*****حلويات بسيطة من مطبخي ....نتمنى يعجبوكم - الصفحة 12

اسمهان79 · 2015-07-12, 02:22

السلام عليكم ورحمة الله وبركاته
احلى سهرة لكل الاحباب وصحى رمضانكم اجمعين
راني عارفة بلي مانيش فنانة في القاطو بصح حبيت نشارككم حلوياتي البسيطة ونتمنى تعجبكم
بسم الله
اول حلوة هي حلوة الطبقات

ثاني حلوة تاغتولات بلاكرام فغونشيبال

المقادير
العجينة
400 غ زبدة ستار
كاس كوكاو مرحي رطب
نصف كاس كاكابيجو(حلوة الترك)
نصف كاس نشاء
كاس سكر رطب
فنجان نتاع تاي عسل
2بيضات و2 صفار
نصف باكي خميرة الحلويات
3 م ك كاكاو
1 فاني
فرينة
كريمة النتيلا للتلصيق
كمية من نيسلي كاراميلزي
كمية من نتيلا
كمية من الكاكا بيجو
شوية عسل
التحضير
نخدم الزبدة مليح باليد ثم نضيف السكر والنشاء ثم البيض
ومن بعد باقي المقادير ونلم بالفرينة نغطيها ونخليها ترتاح شوية
ثم نطرح بالحلالة من الأفضل نغطيها بورق بلاستيكي ونطرح ونقطع بطابع مستطيل مثل اللي في الصورة

نطيبهم على درجة 180 درجة ونخليهم يبردو
في هاذ الوقت نحضر كريمة التلصيق وهي نتيلا ونيسلس كراميلزي والعسل والكاكبيجو ثم نلصق الحبات مع بعض

نعمل ثلاث طبقات مثل الصورة

نخليها تجف

ثم نذوب الشوكولا في حمام مائي نضيفلها شوية زبدة ثم القليل من القهوة السائلة يعني تكون طايبة راح تعطيها لون رائع ويلمع شوية حليب سائل ونحرك مليح ثم نغلف الحلوة نتاعنا

نعمل بالست حبات ونحط ثم الجوانب في الكوكاو مرحي بقشورو وهكذا حتى نكمل

لما تجف شوية نعمل خطوط من نفس الشوكولا ولما تجف نرش شوية ملمع
وهي ليكم ساهل بنين والله يحمر الوجه صراحتا

تاغتولات بلاكرام فغونشيبال
العجينة

200غ صول او لابال او ستار
125 غ سكر رطب
2بيض
فاني 1 خميرة الحلويات
فرينة
الحشوة
كرام فغوشبال
وهي

125 زبدة
125 سكر رطب
2 بيض
125 لوز مرحي بقشورو
50 غ فرينة
فاني زاست قارص اختياري
مقادير الحشوة كلها نخلطها بالباتور مليح

كرام فوندو

250 غ فوندو
200غ زبدة
3 م ك كاكاو
ونخدمهم ايضا بالباتور مليح
نضرب الفوندو مليح بالباتور مع الزبدة والكاكاو حتى يتجانس الخليط كلو مليح
التحضير
نخدم الزبدة مليح باليد ثم السكر البيض الفاني والخميرة ونلم بالفرينة
نخليها ترتاح مدة ثم نعمر بيها ليكيسات نتاع لحديد لما نخلص نعمرهم بالحشوة تاع الكرام فغونشيبال

نطيبهم على درجة 180

نخليهم يبردو ثم نزينهم بلاكرام فندو بواسطة لابوش ادوي نعمل وردات صغار ونرش شوية ملمع
وما تخافوش من هاذ الكريمة راح تيبس عادي وتبقى تبرق

راهم بنان بزاف جربوهم وردولي الخبر
نتمنى يعجبوكم
في امان الله حبيباتي