هل ربنا ليه نعم عليك ؟ كتير ولا مش كتير ؟ متأكد طيب أدخل وشوف !

[قلب متعلق با لله]

بسم الله الرحمن الرحيم

هل ربنا ليه نعمة عليك ؟

طبعاً

طيب ساعات بتفتكرها وساعات بتنساها ؟

للأسف أه !

طيب هل قدرت تعرف كل نعم ربنا عليك ؟ !

من كتر النعم مقدرش أعدها !

طيب تعالوا في الموضوع ده نفتكر ونتفكر ونفكر بعض بنعم ربنا علينا

يعني ممكن يكون ربنا انعم عليك بنعمة وانت عارفها وممكن اكون انا عندي نفس النعمة دي ومش عارفها ! فلما تقولها لي كده بتذكرني بيها

وطبعاً الموضوع هنا مش عشان نعد كل نعم ربنا علينا لانها طبعاً مينفعش نحصيها !

(وَآتَاكُم مِّن كُلِّ مَا سَأَلْتُمُوهُ وَإِن تَعُدُّواْ نِعْمَتَ اللّهِ لاَ تُحْصُوهَا إِنَّ الإِنسَانَ لَظَلُومٌ كَفَّارٌ )

[إبراهيم : 34]

لكننا بنفكر بعض بيها

ومطلوب مننا كلنا كل الي يقول نعمة يقول

هيكون حالنا ايه من غير النعمة دي

ويقول بعد ربنا ما انعم علينا بيها ازاي نشكرها وطبعاً زي ما كلنا عارفين ان شكر النعمة مش باللسان لازم يكون بالعمل زي ما ربنا قال لسيدنا داوود


قال له

(اعْمَلُوا آلَ دَاوُودَ شُكْراً وَقَلِيلٌ مِّنْ عِبَادِيَ الشَّكُورُ )

[سبأ : 13]

فربنا قال اعملوا آل داوود شكراً

ولم يقل قولوا آل داوود شكراً

وممكن واحد يقول نعمة وواحد بعد كده عايز يتكلم في نفس النعمة لكن بصورة تانية ومنظور تاني ..

فمفيش مشاكل احنا بنذكر بعض بالمعاني دي

لو ضربنا مع بعض


يعني مثلاً نعمة الإسلام

وهل الإسلام نعمة ؟

نعم بل انها من أعظم النعم وأتمها

ربنا بيقول :

( الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الإِسْلاَمَ دِيناً )

يعني من تمام نعمة ربنا علينا انه رزقنا بالاسلام !!

هي دي النعمة

تخيلوا لو مكناش مسلمين !

كان زمانا بنعبد خشبة او صنم !

زمانا بنعبد فأر او بقرة !!

تخيلوا أنفسكم من غير إسلام !!

وواجبنا لشكر النعمة دي اننا نحافظ على إسلامنا ونتعلمه صح


وندعوا الناس ليه وندافع عنه ونعمل بيه كاملاً فلا نترك شيء لا يناسبنا ونعمل الي يناسبنا !!

وربنا يديمها علينا نعمة ويرزقنا من فضله ..

ولا شك تذكرنا للنعم دي يقربنا ويحببنا أكتر في ربنا !

لان لما نحس قد ايه خير ربنا ونعم ربنا علينا فلازم نتكسف ونفكر ألف مرة قبل ما نعمل معصية !

وربنا يتوب علينا كلنا

منتظر منكم تذكير بالنعم الي حاسين بيها

حتى ولو كانت بسيطة من وجهة نظرك لازم تقولها لانها لا يمكن تكون صغيرة لانها من ربنا

ها مين هيشارك ؟

</B>

[المعتصمة بدين الله]

مشكورة على هذا الموضوع التفاعلي. كثيرة حقا و لا تحصى نعم الله عز و جل فالحمد لله على كل ما اعطانا.

ما رأيكم في نعمة العافية؟؟؟