خسرت وظيفة احلامي

[مشكلتي]

انا فتاة الان 30 سنة عندما كنت 25 سنة في عام 2017 وجدت وظيفة احلامي في شركة في بيرو كنت سعيدة جدا خدمت فيها 9 اشهر ثم زكني المدير
بحثت صيف كامل و انا نحوس على خدمة كنت نحوس كل يوم في كل مكان حتى رزقني ربي بيها خيرني ناءب المدير ما بين 15 واحد حطو السيفي
بديت نخدم و درت عدة اخطاء اولها مع السكريتيرة اللي كانت حتعلمني معلبليش لاه درت مشكل معاها ولات توقفت و قاتلي منعلمكش و قالت لناءب المدير اديها علي و انا كنت نعاود في الباك في 2017 على جال معدل الطب كنت من قبل درت 4 باكات و لم اصل لمعدل الطب وكنت نقرى للباك في الخدمة و شافني ناءب المدير عدة مرات و حذرني و انا استمريت نقرى ثم و هذا الخطاء الثاني ...وصلت للباك مدلي المدير 17 يوم رحت عقبت فيهم الباك ...و مبعد خرجت نتيجة الباك جبت معدل 14 جاتني صدمة كنت حاطة حنجيب 17المعدل لم اصل لمعدل الطب مرة اخرى و دخلت في اكتءاب حاد كنت اريد الهرب لاي مكان خاصة انو عام كامل و انا اجتهد و كان عندي مشاكل عاءلية خطيرة تعرضت لظلم عظيم و مبعد كنت متابعة صفحة في الفيسبوك تاع الباك دارو اعلان على مخيم علمي ترفيهي في تونس انا كنت غير ناضجة ابدا مع انو كان عمري 25 لكن عقليتي تاع صغار كي شفت مخيم فيه نشاطات ...الخ قلت نروح ليه و فعلا سجلت و كانت اخر دورة للمخيم و كان جواز السفر تاعي مهوش واجد دفعت 2 ملاين به يخدموهولي بسرعة ...وصل اخر يوم يعني اليوم اللي يبدى فيه المخيم رحت نخدم من 8 لل5 على 12 رحت للداءرة لقيت بللي الباسبور وجد فرحت جدا و مبعد وليت للخدمة و على 5 قلت للمدير اني رايحة نغيب 5 ايام فقط مقتلوش اني رايحة لتونس قتلو اني رايحة نخدم وراقي تاع دارنا قتلو عندي ظرف عاءلي طارىء قالي لا متروحيش عندنا خدمة بقيت نحاول فيه ربع ولا نص ساعة قالي لا متروحيش محبش طول و مبعد خرج و خلاني و انا ثاني خرجت و عيطت لناءب المدير قالي اذا رحتي متوليش وقالي ثاني اني مبعد نهدر معاه يقلبك ...انا رحت للدار جبت حوايجي و قلت لامي راه قلقني المدير و مخلانيش نغيب قاتلي روحي لتونس و خليك منو ...مبعد رحت لقسنطينة وصلت في المغرب كانت طاحت الظلمة ركبت مع مدير المخيم في السيارة مبعد عيطتلي اختي و قاتلي وين راكي رايحة اكي مدرتيش ملادي في الخدمة قاتلي ولي مبعد قلت لمدير المخيم اقلبني محبش يقلبني لانو كان يحوس على صوارد التسجيل اللي هوما ربع ملاين وصلنا للحافلة اتصلت بامي قاتلي روحي خليك من هدرت اختك مبعد خلاص كنت في الحافلة و طاحت الظامة يعني مستحيل نرجع ...رحت للمخيم بقيت 5 ايام عقبتهم اسوء خمس ايام في حياتي لاني كنت وحدي مع بنات منعرفهمش و كامل كان يقراو طب و غرقت في البحر قريب مت ...المهم رجعت لولايتي وليت للخدمة لقيت المدير حبسني من خدمتي قالي قتلك متغيبيش و غبت راكي تدفعي في الثمن الان ...

كنت نسلك 3 ملاين و نصف خبيتهم لميت شوي صوارد صرفتهم كامل ...الان عقبو خمس سنوات مللي زعكني من خدمتي و انا نبكي عليها في كل لحظة مقدرتش ننساها طول ...نقول كان مزعكنيش منها كان شريت سيارة و درت السكنة و شريت القش و صدقت ...الخ و الان معندي والو و وليت للفقر

اللي نقلو يقلي ربي شافلك فيها شر عليها نحاهالك لكن انا مقدرتش ننساها مهما قالولي راني نتعذب
و نضال نلوم في روحي لان المدير قالي متغيبيش و انا غبت ...و ثاني لم ارضى لان ربي نحالي معدل الطب و مدلي في بلاستو الخدمة لكن انا اصريت على معدل الطب عليها خسرت خدمتي

الان ...هذو الخمس سنوات اللي عقبو عقبتهم غير في المشاكل العاءلية الخطيرة درت مدرسة عليا في دذاير و مكملتهاش و خدمت خدمة اخرى 5 اشهر و حبستها
الان ملقيت حتى خدمة اخرى عندي غير ليسنس انجليزية ...لقيت خدمة في وزين عمل يدوي ب 18 مية برك السلاك و متعبة جدا و عبادها يقلقو ...مكان حتى مقارنة بينها و بين خدمتي فرق بين السما و الارض

خدمتي كنت احبها كثيرا ...لاه نحاهالي ربي .............كيف انساها ...و ماذا افعل ارجوكم ؟ ....هل نخدم في وزين ولا نبقى غير في الدار نبكي عليها ؟؟؟؟؟؟؟؟؟

[نورسين.داية]

السلام عليكم



من خلال هذه الأحداث المتتالية ألم تدركي القاسم المشترك بينها ؟
تعلمين ما هو ؟ هو القرار الخاطئ بإختصار .
وظيفة أحلامي ، ما هي وظيفة أحلامك ؟ الطب أم الإدارة ؟؟؟
لا أدري ما هو العلم الذي آثرت السكرتيرة أن تعلمه لكي هههههههههههه أضحوكة علاش السكرتيرة واش تعرف هي أصلا ؟؟؟

خمس سنوات تشتري بها سيارة بديبلوم لغة أنجليزية ......؟؟؟؟
علابالك القصة غير منطقية .
نقصي شوية الأفلام التركية .....

[نافعة(=]

قال الله تعالى:
((فأما الإنسان إذا ما ابتلاه ربهفأكرمه ونعمه فيقول ربي أكرمن وإما إذا ما ابتلاه فقدر عليه رزقه فيقول ربي أهانن.. كلا))

قال الله تعالى : كلا

ربي حكيم
واحنا مناش راضيين على ربي
يبتلينا ربي بش يشوف صبر تاعنا
واحنا جاهلين
يا ليت نستغفرو ونتوبو

ربي هو لي يمد وهو لي يمحي

ادعي ربي يرزقك هناء البال والجبر
سواء مدلك خدمة ولا ممدلكش ادعيه يرزقك طيب الخاطر

وهكذا تتهناي ومتعودش حكاية الخدمة تقلقك

[غصن البآن]

للأسف الحكاية كلها ماقدرتش نصدقها او نستوعبها لذلك وحتى لا أقع في خانة التجريح نقولك ربي ييسر أمور كل مسلم ويهديك للصواب .

[Samira wahrania]

ربما خير ان شاء الله ربي يعوضك بما هو أفضل

[حورية تو]

أنت لم تخسري وضيفتك بل خسرت ذاتك أيضا،لم افهم لما كل هذه السوداوية،أنظري إلى الأمام اختي فالحياة لا تتوقف في خسارة ما، الحياة تتوقف لما تموتين فقط

[kazilo]

متبقايش تلومي في روحك
ديري اي مشروع او ديري بارا ميديكال تلقاي بيها الخدمة
ديري دروس الدعم للولاد
ادفعي فالمدارس الخاصة وقري دروس الدعم
عاودي ارجعي للخدمة هديك ادفعي فيها سيرة بلاك يعيطولك