لي تارت تاع عيد ميلاد تاجو حبوبي تفضلن

[أم محمد تاج]

اللهم صلي وسلم على الحبيب المصطفى وسلمه تسليما

حبيباتي بمناسبة عيد ميلاد حبوبي تاجوووو قفل خمس سنوات عملتلو هاذ الزوج كيكات وهو يحب سبونج بوب ويحب القطارات ففاجأتو وفرح مووووووووت الله يحفظهولي ويطول في عمرو ويصلحهولي مع اخوووه يارب
حطيت لي تارت في الكوزينة ونظرا لطلب الحبيبات ورفيقات الدرب على الطريقة قلت نحطهم للفائدة العامة بصح خسارة ماصورتش المراحل كنت على اعصابي وخفت مايطلعوش ملاح
مانطولش عليكم نحط الصور ومبعد نحط الطريقة تاع لي تارت في زووووووج

مشاهدة طيبة

نبداو على تارت سبونج بوووووووووووووب معشوق الاطفال حتى انا نموووت عليه هههههههه





تارت قطااااااااااااار الحلويااااااااات ممممممممممممم







وهنا بعض التحضيرات







حبيباتي اذا عجبوكم فقط دعاء بصلاح ابنائي والرحمة والمغفرة لحبيبة قلبي أمي الغالية

انتظرن الوصفات

طريقة تحضير تارت سبونج بوب:
حبيباتي بالنسبة للكيك انا استعملت مسكوتة عادي وانت تقدري تستعملي جينواز او مسكوتة لي معتامدتيها وهاي ليكم مسكوتتي السهلة البسيطة
4 بيضات كاس متوسط سكر رشة غاني ورشة ملح نخبط مليح حتان يطلع الخليط ويثقال نزيدلهم باطة ياؤورت وزوج مغارف زيت وباكي خميرة ونص كتس نشا وكاس غير شوي فرينة
ندهن المول يكون مستطيل ونحط المسكوتة تاعي طيب

نزيد نحضر مسكوتة بالكاكاو نفس المقادير والطريقة غير نحي مغرف كبيرة من النشا ونزيد نحي مغرف كبيرة من الفرينة ونعوضهم كاكاو
كي يطيبو المسكوتات تاعنا ويبردو مليح نقسمهم عرضيا على زوج يعني يعود عندنا اربع مورصوات زوج بيضاء وزوج سوداء
بواسطة الفرشات نشرب الاجزاء في اربعة مالازمش نسقيهم بزاف راح تعبنا في هزانها كي نكمل السقي نوجد كرام شونتيي
نحط ست مغارف كبار كرام شونتيي ونزيدلها كاس حليب بارد جدا وعلبة فلان ذوق فاني ورشة ملون اصفر ونخبط مليح حتان تطلع ولازم تجي ثقيلة بزاف
نجيو للمونتاج تاع الكيكة:
نفرش بلا بورق الالومينيوم ونحط اول طبقة تاع كاكاو ونحط عليها طبقة وافية من الكرام شونتيي ونزيد نحط عليها طبقة بيضاء والكرام حتان نكمل الطبقات مبعد ندهن الكيكة كامل بالكرام شونتيي ونحطها في الثلاجة ليلة كاملة تحكم روحها ويتخلطو النكهات مممممممممممممم

نحظر عجينة السكر تاعي ونلونها بالوان سبونج بوب واستهلكلي باطة ونصف عجينة التزيين واذا طرية بزاف نزيدلها النشا غير بالشوي وصدقوني وجدتها في الليل وخليتها الغدوة من ذاك لقيتها حكمت روحها روووووووووووعة على عكس لي خدمت بيها بعض الروتوشات
الغدوة من ذاك بديت التزيين
حليت العجينة الصفراء وقصيتها بالموس من اسفل على خاطر مانقدرش نحطها معوجة ومبعد نقص فوق الكيكة راح تفسد
وزدت بنفس الشيء بالعجينة البيضاء والبنية عملت السروال وقميص سبونج بوب
نجيو للوجه الصراحة واعر ويدي الوقت والتركيز وااااااااااااي
رسمت وجه سبونج بوب في ورق شفاف وحليت العجينة البيضاء وحطيت الورق على العجينة الوجه لي مايش مكتوب انتابهو باش مايتخمجلناش من قلم الرصاص وبواسطة الموس تبعت العينين ونحيت الورق وعاودت قطعت الوجه بالموس كامل
والعمل لازم يكون فوق النيلو باش كي تجي ترفدي الاشكال مايقطعوش
المهم عملت نقطة في وسط الوجه وهزيت العينين وحطيتهم على الوجه تهنيت من العينين وزدت الفم بنفس الطريقة
وبواسطة عجينة ملونة بالازرق عملت العين الزرقاء وزدت السوداء
كي كملت كامل الوجه بقى نحوشية بالعجينة السوداء ردو بالكم راهي توسخ واي غلط تخليلك دي تاش وبديت نرقق في العجينة السوداء وعملت الوجه والانف سايرد داير
كي كملت الوجه عملت القرافات وكملت باقي الروتوشات كيما شغتو في الصورة
صدقوني انباهرو الضياف فيها وكي تقصت تشوفو الطبقات والكريمة السخية روووووعة وتخلطو النكهات رووووووووووووووووعة

تارت قطار الحلويات:

الكيك تقدري تستعملي اي كايك معتامداتو والصراحة انا نعمل بتاع الاخت ياراسمين هايل ومانبدلوش ﻻزملنا زوج قولب كايك
كي يطيبو بواسطة السكين نحيو البومباج لي يجي من فوق باش كي نحطو قاطرات القطار يجيو معدولين

نقسم عدد القاطرات كل وحدة كيما تحب الحجم والعدد
كل قاطرة وبواسطة السكين نقطع مربع ونعمل حفرة في كل قاطرة ونخليو وحدة مانعملولهاش حفرة هذيك نرشقو فيها الكوجاك
كي نحفرهم نشربهم بسيرو او عصير فيتا جو ومالازمش نبلهم بزاف
نحظر بلا نغلفو بالالومينيوم وبواسطة شوكولاطة ذايبة نرسم سكة الحديد نخليها تنشف بجيهة
نجيو للكريمة
لكل قاطرة نخبط مغرف كرام شزنتيي بشوي حليب ومغرف فلان مثلا قاطرة الشوكولاطة نعمللها فلان شوكولاطة والقاطرة الوردي نعمللها فلان فراز والقاطرة الزرقاء عملتلها فلان كارامال كي نطلع الشانتيي كل الاذواق نضيف الملونات كل وحدة وذوقها واللون لي تحبو وحتى جنس الاولاد يلعب دور وذوقهم وتاجو حبوبي يموت على اللون الازرق فكثرلتلو الازرق

نبداو بالترتيب القاطرة الاولى نغلفها مليح بالكريمة ونحطها على البلا ونكمل جميع القاطرات وكي نكملهم ونحطهم على البلا نزينهم كل وحدة وذوقها وواش تحب هي واطفالها وهاذوك الحفر لي عملناهم نملؤوهم بالحلويات مممممممممممممم
شوفو البساطة ياعيني ياعيني هههههههههههه

ملاحظات مهمة:
احسن حاجة نطيب الكيكات تاعنا ليلة قبل وكيما تاع سبونج بوب لازم تتغطى بالكريمة بصح تاع القطار نطيبو الكيكة والغدوة من ذاك نديرلها الكريمة والتزيين على خاطر ساهلة

عجينة التزيين اخدموها ثاني ليلة من قبل راح تحكم روحها رووووووووووووعة

عصير السقي استعملت فيتا جو كوكتال خرجت مممممممممممممم ولي عندها السيرو تستعملو

بالتوفيق لكن عمبالي طولت طولت طولت نشالله نكون وفيت وكفيت وتكونو فهمتوني

[أم ياسين الزهراء]

الله يبارك ويحفظ ويصلح ولادك ويجعلهم بارين بوالديهم يااحلى ام ربي يخليك ليهم

ربي يرحم الميمة

[um alaa]

رواااائع حبيبتي ربي يحفضهولك و نشالله يكون من حفظت القران الكريم و ربي يكبرو على الديين و الطاعة

[ام رشدى]

الله يحفضلك وليداتك كامل ويرحم ميمتك ويعطيك ماتتمناي اختي الكريمة

[oum radja]

رووووووووووووووووووووعة ام تاجو ربي يخليلك وليداتك يفرحك كيما فرحتيهم

[cuisineshowdalatifa]

كل سنة و كل حبايبنا بألف خير و ربي يعطيك الصحة و العافية باش تكملي المشوار مع الاولاد و يارب خير خلف لخير سلف

[أم محمد تاج]

والله كلامكم ودعائكم فرحني الله يفرحكم يارب

[tokio hotel]

رووووووووووووووووووووووعة حببتى يعطيك الصحة

[ريتاج تيارتية]

اممممم خرجو توووووووب الله يبارك يعطيك الصحة وربي يحفظلك وليداتك وتشوفيهم ناجحين وصالحين في حياتهم وتفرحي بيهم

[OM DHOHA ANES]

ماااااااااااااااشاء الله راني كتبتلك فالكوزينه طيرتيها لبعل وشيما
ربي يحفضلك وليداتك ويفرحك بيهم ويرحم ميمتك يا سكرة المنتدى

[طالبة النجاحْ~]

روعة روعة ام تاج كل عام وابنك طيب يا رب
ربي يصلحو ويكبرو علي الدين والطاعة يا رب

[أم مروان]

ما شاء الله عليك يا ام تاجو فناننننننننة رب يبارك

[ام نوارة]

مشاء الله عقبال 100 سنة

[fadila34]

ربى يحفضلك ولادك ويخليك ليهوم ويرحم الوالدة يا رب وكل عام وهو بخير وتارت خرجتلك top 44444444444444444

[أم محمد تاج]

الله يبارك فيكم انتن الاروع والله