محتاجتكم خاوتي خياتي

[~أميرة أميري~]

السلام عليكم ورحمة الله
خياتي خاوتي حبيتكم تعاونوني بخبرتكم لاني جديدة فهاد المجال وماعرفتش واش ندير
ماعنديش مدة ملي تخطبت وكامل الناس شكرولي في خطيبي وقالولي انسان هايل ويساعد الناس و و و و و
وبعد مدة من الخطبة اكتشفت انو كي يتقلق مايعرفش روحو واش يهدر كاامل يرجع انسان وحدوخر يولي حتى دارهم ومايعرفهمش ولمشكل يخرج زعافو فيا ويسمعني كلام يجرحني وتغيضني عمري وانا كي وليت نحبو كل مرة نسامحو وزيد يرجع ندمان ويقلي غلطت
البارح قالي راني حابك تعاونيني باش نحي هاد السب وهاد لكلام كي نتقلق قالي خوفيني من ربي علميني لازم تعاونيني وانا ماعرفتش كيفاش نقدر نعاونو
اعطوني نصيحة يعني منا وجاي كي يتقلق ويجي يهدر كلام عيان واش يلزم عليا ندير؟؟؟؟ قالي انصحيني وريلي طريقي دبري راسك واش ديريلي
واش نقدر ندير كيفاش نقدر نبدلو هاد لعادة
مع العلم انو قالي راني كاره روحي وعارف بلي راني غالط معاك ومع ربي وحاب نكون بخير وحاب نفرحك بصح كل مانتقلق الشيطان يغلبني ونولي مانشوف والو قدامي ونعميها
حبيتكم انتم المتزوجين واش تقدرو تنصحوني وكل مرأة عانات نفس الشي وراجلها كان منرفز معاها تعاوني
بارك الله فيكم

[اياد حياتي]

الحمد لله الي يستعرف بالغلطة تاعو يعني حاب يتبدل المهم اختي قوليلو يقرا القران يصلي ويدعي ربي يهديه باه يتحكم في اعصابو وقوليلو لازم يداوم الاستغفار وصلاة على النبي والله فيها راحة وان شاء الله ربي يهديه

[عثمان الجزائري.]

السلام عليكم، أول شيئ ما حاله مع الصلاة هذه أول خطوة ثم ما هي أسباب غضبه هل هي تستحق أولا؟ المهم أن النبي صلى الله عليه و سلم أوصانا بعدم الغضب، خرّج البخاري عن أبي هريرة -رضي الله عنه- أن رجلاً قال للنبي -صلى الله عليه وسلم-: أوصِني قال: لا تغضب. فردّد مرارًا قال:" لا تغضب"، قال رسول الله -صلى الله عليه وسلم- : "ليس الشديد بالصُّرعة، إنما الشديد الذي يملك نفسه عند الغضب"، قال سليمان بن صرد: كنت جالسًا مع النبي -صلى الله عليه وسلم- ورجلان يستبّان، فأحدهما احمرّ وجهه وانتفخت أوداجه ، فقال النبي -صلى الله عليه وسلم- : إني لأعلم كلمة لو قالها ذهب عنه ما يجد ، لو قال : أعوذ بالله من الشيطان الرجيم ، ذهب عنه ما يجد . فقالوا له : إن النبي صلى الله عليه وسلم قال : تعوّذ بالله من الشيطان، فقال : و هل بي جنون؟! رواه البخاري ومسلم ، من كظم غيظه هو الفائز قال صلى الله عليه وسلم : ( من كظم غيظا وهو يقدر على أن ينفذه دعاه الله على روؤس الخلائق حتى يخيره في أي الحور شاء )..لا تبخليه بهذا الحديث بدافع الغيرة
عن النبي - صلى الله عليه وآله وسلم - قال : " ليس المؤمن بالطعان ، ولا اللعان ، ولا الفاحش ، ولا البذي "
و يحاول الإبتعاد عما يغضبه من الأماكن و الأشخاص و ليكن دائما مع رفقة صالحة تعينه على الخير، و أنت كذلك حاولي أن تبنوا حياتكم على الشرع فمفتاح السعادة ذاك......

[cherif algeria]

السلام عليكم

ارى من صيغة كلامك ان كلامك موجه للنساء فقط ثم للمتزوجين بصفة خاصة و انا شاب و غير متزوج

على العموم خطيبك هذا على عكسي تماما فانا ، لكن الصراحة اذا كان في فترة الخطوبة يسمعك كلام مش مليح و يتقلق بهاذي الطريقة بعد الزواج كيفاه راح يكون الامر ؟

قوليهالو هك بكل وضوح قوليلو اذا كنت من درك تعاملني هكا كيفاه راح تكون المعاملة مبعد ؟

قوليلو اذا كنت نتا مش قادر تتحكم في اعصابك كيفاه تحوسني انا نعاونك ؟

اذا كنت تتقلق و تسمعني كلام خايب كيفاه راح نكملو حياة طبيبعة سعيدة نكون فيها متفاهمين

قوليلو ما شكيتش كان مشروع زواجنا راح ينجح بالطريقة هاذي اذا ما غيرتش نفسك و انا مانيش مستعدة نتمرمد و نشبع سب و ضرب حابة واحد يقدرني و يحبني صح و يحطني بين عينيه

ربما بهذا الكلام يعرف ان الامور جدية و يراجع نفسو مليح

اسمحيلي على كلامي لكنو حقيقة الامر

ربي يسهل ليكم و ربي يعيطه القدرة على التحكم في اعصابو

[toulay]

سلام عليكم
Bon لازم تحكي معاه وتحطلو les points sur les i
يا اختي الا السب والهدرة العيانة ملازمش تكون متساهلة معاه في هاذ le point علابالك علاش لانو نهار تتزوجو ان شاء الله ويصرا مثلا problème بسيط خلاص يقلب عليك الدنيا ويسمعك كلام مشي مليح
لازم يكون un respect بيناتكم واذا راح واش الفايدة مين تكملو كيف كيف
يا اختي حتى لوكان تموت عليه متقبلش لروحك الاهانة parce que مين à chaque fois تسامحو يوالف ويقول اي متقدرش على فراقي نورمال ندير واش ندير
مرة خلاف مين تحس راح يتقلق ويبدا فالهدرة لخاطي الطريق قولو راني راح نقطع ومين تولي لباس ويرجعلك عقلك عيطلي باش نتفاهمو لانو العياط والسب مايجيب حتى نتيجة وخليه ni plus ni moins
قولو انا مادابيا نعيش مهنية ومرتاحة
تاني قولو التغيير يبدا من عندك انت قولو صح اذا حايب تتبدل وترجع افضل راني هنا بصح اذا انت معاونتينيش ماعندي ماراح ندير
قولو بالعقلية تاعك كيفاش راح تكون حياتنا قولو اولادنا مرة خلاف كيفاش راح يعيشو مع اب عصبي
قولو قبل ما يطلعلك gaz استغفر ربي وقول الله يلعن الشيطان هكذا باش تولي calme وتهدر بالهداوة والسياسة
ربي يسهل ان شاء الله
بالتوفيق

[القائدة]

المشاركة الأصلية كتبت بواسطة cherif algeria

السلام عليكم

ارى من صيغة كلامك ان كلامك موجه للنساء فقط ثم للمتزوجين بصفة خاصة و انا شاب و غير متزوج

على العموم خطيبك هذا على عكسي تماما فانا ، لكن الصراحة اذا كان في فترة الخطوبة يسمعك كلام مش مليح و يتقلق بهاذي الطريقة بعد الزواج كيفاه راح يكون الامر ؟

قوليهالو هك بكل وضوح قوليلو اذا كنت من درك تعاملني هكا كيفاه راح تكون المعاملة مبعد ؟

قوليلو اذا كنت نتا مش قادر تتحكم في اعصابك كيفاه تحوسني انا نعاونك ؟

اذا كنت تتقلق و تسمعني كلام خايب كيفاه راح نكملو حياة طبيبعة سعيدة نكون فيها متفاهمين

قوليلو ما شكيتش كان مشروع زواجنا راح ينجح بالطريقة هاذي اذا ما غيرتش نفسك و انا مانيش مستعدة نتمرمد و نشبع سب و ضرب حابة واحد يقدرني و يحبني صح و يحطني بين عينيه

ربما بهذا الكلام يعرف ان الامور جدية و يراجع نفسو مليح

اسمحيلي على كلامي لكنو حقيقة الامر

ربي يسهل ليكم و ربي يعيطه القدرة على التحكم في اعصابو

انت لم تكمل الجملة الملونة بالأحمر ! كنت رح تتكلم على نفسك و مبعد ديرابيت !

و رآك دخلت في الأخت قوليلو قوليلو قوليلو قوليلو حسستني انك فيصل القاسم في الاتجاه المعاكس !
المهم ... نعود الى الموضوع
أوافقك الراي بعض الشيء
وش رح تربي وش رح تعدل هاذ المخلوقة ! تربية تع
سنين طويلة تع صغر مش تع نهار ! و هاذي مهمة الأبوان مش الزوجة ! و لكن هذا هو الحال للاسف
هاذ العجايز مايربوش ولادهم و المرا مسكينة تديه بياس ديطاشي و تجيب عمرها ترقع فيه و تتحمل و تصبر و فوقها تزيد تدي السب من العجوز و السلافات !
اللي قلقني في كلام هاذ الخاطب انو يقولها ( دبري راسك واش ديريلي ) !!! يعني موتي امرضي اهبلي سوطي اطلعي انزلي نوضي ارقدي تكسلي تكمشي ميهمنيش المهم ديريلي حل دبري راسك و تحملي مخلفات السنين اللي فاتت !!!!!!!!! هذا اللي ميعجبنيش انا ياريت لو العجوز تقدر هاذ الكنة اللي شايلة مثالب تربيتها لابنها .
و الله الحكاية مش خسارة فيه يعني كون تعاونو و تريسكي معاه تدي فيه اجر ولد الناس بصح المشكلة صعييييب تربية تع سنين من الصغر تبدلها لازمها صبر و تضحية و بعض التنازلات و ممكن في الاخير يا تنجح يا لا .
الله يهديه على كل حال و يجمعهم على طاعة الله و يهبهما الحياة السعيدة الهنية ، فيكفي انه يطلب العون و هذا مؤشر إيجابي ينم عن رغبة في التغيير و معاتبة النفس ، نسال الله ان تكون الأخت سبب في هدايته و سعادته و ما ذالك على الله بعزيز ، بالدعاء و الصبر و حسن الضن بالله .

[visa uk]

اختي نعطك نصيحة لوجه الله لايوجد فينا في الدنيا كامل خطيبك هدا يبان والله اعلم قلبو طيب ومليح الفون تاعو ربما مشكلتو متنرفز اوك هنا تبان لمرا الحنينة والطيبة والصادقة ودات القلب الطيب والجميل ربما انتي سبب تغييرو صدقيني ماتسمعيش لي يقلك خليه ووو المهم ماهوش تاع شراب ودخان ومخدرات وحتي ربما نسلء باش تخمي تحبسي معاه ساعفيه وهنا المرا هي نقطة ضعف الراجل يعني كوني دكية اعطيه لكلايم لحلوين وادا لزم ادعيلو وزدي ادعي والمهم دري قران ووو انا مادامة تاعي سقمتي كنت متعصب بسببها تسقمت وهاته حقيقة ماكنتش بلا مرا بلا عاطفة نخمم غر في الزواج ولمرا باسكو الوقت والعاطفة تكبر سواء للراجل والمراة ايا جات بدلتني ووليت مرتاح نفسيا وعاطفيا بسللها صراحة

[محمد جديدي التبسي]

وعليكم السلام ورحمة الله وبركاته
على حسب كلامك هذا خطيبك يعني العقد الشرعي مكاش كيف تقبلين على نفسك هذا ؟! راك نية وقيل!!
في عوض تبحثي عن حل ليتخلى هذا الخاطب عن عصبيته المفروض تشوفي حل لعمرك وتحبسي الحديث معه من أساسه لأنه لا يجوز شرعا اذا كان خطبة فقط ..ومادام عرفت عنه هذه المثالب الأخلاقية وهذا الاستهتار يقولك شوفيلي حل لعصبيتي (وهو سوء أخلاقي أكثر منه عصبية).فأنصحك أن تنجو بنفسك واقطعي علاقتك به وابحثي عن غيره فالطبع يغلب التطبع ..ربي يفتح عليك

[maiar]

نصيحة اذا راه هك من ذرك ماتطمعيش يتبدل و اذا تبدل بالطولة لازملك قوة الصبرو التحمل لانو هذا الشي مش ساهل درك راكي بعيدة كي تكونو ساكنين تحت سقف واحد تغيضك اكثر درك هذا يرجع ليك شابفة روحك قادرة و ما تقوليش ندمت لي كملت معاه اللهم بارك شايفة روحك ما تقدريش ربي يسهل عليك

[AMINA.Z]

النسا يرضاو بالذل .... من بعد يا اختي ما تجيش تشكي كي يولي يضربك
هذ الانسان امو ما عرفتش و ما قدرتش تربيه ...تجي انتي تربيه !!!!!!! و راح تربيه هو و الا ولادك من بعد !!!!!!!
و اذا حاطا في بالك بلي المراة تقدر ترجع الراجل للطريق و منعرف واش و تبعي الهدرة هادي ....ديري في بالك من بعد ...هاذا اختيارك و اتحملي النتيجة.
السيد ما يعرفكش و ماش موالفك هكاك و ما حتارمكش و من البداية يسب و يشتم!!!!!!!
الحب اللي راكي تحكي عليه ....راح يجي النهار اللي تندمي عليه.
اختي خمي على روحك مليح ...معيار الاخلاق رتهو ماكانش عند السيد هادا.

[~أميرة أميري~]

السلام عليكم ،،، حبيت نشكركم واحد بواحد لانكم عاونتوني ولو بكلام ريحني زخلاني نخمم ونعرف الصح من الغالط برك حبيت نصحح حاجة
لي راهم يقولو تربية الوالدة والله حرام عليكم الوالدة بعد ماخلاهم باباهم برا مرميين صبرت وتعبت عليهم ورباتهم ورجعتهم رجال قساو بزاف في حياتهم لانو باباهم سمح فيهم وهوما كانو صغار وعاشو معانات كبيرة ويماهم سهرت عليهم وكانت حتى تملس الطواجن وتبيع في البيض باش تربيهم وحتى كانت بيضة تقسمها مابيناتهم والله وربي شاهد غير مرا ونص وقفت مع ولادها ورجعتهم غير الراجل وخوه قراتهم وكامل راحو للخارح وكملو قرايتهم وجاو ليماهم بناولها الدار نتاع الصح تعبت عليهم
وهو سبب عصبيتو صغرو لي عاشو مع باباهم لي كان ديما يسب ويشتم ويضرب يماهم قدامهم
حكالي خطيبي انو كرطاب واحد كانو دايرين الدالة عليه وكانت عندهم دار وحدة متقاسمينها بيزار اييييه وعلى ديك خرج عصبي وباباهم راه توفى ماعندوش بزاف وخلالهم عقدة كان خطيبي ديما يحكيلي يقلي راه معدبنا وسامح فينا كان ديما بجي للدار يضرب يماهم ويكسر و و و و
يعني حبيت نوضح انو سبب غضب خطيبي والنرفزة نتاعو هو الشي لي عاشو في صغرو قالي كنا نباتو برا قالي يمى تناحي حوايجها وتغطينا
يعني راكم غلطتو بزاف لانكم دخلتو في تربيت الام
واليوم الحمد لله خرجتهم رجال وكل واحد راه بدارو وبمرتو ودايرين يماهم فوق ريسانهم لانها تعبت عليهم
وخطيبي طلب مني العون لانو شاف يماه كيفاش عاشت واش قاسات قالي شي لي نديرو كي نتنرفز فوق طاقتي وقالي عاونيني
يعني ماتفهموش النرفزة نتاعو جاية من تربية امو راكم غالطين بزاف ويماه راهي يمى الثانية وقالي راهي القدوة نتاعنا وراهي على الراس ولعين

[شريفة 28]

الدعاء له وقليل من الصبر .

[الجنة الجنة]

السلام عليكم
في رايي الحل ماشي انك تقوليلو ما تقولش كلام قبيح ووو لانو هذا الشيء يعرفو وراهو واعي بالمشكلة وزيد وقت الغضب ما يفيد والو اذن انا نشوف الحل بانك ما تروحيلوش بطريقة مباشرة، الطريقة لي انا نشوفها مليحة انك تساعديه على الصلاة في وقتها و الصلاة في المسجد خاصة صلاة الفجر شحال من واحد يشد في صلاة الفجر يتصلحو عيوبو بدون ما يحس، حاولي انك تقومي لصلاة الفجر وانك تصلي كل صلاة في وقتها راح يحاول يدير مثلك وتكوني صلحت من نفسك ومن خطيبك، ربي يجمع بيناتكم في الحلال ويهنيك وتعوضيه على الشي اللي فات عليه.

[nihal159]

المشاركة الأصلية كتبت بواسطة souzy manita

السلام عليكم ،،، حبيت نشكركم واحد بواحد لانكم عاونتوني ولو بكلام ريحني زخلاني نخمم ونعرف الصح من الغالط برك حبيت نصحح حاجة
لي راهم يقولو تربية الوالدة والله حرام عليكم الوالدة بعد ماخلاهم باباهم برا مرميين صبرت وتعبت عليهم ورباتهم ورجعتهم رجال قساو بزاف في حياتهم لانو باباهم سمح فيهم وهوما كانو صغار وعاشو معانات كبيرة ويماهم سهرت عليهم وكانت حتى تملس الطواجن وتبيع في البيض باش تربيهم وحتى كانت بيضة تقسمها مابيناتهم والله وربي شاهد غير مرا ونص وقفت مع ولادها ورجعتهم غير الراجل وخوه قراتهم وكامل راحو للخارح وكملو قرايتهم وجاو ليماهم بناولها الدار نتاع الصح تعبت عليهم
وهو سبب عصبيتو صغرو لي عاشو مع باباهم لي كان ديما يسب ويشتم ويضرب يماهم قدامهم
حكالي خطيبي انو كرطاب واحد كانو دايرين الدالة عليه وكانت عندهم دار وحدة متقاسمينها بيزار اييييه وعلى ديك خرج عصبي وباباهم راه توفى ماعندوش بزاف وخلالهم عقدة كان خطيبي ديما يحكيلي يقلي راه معدبنا وسامح فينا كان ديما بجي للدار يضرب يماهم ويكسر و و و و
يعني حبيت نوضح انو سبب غضب خطيبي والنرفزة نتاعو هو الشي لي عاشو في صغرو قالي كنا نباتو برا قالي يمى تناحي حوايجها وتغطينا
يعني راكم غلطتو بزاف لانكم دخلتو في تربيت الام
واليوم الحمد لله خرجتهم رجال وكل واحد راه بدارو وبمرتو ودايرين يماهم فوق ريسانهم لانها تعبت عليهم
وخطيبي طلب مني العون لانو شاف يماه كيفاش عاشت واش قاسات قالي شي لي نديرو كي نتنرفز فوق طاقتي وقالي عاونيني
يعني ماتفهموش النرفزة نتاعو جاية من تربية امو راكم غالطين بزاف ويماه راهي يمى الثانية وقالي راهي القدوة نتاعنا وراهي على الراس ولعين

ياختي مادام المشكل تاعو عندو علاقة بمرحلة الطفولة و إرهاصات الماضي راهي تحولت لعقدة نفسية لازملو طبيب نفساني يساعدو باش يتخلص من هذه العصبية و العدوانية؛ وأنت في المقابل أوقفي معاه وشجعيه باش المأساة لي عاشها مايعيشوهاش أولادكم مرة أخرى؛ ربي يكون معاك.

[nihal159]

والله كي عرفت حكايتو مسكين غاضني و لتمستلو الأعذار؛ أنا كان في بالي جايح أو ناقص تربية؛ ظهر مسكين سوفرا بزاف في حياتو.