ماشي الفهامة اللي ما يفهمش..!!!

[muhibbat rrasoul sws]

[/SIZE][/u]بسم الله و الصلاة و السلام على رسول الل و على آله و صحبه و من والاه

السلام عليكم و رحمة الله و بركاته

يا أخوات، هناك مواضيع جدا مهمة لكن أحيانا لا أفهم ما يُكتب، مرات تقعد الكلمة أيام في راسي تدور أو أكثر حتى نلاقيها في موضوع آخر فيتضح المعنى....
يا أخوات اللغة الفرنسية و غيرها من اللغات الأوربية أخذت كثيرا من لغتنا العربية و نحن اليوم نترك لغة فيها ملايين الكلمات لنأخذ أحيانا كلمات عربية معوجة فنزيدها اعوجاجا، و الله عيب، لغات فيها بضع عشرات الآلاف من الكلمات إلى ما هو أقل من عشر ما في العربية.

زد إلى ذلك، هناك عربيّات أو قارئات بالعربية يدخلن المنتدى فلماذا نضيق عليهن و نجعل علينا طوقا فلا يفهمنا أحد؟! إذا أنا جزائرية أجد صعوبة في الفهم فما بالكن بغيري من العربيات؟!

فقط سؤال لماذا؟

لابات : العجينة
البلا : السنيوة، السينية ( حنا عندنا البلا ما يرادفه البلاء لغة)
لي مول: القوالب
لا كريم : الكريمة
لا صوص : المرق ( هدي أول ما سمعتها من مصري، و الله صادفني و ضحكت، أول ما فهمت على صيصان الدجاج و الله!!)
تومات : طماطم!!!!!!!!!!!!!
مي : لكن، بصح
الباتور : الضراب اليدوي
بوش إيدوي ( هادي و الله بقيت معاها مدة طوييييييييلة باش فهمتها) : كيس / قرطاس ( تزيين) الكريم و المعجنات، الأقماع ( آخر ما يركب في الكيس)
الميكسور : الخلاط/ الخلاط اليدوي

الكوزينة : المطبخ
الفور : الكوشة/ الفرن
الموطأرد : الخردل
الفرشيطة : الشوكة ( يا ناس تنجيكم طبيعي نقولوا الكوييرة و إلا اللوشة؟! هذا من نفس القبيل)[/SIZE]
رابي : مسكرفج ( هذه الكلمة تكاد تختفي )، مبشور
ديسيرفيات : ما علاباليش اذا فهمتوا بصح معناها فوطة/ منديل ( الطاولة)
قاطو : حلوى/ حلويات
بودرة : مسحوق
بورت مونجي : علبة حفظ الأكل ( هادي و الله قالتلهم أرقدوا)
الرولو : الحلاَّل ( عند ناس العاصمة)
البانسو : الفرشاة أو فرشاة المعجنات
الشابلوغ : فتات الخبز، البقسماط
الفرماج : الجبن ( الذائب، الأبيض، الرومي ...)
ميلفاي : الألف ورقة
سوطي : محمّر
صاشي/ساشي : شكارة، كيس (صاشي مكتوبة تفكرني بكلمة صايش عدم المؤاخذة)
جوطابل : للإستعمال مرة واحدة ( هذه حقيقة ما استنيتهاش)
رافيطايمو : العولة
البول : الغرفية ( هنا تصروا وحدة تكتب مثلا نحط البيض في البول، و ناخد بول زيت، واش راح يكون التساؤل الفطري لأي متكلم بالعربية؟ ما دامها بدأت بالبول فبما ستكمل يا ترى؟!)
جامي : أبدا، عمري...
البرا : الخلاط اليدوي ( هادي يا أخوات لوكان يقراوها العربيات من غير تاع المغرب العربي أو حتى الجزائريات المغتربات راح يتصادفوا! علاه؟bra= الصدارة!!!!)


ملاحظة: لما أجد كلمات من تراثنا أضعها و لما لا أجد ( لأن قاموسي ضعيف كوني تربيت في مدينة و كلامنا في البيت كان جدا مفرنس) أضعها بالعربية الفصحى،و لو تنبهني الأخوات أرجع و أعدل، نحن المغاربة عندنا لغتنا الخاصة الجمبيلة التي لا نكاد نجدها اليوم إلا في القواميس.


يتبع إن شاء الله

[سحابة باردة]

مساء الخير موضوعك هادف وجميل
ههههههه ضحكتيني على الصيصان والبوش ادوي ياختي

المشكل اللذي تطرحينه قديم ولا ينحصر في المطبخ فقط بل في كل كلامنا وتعاملاتنا اليومية

وسبب معروف نحن بلد استعمر اكثر من قرن فطبيعي اختلاط اللغة وتاثيرها على الشعب عامة

ونا معاك لغتنا غنية ولا تحتاج مصطلحات اجنبية نغنيها بها ولاكن للاسف صعب نغير من كلامنا فجأة

شكرا لطرحك المميز

وان كنتي من محبي الكلام العربي الاصيل يمكنكي زيارة موضوعي في دردشة لشعر والخواطر

[zokhrofa]

والشابلوغ ؟ la chapelure هههههههههههه

[شمس 15]

صح عندك الحق كما قالت الاخت ماشي غير في المطبخ .....
انا ساعات نفضل العربية مكسرة على الفرنسية ساعات نتلاقى مع ناس يعلمو ولادهم غير الفرنسية تقول مراهم عرب...
انا كي نبعث لحباباتي ميساجات تلقاي 3 لغات نستعملهم العربية،الفرنسية،الانجليزية...
بصح عندي مدة راني نحارب في روحي باش نكتب لغة وحدة..

[zokhrofa]

صحيح المشكل انو الفرق بين الدارجة و الفرنسية المكسرة فارق كبير

لغة الأم هي اللغة لي يهدر بيها ناس بلدة ما

لكن أحنا بلدنا تخلى على كلمة مكاش منها و ولا يقول c'est pas vrai

هذا هو الاشكال الحقيقي

يعني مافيها والو نهدرو بالدارجة لكن بكلمات لغتنا الأم

و الكل يعرف انو لغتنا الام ليست عربية مئة بالمئة لكن ليست بفرنسية ايضا

[muhibbat rrasoul sws]

المشاركة الأصلية كتبت بواسطة شمس 15

صح عندك الحق كما قالت الاخت ماشي غير في المطبخ .....
انا ساعات نفضل العربية مكسرة على الفرنسية ساعات نتلاقى مع ناس يعلمو ولادهم غير الفرنسية تقول مراهم عرب...
انا كي نبعث لحباباتي ميساجات تلقاي 3 لغات نستعملهم العربية،الفرنسية،الانجليزية...
بصح عندي مدة راني نحارب في روحي باش نكتب لغة وحدة..

شوفي يا أختي لازم حنا ناخدوا بزمام الأمور و نبدلوا، رانا تبهديلة
تتصوري طالياني يهدر مع وليدو بالشينوية؟!
ناهيك على واش دارت في جدودنا فرانسا، و الله عيب
ساهل، شخصيا نحيت الفرنسية تقريبا كليا من قاموسي رغم أني تربيت عليها تقريبا كلغة أم، حتى كانت عندي أحيانا مشاكل مع زملائي بسببها، عمبالهم نلعبها!
و زاد قريت بيها، يعني مصيبة، بصح اليوم نحيتها، و وليت نتكلم غير العربية، و كي نحب نستعملها للحاجة و فقط نستعملها غير هي ما نخلطش.
و زاد لاحظي يا أختي، فطريا نننجد أنفسنا نحترم أكثر المتمكنين من العربية في حياتهم اليومية و ليس الذين يخلطون.

[أمنية غفران]

عندك الحق أختي الكريمة صح كاين بزاف كلمات نستعملوهم و انا وحدة منهم هههههههههههههه
ان شاء الله نحاول في مواضيعي القادمة تكون واضحة و مبسطة و بكلمات عربية

مشكورة على التنبيه

[كريمة الجزائرية 48]

المشاركة الأصلية كتبت بواسطة شمس 15

صح عندك الحق كما قالت الاخت ماشي غير في المطبخ .....
انا ساعات نفضل العربية مكسرة على الفرنسية ساعات نتلاقى مع ناس يعلمو ولادهم غير الفرنسية تقول مراهم عرب...
انا كي نبعث لحباباتي ميساجات تلقاي 3 لغات نستعملهم العربية،الفرنسية،الانجليزية...
بصح عندي مدة راني نحارب في روحي باش نكتب لغة وحدة..

اخت شمس انا انغرست فينا هاذي الهدرسة والدليل في كلامك ميساجات (رسائل) هههههههههه انا تاني كيما هاكا الهدرة هاذي لازم من الصغر ماشي حت نكبرو ومتنزعفيش غير نزعق معاك

[zokhrofa]

صح عندك الحق

شهادة اعتز بها انا ملي دخلت لمنتدى الجلفة وليت كي نهدر مع عايلتي نستعمل الكلمات العربية الفصحى هههه حتى يبقاو يستناو في بقية الحديث

و تامني بربي؟ حتى انا ننخلع نقول ياا كيفاش قلتها بالفصحى

ان شاء الله نزيد نتعلم معاكم الفصحى

[zokhrofa]

المشاركة الأصلية كتبت بواسطة كريمة الجزائرية 48

اخت شمس انا انغرست فينا هاذي الهدرسة والدليل في كلامك ميساجات (رسائل) هههههههههه انا تاني كيما هاكا الهدرة هاذي لازم من الصغر ماشي حت نكبرو ومتنزعفيش غير نزعق معاك

هههه تامني حتى انا قريتهم و جاتني عادي ميساجات كلي ماشي كلمة فرنسي

ربي يثبتنا

[muhibbat rrasoul sws]

المشاركة الأصلية كتبت بواسطة zokhrofa

هههه تامني حتى انا قريتهم و جاتني عادي ميساجات كلي ماشي كلمة فرنسي

ربي يثبتنا

صدقت الأخت زخرفة

أنا كذلك تعلمت الكثير من الكلمات الفصحى في مجالات الطب و الطبخ و تذكرت ما نسيت، و و الله صرت متمكنة أكثر في العربية يا حسراه، حتى كييي نهدر ننسى الكلمات اللي كنت نستعملها فطريا بالفرنسية و نحس الناس اكثر اهتماما و إصغاء.

[muhibbat rrasoul sws]

المشاركة الأصلية كتبت بواسطة سحابة باردة

مساء الخير موضوعك هادف وجميل
ههههههه ضحكتيني على الصيصان والبوش ادوي ياختي

المشكل اللذي تطرحينه قديم ولا ينحصر في المطبخ فقط بل في كل كلامنا وتعاملاتنا اليومية

وسبب معروف نحن بلد استعمر اكثر من قرن فطبيعي اختلاط اللغة وتاثيرها على الشعب عامة

ونا معاك لغتنا غنية ولا تحتاج مصطلحات اجنبية نغنيها بها ولاكن للاسف صعب نغير من كلامنا فجأة

شكرا لطرحك المميز

وان كنتي من محبي الكلام العربي الاصيل يمكنكي زيارة موضوعي في دردشة لشعر والخواطر

شكرا على مشاركتك
نحن استعمرنا لكن الشعب الحزائري بقي محافظ على مقوماته إلى حد ما إلى أن طرد فرنسا فحصار يبحث عنها بالريف الناشف
فرنسا حسب حساباتي لعدد سكان البلاد لما خرجت، قتلت ربع سكان الجزائر في سبع سنوات!

[سحابة باردة]

صح كي راحت فرنسا ولاو يحنو ليها
لازم كل واحد يبدا بنفسه من اجل الحفاض على لغة الاسلام
فنحن بربر عربنا الاسلام وهذا فخر لنا والحمد لله

[zokhrofa]

صح صح هذه حقيقة للأسف الكثير لا يعترف بها

[روعة الصحراء]

صح عندك الحق حضرت مرة في خطبة الجمعة وقال الامام كي تتكلمو بالعربية وتكتبوها بالفرنسية هذا اعتداء على اللغة العربية واعتداء على لغة القران اللغة العربية لازم نحافظو عليها ربي يهدينا وشكرا ليك