طبخ الأعراس

[روح مراد]

أخواتي منذ مدة اضطررت أن أطبخ الكسكسي في أعراسنا (في البيت) و كذا في المناسبات أين يكون عدد المدعوين كبير
أعجبتني الفكرة و أود لو أتفنن في طبخ اصناف أخرى بالإضافة إلى الكسكس
طبعا مع الكميات اللازمة لذلك و الطريقة السليمة في الطبخ و في ربح الوقت كذلك
شكرا لكن

مقادير السلطه للاعراس

تنقي الشلاظة و تحطيها في كسكاس تقطر في مكان بارد باش ما تذبالش و تكحال من بعد
شوفي واش تحطي كامل فيها
مثلا طماطم تقطعيها و تحطيها في علبة مغلوقة و ديريها في الثلاجة ، توجدي الخيار تقطعيها في علبة و تغلقيها و ثلاجة ، البيض تغليه و تقشريه و تقطعيه
الزيتون تغسليه و تقطريه و تحطيه جيه ، جزر، أو بيراف... أو أي شيء آخر وحده
تخدمي مايوناز إذا رايحة تحطي خيوط للتزيين كي تخدميها ديريها في كيس و تحطيها في الثلاجة
يعني باختصار كل شيء يتحضر من قبل و يتحط وحده
و فينيقرات إذا تخدميها في الدار تحكمي قرعة سعيدة فارغة أو كاش علبة وحكمة الغلق ديري فيها كمية من الخل أو عصير الليمون أو خليط خل و عصير ليمون
ضعف الكمية زيت و ملح و 2 فصوص ثوم مثقوبين بالموس غير باش يطلقو البنة، ورقة زعيترة صغيرة، فلف اسود عرف نعناع وو عرف ماعدنوس و ملعقة كبيرة خردل موتارد و مغرفة صغيرة مايوناز و خلطي مليح مليح و ذوقي إذا حامضة زيدي شوية زيت و إذا ماشي حامضة زيدي عليها شوية خل حتى تلحقي للذوق المطلوب و خليها جيه
مثلا رايحين تبداو توكلو على 12
11 و 45 دقيقة تبداي تحضري حطي طباسة في طابلة و بداي تستفي سلاطة خضراء أولا على محيط الطبسي من بعد عطي الخيار و الجزر، البيتراف التزيين كل واحد كيفاش يحب و حطي قطع الطماطم من الأحسن يجو كامل مزينين بنفس الطريقة نفس عدد القطع في كل طبسي و حطو من الفوق الزيتون و كي قريب يبداو يحطة فرغو فينيقرات من الفوق
نديرو من الأحسن الفينيقرات في قارورات الخل الفارغة أو في قرعة سعيدة و نثقبو الغلاق باش جينا ساهلة نسقو بيها بالخف بلا ما ننساو البيض كل واحد كيفاش يزينة و آخر مطاف المايوناز




شوربه فريك



الطريقة اللي تعرفي بيها العبر و من بعد تعودي ديري عينك ميزانك



عندك مثلا 10 عباد
كي تكوني قاعدة حكمي قدرة ديري فيها 10 بول شربة معمرين ماء و فرغي في القدرة رايحة تعرفي شحال يجيك الكمية في القدرة و زيدي ديما غضافة 2 أو 3
هاذ القيس رايح يكون يعبر على كمية الشربة الطايبة في القدرة و انت بالتأكيد رايحة تمرقي أكثر من هاذاك الكيل و لكا الطيب حافظي على الكيل
بالنسبة للحم كل واحد و مقدورو طبعا و لكن أنت تشري مثلا رطل لحم أو كلغ تقطعي منه قطع صغيرة للشربة و ديري حساب مثلا كل بول شربة ديري فيه 2 أو 3 قطع و حسبي رايحة تشوفي الكمية المناسبة
من هاذي تبداي الخطوات الأولى في التعلم بالطبع كي يكون عندك ضياف تزيدي كمية اللحم إذا عندك و إلا راكي ديري بالحساب
نصيحة قبل مايجوك الضياف أنت باش تتحكمي في المقادير و الطريقة لازم تجربي من قبل
مثلا تحكمي كينتاع 5 عباد كيلي اللحم و الماء و بالباقي عينك ميزانك كي تلحقي للفريك كيلي بالكاس مثلا 5 عباد تقريبا نصف كاس و شوفي كي يكون يغلي المرق إذا فيه الفريك يبان راهي الكمية مناسبة و إذا فيه قليل زيدي شوية و رايحة تتحكمي في كمية الحشيش و الملح و التوابل و من بعد ضاعفي المقادير بالنسبة ل10 أو 15
بالنسبة للبربوشة هاذي ما فهمتش واش قاصدة بيها الكسكس أم البركوكس
بالنسبة للبركوكس ما نعرفش مانطيبوهش في المناسبات
بالنسبة للكسكس كاين مناطق يمرقو بزاف الكسكس يكون جاري بالمرقة و كاين اللي ياكلوه ناشف شوية مرقة فقط
نفس الفكرة نتاع الشربة باش تتعلمي و كاين اللي عمرو ما يكيل مثلي أنا كل شيء عيني ميزاني عندي مرت خالي تكيل كل شيء عندها ميزان من الزيت للملح للماء .... ميزان واحد ديما
أنت كي تكوني مرتاحة و نفسيتك مليحة طيبي بالكيل و حكمي المقادير من بعد ضاعفيها و اللا نهار ديري ماكلة مليحة و كل شيء قيس اكتبي المقادير


مقادير قازان متوسط يكفي لحوالي 80 شخص.

عامة الشربة تكون بلحم غنمي مقطع قطع صغيرة حوالي 2 كلغ (كاين اللي يستعمل أكثر من 2 كلغ و كاين اللي ينقص في اللحم القطع و الأخير يضيف كويرات اللحم المرحي كاين اللي يضيف بعض الدجاج ) من جهتي أفضل اللحم الغنمي 2 كليو
نضع في القازان (قدر كبير لطبخ الأعراس) أو المناسبات
إذا كان اللحم مشحم حوالي كأس زيت ثم نضع اللحم و نضعه فوق نار هادئة و نقلبه ، هاته الكمية لزملها 5 إلى 6 حبات بصل مسكرفج حين نقلب اللحم في الزيت حوالي 10 دقائق على نار هادية نضيف البصل و الملح و الفلفل الأسود و عود قرفة و نترك الكل على نار هادية يتقلاو.
في جهة أخرى نضع حوالي رطل حميصة مشمخة تغلي في ماء وحدها مع قلبل من الزيت و الفلفل الأسود و الملح لإعطائها بنة من البداية
نعود إلى اللحم و البصل بعد ما يتلاو شوية نضيف 6 حبات طاطم طايبة مليح بلا زريعة مرحية و نتركها تتقلى مع اللحم نقطع ربطة صغيرة حشيش أو ربطتين و نضيفها للحم
نأخذ خيط نربط فيه ربطتين حشيش أخرى + 2 أعراف نعناع أخضر + غصن كرافس من الأحسن العود ماشي الورق نتعا الكرافس) كاين اللي يضيف كرافس مقطع + 2 اوراق رند و نضع الكل في القازان مع التحريك حتى تنشف الطاطم من الماء نتاعها
نضيف طماطم مصبرة للقزان حوالي 500غ علبة رطل من النوعية الجيدة (نفرغها في إناء نضيف لها مغرفة عكري حلو (فلفل أحمر حلو مرحي) + كأس ماء دافي + نصف ملعقة صغيرة بيكاربونات أو ملعقة كبيرة سكر) و نحركها في الإناء و نفرغعا في القازان
نتركها لحوالي 15 دقيقة مع التحريك حتى أنشوفوها تقلات مليح و أبدات تلصق بشوية في القاع (بهذه الطريقة تنقص حموضة الطماطم) نفرغ عليها الحمص بالماء نتاعو و نترك القازان يغلي في البداية حوالي 15 دقيقة غيكون فيها ماء قليل في هذه المدة نضع قدر ماء جانبا ليغلي باش أنزيدوه للقازان و نحضر 1كلغ و نص فريك نغسلو و نخليه فغي طبسي يتشرب.
الأخوات اللي دارو الدجاج مع اللحم في البداية قبل التمراق النهائي نجبدو الجاج و نغطيه جانبا و نترك اللحم ينضج بعد مانزيدو الماء المغلي و نغلق القازان لحوالي 45 د حتى نشوفو اللحم بدا يخلو الطياب و نضيفة الفريك مع التحراك من حين لآخر
الأخوات كل واحدة اشحال تمرق على حساب الكمية اللي تحتاجها أقدم لكن فكرة على التكيال باش نعرفو الكمية بالضبط أنتاع الشربة
نحكمو صحن الشربة نعمروه بالماء و نفرغوه في القازان و نحسبو اشحال من واحد كل شخص و نحسبوه بصحن واحد حتى نحدد الكمية
فيما يخص الفريك أنديرة 1كغ و نص و لكن اللي عندها كمية أقل دير 1 كلغ و شوف كي تبدا تغلي الشربة إذا شافت فريك باين مع غليان الماء بكمية متوسطة ماكلاه أتزيد إذا كانت شوف غير حبات برك مع الماء يغلي أتزيد و تلاحظ
كي أنشوفو الشربة أبدات الطيب نجهزو كويرات اللحم (نضع الكمية اللي أنحبة أنتاع لحم مرحي حوالي 150غ إلى 500غ على حسب المقدور أو يمكن أقل حسب المقدور نضيفو لها قليل من الملح و قليل من النعناع اليابس مرحي سنات ثوم و بصلة صغيرة فقط ممكن أن نكتفي بالثوم فقط + حشيش شربة مقطع صغير و حبة بيض و نخلطو مليح حتى نشكلو كويرات صغيرة أقل من كويرات المثوم من الأحسن باش نتحصلو على كمية كبيرة من الكويرات الصغيرة) نضيفوها للقازان و نحركو و نتركها تطبخ على نار قليلة الفريك إيكون تقريبا طايب في هذه المدة هاذي نحكمو الجاج اللي نحيناه في البداية أنفتوه أنولو العظم و الجلدة كامل و نرجعوه للقازان في 10 دقائق الأخيرة. من جهة الملح أنكونو دقنا المرقة قبل ما نديرو الفريك و بعض ما نديرو الفريك إذا خص الملح أنزيدو إلا شفنا الشربة مالحة الكويرات ماكالاه الملح.
كينشوفو الشربة تقريبا عقدت أنطفوا عليها غير أنطفو أنكونو قطعنا حشيش حسب الكمية اللي أنحبوها مع نعناع أخضر و نضيفوها للقازان و نغطوا عليه.
كاين الي يزيد رشة قرفة صغيرة و فلف أسود كاين الي مايقطعش الحشيش إيدير حزمة حشيش مع نعناع و يربطها و يرميها في القازان و يقدم مع الشربة في الأخير حشيش مقطع في صحن.
هناك ملاحظة اللي أطيب الشربة على بكري و تخليها ترتاح قبل موعد الأكل ما تخليهاش بزاف عاقدة أتخليها شوية جارية باش أتظيد تشرب كي تبرد، اللي تقدم مباشرة أتخليها تعقد على حساب الذوق.
ما ننساوش أنشوفو الطماطم كذلكل كاين اللي يحب شربة حمراء بزاف كاين اللي يحب غير شوية
قبل التقديم نجبدو كامل ربطات الحشيش و الرند و عود القرفة
إنشاء الله أنكون وفقت في تقديم هذه الشربة أنسيت ملاحظة كاين اللي يزيد في البداية مع اللحم 3 حبات جز + 4 حبات إلى 6 حبات قرعة + حبة بطاطا و يرحيهم في الأخير قبل إضافة الفريك كاين الي إيدير حبات لفت كذلك أنا ماندير والو أحسن.
الأخوات اللي عندهم طريقة مغايرة و أحسن من هذه ماذابيكوم أتشاركونا و تقدمو طريقتكم للتصحيح كل واحدة عندها فكرة حتى ولوكان تكون ما تعرفش مي عندها أفكار مفيدة
غن شاء الله أنكون وفقت في شرح الشربة اللي عندها سؤال راني في الخدمة

شوربه فرميسال


[فيما يخص شربة فيرميسال المعروف و الغالب تحضر بالخضرة يعني لازم القرعة و الجزر كاين اللي يزيد اللفت كاين اللي يستغني على الجزر إيدير فقط القرعة و البطاطة
في الأخير يرحيهم قبل ما يرمي الفرميسال
كاين اللي يسكرفج القرعة و البطاطا و الجزر و يقليهم مع اللحم في البداية
كاين اللي يقطع كل شيء رقيق و يقليه مع اللحم في البداية
و كي يطيب اللحم و نمرقو على حساب المطلوب نرميو فرميسال عينك ميزانك بنفس طريقة الفريك إلى شفتي المرقة شوية خاثرة أرمي بشوية و شوفي كي تبدا تغلي
إلا المرقة جارية كثري شوية فرميسال
إلا جاتك بزاف جارية في الأخير تحكمي شوية مرقة و تحطي عليها قليلا من الفرينة و بعض قطرات من عصير الليمون و تحركي الفرينة مليح صفيها و زيديها للشربة و حركي باه تعقد المرقة شوية
فيما يخص الطماطم أنا أنشوف على حساب الحبات ممكن كيلو ممكن أكثر كاين طمطم كيترحيها اتبان بزاف حمرة و الأخرى تبان شوية مصفارة على هاذي لازم طماطم بزاف طايبة
أما مرقة الكسكس أنا من منطقة الوسط يعني مرقة الأعراس أتكون مرقة بيضاء هادي متمكنة من طيابها
أما المرقة الحمراء بكميات كبيرة ماجربتهاش من قبل
أخواتي أنا مارانيش خبيرة في الطبخ و لكن الظروف هي اللي خلاتني ندخل هاذ الميدان
الأخت مليكة ربي يحفظ والدتك و يطول في عمرها إن شاء الله
أخواتي اللي عندها اي إضافة أو معلومة تشاركنا بيها ، ما تقولوش رانا صغار خاطينا طياب لأنه من المعروف ديما نساء الكبار هوما اللي يطيبو في المناسبات و لكن الواحد ما يقدرش يعرف كيفاه رايحة تكون ظروفو من بعد


كسكس مرقه حمرا


ممكن جدا ديريها بلحم بقري ماكانش مشكل (صدقة مقبولة إن شاء الله) اللي قدرتي عليها معليش
نحن في الوسط أنديرو مرقة بيضاء و لكن لا باس عندي طريقة يعملوها ناس الشرق للمرقة الحمراء و هي طريقة سهلة و لذيذة
أختي قبل كل شيء بما أنك رايحة الديري لحم بقري من الأحسن فلفل أبيض (ما شي أسود) لأنه الأسود يكحل المرقة ممكن تخلطي شوية أبيض و شوية أسود للبنة
أختي تحكمي كمية اللحم اللي تقدري تشريها و هذا حسب المقدور طبعا تحكمي خيط اللي يركبو فيه اللحم هذا الخيط يتباع عند اللي يبيعو لوازم الحلويات تشري إبرة كبيرة تتباع عند اللي يبيعوا لوازم الخياطة تركبي الخيط على 2 أو 4 باش ما يتقطعش كي ترفديه تركبي اللحم و لكن ديري 10 قطع مع بعض في خيط و لا 6 قطع باش إيجيك خفيف كي تحركي
تركبي اللحم أنتاعك تحطيه في بسينة نقية أو جفنة و لكن من الأحسن بلاستيك لأن الحديد يتفاعل بعد مدة
1- أنحطو اللحم المركب في بسينة
2- نرحيو أو نسكرفجو البصل أختي ما نقدرش نعطيك الكمية بالضبط لأني ما نعرفش أشحال راكي رايحة الديري اللحم و لكن ديري 2 بصلات متوسطين لكل كيلو لحم
3- نضع في صحن غامق كاس زيت على حسب اللحم ممكن أكثر ممكن أقل أنضيفو ملعقة كبيرة عكري حلو أنخلطوها بالزيت مليح و نحطو فلفل الأسود و الأبيض و نحركو نقدرو أنديرو الملح كذلك و نخلطو جيدا و بعدها نفرغو الخليط على اللحم كاين اللي يضيف كذلك الطماطم المصبرة
و نفرغو البصل و نحركو جيدا اللحم مع الخليط أنغطوه و أنحطوه جانبا.
في هاد الوقت نرحيو 2-4 حبات طماطم و نوجدوهم جيه و نقشرو الخضرة تقدري ديري القرعة و اللفت أو الجز و القرعة أو تقدري الديري القرعة و الجزر و اللفت حلى حسب الاختيار و تكوني من قبل شمختي الحميصة
من الأحسن نترك اللحم لمدة ساعتين أو أكثر كيما في الشتاء تقدري تحضري في الليل و طيبي في الصباح أما في الصيف تقدري تخلي اللحم في الخليط ليلة كاملة و لكن في الثلاجة
كي تدي الوقت اللازم تحطي في قدر ماء و حمص و تخليه يغلي بجيه
تحكمي قدرة كبيرة مناسبة للكمية اللي حابة تحضريها تحطيها على نار خفيفة و تفرغي فيها اللحم و تحكمي كاس ماء تشلي بيها البسينة و تفرغي الماء هاداك على اللحم لأنه فيه بقايا الخليط و تغطي القدرة و تخليها تتقلى الوقت اللازم من الأحسن تنقصي للنار و تدي وقت ظيل حتى يطلق اللحم كل عصارته ترمي عليها الطماطم المرحية و عود قرفة و تخليها حتة شوفي كل اللحم تقلا مليح تفرغي عليه الحمص بالماء المغلي اللي فيه و اتركي اللحم يطيب بعد ما تزيدي للنار
بعدها مباشرة تكوني حضرتي ماء مغلي من جهة أخرى و تمرقي على حسب الكمية الزمة لطبخ اللحم في العادة على نار قاوية حوالي ساعة.
بعد ما تمرقي تحضري الكسكس كل واحد و الطريقة اللي يشمخ بيها كاين اللي يدهن الكسكس بالزيت و يفورو في المرة الأولى كاين اللي يغسل الكسكس و يصفيه و يدهنو بالزيت كل واحد و طريقتو المهم للجفنة حوالي 3 كيلو يكفيك على حسب الكمية تقدري تزيدي أو تنقصي
تحضري الكسكس و تحطيه على اللحم يتفور هذا يسرع عملية طبخ اللحم كي يتفور تنحيه و ترشيه بالماء كالعادة و في هاذي كل واحد و طريقتو كذلك
تفقدي اللحم ما تنسايهش تقدري تزيدي تفوري عليه للمرة 2 إذا مازال ماطاب عينك ميزانك
كي يطيب اللحم تحكمي مغرف و ترفدي الخيط المركب تخليه يقطر شوية و بعدها تحطيه في حاجة جانبا و تغطيه باش يبقى سخون و طري و ما يتبدلش لونه
قبل ما تنحي اللحم شوفي الملح تقدري تزيدي حسب الحاجة من الأحسن اللحم يكون مالح يعني ما يكونش ناقص ملح لأنه بعدها تزيدي تمرقي بالمء السخون حسب الكمية اللي تحبي و الازمة و ترمي الجزر بعد 15 دقيقة تزيدي ترمي اللفت بعد 15 دقيقة تركي القرعة
كي ترمي الجزر إلا كنتي مازال ما كملتي التفوار انتع الكسكس تقدري تفوري على الخضرة عادي
في كل هاد المدة تلاحظي كمية الطماطم إلا لازم تزيدي زيدي و كذلك الملح بعد ما يتفور الكسكس تدهنيه و ترشيه برشة خفيفة قرفة و تخلطي تقدري ما ديريهاش هاد الرشة على حسب الذوق
بعد ما الطيب المرقة نضيفو لها ملعقة فلف اسود في الأخير و نطفو عليها
تحكمي الجفنة تحطي فيها الكسكس ديري حفرة صغيرة في الوسط حطي فيها الحمص و زيني بالخضر و اللحم على حسب الذوق و حطي المرقة و الخضرة المتبقية في إيناء مغلق ليسهل حمله للمسجد و شوفي واش يلزم من ملاعق و و صحون هادي كل مسجد و كيفاه و كل منطقة و كيفاش كاين وين ياكلو كامل من القصعة كاين و ين يحطو في صحون فردية على حسب الحالة زوجك هو اللي يجاوبك على هذا السؤال





كسكس مرقه بيضاء

أخت سيرين اللي طلبت الكسكس بالمرقة البيضاء
أختي رايحة نعطيك بالتفصيل مع كل أنواع اللحوم بصفة عامة
الحاجة الأولى بالنسبة للحم البقري و الغنمي و الدجاج يعني الأساس واحد لا يتغير
البصل المسكرفج مليح يعني هذا على حسب الكمية المراد طبخها لحوالي كيلو لحم 2 بصلات كبار
أول شيء أنحطو السمن في القدرة مع 2 ملاعق زيت المائدة و نزيدو البصل و نخلوه يتقلا مليح بلا مايتحرق البصل بعدها نظيفو اللحم أم الدجاج نفس الشيء و نخلوه يتقلى لمدة 5دقائق قبل بعدها نظيفو التوابل
للمرقة البيضاء الأحسن الفلف الأبيض ماشي الأسود إلا ما عندكش أنديرو فلف اسود (الفلف الأسود يكحل المرقة خاصة البقري) و نحطو عود قرفة و ملح حسب الكمية و نخلو اللحم يتقلا مليح مليح
من جهة أخرى أنكونو حطينا في قدرة أخرى الماء مع الحمص يغلا شوية وحده لمدة 15 دقيقة مع قليل من الزيت نحو الرغوة كامل الليتطفو على السطح و بعدها بعد ما يتقلى مليح اللحم نرمو عليه الحميصة مع الماء المغلي. و نغلقو على القدرة
في هاد الوقت نحرو الكسكس كل واحد و الطريقة نتاعو في التحضير نحطوه إيفور على اللحم
بعد ما يفور المرة 1 نعاودولو التشماخ و ندهنوه و نحطوه جيه نتفقدو اللحم إذا كان دجاج إيكون طاب أنحوه من القدرة إلا مازال نزيدو نفورو للمرة 2
بالنسبة للخضر اللي ترافق المرقة البيضاء .
إما لفت لوحده ، أو قرعة لوحدها ، أو خليط من اللفت و القرعة
بعد ما يفور الكسكس ندهنون بشروية زبدة و نرمو عليه رشة صغيرة قرفة و نخلطو القرفة نصف ملعقة قهوة أو أقل ما تكثروش لأنه إذا كثرنا الذوق يتغير
بالنسبة للمرق كي يطيب اللحم نجبدوه و نحطوه جانبا ما تنساوش تغطوه مليح
نرمو الخضرة في المرق و نخلوها الطيب
بعد ما الطيب المرقة نزيدو عليها رشة فلف اسود خفيفة و رشة قرفة صغيرة و بالصحة عليكم
بالنسبة للتقديم إذا عند ضياف من الأحسن تحطي الكسكس في صحن كبير تحطي الحمص و تزيني بالخضر و الدجاج أو اللحم
و المرقة تتقدم في وعاء جانبا


كاين طريقة اللي يعاودو بيها الكسكس ثاني ساهلة ديري بسينة كبيرة ماء فيه ملح و زيت شوية فقط زيت و كي ترفدي الخمار من فوق الكسكاس تغطسيه مباشرة داخل البسينة و ترفديه بالخف و تفرغيه في جفنة و تحليه عادي
من بعد خليه يشرب
كاين طريقة الكيل نتاع الخضرة مثلا تقطعي بسينة جزر لازم لها 2 بسينات قرعة
القرعة باش الجيك حلوة كي تقطعيها رشي عليها ملح و فلف اسود و خليها تشرب قبل ما ترميها في القزان قطريها مليح ولا شليها بالماء باش يروح الملح
هاذ الطريقة تخليها تفقد كامل المرورية و جي بزاف حلوة



طاجين الزيتون

نبداو خطوة خطوة باش نوضح مليح
أول شيء اللحم أو الدجاج
إذا رايحة الديريه بالدجاج تحسبي 50 قطعة دجاج ملاح و تزيد ديما حوالي 5 أو أكثر للاحتياط
و إذا رايحة الديري اللحم كيف كيف من الأحسن تحسبي القطع مثلا رايحين نحطو 2 قطعات في طبسي نحسبو 100 قطعة و نزيد شوية للاحتياط
نشريو الزيتون هنا ما نقدرش نمدلك الكمية بالضبط عينك ميزانك و على حسب شحال رايحة تسربي في الطبسي كاين اللي يحط بزاف و كاين اللي يحط شوية على حسب المقدور
المهم تشري الزيتون على بكري و تخليه يبات ليلة كاملة في الماء و من بعد إذا عندك الوقت بديلو الماء و زيدي خليه أحسن من أنك تغليه باش يروح الملح
إذا ما عرفتيش الكمية أشري و فرغي في الطنجرة اللي رايحة طيبي فيها حتى تلحقي للكمية المطلوبة
نبداو بالتحضير
نحطو اللحم أو الدجاج نسكرفجو عليه البصل حوالي 4 بصلات و زيدي راس ثوم و زيت و ملح و فلف أسود و عود صغير قرفة و خلي كل شيء يتقلى اللي يحب مرقة حمرة يضيف حبات طاطم مرحية و قليل من الطماطم المصبرة و الللي يحب مرقة بيضاء يخليها بدون إضافة ممكن نضيفو زعفران كذلك الواحد و ذوقو
كايف اللي يضيف أوراق الرند 2
كي يتقلى اللحم نمرقو بالماء المغلي و نخليو اللحم يطيب كي فريب يطيب اللحم نضيفو الجزر مقطع إما دوائر أو طولي مائل يعني دوائر طولية مايلة
و نظيف الزيتون و ربطة معدنوس مربوطة و نخليو كل شيء يطيب
إذا درتي الجاج غير تمرقي تظيفي الجزر و الزيتون و خليه يطيب
و لكن بالنسبة للجاج نراقبوه إذا شفناه طاي قبل الزيتون نحيوه
و كاين طريق أخرى بالنسبة للكميات الكبيرة بزاف نطيبو اللحم و أو الدجاج وحده من بعد نحيوه و نحطوه جيه نغطوه
و المرق نحطو فيه الجزر و الزيتون و نخليوه يطيب
بهذه الطريق نقدرو سربيو بسهولة نحطو الزيتون في الطبسي و فوقه اللحم أو الدجاج
قبل ما نطفو على الزيتون كاي 2 طرق باش نعقدو المرقة
كاين اللي يطيب ناشف من الأساس هذا ما يسحقش مرقة عاقدة
إذا كانت كاينة مرقة كاين 2 طرق
1- الطريقة المعروفة نعمرو شوية مرقة نضيفو لها شوية فرينةملعقة أو 2 على حسب الكمية و قطرات عصير ليمون و قليل من الفلفل الأسود و نحركو من بعد نفرغو على الطنجرة و نخلوه يغلي 5 دقايق و نطفيو عليه
2- كاين اللي يضيف creme freche هذا يعدل من ذوق الزيتون و يعقد المرقة أنا نفضل الطريقة الثانية
كاين اللي يحب يحمر الدجاج و يحطي فوق الزيتون كاين اللي يضيف بطاطا مقلية معاه و هذا في حالة وين يكون عندك بزاف الغاشي و تخافي ما يكفيش

طريقه اخرى

روح مراد قريت طريقتك في طياب الزيتون حنا في الوليمة نخدموه بنفس الطريقة ولكن كاين عفسة تحكمي الزبدة الملح فلفل أسود عرق لصفر تعركيهم مليح وتحكمي اللحم عدد ما عندك ضياف وتطليه بهذيك التحميرة و تستفيه في طاجين كبير تغطيه وتشعلي عليه النار و تخليه يقلى على غرضه كي جي تمرقي ذوقيه على الملح غطيه وخليه يطيب
تاخذي الزيتون نتاعك حسب الكمية لي تحطيها في صحن التقديم نتاعك وتضاعفي طبعا الزيتون تكوني نحيتيلو الملح من قبل ليلة كاملة تشليه كي يقطر ديريلو ملعقة صغيرة كروية وملعقة أكل فرينة لكل كيلو تخلطيه مليح وتغطيه و تخليه منين يطيب اللحم نحيه من المرق وحطي فيه الزيتون و خليه يطيب راه يعقاد الروحو و ما يحتاج حتى إضافات
تحمري الفطر كامل غير مقطع في شوية زبدة وتضيفيلو شوية مرق من الطاجين وتخليه يطيب و البقية راكي عارفة كيفاه تكملي المهم هذه طريقة ناجحة بزاف راني معتمدتها في شحال من عام و هي ناجحة و بنينة




أختي حبيت نقول لك على عفسة بالاك تفيدك مستقبلا و الأخوات

العفسة الاولى

عن كيل الكسكس نتاع المناسبات شوفي كيفاه نديرو شفتي طبسي او زلافة الي فيه الكسكس في موضوع العشاء هو قيس 5 عباد و ادا كان عندك ضيوف حوالي 250 شخص يعني لازملك 50 زلافة اوكي
و باش يكون عندك حساب و ما تفسدوش الكسكس و لا تنقصو شوفي كيفاه عمتي كانت تكيل

عادة الكسكس يكون مفتول من مدة يعني جاف ياك امالا الحساب هو حكمي بول نتاع الشربة الي معروف عندنا نتاع الحريرة و عمريها بالكسكس اليابس هادي تخرجلك زلافة كسكس من بعد ما يفور
ويكون جاهز للأكل

امالا تحتاجي 50 بول من الكسكس اليابس و طيحي قد قد

نتمنى تكوني فهتنيي

اي سؤال تفضلي أختي

العفسة التانية

شفتي هاد الصورة الي فيها طراشن

هادوك طرشونات مشمخين بالماء علاجال الضيوف كي ياكلو اللحم اكيد بيديهم امالا من بعد يمسحو برك بهاد طرشونات المشمخيين و ما يبقاش بقايا اللحم في يديهم هي صراحة ناس بكري كانو يديرو ليقامة نتاع الغسيل مكونة من صابون حجرة و لا سائل و فوطة يكلفو شخص معين الضيوف غي يخلصو و يكملو الأكل يجوز عليهم هاد الشخص يغسلو يديهم بالصابون و ينشفو بالفوطة بصح تقدري تقولي هاد العفسة اندثرت و عوضناها بهاد الفكرة نتاع الطراشن المبللة

تحياتي