🌻🌻رمضان على الابواب زلابية لسهراتكم من مطبخي 🌻🌻

[حياة نور الدين]

السلام عليكن

حبيباتي بما انه شهر رمضان الكريم على الاابواب جربت اليوم وصفة زلابية شفتها في النت والنتيجة كانت هايلة ولكن الحكم





نحتاج مقادير بسيطة
كاس فرينة ، كاس سميد رطب ، كاس ونصف ماء دافئ، ملعقة كبيرة ماشي معمرة مليح خمارة الخبز، زوج مغارف زيت ، ملون او زعفران كمية قليلة وقرصة ملح،
عسل وزيت للقلي



نخلط كل المكونات مع بعض نضربها بالباتور او البرا او البلاندر نتحصل على عجينة كما تع البغرير نخليها ترتاح ربع ساعة نهبطلها الخمور ونعمرها في قرعة ازيس فارغة ومغسولة او في قرعة تع مايونيز



نحط 6 ملاعق كبار زيت يسخن على نار هادئة ونشكل الزلابية تاعنا ونخليها طيب كي تحمار من جهة نقلبها على لخرى كي طيب ننزعها ونعسلها مباشرة

تنبيه

العسل يكون بارد وثقيل معنتها لا اضافات

الزيت في المقلة قليل منكثروش

متخلهاش اكثر من ربع ساعة لانها ادا طولت ترجع بغرير هههه

نضغط على القرعة اللي فيها العجين بقوة ونشكل

تقدروا تستعملوا لابوش بلادوي الصغيرة الفكرة نبهتني لها حبيبتي ريمة

[البدرية]

اللهم بارك سلمت يداك أختي حياة ربي يحفظك تبان تشهي ندي الطبسي ونهرب بيه

[RIMA.87]

و عليكم السلام و رحمة الله و بركاته
ما شاء الله لا قوة إلا بالله ،
زلابية رووووووووووووعة ،
ربي يبارك فيك و جزاك الله خيرا و جعل هذا المجهود في ميزان حسناتك

[حياة نور الدين]

المشاركة الأصلية كتبت بواسطة البدرية

اللهم بارك سلمت يداك أختي حياة ربي يحفظك تبان تشهي ندي الطبسي ونهرب بيه

بارك الله فيك اختي بدرية على كلامك والطبسي بصحتك ههههه

المشاركة الأصلية كتبت بواسطة rima.87

و عليكم السلام و رحمة الله و بركاته
ما شاء الله لا قوة إلا بالله ،
زلابية رووووووووووووعة ،
ربي يبارك فيك و جزاك الله خيرا و جعل هذا المجهود في ميزان حسناتك

اهلااا بالغالية ريمة بارك الله فيك على مرورك يا ابتها النسمة الدافئة هكا نحسك وربي يجازيك خير

[سحابة باردة]

ماشالله ربي يحفضلك ذوك اليدين جاتك هايلة
حسينا ببنة رمضان معاك
يعطيك الصحة حياة شجعتيني نجربها في الدار

[سَامِيَة]

الزلابية تساوي تجاااااااااارب فاشلة وكنت رايحة نحي إمكانية تجربتها هاد رمضان لكن ولا يهممممممممك راح نجرب هاد الوصفة لعيونك حياة ياااااا متواضعة المنتدى.

[RIMA.87]

مشكووورة على كلامك الطيب اختي حياة و تفضلي اعطني رايك في تطبيقي السريع
و الناجح لاحلى زلابية ،ربي يحفظك و ينور دربك ،
حقيقة و دون مجاملة جات روووعة و العايلة عحبتهم و قالولي ما نزيدوش نشرو الزلابية،و جات تقرمش كيما نحبها ،
و نقولك اني استعملت الكيس الحلواني بالقمع الرقيق ديالو و درت ملون طبيعي لي هو قليل من ماء البيطراف
و على فكرة اول مرة نتجرأ و نجربها ،كنت نتخوف منها لكن غير حطيتي موضوعك توكلت على الله و جربتها لان مقاديرها بسيطة و زيد جربت بكاس الصغير تاع الموتارد.
و الحمد لله النتيجة كانت مرضية.





في أمان الله

[عطر و مطر]

يعطيك الصحة الاخت ان شاء الله نصومو بالصحة و الهنا

[روان دينا 27]

الله يبارك اختي خرجتلك روعة شهيتيني لانو نبغي الزلابية بزززززززززززززززاف

[أمنية غفران]

ربي يحفظك حيوتة والله غي عجبتني بزاف يا طفلة خرجتلك حاجة فور ان شاء الله نجربها و عينيا مغمضين راني دونتها في دفتر اوناستونس

من فضلك كي يكون عندك شوي وقت ديريها لينا بهاد العفسة نتاع الكولاج باش نحتفظو بيها في الهاتف

مشكورة و دمتي متألقة حبيبتي و لكي مني أحلى تقييم

ان شاء الله الموضوع يثبت

[ام رضوان]

بارك الله فيك ياطيبة
خرجتلك هايلة
راح نجربها باذن الله
شكرا

[بيلسان91]

حياة مرسي على الوصفة بربي نشالله نجربها
جربت تع ام وليد رمضان لي عدا مصلحتليش

[أثيلة]

السلام عليكم
يامييييييييي تهبل تهبل تهبل شطوووووووووووووورة الله يبارك على دوك اليدين جاتك فوووووووووور يعطيك الصحة محبوبتي
راح نجربها اكيد

[ام و ابنة]

امممم حويتة ازربي طيحي بحبة و الله سخفتيني بصحتكم و ربي يباركلكم
تبان هايلة سيرتو كي فيها السميد
و عجبوني النصائح كثريلنا منهم خخخ
حقا منبعد قوليلنا كي تطول او تبات كيفاش ترجع

[oumelabedmh]

ماشاء الله تشهي ان شاءالله كي نجربها نقولك في الكوزينة