ورشة خياطة قفطان بقماش العدس

حنين فتـاة · 2016-01-18, 21:00

السلام عليكم ورحمة الله تعالى وبركاته
بناء على طلب الاخت ساندي راح نحطلها كيفاش تخيط قفطان بقماش العدس او الجليتر كيما لي راه فالصورة

هدا تطبيقي ليه

اولا نحتاج ل 3 مترات تاع قماش لاموسلين اسود سامبل سعرها 35 الف للمترة

مترة وربع قماش الجليتر احمر قيمتو 85 الف للمترة

3 مترات قماش ساتان دياموند يدير 65 الف وزيوتنات وحدة سوداء ووحدة حمراء وكروشيات تاع المحزمة

الكرطونة تاع المحزمة

والقالون حوالي 16 الى 17 مترة هدا شريتو ب 12 الف للمترة كاين لي خير منو بصح يسوى 16 ولا 18 الف للمترة

ساندي 28 · 2016-01-18, 21:09

بارك الله فيك اختى حنين ربي يجازيك كل خير فى انتضار التكمله

حنين فتـاة · 2016-01-18, 21:13

نبداو على بركة الله
اولا نحكم الكتان الاحمر نطويه على 2 ومن بعد على شكل مثلث كيما فالصور

نروح لاحدى جهات المثلث المتقابلة نشوفو بلي كاين جهة مغلوقة وجهة مفتوحة راني وريتلكم بيدي كيفاش

يعني القماش هنا راه على 4 ضرك نحسب محيط الكرش ونقسمو على ربعة وحط القياس على الكتان

لما نحسب محيط الكرش نحطها على الزاوية لي لفوق ومن بعد نروحو للجهتين المتقابلين لازم الطول تاعهم يكون كيف كيف

هنا كي نحسبو الطول لي راكي حابة القفطان يكون فيه نوصلو بين الجيهتين هكدا كيما راني موضحة فالصورة ومن بعد نقصو نتحصلو على هدي النتيجة

لما نفتحو نديرو الجهتين لي يركب عليها القالون فالوسط هكدا

الان نروحو للكتان الاسود نديرو نفس الطريقة تاع الكتان الاحمر لكن الكتان الاسود نطولوه شوية ب 1 او 2 سم ونحطو فوقو الكتان الاحمر ونقصو

حنين فتـاة · 2016-01-18, 21:19

ضرروك نقلك كيفاش تركبي القالون
تحكمي الكتان للجهة الحقيقة تاعو وديري قلبو خفيفة للجهة البرانية تاع الكتان يعني تقلبي الكتان ب 1 سم للجهة الحقيقة
باش نفهمك كتر
شفتي كيفاش موالف ندير قلبة من تحت موالفين نديروها للداخل؟؟بصح كي تحبي تركبي القالون ديريها للبرا باش يركب عليها الكتان باش ميتسرسبش الكتان ومينحلش خاطرش الساتان تنحل
احكمي الكتان خيطيه كامل بيدك ومن بعد كاين وحد اللصقة يديرو بيها القلبة للحجابات راهي تتباع غولون يدير 16 الف ديريها فوق القلبة وديري فوقها القالون وفوتي عليها بالمكواة لازم تكون تاع بخار فوتي عليها وحدي مليح هكدا باش يلصق وكي تجي تخيطي القالون ميتعوجش انا هدي الطريقة نخدم بيها كي نكون نخدم القالون دايمن يجيني القالون مرتب ومستقيم وميعواجش
غدوة ان شاء الله نصورلك البوبينة تاع اللصقة راهي تتباع عند لي يبيع لوازم الخياطة قوليلو السكوتش لي يديرو بيها القلبة تاع الحجابات راح يفهمك
ديري قاع القالون من الجهتين لي فالامام وسيري بيه كامل من تحت باش يجيك باهي وديري للكتان الاسود والاحمر في زوج والا مفهمتيش كاش حاجة قوليلي
كي تكمليهم بالمكواة رجعي فوتي عليهم بالمشينة خيطي القالون والقالون باش ميكمشلكش القماش اغسليه بنهار من قبل وخليه ينشف باش يولي طري خاطرش القالون شوية يشرب
وكي تكملي خياطة القالون ديري الكتان الاسود فوق الكتان الاحمر وقبضيهم بلبرة والخيط من جهة الكرش باش تبلاصيهم فالكتان لي لفوق

حنين فتـاة · 2016-01-18, 21:33

ضروك نروحو لكتان الجليتر
اولا نحكمو الكتان نديروه على ربعة كيما راني دايرة فالصورة ونفس الشي عندنا جهة مغلوقة وجهة مفتوحة
نفصلو جهة الرقبة اول شي

من بعد نفصلو الذراعتين

من بعد نفصلو المقاس تاع جسمنا من جهة الصدر والكرش من الاحسن جيبي كاش فاست ولا تريكو ولا روبة حطيها على الكتان ورسمي وخلي حساب الخياطة وقصي والطول تاع الكتان هدا وصليه عند السرة نيشان

هنا كي تفصلي احكمي الجهة المغلوقة خليها للرقبة والجهة المفتوحة خليها للجهة الامامية كيما راني موضوحة ومن بعد فصلي شكل العنق لي راكي حاباتو

تقبضي هدو الجهتين الخياطة تكون للبرا يعني منخيطوش للداخل ..نخيطوه للبرا باش القالون يكون فوق الخياطة كي تحكمي هدو الجهتين بالمشينة احكمي جهة الكتفين مع بعضاهم ومن بعد من جهة العنق والرقبة تاني ديري قلبة خفيفة للبرا باش يركب عليها القالون وركبي القالون تاعك وبعد ما تركبي القالون للجهعة الفوقانية خيطيهم الجهة الفوقانية مع التحتانية

ومن بعد فصلي الاكمام كيما هكدا وديريلهم القالون في طرفهم

حنين فتـاة · 2016-01-18, 21:42

بالنسبة للمحزمة جيبي الكتان الجليتر قطعة طويها على تكون مناسبة لتغليف المحزمة قد قد
ركبيلها القالون قبل متغلقيها وكي تركبي القالون اغلقيها ودخلي فيها المحزمة والمحزمة تقدري تنقصي من العرض نتاعها كي تدخلي خلي قيس 2 سم من كل جنب باش تطوي لخياطة للداخل وتخيطيها وكي تغلفيها كامل سخني المكواة وفوتي عليها باش يلصق الكتان على المحزمة ومن بعد ركبي الكروشيات تاوعك وركبي الزويتنات للقالون
وفي الاخير نتمنى فهمتيني والا مفهمتيش اسألي ونجاوبك عادي
وكل لي استفادت من الوضوع ادعولي بسكنة تجمع شملي انا وزوجي وولدي ان شاء الله متبخلوش عليا بالدعاء

غزالة1 · 2016-01-20, 14:04

السلام عليكم
شكرا الف شكر على الورشة
دعيتلك في موضوع اخر و الان اعيدها
يا رب يا رحيم ارزق حنين سكنا يلم شملها هي و عائلتها الصغيرة
اللهم لا تفرقهم يا ارحم الراحمين من لها سواك اللهم و ارزقها الرضا

اكرام حنين · 2016-01-20, 15:04

جزاك الله على هادا العمل الرائع ربي يرزقك بسكنا وصحة وعافية سوالى هو مبطنتيش القماش اللى درتيه فى الصدر سلامى

حنين فتـاة · 2016-01-20, 16:21

اقتباس:

المشاركة الأصلية كتبت بواسطة اكرام حنين

جزاك الله على هادا العمل الرائع ربي يرزقك بسكنا وصحة وعافية سوالى هو مبطنتيش القماش اللى درتيه فى الصدر سلامى

لالا اختي مبطنتوش بصح تقدري تبطنيه بالكتان تاع الصيف باش يجيك بارد
شكرا على الدعوة ختي

حنين فتـاة · 2016-01-20, 16:22

اقتباس:

المشاركة الأصلية كتبت بواسطة غزالة1

السلام عليكم
شكرا الف شكر على الورشة
دعيتلك في موضوع اخر و الان اعيدها
يا رب يا رحيم ارزق حنين سكنا يلم شملها هي و عائلتها الصغيرة
اللهم لا تفرقهم يا ارحم الراحمين من لها سواك اللهم و ارزقها الرضا

شكرا لك اختي ربي يحفظك