للي طلبو مني وصفة المورانغ الناجحة 100/100

doudou belle · 2013-08-26, 18:53

مساء الخير عليكم بنات اني جيت و جبتلكم وصفة المورانغ الناجحة من مطبخنا هي وصفة مجربة و ناجحة يعني تجيك خفيفة و بنينة و رايعة و ممكن حتى أحسن ملي تنباع. ههههههههههههههههههههه حوحو يشكر روحو هههههههههههههه
أيا نخليكم مع المقادير:
اولا تجيبي بياض 2 حبات بيض يكونو بحرارة المطبخ تحطيهم في صحن و معاهم قرصة ملح و تضربيهم بالباثور مليح فوق حمام مائي و الماء تاعو يكون فوق نار هادية و توجدي من قبل المقادير التالية: كاس سكر رطب +ربع كاس سكر عادي يعني حرش + 2 ملاعق أكل نشاء تغربلي الكل و توجديهم في صحن و كي يطلعلك البيض مثل الثلج تصبي المزيج المغربل دفعة واحدة و تواصلي الخلط بالباثور فوق الحمام المائي و كي تحسي المزيج سخن نحيه من فوق النار و كملي الخلط بعيد عن النار حتى يذوب السكر مليح و تحسي الخليط جمد مليح . حطي المورانغ تاعك في الثلاجة تبرد حوالي 10 دقائق و من بعد حطيها في لابوش تاعك (كيس الحلواني) و شكليها فوق ورق الطهي لأنو رايع و يسهلك و ميلصقلكش المورانغ و حطيه في الكوشة ولا الفور تاعك لي متسخنيهش بزاف من قبل يعني اهم شيء في المورانغ طهيها يعني كي تقربي توجدي كامل البلا تاعك شعلي الفور حوالي 5 دقائق فقط على درجة حرارة 100 درجة مئوية فقط لاأكثر و لا أقل لمدة ساعة كاملة من بعد ما تفوت الساعة شوفي المورانغ تاعك تلقايها طابت خليها في الفور تبرد حوالي ربع ساعة حتى نصف ساعة و اجبديها و قدميها و اتمتعي ...
و نخليكم مع الصور

ايا بصحتكم كامل و نتمنى تعجبكم و تردولي الخبر لأنو و الله وصفة مضمونة بإذن الله. ايا بالسلامة و ادعيوليييييييييييييييي