مايكون مشبوح بزاف
و لكان العكس معناها الخيط تاع الكانات لي يطلع


معناها لا طونسيون تاع الكانات لي مرخوفه و هاوليك منين تريقليها تعاودي تسيري الفيس هذا

منبعد نريقلو مدى ظغط البيي نتاعنا من هنا



اذا كان قماشنا خشين نطلقوه و اذا كان متوسط نخليه في النص و اذا كان رقيق نظغط عليه
و نكملو نتعرفو على الرجلين لي جاو معاها واش يديرو

نبداو بالاول هذا العادي نخيطو به الدروات و الزيقزاق نورمال

الثاني يخدم الكفه الرقيقه كيما لي جي في حاشية الخمار

اول حاجه لازم نحكمو الجزء الاول بليبانقل. و تكون الكفه صغيره نص سنتمتر و لازم تتحكمي فيها مليح باش ماتدخلكش قماش بزاف داخل الكفه والعكس باش ما تميلش الكفه و من بعد ماتحكملكش لخياطه هي هكذا جي




نروحو للرجل الثالثه ساهلة تاع ثقب الازرار تركبيها و تريقليها بالرقم منا و تبداي على حياي كبر الزر تحددي طول الثقب 1 2 3 4 رايحه تحددلك بكل سهوله الثقب نتي ماعليك غير تفتحيه بمقص



الرجل الاخيره حنا نديرو بيها البساط و الكوات هي تسهلي لخياطه تخدملي مسار لخياطه و تحددلي المسافه قدقد باش ماتعوجش لخياطه و تسبطلي البونج



و نحب نستعملها في الفيرميتور انا ما كانتش عندي باش نوريلكم كيفاه
و اخيرا راح نتعلمو كيفاش نطرزو
اول شي لازم توجدي الرشمه نتاعك فوق لقماش و تكوني درتيلو الفيزلين (انا مكانتش عندي درت هكذاك المهم نوصللكم الفكره )

تحطي لبلاكه فوق سطح المشينه باش تطرزي بانسيابيه و ماتلصقلكش لخياطه من تحت

من بعد تريقلي طول الغرزة انا درتها 0 و الزيقزاق خيرت عرض f


و تطلقي الظاغط من فوق باش ترخفي الرجل و تسهلك الدوره


و برك ابداي اطرزي

و هذا من اسفل كيما قلتلكم انا ماعنديش فيزلين ولا طمبوله باش نشبح ايا جات تعيف المهم توصل الفكره

انتهي بعون الله و الحمد لله
ان شاء الله راح تستفادو من الموضوع
دعواتكم
في امان الله

سطايفيه

[لينة المتفائلة]

شكرا ليك اختي سطايفية حبيت نسقسيك على مشينة سانجار كحلة ايلا مفيهش مشكل

[stayfiya]

علاش لينا واشمن مشكل فيها ؟؟؟

[chafia82]

شكرا حبيبتي انا حبيت نسالك على هذا الرجل نقدر نخدم بيه الكورد ون ولا نشري الرجل لخاص بالكورد ون وشكرا للمرة الالف

[لينة المتفائلة]

تقطع الخيط قبل كانت تتكسر الابرة و بدلناهالها ودرك عاد الخيط يتقطع من جيهة الابرة ريقلتها خيطتلي شوية او مباعدا بدات تقطع فيه

[stayfiya]

المشاركة الأصلية كتبت بواسطة لينة المتفائلة

تقطع الخيط قبل كانت تتكسر الابرة و بدلناهالها ودرك عاد الخيط يتقطع من جيهة الابرة ريقلتها خيطتلي شوية او مباعدا بدات تقطع فيه

نتي راكي تخيطي بالكبه لكبيره ولا صغيره ؟؟ و لبرا واشمن نيميرو. الزيت راكي ديريلها كل اسبوع ؟ و مسار الخيط راكي تفوتي على كامل المواحل و لاطونسيون نتاعها بلاك مشبوحه ؟؟ و البورت كانات كي تخلخليها تتحرك بزاف ولا ثابته في بلاصتها (طبيبه زعما..!) لانو ممكن كيتعودي تخيطي مع اهتزاز المشينه تقيس لبرا في البورت كانات تتكسر ولا يتقطع الخيط.

[لينة المتفائلة]

المشاركة الأصلية كتبت بواسطة stayfiya

نتي راكي تخيطي بالكبه لكبيره ولا صغيره ؟؟ و لبرا واشمن نيميرو. الزيت راكي ديريلها كل اسبوع ؟ و مسار الخيط راكي تفوتي على كامل المواحل و لاطونسيون نتاعها بلاك مشبوحه ؟؟ و البورت كانات كي تخلخليها تتحرك بزاف ولا ثابته في بلاصتها (طبيبه زعما..!) لانو ممكن كيتعودي تخيطي مع اهتزاز المشينه تقيس لبرا في البورت كانات تتكسر ولا يتقطع الخيط.

الكبة لي ندير بيها صغيرة والرا نيمرو 12 او زيت سمانة لي فاتت درتلها او ماعاودتلهاش و الخيط نفوت فيه قد قد بصح لا طونسيو والله ماعلابالي حتى البورت كانات ما مسيتهاش درك نجبدها او نرجعلك الخبر

[R I A D]

السطايفيةاختي يعطيك الصحة على الموضوع القييييم و الرائع
و الي اكيييد راح يفيد الكثيرااات من محبي الخياطة
و نطلب ربي يزيّن سعدك و يسعدك في الدارين امين

قوليلي من فضلك هذيك البياسة لازم للطرز , خاطر انا ما عنديش هذ البياسة ...نشريها ؟

و نسمعكم تهدرو على السنين تاع الماشينة كيفاه؟....نطلعوهم و نهبطوهم و لا ما يتمسوش ؟كي نحبو نطرزو ؟و لا نشري هذيك البياسة و نحطها برك و نطرز ...ما تضحكوش عليا اني نحس بيكم

[الماضوية]

مشكورة استادة واش هادى الغيبة حبيت نسقسيك على مشبنة toyotaواض رايك فيها

[couture]

حبيبتي سطايفية يا رب تكوني بخير
عندي مشكلة راااااااااااني حااااااااااااااااااااااصلة

شفتي هذاك نتاع la tension اللي يجيو فيه الأرقام بش نريقليو الماشينة للي يفوت عليه الخيط كي نكونو نركبوه هذاك حليته كل مرة نحس بيه راه ماشي مليح حليه نشوف ماله كي جيت نرد ما عرفتش تقدري توريلي ؟ الله يفرحك ختي يلا تعرفي راني حااااصلة نتاع الصح
ماشينتي بالضبط كما نتاع مرت خوك
وجدت هذه لصور في النت لكن عندي مكانش هاذ البياسة رقم G
ممكن من هذا راح الخلل نتاعي و لا حتى نتاعك مفيهاش
https://www.sewingonline.co.uk/feet/image054.jpg

[ضياء الحياة]

انا عندي نفـــــس الماكينة و راني حيرت واش نديرلــــــها شريتها و معرفتش نخــــدم بيها
ريقلتها كيما قلتي بصــــــح الخيط يدوبلا من تحت
انصــــحني واش نديـــــر !!!!!!

[ام احلام]

الى الاخت السطيفية هادى مدى و انا نحوس عليك عندى بزاف حجات فى ما يخص الخياطة ورتحت ليك بزاف حبى تعونينى فهمنى انا وكيبحالى نحب الخياطة امنعرف والو فى هادا الميدان ارجوا منكى الشرح ابالتفصيل الممل فى كل من التفصيل ودقيقى فى هادا والخياطة و عريفنى اكثر فاكثرفى المشينة سوبر زقزاق 820 فى اقرب وقت ممكن والوقت الى يريجك اسفة على الازعاج جزاكى الله كل الخير مشكورة مسبقا

[aroua.katy]

راني حابا نشوف تصاور راهي عاجبتني اعمالك

[miss-khadij]

المشاركة الأصلية كتبت بواسطة لينة المتفائلة

تقطع الخيط قبل كانت تتكسر الابرة و بدلناهالها ودرك عاد الخيط يتقطع من جيهة الابرة ريقلتها خيطتلي شوية او مباعدا بدات تقطع فيه

يمكن الابرة راها راكبة بالمقلوب اختي او يمكن الراس ديالها راه مكسر حاولي كدلك تبدلي الكانات ساعات تكون السبب

[crystale49]

الله يبارك اختي السطايفية على الشرح الي اكثر من رائئئئئئئئئئئئئئئئئئئئئئئئئئئئئئع فمبرو ك لكل الخياطات بهذا الانجاز الي راح يستفيدون منه فعلا