عندما يحرم الإنسان من نعمة الأبناء -حكاية ولد عمي-

[mouadezzine]

السلام عليكم ورحمة الله وبركاته
بعدما لقيت منكم تجاوب كبير مع حكايتي في هاذ المنتدى، حبّيت هاذ المرة نحكيلكم على ولد عمي ومشكلتو مع الإنجاب.
ولد عمي هذا تزوج من 10 سنين تقريبا من الفتاة اللّي حبها، وتمناها تكون ليه من صغره. دار عرس كبير وعرض كامل حبابه وصحابه وbien évidemment أهله وجيرانه. كانت أمنيته أنه يكون أب ويربّي ولاده التربية الصالحة ويقرّيهم باش يجعل منهم ناس صالحين في المجتمع، ولكن حلمه بدا يتبخّر بالشويّة وبدات حياته تتبدّل من سعادة وهناء إلى حسرة وشقاء. كانت أمنيته أنه يولد عنده طفل يجعل لحياته طعم ومعنى، ولكن الله سبحانه قدّرله أنه يكون عقيم وماينجبش الاولاد...

كان ولد عمي كل ما يشوف طفل صغير مع باباه يبكي ويتحسر. يتحسّر لأنه تّحرم من نعمة كبيرة ناس بزاف متمتعين بيها. كان قلبي يتقطّع كي نشوفه على هذاك الحال. كنت دايما نحاول نصبره ونواسيه، ونأكدله أن ربي يالاك حاب له الخير وبعّد عليه الشر عندما حرمك من الاولاد. كنت نحاول دايما نقنعه بالاك لو رزقه ربي بيهم يكونو عايقين أو فاسدين، ويكرهوله حياته ويندم على اللحظة اللي فكّر فيها أنه يكون أب. ولكن كان دايما يقللّي "اللي يده في الما ماشي كي اللي يده في النار" و"ما يحس بالجمرة غير اللي عافس عليها" صراحة أوقات يعجز لساني على الكلام كي نشوف الياس في عينيه والحسرة تقطع في قلبه. ربما عنده الحق، أنا ما جربت ماعلابالي، وأكيد مانقدرش نحس بالشي اللي يحسّه هو...

بعدما انتظر مدة من الزمان، قرّر ولد عمي أنه يزور الأطباء ويفحص نفسه لعلّه يلقى العلاج الشافي لحالته، وكان في كل مرة يتناول الدوا ويدير les analyses، ولكن بغير فايدة. الله غالب، قدّر الله وما شاء فعل.. في ذاك الوقت كْحالت الدنيا في وجهه لأنه ماكاش يتصوّر أنه راح يكون بلا اولاد ويتّحرم من كلمة بابا للأبد. ولكن مع مرور الوقت بدا يوالف ويتعوّد على وضعه، خاصة أنّ زوجته كانت راضية بمكتوبها وصابرة على حالها...

حاولنا كامل معاه باش يسعى للمستشفيات لعلّه يصيب bébé يربّيه ويعمّر عليه داره. والحمد لله ربي ماخيبوش، ولقى الطفل في وقت قصير... وهكذا بدات حياته تزهى من جديد كأنه عريس جديد... الطفل الآن صار عنده 3 سنين، وtellement ولد عمي متعلّق بيه بزاف صار يخرج معاه في كل وقت ولأي مكان. وصار كل من يشوفه الآن وهو على هاذ الحال فرحان ومبسوط يكذّب أنه كان في وقت سابق ناقم من حاله وكاره حياته...

سبحان مغيّر الأحوال.

هذي حكاية ولد عمي حكيتهالكم حتى نعتبرو، وناخذو منها درس يفيدنا في حياتنا.

كل ما يقدّرهولنا ربي أكيد فيه خير

تحيات أخوكم معاد
............
الله يفارقنا بلا ذنوب

[انغام المنى]

ربي يرزقو وكل محروم من الذرية الصالحة يا رب

[هيام الريحان]

ربي يرزقو ان شاء الله ويحفظلوا لbébé ويكبروا في طاعته ويفرح بيه عريس ان شاء الله

[مريم الصابرة]

السلام عليكم اخي معاذ
جمعة مباركة كيف حال الوالدة إن شاء الله بخير
والله أخي وليد عمك مر بازمة ومن حقو ماشي بالساهل الراجل لما يتزوج بمرا يكون ناويها ويفرح الآتي إنو يستنى اولادو وماشي بالساهل يتقبل الراجل إنو ما يرزقش بأولاد ممكن وليد عمك لو عرف المشكل فيها ومدى تعلقو بالأطفال اكيد كان راح يتزوج عليها ولكن بما إنو عرف المشكل فيه ونحييو زوجتو لانها صبرت معاه وهذا حال كثيرات من الزوجات
العلم تطور كثيرا ولو سعى اكثر وهناك بيت الحكمة وما رايته انا هناك من تجارب حقيقية هناك من رزقو باولاد بعد اكثر من 15 سنة زواج من يدري
ولكنه تكفل بطفل وهذا يكفي ان يكون عند الله عظيم قد يشاء الله أن يرزق بأولاد وهذا ما حدث مع احد معارفي بعد ان تكفل بتيم وكانت مرت سنوات كثيرة على زواجه ولم يرزق بأولاد بعدها رزق بتوأم ماشاء الله والطفل اليتيم بالنسبة له اهم من ولديه الحقيقين إن الله إذا أعطى أدهش
الحمد لله الطفل عمر فرحو وممكن يرزق بأولاد او يتكفل بطفل آخر سيكونا سبب دخوله الجنة
شكرا لك

[مسلمة انا]

ماشاء الله بالاك هذا الفل يكون له خير من اي ولد يكون من صلبه

اخي كيفاش جاب الطفل يعني يتيم ام من الاطفال المتخلى عنهم في المستشفيات وهل كانت الاجراءات سهلة؟؟

[عبد الرؤوف24]

السلام عليكم ورحمة الله وبركاته
بامكان الشخص ان يحول النقمة الى النعمة بالايمان

[mouadezzine]

المشاركة الأصلية كتبت بواسطة انغام المنى

ربي يرزقو وكل محروم من الذرية الصالحة يا رب

آمين يارب العالمين
نشالله واحد ما يحرمه ربي من نعمة الأبناء
بارك الله فيك ختي انغام
.........
الله يفارقنا بلا ذنوب

[mouadezzine]

المشاركة الأصلية كتبت بواسطة هيام الريحان

ربي يرزقو ان شاء الله ويحفظلوا لbébé ويكبروا في طاعته ويفرح بيه عريس ان شاء الله

آمين يا رب العالمين
هو ثاني دايما يدعو ربي باش ينجح في تربيته ويشوفه في يوم ما عريس.
الله يرزقنا جميع بالذرية الصالحة
.............
الله يفارقنا بلا ذنوب

[mouadezzine]

المشاركة الأصلية كتبت بواسطة مريم الصابرة

السلام عليكم اخي معاذ
جمعة مباركة كيف حال الوالدة إن شاء الله بخير
والله أخي وليد عمك مر بازمة ومن حقو ماشي بالساهل الراجل لما يتزوج بمرا يكون ناويها ويفرح الآتي إنو يستنى اولادو وماشي بالساهل يتقبل الراجل إنو ما يرزقش بأولاد ممكن وليد عمك لو عرف المشكل فيها ومدى تعلقو بالأطفال اكيد كان راح يتزوج عليها ولكن بما إنو عرف المشكل فيه ونحييو زوجتو لانها صبرت معاه وهذا حال كثيرات من الزوجات
العلم تطور كثيرا ولو سعى اكثر وهناك بيت الحكمة وما رايته انا هناك من تجارب حقيقية هناك من رزقو باولاد بعد اكثر من 15 سنة زواج من يدري
ولكنه تكفل بطفل وهذا يكفي ان يكون عند الله عظيم قد يشاء الله أن يرزق بأولاد وهذا ما حدث مع احد معارفي بعد ان تكفل بتيم وكانت مرت سنوات كثيرة على زواجه ولم يرزق بأولاد بعدها رزق بتوأم ماشاء الله والطفل اليتيم بالنسبة له اهم من ولديه الحقيقين إن الله إذا أعطى أدهش
الحمد لله الطفل عمر فرحو وممكن يرزق بأولاد او يتكفل بطفل آخر سيكونا سبب دخوله الجنة
شكرا لك

وعليكم السلام ورحمة الله وبركاته
في الحقيقة ولد عمي تقاس بزاف ختي مريم، خاصة إذا تكلم واحد قدامه على الاولاد أو شاف أب فرحان بولده...سبحان مغيّر الأحوال، كي نشوفه ضرك ونتفكر كيف كان قبل نكذّب. والله لحق وقت كره حياته كامل لولا لطف ربي و وقوفنا بجانبه، خاصة زوجته اللي بقات شادّة فيه وماتخلاّتش عليه. في الحقيقة زوجته جوهرة وأمثالها قلال. ربما مثل ما قلتي لو كان المشكل فيها ربّما يتزوج عليها وعندها كامل نقولو عنده الحق. المهم هو الآن راهو متلهي مع وليده وماراهوش يفكّر كامل في زيارة الأطباء من جديد. خليني نقلّك راهو الآن يفكر يزيد يسعى ربما يحصل على طفل ثاني يتكفل بيه.
بارك الله فيك ختي مريم أنك تسألي على الوالدة الحمد لله المورال تاعها راهو طالع خاصة أن الطبيب اللي يتبع فيها راهو يطمّن فينا.
ربي يسترها معاك ختي لعزيزة ويفرّجها في وجهك ويعطيك ماتتمنّاي.
............
الله يفارقنا بلا ذنوب

[mouadezzine]

المشاركة الأصلية كتبت بواسطة مسلمة انا

ماشاء الله بالاك هذا الفل يكون له خير من اي ولد يكون من صلبه

اخي كيفاش جاب الطفل يعني يتيم ام من الاطفال المتخلى عنهم في المستشفيات وهل كانت الاجراءات سهلة؟؟

السلام عليكم
والله كلامك يقدر يكون حقيقي وصحيح ختي مسلمة
من يدري ربما الأبناء اللي نتبنّاوهم يكونو خير من اللي نولدوهم.
بالنسبة لسؤالك
الآن ماعندي أيّ فكرة على الموضوع، ولكن رايح نسأل ونجيبلك الخبر.
ربي يعطيك ما يرضيك ويسعدك بالذرّية الصالحة.
...............
الله يفارقنا بلا ذنوب

[mouadezzine]

المشاركة الأصلية كتبت بواسطة عبد الرؤوف24

السلام عليكم ورحمة الله وبركاته
بامكان الشخص ان يحول النقمة الى النعمة بالايمان

وعليكم السلام ورحمة الله وبركاته
عند الحق خويا لعزيز
المشكلة عندما يكون إيماننا ضعيف، وما نقدروش نواجهو مشاكلنا وهمومنا.
والحمد لله ولد عمي لقانا بجانبه ولقى خاصة زوجة أكثر من رايعة قدرت تعينه على تجاوز تلك المحنة.
شكرا على المرور خويا عبد الرؤوف ونشالله يرزقك ربي بالذريّة الصالحة
...............
الله يفارقنا بلا ذنوب

[aouniak]

انا متزوجة من 6 سنين ومازال مارزقنيش ربي العالمين راني نحاول بصح راضية وديما نقول الحمد لله الصبر والرضا برحمة الله هما اجمل سلاح في الحياة

[mouadezzine]

المشاركة الأصلية كتبت بواسطة aouniak

انا متزوجة من 6 سنين ومازال مارزقنيش ربي العالمين راني نحاول بصح راضية وديما نقول الحمد لله الصبر والرضا برحمة الله هما اجمل سلاح في الحياة

السلام عليكم
حكايتك أثرت في أستاذتي
وخايف نكون حطيت صبعي على جرحك بدون قصد
نشالله ما يخيبكش ربي مادامك شادّة فيه
ربي يعطيك ما تتمنّاي
ويرزقك بالذرية الصالحة يملاو عليك دارك وحياتك.
آمين يا رب العالمين
........
الله يفارقنا بلا ذنوب

[oum imane83]

وضعت يدك على الجرح اخي بطرحك لهاد الموضوع ...............

ربي يرزق كل محروم ويعوض ايام صبره بكل خير ... نعمة الدرية يحس بها اكثر فاقدها ... ربي مايحرم حتى زوجين ..الم الي يعيشوه كبير وعميق وكيما تفضلت مايحس بالجمرة غير الي كواتو ... ووليد عمك الحمد الله ربي من عليه بيتيم رباه من جهة ينال اجر كبير عند ربي ومن جهة اخرة يعمرلو دارو .. ربي يجعل هداك الطفل من الصالحين والبارين ويكبر على الطاعة

[mouadezzine]

المشاركة الأصلية كتبت بواسطة oum mane83

وضعت يدك على الجرح اخي بطرحك لهاد الموضوع ...............

ربي يرزق كل محروم ويعوض ايام صبره بكل خير ... نعمة الدرية يحس بها اكثر فاقدها ... ربي مايحرم حتى زوجين ..الم الي يعيشوه كبير وعميق وكيما تفضلت مايحس بالجمرة غير الي كواتو ... ووليد عمك الحمد الله ربي من عليه بيتيم رباه من جهة ينال اجر كبير عند ربي ومن جهة اخرة يعمرلو دارو .. ربي يجعل هداك الطفل من الصالحين والبارين ويكبر على الطاعة

السلام عليكم
آمين يا رب العالمين
معاك حق ختي
ما يحس بالجمرة غير اللي عافس عليها.
أكيد كاين من راه صابر على بلاه
ولكن أنا متأكد أن معظم المحرومين من الذرية راهم يتألمو في صمت
ويدعو الله أنو يفرج عليهم.
ربي يفرج على الجميع
ويرزقهم الذرية الصالحة يا رب العالمين
........
الله يفارقنا بلا ذنوب